اسكابشنات

دمغةاولى:
الغباش الفى دمى منك
لو كسر ضلعين عزرتو
(الود عاطف ود خيرى)

ختم بتوقيع:
واعلن يا صحف ضليت
خرجت ولم اعد للان
وقد ودرت محبوبى
(اللذيذونى عثمان بشرى)

ختم بارز:
اتمدد على كيفك
اتمدد قدر فرشك
وحت لو كان اذا نعشك
زنق احلامك البكرة
(الزائد لذة عثمان بشرى)

الموضوع : ترتار الحلة.....اللامى الشلة
يا سلاااااام....فى زمان ليس ببعيد كان هنالك ما يضاف الى جميل (لذيذونات) بلادى فيما يسمى الترتر (الرقاش) ....الذى ان فشلت فى الوصول الى صاحبته ولم تستلم المنديل حرير قد ينتهى المطاف بك الى نيلك الازرق او الابيض منه او الى (ابيهم) الذى علمهم (النهر)
بت لذيذونة طاعمة تصول وتجول وتكسر كل ما يمكن ان يحول بينها وبين الحبيب الذى يمتطى صهوة (الترتار) ويكثر الانظار فى الانسان الطرفو نايم وصاحى..وصاحى كالنعسان....
ترتارات لا تخضع لقانون الاعمار من بداية الدنيا (هن) واقفات امام عتبة بيوت الحلة الطيبة....تنتعل خصوبة ارض بلادى البكر وتعلن وتصرخ بمل الفم عن مبدا الحكر....وتتنفس فى (احشائها) اوكسجين بلادى النقى وتكسو ظهرها الذى لم يعرف انكسارا يوما ما بسواد قارتنا السمراء...تاخذ شكلا دائريا كمحاور الافلاك...وتكتنز بالاسلاك....ظهرها مريح ومجلسها فسيح...تضم العوام والعباقرة والاعلام...لا تابى العطالة ولا تحتقر البطالة.....تحترم الاذكياء وتغازل الاغبياء...فيها المكر والدهاء وبعض من الحياء...على اسوارها الضحك المعافى والخصام المكافا....ضحك مجلجل... وحديث (مشلشل)...وقطيعة وزريعة وقلة من الادب التى قد تخلو من ادب...
فيها طرب وميزيكا قرب....فيها مؤامرات ومحاضرات ومقارعات ومفارقات ومشاركات ....فيها وااااى وفيها سااااااى وفيها تعال شيل الشاى... فيها يا عواليق...وفيها هووووى يا مطاليق......وفيها....وفيها
ورغم ما فيها وما فيها ...فيها الود القيافة المستنى بت الحلة اللذيذوووونة....بت بتطلع مغرب متدثرة بثوب جميل فى ابهى ما يكون كيفما تحب وكيفما نحب ان نراها....تمشى الهوينى لا عجل وتتلفت يمنى وتارة يسرى وتردد فى سرها
الشوق شرب حزن المواويل
وانجرح خاطر النهار
وقبل ان تنجرح شمس بلادى وتفقد كل دمائها الندية ويلفها ليل بهيم تصرخ انت ود الترتار قوون المغربية احسن من 100 !! ومافى احسن واجمل من ذلك....انه لقاء الاوكسجين بالهايدروجين عصب حياة للترتر والترتار الذى يردد فى سره وجهره
من بعد عز المزار
والليل سها وملت
نجومو الانتظار
اانها لحظة انتظرها كثيرا...البت الذيذونة تتبختر بين الضحايا والحفايا والعرايا و(الشقايا)...وحتى الذين لم يسلموا من (هنايا) والذين افرغوا حبر الدوايا وعبروا عن اطروحة الالم الرفيع...واخرين اصابتهم سهام الاحبة واصبحت قلوبهم هائمة وحياتهم بلا نكهة كانهم يرددون
وبقت حياتى مقسمة
نص فى الارض
ونص فى السما
وانتهت بهم المطافات الى براحات هوليوود (المحايا) ...ومن بعدها كانوا او هانوا!!!
فيلم حياتى بسيط معتق ومجرتق بامال عريضة بكلمة منك حلوة...كنت مستنيها.... لله دره كم من الزمن جلس على الترتار ليسمع منها مش حاتنازل عنك ابدا مهما يكون..وبين قوسين(يا مجنون!!)...فيلم البطلة فيه خائنة والخائن فيه بطل!!او يحق له حب الذيذونة بت الحلة؟ولم لا!!!؟قد تاخذه الغرة عينها ويصيغ المبررات لنفسه ويغنى لها:
يا بت انا ود الحلة
عاشق وحياة الله
قد لا تصدقه (الترتر) وقد يجلس مرة اخرى على الترتار ويؤكد عشقه لها
والله..والله
وتبدا سلسلة جديدة من المغامرات او ان شئت سمئها المجاذفات ..لامحفوفة بالمخاطر....والزرازر...احتمال من بعض العساكر
وكثير من الهواجس...اخوها قاطرنى....فلان ساحرنى...ووهناى مداقرنى....غايتو الله يستر

ترطيبة تحت ضل خريمة:
ترتار الحلة مليان مواضيع بالجملة....طالما ممدود فى الحلة
ادونا فرقة تدخل ورقة وراجعيييييين

الريس ود الزبيدى الكاسر قيدى وقاطع رشمة السكات... سلاااااااامات بقدر رقم اوفقادرو والاشواق كميات خزانات مروى والحماداب.....غايتو هى محاولات اما دقت فى العراضة او جابو القون الجماعة القريبين منها....باختصار هى قضاء وقدر زى كورة بلادى.....
غايتو اعزرنى يا ريس فى صنة الونسة ونواصل ..وفى الفتر بعد المشاويرفى المفاصل زى ما بقول الشاب خالد فالكاو.....
ترطيبة وفى الشعر شيبة:
قالو فى المتل الماتعرف منو القالو ترحيب ود القبايل يخلى الزول يعمل عمايل.....هههه
كدى اشحم (الفرول) واجيكم صاد

سكابشن يااااااااااا بتاع (ديدمونة)

هل تذكر تلك الأيام؟؟؟ { ايام "فتوة الإلهام" برأي البروفيسور/علي المك رحمه الله}

واصل ونحن منتظرين

scaption كتب: سلاااااااامات بقدر رقم اوفقادرو

يا اسكابشن الدكاترة ديل رقم افوقادرو مابرعفوه...
فى انتظارك تواصل!!!!

اسكابشن الف مرحب ,, واصل.
هيثم لشفيع الف مرحب,,, ومنتظرين .
الرشيد الريح الف مرحب ,,غياب غير مبرر,,ربما ستتعرض للمحاسبة
لكم الود.

يا سلااااام الوريف هيثم....عوافى
الله كيييييف!! يا سلاااااام طلباتنا وصلت للسنت رغم القراية الاتحسنت...قدينا بالحظ الكعب
ديدمووووووونة....الله..الحقنى يالشيخ ود سحوووووونة....ههههه
بتتزكر مقولة:
لمحتك وكان بينى طوبة
ولمن اتمعنت..اتارى الطوبة وراك!!!!
ياخى حب فى معامل الفيزياء زاتو...العن ابو الكدسة الزرق
بلاقيك بس ادينى فرصة اطبق جلاليب الهوا الجوانى

اللذيذ الرشيد....ياود حاج....انشاءالله مبرور.... والسعى مشكور
انتاجك الروحى ماشاءالله لذيذوووونى ربنا يحفظو....اوفقادرو منو القدرو!!! ده سر عجيب
دار البترو كيييييف؟شل شل كب لى جالون....دقيقة يافردة افتح الصالون واجييييك

الريس قائد الاسطول....سلامات
يا ريس معليش انا بتاخر شوية فى الجية بس عليك الله ما تسقطنى فى (اعمال) السنة واخوك بشرفك فى الورقة الرئيسية واذا احتجت دفرة ما دايرلك وصية....
شبااابس انا مخنوق بيكم شكر وومحكوم على بالاعدام شنقا حتى الموت
موت!!!!!!! انشاءالله لا اموووووت ولا افووووووت

شبابسس روعة .
ما شفنا حاجه.من بيت الكلاوي.

اسكابشن سلامات كتييييييره مرحب بيك والله المنتدى نور نأمل ان تكون اضافه جديده جميله لك الود

مرغنى سلام الرشيد قال الدكاتره ما بيعرفوا رقم اوفقادرو معليش يكون قايلكم اتخرجتوا من جامعه ود حامد لك الود

الاخ قرفان جدا...سلامات
ياخى الصبر البخلى الزول يطقطق اصابعو.....لسه فينى لسه من المجابيد الملحة ومن خرير الامنيات زى ما بقول عثمان ود بشرى....
شكرا ليك طن من المزاج سايطنو فى (قرفة_بكسر القاف)

الاخت سلمى بت الشفيع....سلامات يا بت يا كونتينينتال(الرشيد)
جية الترتر تعنى استمرارية الترتار...دردقيهم لينا جملة حتى اللسه قبل الخلق والتكوين...ههههههههه
سلمى صحى الحجاج بمدحو:
الدينو راسى....كالمراسى
يا احلى زول (شفيع ) الناس؟!!!!!
هههههه... شكرا بقدر ظل تمام زاوية طلتك

الريس ود الزبيدى سلامات
على الطلاق واحد جعلى قال اوفقادرو ده بعرفوه وعندهم جعلى فى حفلة حلف حرام الا يدقوه بالسوط فى حفلة مليانة(رتاين) قدر رقم اوفقادرو....وسالوه طوااالى انت عارفو؟!!!
قال ليهم:حرم افو قادرو......ومن ديييييك وعيييييك دار جعل كلها بتعرف اوفقادرو
شكرا بقدر احساس برودة بلاط الحرم الشريف
جمرة حبيبة فى عدادكم:
يا جماعة معليش لو كاتلنى فى البحر السكات....بلقاكم فى محل يوم داكم

الاخ : اسكابشن ياخي اظنك مابتعركل الاعضاء جيدا

بالله عليك كلمة ريس دي خليها لانو في واحد هنا كان دخل المنتدي بفرتقا


والمقصود باين

( انشا الله التلفون مايرجع قريب )

التحية ليك اسكابشن ومعاك لحدى ما الترتار يتحول لتموت تخلى وبعدين رقم أفقادرو دة مالو أخذ حيز كبير قدر ده ونحنا سبناهو للمهندسين أنشاالله يبقى ليكم رقم حساب فى بنك

يا عمنا النيو لوك الاول وقلبتة فيهو الهوبة



بكرة أحلى يا شباب

سلااااام ياسعادتك.. طيب لما خلى يشرب من البحر مالك مجقلب من الستين داهيه؟هوووى يا اولا الزبيدى ارعوا بى قيدكم مالكم ومال البيقول باع؟والله تكترهو يقول ليكم هو والباقى انت ما عاااااارفو..لكم الود

ميرغني ابراهيم عمر كتب:هو منو يا ربي؟؟؟

ياربي مـ مـ مـــــــــــــــــــحمد علي كلاي لآلآلآ عـ عـ عــــــلي عثمان لآلآلآ ااالعجب لآلآلآ ووووليد الزبيدي لآلآلآ يـ يـ ياسر ميرغني

لآلآلآ ة ة ة ( حجر حجرجرحجارة لآ تبيض تفقس جدادة لآ كرعينا اربعة حمارة لآ )

ميرغني الزبيدي حاول مرة اخري

والله يا جماعة انا كنت مطشش فى الزول ده منو لكن الاخت سلمى قربت المسافة والله يكضب الشينة ياريس
بعدين يا عمنا لو ما فهمتك انا البفهمك منو حتى فى الكورة
وريس ونص وخمستاشر والما عاجبو يترشح




بكرة أحلى

شنوو ياااااااااااا سكابشن؟؟؟

ضربت الإسكابشن ونسيت الإسكابشن ....وخليت لينا الإسكابشن ينظر في الإسكابشن؟؟؟!!!؟؟؟

سلام ياجماعه وييييين اسكابشن مالو مختفى انشاءالله خير؟ مفتقدنك والله نأمل ان تعود اقوى.لك الود

يا أخوانا موضوع الريس ده انا كنت مطشش خالص وبصراحة كنت قايلو واح تانى لكن طلع فردة موية نار وانا بعتزر وبسحب كلامى وطبعا هو من ال بدر ولو عاوز يبقى الريس ممكن نعمل كنفدرالية ونعطيهو أقليم أوولاية صريحة او ممكن يبقى ريس بالتناوب يعنى كل ستة شهور على واحد والله شنو يا عمنا الريس باعتبار أنك الريس بتاع الستة شهور الاولى




وبكرة قالو فى قبض اعملو حسابكم

بكري الايام دي شايفك مغيرمشيتك

يا اخوي الريس عرفنا وسلفاكير معروف انت منو

عزيزى وليد لك التحية مضارات المسلم على نفسة صدقة
أنا رقم صفر الذى لا يعرف حقيقة أحد
أتضاير يا خوى الجماعة دى فاكين فينا أوكامبو القبض من طرف




بكرة الهلال غالب

العزيز بكري علي عبدالله (تختخ ) الشاويش فرقع منو

المفتش سامى منو يا حبة أنت أدهم صبرى عديييل

يأخواننا وين الاسكابشنات دي ؟؟
ما شايفين اي سكابشن في الاسكابشن

سامي الحاج : بن لادن منو

وعلي الطلاق لوزة ماعرفتها

سلامات ياشباب انتو اسكابشن تنازل عن البوست بتاعو لأخوهو وللا شنو؟مختفى ولا عارفين خبرو شنو وبكرى مجدع فينا طمئنا عليهو يابكرى اول حاجه واحتل مكانو بعد داك.لك الود

والله سكابشن بقت عليهو(أهل البكا غفروا ....... وناس بكري كفروا)

يا مدير

ما عندك تلفونو تعمل ليو لفت نظر؟؟؟

سلام يا بشو إنت يا هيثم بقيت ولاع نيران بين الاخوان مره مرغنى والاخوهو ومره إسكابشن واخوهو الدور علينا انا ومعاويه وللا شنو؟لك الود

بطاقة شحن موبيتيل:
وانتى ساعة المغربية
خايفة من كلمة وداع
(الفنان الشاب خالد الصحافة)
بطاقة شحن زين:
يا احلى صبية بتطلع مغرب
عين فى الارض وايد تتناول
من خالات الضيق رواب
(الشاعر القدال)
بطاقة شحن اريبا:
يا بت انا ود الحلة
عاشق وحياة الله
(الفنان الراحل سيد خليفة)
بطاقة شحن (سودانى):
والمغارب لابسة اقصر
من خيال المفترى
ونحنا مديونين نسيم
(الشاعر الشاب عاطف خيرى)
الموضوع:
عصرية بس....مليانة حس
ياله من (عصرا بدرى) ولمة فتيان الحلة زرافات و(وجدان) ...قصيرهم وطويلهم... ابيضهم واسودهم وحتى من لا لون له.... المتعلم منهم والامى...المستاجرين والملاك... انصاف الحيارى و(السكارى) والعطالة ومروجى البطالة... اولاد (العز) واولاد(القرف...بكسر القاف) ...اوائل المدارس وطيشهم... كل هذه الباكورة الرائعة التى تمثل عصب الحلة وشريان الناس تلتقى تحت سقف دافورى الحلة وياله من دافورى؟!!
كيف استطاع هذا المدعو الدافورى ان يذيب كل الموانع والعوائق تحت مناخ حار جاف صيفا الذى ( يصف) الناس جميعا تحت جلاجل ونغمات من الضحك والصراخ المعافى
الذىيؤكد حضور هذا الجنس البشرى الذى كانما بزرات العرق الذى ينسدل مارا عبر وجوههم ليروى خصوبة الارض تحت اقدامهم يزيد قناعة الكثيرين ان الطاقة التى تفجر الحب بين الناس لا تفنى ولا تستحدث كما يدعى العم نيوتن ورفاقه... هنئيا لنا ولكم هذا المشهد النادر
فى قناعاتى لهذا الدافورى معنى اكبر مما تصورناه جميعا اذانه ملتقى شباب اهل الحى الذى يوثقون علاقاتهم عبره ويزيدون صلابة وعراقة وعتاقة بممارسة الرياضة التى تصح عقول الكثيرين وبالاضافة الى ذلك يؤكد حضور هذا الحى اذ انه (حى) لا يموت... حراك وعراك نقى كماء النيل العذب بين اخوة لم تلدهم ام واحدة ولكن جمعهم (اب) واحد.....
وحول مضمار هذا النسيج المتماسك حياة تستمد قوتها من هذا الحضور.... الاطفال الزغب يدورون حولهم ويتشوقون بردا وسلاما لان يكونوا يوما ما ضمن هذا الحضور
وطعومية (بت) الحلة تتجلى فى حركات وصولات وجولات الى بعضهن البعض ولكنهن ينتهزن فرصة ان يمروا بساحة (فرسان) الحوبة والمستقبل كيف لا؟
ومن بين الفوارس الاخ والحبيب والعريس والصديق وحتى العدو ممن لا يطاقوا....
شمس هذه الحلة تنسحب سرا وتحاول ان تتوارى خجلا نحو مغيبها والكل يسرع فى صولاته وجولاته كيف لا انه قوووون المغربية الاحلى من 100 !!!! كانك بتسجيلك لهذا القون قد فزت بقلب اجمل (عزارى الحى) ويا له من قلب!
الشمس وصلت الى مستقر لها وذاب الفاصل (المدارى ) البشرى الذى يفصل بين رياح قلوب الناس الجافة والقلوب المشبعة بالرطوبة فى منظر بديع لابناء الحلة وهم يسوقون اقدامهم الى (اصيل) بيوتهم
رحم الله شاعرنا اسماعيل حسن حينما ردد:
تصور كيف يكون الحال
لوما كنت سودانى
واهل الحارة ما اهلى!!!!
وللحديث بقية اذا لم تغب شمس دافورى بلادى

شبابس.........سلامات
لكم ما تقدم من شوقى وما تاخر منه
مشتاقييييييييييييييين لممن ماسكانى قطيعة فى ضهر الشوق!!!
كدى اول حاجة نشكر الدكتور (الريس) على فوتوشوبية البراق الصعيد الهضبة الحلة......ياكلماتنا هو لولب....يالشوق الوقف سدارى هو لولب.....
شكرا قدر قنقليز بلدى لكل الاحبة قطاع الديدمونات والديدمون...المشفرون والآنسون.....ولكل من تكبد مشاق حمل حرفه بيمينه او بيساره.....
ورددوا معاى:
من اجل حلايب وغادى....انشاءالله نموت سعداء
تنسيمة:
الاخوان نظامهم كيييف؟زى درس العصر؟!!!!!

القاطوع ما اجمله من اسم يقطع نفس خيل القصائد ويشده اجراس المعابد....
فى زمان ليس ببعيد وربما حتى الان كانت هناك خصوصية لمكان اشبه باستوديوهات هوليوود واشبه بغرفة الاشباح فى منتزهات..... ركن(ركين) ملتصق بظهر(اوضه) كما الطفل المعلق على ظهر امه لا يبرح ظهرها ابدا مهما كانت الظروف له باب صغير يفتح على الاوضة ذاتها وهو فى مساحة اشبه بممر للمشاة فى داخله ظلام دامس لا تستطيع رؤية امتداد ابهامك...به بصيص ضوء ينفذ خلسة من خلال(طاقة) على ارتفاع قصى ...تفوح منه مزيج من الروائح من ريحة العيش الفتريتة الذى يرتكز على شوال عند مدخل بابه الصغير ورائحة عطور محلية من صندل وكركار ومحلبية ورائحة ودق متطايرة جميعها داخل بما يسمى بالسحارة التى ترتكز على احد الجدران فى منتصف المكان كناية عن علو القامة وسيادة الموقف ولهذه السحارة قصص فى هوليوود هذه الامة حيث كانت النساء فى زمان جميل عند قدوم زوجها من تسفار قد طال امده من فرط حيائها وادبها ومن فرط السعادة بعودة البطل الهمام تجرى مسرعة الى هذه السحارة فى هذا القاطوع وتفتح بابها مسرعة(وتضحك) حتى تخنقها العبرة وتحتفل بسعادتها داخل هذا العالم الخفى...لله دركن ياحبوبات الامس ورحمكن الله و انتن قد افرطتن فى تقديم انقى معانى للحياء عرفته البشرية وفى جانب اخر من السحارة تجد السكسك والخرز والهلال يجرتقون بها عرسان المستقبل فى الحياة كما لايخلو هذا القاطوع من مستلزمات الممات من كفن وريحة بت السودان وكل ما يكمل تحنيط موتانا لله دركم امة تحتفظ باكفانها بين ظهرانيها اى ايمان هذا يا بسطاء بلادى.. كما لا يخلو هذا القاطوع من مسامير مثبتة على نعش جدرانه بها من (المعلقات) ما يكفى بتوشيح فارس مغوار.. سوط من العنج الاصيل وبرش ذو لون احمر هادئ ذو نعومة لختان صبى او زفة عريس و(تبروقة) زاهية الالوان لصلاة الحاج القادم من ارض الحرمين ومناجل ومعاول وعصا كما الرئاسية للمناسبات الرسمية وصيجان ومفارك ومصافى كلها على الجدران كالمعرض التشكيلى لفنان مشهور... وعلى ارضية القاطوع عدد لا يستهان به من مستلزمات ضرورية
ومهما استوجب دخولك لهذه الاستوديوهات لابد من ان تسمى بالله العلى وان تصلى على حبيب الله ومتى ما خرجت
انها قداسة ما بعدها قداسة انها معمارية الارث السودانى الاصيل
التحية لكل اهل البادية واهل القرى وجميع اهل بلادى الطيبين
ودمتم بقواطيعكم ..وينابيعكم العذبة
انتهى..

بالله عليك يا سكابشن الله ما بسألك : كيف تحرمنا من زي دا ونحن اولي به من الآخرين ,,,, غفر الله لك ما تقدم وما تأخر اما نحن فقد غفرنا لك ما تقدم ولن نعفو لك ما تأخر ,,بي الواضح كده ,, ياأخي حرام عليك!!!!!
وبعد دا لك الود.

أسكابشن لله درك نسيت التمر المتكول فى الخرطاية وحلاوة ريا بواقي العيد المدخورة لزيارة حبيب أول زولا عززززززززززيز وسورج قبل أن تصنف البقنية من المسكرات والكباير

شكرا وادينا من النوع دا وكتر المحلبية عفوا المجموع يساوى عشرة صفر

وبكرة أكيد الحنة بتشيل

لك التحية سكابشن واصل فى الزمن الجميل... الدافورى ... الترتر .... وشليل وين راح اكلو (التمساح)

ياخوانا زول يحرك ليناسكابشن دة ويشوفو زاغ وين؟؟؟

أنا مندهشششششششششششششششششششششششش ..
بس ؟!

خالدعمرحسن كتب:أنا مندهشششششششششششششششششششششششش ..
بس ؟!

ونحن مندهشين زيك ياخالد...........سكابشن مشى وين؟؟؟؟؟؟؟؟؟؟؟؟؟؟؟؟؟؟؟؟