بلادي انا

موضوع: بلادي انا الإثنين ماي 19, 2008 11:15 am

الهرم المهول والشاعر اسماعين حسن ود حد الزين ,,, قال اجمل ما قيل في السودان,,, تطربني هذه القصيده ولا امل سماعها ابدا ,,, اخترتها لكم اليوم ,,, لانو عندي مزاج فيها :

بلادى أنا

بلاد ناساً مواريثم في أول شي … كتاب الله
وخيل مشدود … وسيف مسنون حداه درع .
تقاقيهم تسرج الليل مع الحيران

وشيخاً في الخلاوي ورع .
وكم نخلات تهبهب فى جروف الساب

وبقرة حلوبة تتضرع وليها ضرع .
وساقية تصحى اليل مع الفجراوى ..

يبكى الليل ويدلق فى جداولو دمع .
يخدر فى بلادى سلام .. خدرة شاربي موية النيل ..

تزرد في البوادى زرع .
بلادي سهول .. بلادي حقول ..

بلادي الجنة .. للشافوها أو للبره بيها سمع .
بلادي أنا تكرم الضيف وحتى الطير يجيها جعان ..

من أطرافها تقيها شبع .
بلادى الصفقة والطمبور ..

بلادى بلاد من التاريخ من ترهاقا لي عن ميسنا
وناسا حنان .. يكفكفو دمعة المفجوع
يبدو الغير على ذاتم .. يقسمو اللقمة بيناتم
ويدو الزاد .. حتى إن كان مصيرم جوع .
ديك أهلى ..
عرب ممزوجة بي دم الزنوج الحارة .. ديل أهلي
ديل أهلي لما أدور أفصل للبدور فصلي ..
أقول بعضى .. ألاقيهم تسربوا فى مسارب الروح بقو كلي
أسياد قلبي والإحساس .
وسافر في بحار شوقم زمان عقلي .
محل قبلت ألقاهم معاي معاي زي ضلى .
لو ما جيت من زي ديل ..

كان أسفاي .. وا مأساتي وا ذلي
تصور كيف يكون الحال ؟
لو ما كنت سوداني .. وأهل الحارة ما أهلي ؟
تصـور كيف ؟
_________________
تخيل كيف يكون الحال؟؟؟

موضوع: رد: بلادي انا الإثنين ماي 19, 2008 1:18 pm

آآآآآآآآآآآخ ياميرغني

كنت ذات يوم عائداً من المكتبة -أيام الدراسة- فمررت بتلفزيون الداخلية ...وديكتاتورية الكيزان في أوجها...وجدت وردي يشدو:
(بناتك عيونن صفاهن سماي
وهيبة رجالك بتسند قفاي)
فقلت بصوت جعل الذين يشاهدون التلفزيون يلتفتون لمعرفة مصدره:{دة كان زمان ياولدي}

أخشى ما أخشاه أن تكون قصيدتك هذه غير صالحة للإستخدام في زماننا هذا
وإن شالله مافي زول يقول ليك:
دة كان زمان ياولدي

موضوع: رد: بلادي انا الإثنين ماي 19, 2008 4:30 pm

لوشفت التانيين يا هيثم ,,,,, بتلقي نفسك بتصهين عن بعض العيوب الحاضره ,,, صاح كان زمان لكن الباقي اكتر من حق التانيين علي قلته ,,, لك الود.
_________________

رأي بعينيه ماءً عز مورده ,,,,, ولا يملك دون الماءِ منصرفا