استراحة مع اجمل ما كتبة شعراء الشايقية

استراحة مع اجمل ما كتبة شعراء الشايقية
الاخوة الاعضاءمن المعروف أن معظم الشوايقة حنينين واشعارهم من النوع الذي يمس الوجدان ويتغلغل في الروح لدرجة انك تحس وتتعايش مع القصة كأنك صاحبها اوأنك من يقصدك الشاعر مع العلم ان الفنانين الشوايقة يزيدونها حلاوة ويضيفوا عليها بهارات بأدائهم مما يجعلها مقبولة من الجميع اتمني يشترك الجميع بامدادنا بالكلمات الشايقيةالاصيلةويلا نبدا

كمان زعلان
صديق احمد
عبدالله محمد خير
تعاتبنا !!! وما قبلان تكاتبنا
ما إنتو اللبيتو الحله يا نوره
ورحلتو بعيد بلا شوره
تراها الحله من يوم قمتو مهجوره
وما رضيانه بعدك إلا مجبوره
ومشتاقه
عارفه الدنيا لمان تقسى فراقه
حليل الحله .. وين أملاكه
(وين حوره)؟؟ وين شاديها ؟؟
يا شاديها ما تزوره
يا فتنه
يا البعد الله منك كان مخافتنا
أكان حيين .. وما متنا
وكان حن القدر والدنيا لمتنا
وتاني الحله زي ما كنا ضمتنا
بنحلف ليك بزمتنا
سعادتك كل مهمتنا
وبلاك قامت قيامتنا.

الرواسى للشاعر حاتم حسن الدابى
غناء جعفر السقيد
بدر مدر يا رواسي نحن بعاد لحقنا القيفة
انت مدبج ونحن نقاسى فى برد امشير والموج والزيفة
مركبك الماليها مطارق تمشي تقيف تسرح بى كيفه
مرة مغارب ومرة مشارق وانت تخاف الريح وحفيفه
ساوها زينة وفوقها بيارق وانت مدبج توب وقطيفة
فيها المات والضاربه الفالق والسلمين فى حالة مخيفة
كل الناس ترزح في كفة وانت وناسك فوق الدفة
الدايشين والراسهم لفة والشاخصين فى المدى للضفة
صوف افضالك فوقهم جوة فوق الموية وريقهم جفة
من العطش النص اتوفى وباقى النص الفضل جيفة
....
ضاقوا المر والحال استعصى الشغال واللاحق الحصة
الواصال للرحم اتقصة والهداي مو لاقى الفرصة
الرساي سافر ما وصى خلى محمد واحمد وحفصة
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
.....
كل الراكب شاف احلامه دون احساس ماتت قدامه
فنُ كتابه وكسر اقلامه لا الوالدين لا جار ما لامه
ناس الحلة القعدوا وقاموا اصر والح يمشى كلامه
هزموهو اخوانه البى الجوع نامو وكم خريج ما لاقى وظيفة
.......
يا الفكيتها وقلت لها سيرى وعارف انه الدنيا دميرى
لا فى ضفاف لا شفنا جزيرى لا فى الحيرى ولا في الطيرى
كسرت جناحها وقلت لها طيرى اتملكت الكانت ميرى
يا السودت الناصع وجيرى ايد الحق صابونى وليفة
......
قبلك كم متعلم وقاري عكس الريح فكولو الصارى
مشدوهين متعشى وحارى ريسها شلته والبحارى
كم سنوات علام البارى واقفى وهم شايفنها جارى
بقينا هلاك والقيف متضارى لا حجار لا دوحة وريفة
.....
حسك عينك ما تتمادى وتنسى الراكب عنده ارادة
الاهوال الشافها وخاضها كان فى مدرسة والا عيادة
شفنا الايد الكان اجوادة يا مبتورة يا شحادة
وياما رقاب كانت سدادة علمت الله من التعريفة
......
يا ريسنا قدر مديرك فك الدفة وادها غيرك
احفظ نفسك ترضى ضميرك وقف اوع تواصل سيرك
كان طاوعتنى شن بيضيرك عرض اكتافك وفك البيرك
لا هنى شكرا وكتر خيرك وكل انسان في الارض خليفة
__________________

حوا كلمات خالد شقورى
أداء يعقوب تاج السر

ضمه جسم الليل عويله وضمت الاهات زليله
حوا ياناس ياحليله وثاني ياناس ياحليله
ماسكي كف الثوب تخيط والدموع تنزل هميله
كان متاكي الباب وخايفي من ابوها يشوف حويله
مالعليهو هو ماهو هين كيف تعل روحو العليله
كان يقول لها حوا مالك والعذاب كيفن مشى لك
حوا لا تزيدي العليكي فوق كتيفي انا شايلو فالك
حوا ماهميني حالي الا بس هاميني حالك
حو ا حوا باقي نصبر ونحبس العبر الثقيله
حوا برد الدنيا اكبر والله اكبر من عغتاها
كان بامكانه تسرق بس ضمير الخير حماها
زاد ازاها وزاد شقاها لمه ابوها الراجيه ودع
وروحو دقت بوغ رحيله
حوا قالت داير تاكل لو لقت لها لقمه نيه
قالوا ليها ان دايري تاكلي اكلي في خاطرك شويه
اضحكيلم وابسميلم تلقي بدل القمه ميه
حوا قالت دايره تغمر لو حلم بالفرحه طافه
قالو ليها الدايري تغمر الا في صدر السخافه
بينا وبين عيشة المعزه ماخلاص بعدت مسافه
حتى قدر الموت اباها مش حرام الموت ياعافا
سوت الشاي للعطالي ماجنت غير الرزاله
حامت الحلات تغسل شالو ناس الحله حاله
مدت الايد للعمايه ختو في ايدينه لالا
قنبت في ضل مصغر سارحة تلتق في نعالة
في ضجيج عجلات زمانه مانست صرخة جماله
حوا ماتت لمه ماتت امها وكانت طفيله
ماتت لمه ابوها روحو دقت بوغ رحيله
وماتت الف مره لمه سلبوها الفضيله
ودمتم

التجلة لشعراء ابناء شايق ولك اختنا هالة لجهدك المقدر.
لك الود.

جميلة تلك الكلمات التى يخطها كتاب الشعر الشايقى بل الاجمل منه الطريقة واللحن .......... ونلاقيك ونعاينلك ونقول انشاء الله نتفرق وكان قبلنا منك غادى لى شوفتك بنتحرق

ليكا من غير ما تقول لى سلام بقول اهلا حباب يا هالة الزبيدى..فتحت بابا يفوح منه العبير..انا منحاز لشعراء الشايقية(كما يقول المثقفاتية)..واصلى و اسرقى لينا نسمات ندية وسط هذا الهجير عشان نقدر(نصبر على البوخ القريب نستحمل اصوات القعو...لامن يجينا الهمبريب والليل غناوى نولعو..يايمة تفرحى من طرف..عاد والمسافرين يرجعوا)..بس يا هالة غير الشايقية هم البقولوا الشوايقة... الشايقية بقولوا شايقية...

مشكورين علي المرور الاخوان ميرغني وعمر ومعاوية امدونا بالمزيد من روائع الشايقية وهاكم دي

الطمبور صديقنا وعزنا وملجانا

وكتين السنين تفتح بوابة أحزانا

مما قمنا نسمع فيهو لا ملينا لا ملانا

زي إبل الرحيل شايلي السٌقا وعطشانه

أوتارو الحنيني تملِّي عايشي معانا

في الريف والحضر ومحل ما تمشي خطانا

الله لو بشيشي تداعبو إيد فنانة

تتراقص جميع الدنيا بي أركانا

لو قلبك حجر وغنانا شايفو رطانه

أول ما يرن تلقاك طربتا معانا

إحساسك يذوب قامتك تميل طربانه

زي مرّ النسيم وكتين يداعب البانه

الطمبور سماحتو القمرة مالي سمانا

الليل والسكون والرملة كالمرجانه

نتلملم نكون في شلة زاهية الوانا

نضحك ننبسط لما الصباح يلقانا

وفي رواية اخرى معروف من قديم

انو الجمال نسبي وللموجب دوام لابد من سلبي

لكن نتفق رسمي وكمان شعبي
الطمبور علاج لكل مرض عصبي

لكن نتفق رسمي وكمان شعبي
الطمبور علاج لكل مرض عصبي
سبحان رب العباد ربي
خلا قدح حراز دبكر أصيل عربي
ومكسي جلد بقر يلصف تقول دهبي
فوقو تلات عصي واقفات بلا شعبي
وخمسه سلوك سونان موزوني بالنسبي
لو رنت تذوب ترقص جبال كجبي
والبركل يمور يتحول العقبي
ولو ما كت بخاف والناس تشيل كضبي
كنت بقول يرن تنحلا لوكربي
وأنداح الوئام بين الخلق يدبي
والبوسني الجريح يستأمن الصربي
وينشر الفرح من راجا لاوربي

يا هالة لو سمحت ظروفك ادينا( يا رمال حلتنا زوووووولا كان باانسك يا حليلو...يا حليلو...قام رحل من بلدو روح ..روح والله روح وفات لى دار ماها هيلو...ماها هيييييلو)

مافى كلام .............. لكن عندى ليك اقتراح الاخت هالة ......... تقومى تعملى مكتبة على حسب المغنى او الشاعر .......... تصور كيف يكون الحال لو ماكنت

حديثك شوقنا ليك قول لنا اى حديث نسمعو قول لنا اصلك ما بتريدنا وللا قول لنا قوموا ارجعوا
نحن جيناك وقصدنا كان الله شملنا بيك يجمعوووا ولو يدور يخرب بينا زول لا نبارى ولا نتبعوا
تبقى دنيانا هنا وسرور ضمة عرق الشقا نقلعوا
نزرع الريد فى كل دار نسقى لما يفرهد خدار
ولما يتتاكى يشيل ثمار نحن اول ناس نفرعوا
فر بسمك شلعن بروق رغم انف الضو يلمعو
فر فرح..فرح قليب فيك خاب املو ومطمعو
ينبهط فى لجج السماح ينبسط لطعن الرماح
اصلو فى ريدو قمح قماح سد باب الريد شمعو
نسيت الباقى بفعل الكوارث والعمر وفساد الحكام

وقفت بعد حلبت لبينة الشاي تكورك يا الحسن
يا ام الحسن وينو الحسن ؟

ولامن صفت رغوة شخيبات اللبن
في حلتا المبني من طبق السكن
واقفي في حوش البهايم ولسع تكورك آلحسن

جاها حسا من بعيد مارق من القاطوع ورا
قال ليها خير يا الحاجي خير ؟
قالتلو خير .. تعال لي جاي
دايراك تعنون لي جواب يا الراسي لي ولدي الخدير
ولا تبقي زي شافع السرير.. يقول لي زين آيمة زين
زين وتبقي بعد شهير ؟؟وان جاني يكتب فد سطير
اقولو يا سجم السجم انا زي قرايتك ما قريت
لكن عويناتي بيفرزن الوريقة البيضاء من لون القلم

بعد المغيرب بي شوي جاها الحسن تعبان يسير
دا العشى غنمو من الدرب وسرقت ندي وشو الهجير
سوتلو شاياً بي لبن قرض معاهو حرف فطير
قالتلو بسم الله قول واكتب وصيتي انا للخدير

الزمن يا ولدي ماحقاهو السنين
البعيش في الدنيا ما بعيش مرتين
العمير فاضلي بس منو اليقين
وانت طول في البنادر يا الحبيب لا متين ؟

تعال اوريك حق ابوك الجم حقيق حاج اللمين
ان عرفتو بلا عمار يقولو ولداً عندو طين

والعلاج لا تنسي رسلو لي دحين
العوينات آجناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين

انا كت برسلا ليكا في لوري الخزين

يا ساري الليل : ما شفت عوض تابع النجمات فات لي قدام ؟؟
يا ساري الليل لقد ذهب عوض في ليلة من فيضان 1988م

من يوم البحر الجانا وتسب وقام
يوم دخل الحلة وهدم بيوتنا ترا وهدام
صبحنا ضيوف ما خلاّ وراهو صلة أرحام
يوم داكا عوض خلاها مرق سفره طويل مع الأيام

الزول زول الله من الصلاح الرفعت عنهم الأقلام
من غرث الرسل الدارو الآخرة أم خيرن دام
التركو نعيم الدنيا الزايل للعبدوها وللحكام
ثم يبدا في وصف ملابس عوض وما كان زاده يوم خروجه
متجلبب بي تيبان الرحمة غتا وهندام
متنعلت بي أرض الله الواسعة خطى الأقدام
متزود شايل خير الزاد تقى وإلهام
يا ساري الليل ما شفت جناح جبريل غتاهو بقالو مظلة جلوس وقيام

يبقالي نجع متوجه قاصد أرض الشام
ما شفتو هناك مع الحجاج لابس الإحرام
بين يثرب ومكة وفي بيت الله المكسي رخام
يبقالي هناك يكون مندسي مع الخدام
فتشنا سما أرض ما شفنا منام
في التمر الشايل تكا سبيطو مدلول خام
في الجرف الأخضر في لوبيهو وفي النجام
في جدول جاري تسرسر مويتو نعيماً دام
ومع ذلك لم نجده وقد طال الغياب ولن نيأس فالحلة في الانتظار فاينما وجدته بلغه السلام
يا ساري الليل أنا داير أوصيك وأديك كلام
الروح إين صعدت لي باريها وفي جنات الخلد مقام
لو لاقيتو في إي مكان في إي زحام
روح كلمو قولو الحلة بكت من شوقا إليك تغريك سلام

الاخوان/ معاوية, هالة , عمر .

من اشد المعجبين والمتحيزين للشعر الشايقي , تجدونني ,, ولكن لا اخفيكم سرا , ان قلت ان ما احفظه من غناء الشايقية لا يزيد الا قليلا عما احفظه من غناء شرق السودان مثلا, واحسب ان السبب يكمن في توصيل الشعر الشايقي للمستمع, القصد ان الشعر الشايقي عظيم عظيم عظيم وملئ بالكثير المثير من تشبيهات وكنايات وتوريات , وما اليه من اوجه البلاغة ,,,, وهناك قامات سامقة في الشعر , لا تعد ولا تحصي , ولكن يبدو ان المشكلة تكمن في التطريب , اي المطربين ,,,لا احد يشبه النعام ادم وصديق احمد { اين هو} ثم محمد كرم الله ومحمد جبارة,,,,,,,, هل هذا كل ما قدمه الغناء الشايقي ,,,؟؟؟ قد يقول قائل { عبد الرحيم البركل} هوصورة طبق الاصل لمن سبقوه في رأي المتواضع جدا,,!!!! الغناء بنفس الكيفية والصورة,,,, لا اظلم احدا ولكني تجدني مستمعا جيدا للشعر الشايقي ,, ولكن اقل طربا للغناء الاان كان لمن ذكرت { يطربني حد الطرب صديق احمد والنعام ادم} با ختصار انا اري ان قامة المطربين تقل كثيرا عن قامة الشعراء الذين هم بصمات في خارطة الشعر السوداني ,,, اين هؤلاء المطربين من شعر الحميد,,, حتي تلقفه مصطفي سيد احمد وحدث الناس عنه ,,, اين هم قبلا من اسماعين ود حد الزين ,,, ومن ىسيد احمد الحاردلو,,,,,,,,,,, اقول لكم اين هم ,,, هم مع الشعر العاطفي الصرف{ حسن الدابي, تاج السر الطيب,,,وووووو} هذا ليس عيبا في حد ذاته ولكنه يقصر كثيرا من قامة الشعر الشايقي الفارعة,,,, شئء آخر هام جدا ولو اني اطرب كثيرا كثيرا للايقاع الشايقي,,, واكثر ما يطرب في غناء مصطفي سيد احمد,,, دليب,,, ولكن اريد ان اقول انا ترعرعنا وسط غناء الدلوكة وايقاع العرضة في منطقة جنوب شندي مما قد يكون قد اثر كثيرا علي اذاننا,,, فان كما تعلمون شايقية نص كم ,,, ولكم الود الكثير.
_________________
تخيل كيف يكون الحال؟؟؟

أختنا هالة والأحباب
أنا-عائذاً بالله منها- مريض بحب الشعر وكما تعلمون ..شايقي فبالضرورة أحب شعر الشايقية ، وعطفاً على حديث ميرغني أضيف أن هناك مجموعة من شعراء الشايقية لم يسمع بهم أحد ولكنهم كتابييييييييييييييييييييييييييييييين وكضرب مثل فقط أضع بين ايديكم قصيدة لشخص اسمو(ياسر علي بشير)إتحداكم كان في زول سمع بيو!! وشوف براكم هي خطيرة كيف..
ياميرغني :في زول غنّاي شديد وماشي في شارع حقو براهو إسمو محمد النصري حاول تسمعو...

عَقـــــــــــــــوق الحِـــــنْ

كلمات/ياسر علي بشير
أداء/محمد النصري

أفكر في لقاك كيفن..................بعد ما عُدْ علي كيفي
عيونك ما على كيفن.

ما سنين ودنين أنا استنيت جروف البينا لو يلدن
على قيفك
ضفاف قيفك
من الشمات أبن يفضن
بنات الشوق يلاوزن فوق من الأمواج وما يردن
******
فيا بحر الرجا المقطوع
أجر ياريح وما تهدِّنْ
وجل يامشرعي الممنوع
قوافل ريدي ما يعدِّنْ
إذا جيبة الحبيبة دموع
خطاي تالاها لا تودنْ
******
واقول ياقلبي خلَّو الزول
إذا ماكان سحابة تضن
على العشمانلو في قندول
يحاحي الطير رياحو تزِنْ
وانا الفوق التراب مكتول
وفرقي من (السرابة) بئن
******
موهطة كنتي يالجواي
كما بين الغناوي لَحِنْ
عُقُبْ شرَّيتْ عليكي رجاي
بياض نية وطويتك حِنْ
فليش زالفتي غادي وجاي
وطوَّحِك الزمان ليشن؟؟
*****
بخافلك من حقيق مظلوم
بخافلك ياعقوق الحِنْ
أخافلك من حساب اليوم
وَكِتْ كل النفوس يصْفِنْ
سؤال منو القيامة تقوم
بقيت ناكر جميل كيفن؟؟؟؟