مكتبة للراحل الخالد مصطفى سيد احمد

من طرف عمر ابراهيم الجمعة ديسمبر 14, 2007 5:41 pm

الاخوة الاصدقاء تعالو معى نأسس مكتبة لهذا الهرم السودانى اول مشاركتى سوف تكون بين الموجة والخزان حلم انسان
محمد الحسن حميد
***************
هَرَدْتَ لهاتي بالغنوات
وقُتْ يبُردْ حَشَاك يا امِّي
ومن التّعب البلا صَالِحْ
تفيقي
تروقي
تنجمِّي
تسوِّي مكانسِكْ المطرة
تضوِّي البيت وتنحَمِّي
تمرقي صبوحة للجيران
قدح فوق ايد وفي ايد أَلمْي
يلاقوك شُفّع الكُتّاب
نُضاف وظُراف بلا النّسْمي
ويغنولِك
يغنّولِك غناوي السّابْ
وفي بيّوضة مافي سرابْ
جُبال كَجَبي وفيافي الكاب
تميد بالخُضرة منقسمي
ولا غابار ولا هو سحاب
وتنهجمي من الدّهشة
وتحاحيهُن
غناكُن نيي
غناكنُ نيي
غُنا الوهْمي
ويهتفوا زي كلاب الحي
على الأغراب
حوافي الصّي وبيوضة
البراسيم فيها مفروضة
خدارا يراري شوف عيني
على الأبوابْ
قماريها
وحواريها
وطواريها
بقت روضة بقت تشرب من الحامدابْ
تشربي عافيي من إيديّ
تدوِّي اليوية بي حِشْمي
تسوّي السّي وتبتسمي
تشوفي رهاب بُعُد نجمي
واشوفو قريب قُرُب نَضْمِي
اشوف العالم التِّحْتَاني
هيلا هوب وقف ناهِضْ
ودكّ عمايد الفوقاني
جوه الُّجب رَمى العارضْ
وفي السّابو الدّمَار أفراق
عريق الحب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي
وارْمُلا من عصب عشّاق
أنُطْ تُلُّبْ واجيك عارِضْ
واجُرْ نمَيِّ
أدودي لهاتي بالغنوات
عُقُب يبرد حَشاَك يا امِّي
تسوِّي السّيْ وتبتسمي
تسمِّي الشّعب وتعتّصْمِي
بحبل القُدرة تتفرّقْ
ظُلُمةً فيها تتحرّقْ
صُرُمةً قالوا ليك قِسْمي
أدودي لهاتي بالغنوات
عُقُبْ يبُردْ حَشَاك يا امِّي
تقلبي الكلمة بي الكلمي
ضُراعِكْ يرْمِي ما يَدْمِي
تقيفي بعيد عن الشُّمات
تكوني اقرب لي من إسمي
واضُمِّكْ بارتياح يا امِّي
أحبِّكْ صَاحْ
وصَاحْ حلمي
ولاكي سعية للضَبّاحْ
ولا شمش الصّباح حِزْمِي
ولا كَتْف السِّلاح سوّاحْ
ولا نزف الجراح ألمي
هيا انحزْمي
هيا انخلْقي
هيا انعتْقي
متين مو دايرة ري تسْقِي
ولا في إيد النّزيف نبقَى
ولا في إيد الخريف تبقِي
ولا الفيضان يبدِّع بِكْ .
ولا في القيفة تنهدْمِي
ولا انْ جَاتْ حارّه تنهزْمِي
ولا يغشى الغُلُب قلبِكْ
ولا تشقِي
ولا انتِ تخافي لا تَدْمِي
ضُراعِكْ يرْمِي ما يَدْمِي
فيا حزن البلد عوك كَرْ
ويا سعد الولد
ضَرْ ضَرْ
مع النّسْمِي
و ألِوْ قيمة العَمَل عِمِّي
وافتحي ظلمَتِكْ للضّي
سِنِّي على النضال إيدي
سوِّكي بالهُتَاف فَمِّي
شوارعِكْ لَيْ
دَويها عَلَيْ
اذا ما اخر العلاج الكَيْ
مراويدِكْ حُمُر صَمِّي
مراويدِكْ حُمُر يا امِّي
بليلتي ولا ضبايح طَيْ
قليلتي ولا كُتُر سِمِّي
وطني ولا مِلي بطني
سُكَاتي ولا الكلام النيّ

سطوة محاسنك

كان نفسى أقولك من زمان

بى الكاتمو فى سرى .. ومكتـّم فى حشاى

مدسوس سنين

بى الشايلو فى عيني معزّة

وفى القلب

ريداً يخاف الغربة والشوق .. والحنين

زاملنى زى خاطر الفرح

وكتين يقاسم الهم .. عزا

وكتين مدامعى تكون جِـزا

وتفتح مباهج الليل .. ظنون

**************

كان نفسى أقولِّـك من زمان

سطوة محاسنك عندى ما كسرة ..جفون

وكت العيون تعبرنى زى خاطر المسا

سطوة محاسنك ما الرخام .. الفى الحرير

وكت الثغير يفجعنى

بى حرفاً .. قِـسـا

سطوة محاسنك عندى وكتين كبريائك ينهزم ..

لى طيبتى .. بى لفظة حنان

وكتين مشاعرك .. تنسجم فى عمرى

تنفح قلبى بى رعشة أمان

سطوة محاسنك عندى

وكتين شوقى يصبح فى هواك

ليل عزّة

ما بتعرف هوان

***************

كان نفسى أقولك من زمان

عينيك وحاتك غربتى .. وأهلى

وبلادى الفيها ضايع لى زمن

عينيك وحاتك شوقى لى زولاً ولوف

من بعدو ساب عينى .. سهن

وانا كنت داير من زمان

أشرح حكايتى معاك ألف

أحكيك .. وأزيد القول .. إلِفْ

وأتمنى لو قلبك عرف

كان من زمان

من قبل ما فى قلبى يتحكـّر

زمان الغربة فى جرح الأسى

من قبل ما حرف الحقيقة الحلوة

.. يتبدل عسى

ويصبح أمانى كسيرة

.. فى خاطر الحنان

الشاعر/قاسم ابوزيد

علمينى الإحتمال
* * * *
علمينى الإحتمال

وكيف أجاوب عن هواك

لما يغلبنى السؤال

لما يتأرجح منانا بين مظنة وإحتمال

ما بحسِّـك دونك .. إنتى

ما الحقايق .. ما الظلال

والحرِف بِعرِفْ مداهو

حتى لو جفّ الخيال

*****

علمينى الإحتمال

ونحن كيف نقدر نقاوم

فى بلد ملّ الحِوار

صرخة بتموت فى المزارع

وزيف مشتّت فى الشوارع

بين مداينّـا الكُتار

علمينى الإحتمال

ونحن كيف نقدر نقاوم

هجمة الزمن التتار

وكيف نحصِّن ومضة الأمل

البيشرِق كل مرة

وفى إنتظارى

إنتى والشوق فى المجرّة

برق خفّق من خدودك

ورعد يفتح لى دروبك

وغيث يقفّل فى شجوبك

*****

علمينى الأحتمال

ونحن كيف نقدر نجمّع لى ملامح الليلة

من عُمق المدار

علمينى الإحتمال

ونحن كيف نقدر نقاوم

فى بلد ملّيت صِفوفا

ولاّ أمشى على المزالِق

فى بلد نكرت دِفوفا

ولاّ أشيلِك وإحتِمالِك

إمّا أدّيك إحتمالى

يا أشيل منِّك ظروفك

ولاّ أرجّع ليك حروفِك

غنية تمرُق من دفوفك

برجا هجعة ليل طيوفا

*****

علمينى الإحتمال

ولاّ نتعاهد نواصِل ..

فى الظروف القاسية .. نمشى

وفرحة الأطفال نشوفا

ومضة تمحوها الظلال

ونظرة تغنيك عن سؤال

فى خيالك .. وغيم ظلالك

لمّا يتجاوب سؤالك

ترفع الأحزان ظروفا

وتنقر الأفراح دفوفا

لمّا نتقابل نحقّق

فى وجودى .. وفى وجودِك

أحلى شوف

ة[/size][/color]

لحظة شهيق :عاطف خيري

نكر صوتك صداك غالطني الزمن فيك
شهرت على الجفاف وعدك بطاقاتنا
الخريفية رجع فاضي الكلام مليان معاك
أتبرجت غيمة وشهق جواي صوت جدول
مرقت على المطر حفيان لقيتك والرزاز
مدخل وناديتك أقيفى معاى نشيل كتف
الغنا الميّل ونتخيل حلم دونك بيتحقق
وقبلك خيل دماي واقفة على شرياني
تتشهق وبرد صوتك صداك غنيتي
رشحت حلقك لي إذاعات الشجر
والمنتظر من عودة المدعو المطر
للطنابير والمسادير واللسة في رحم
القصيد والدابو حسة وفى سوق عكاظ
بين مزادات الحروف غيرت رسمك
واحتكرتك للظروف للزمان الجائى
واللحظة اللي فاتت منك هسه
يا واقفة بين جرح السحاب وبين
شهقة الأرض البكر ما كان دا ريد
كان إحتمال تغيير قوانين حركاتك
مابين حديثنا ولحظة الفعل الحقيقي
وإنتباهك إنتى للشارع البيرحع
تانى لي نقطة بدايتو وإنحيازك
إنتى للشارع البيرشح في مسام
رمل التوقع ما إتعرف قانون نهايتو
غايتو أمشى بالدرب البطابق فيه
خطوك صوت حوافرك
يا فرس كل القبيلة تلجمو و يكسر
قناعاتو ويفر يسكن مع البدو في الخلا
ما يرضى غير الريح تجادلو وتقنعو
إفترضتك لون أساسي يمنح اللوحة
إزدواجية القراية ويفتح الضوء بين
خطوط الريشة والخط الإضافي
الجائى من شبكية الزول المشاهد
وإكتشفنا الرسمك وأنا نفس
التوارد في الخواطر
نفس أرقام التذاكر البيها
سافرنا وشهدنا إنفجارك
في الأرض يا سمراء يا واضحة
ما غنيت يوم جيتك صدفة
قبل أبداك كان غصنك بشر
يوم ما كان إحساسك مدا
عرّج الغيمة الفيني ومطّر
لحظة طار عصفور من صدرك
ردد فينا إحساس بالإلفة
ودوزن عصب الزمن الأشتر
واتوكلت عليك وقلت
المارق منك
داخل جرح الوردة وراسم فوقها غناوى الطل
المارق منك رجّع للغابات العرب العاربة
وللعتمور الزنج الهاربة وادّى الكون
مفتاح الحل المارق منك شادد عصب الورقة
وحرفي وراسم في اللاوعي سكون
مواعـيد صحوه وحلمو ونومو شارّى
يقينك في صمتي سارق لحظة إنى أفكر
المارق منك مارق منك أو مت شهيد
ما تضاري وراء الدعوات ما تتلبسي
الفرح الفات بسكن فيك النغم الزائف
ويسرق حاسة شوقنا الواقفة على
رجلين جواي ،نحن الهاوية والمتطامن
من الأرض آهـ من نحلك سـاعة يرحل
ولمن يكتب فينا الحنضل ويختم عمره بفعل الشهد
قال الجدول طلوع النخلة مرور الريح واحد
لكن الريح بيعانق حقل ونحن بنطلع نخلة
وننزل ونكتب في ذاكرة الصفق الأخضر
سجنا الريح في الورق الأبيض
وجهناها ضد التمر الناعس يسقط
فـى قبعة الحارس ذي الكان بيناتا وراح
قالت غيمه بين قوسين غيمه لئيمة
أولاد الشارع فهرس لي كل المدن
التهرس جوفك بالأسمنت قالت ريح
شوف الناس قنديل لو ما نوّر يحرق
كوخ وباقي الحلة تنور أو جبة جوخ
أو ينزل بوخ يقول لي النسمة الزائفة أقيفى
لو تتفرد ريح تتشرد ريح ريح الخوف
لو تتفرد ريح تبـدأ تفرتق ضفاير المدن
النائمة تعيد تسريحتك
يوم سمايتك شكل قامتك كيف تموتي
وتحيى تانى ويوم قيامتك هو البيدينا الثبات
يا مجلوبة في قافلة رق ما بستحمل صدرك
رصاص الظلم يا صابت رحم الفال
يا قطعت حبل الود يا كنا نبيعك يا نسرق
اخترنا النار الضلها يحرق
طمناك إنو الدنيا بيخشها ضوء يجرح
جلد العتمة لما الليل قربان فجرك
يا بت يا نيل لو نامت قمحة على الأبيض
اتشرت زيو زاد الأبيض في غيه
مدد رجله اليسرى ماكان الكٍسرة
جاتك من بره صفرة ومنكسرة
زوجناك الشهداء أولاد الكلب
الماتو عشان الشعب زوجناك
ما عندك ضرة زوجناك ما جاتك ضرة
ما إنشاف ما عونك في الحلة يساسق ويلقى فتات
قال الأبيض للأزرق يبقى ضد الإنتباه
ضد تواريخ التمازج البيني بينك
للبشوفك في مراهفة الخرائط
فينا من وجع المسافرين واطه ما لاقت هوية
ردَّ الأزرق مطر الحبش لوكان نبش جواك سقف
وهدّ حيلك في الدواخل وشدّ عصبك في المداخل
صوت مراكبي وجيت بتسـأل فـي القمح
وفينا من فرح المسافرين قصة الشمس القضية
يا أعشاب النيل الأبيض ما تتضارى وراء الدعوات
أقرأ تاريخك وأقاوم وأسأل جبين الفجرألقى الفجر
مطعون في القـفا هل سافرت في دمك المحقون رجا
حبة غضب ما شلنا جمرك وإنطفا جوانا نارك والمطر
جائين بي الكتابة وضربة النـاس المهابة
لو هزّ نخلك بـاشبزق ما فارق التمر السبيط
ما سـاور الطـورية شـك إنو الأرض أنثى
وبتحمل بي الحـلال مين اللي قال إنو المسافة
البينا بين الشمس طاقـة أو ميـاه النيل
بتدخل فـي عـروق السنبلة المسقـية بي
عرق الجعانين والمساهرين بالبطــاقة
أقرا تاريخك وأقيف جواك والزمن النضيف
جـواي مـن جواك غضب سلم مفاتيح
الســؤال جيل الشمس موكب حريـق
واقف على باب الدخول بيناتو بينات الوصول لحظة شهيق

غنوات: محمد طه القدال

بقول غنوات .. واقول غنوات
فى البلد البسير جنياتها لى قدام ..
بقول غنوات
وفى الولد البتل ضرعاتو فى العرضة
ويطير فى الدارة صقرية ..
ولو السمحة تلت إيد
ومدت جيد يقوم شايلاه هاشمية
يشيل شبالو وختفة ريد وفرحة عيد ..
وريدة روح وحمرة عين وإيدية
بقول غنوات .. بقول غنوات
وفى الولد البشيل مدقاقو قولة خير على القمرة
يقابل الجاية متحزم ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
و قبال حول تغيم غيمة قبلية
ترش الدارة والحدبة الصعيد الحلة
يا فرحه نداوة الصفقة فى النسمة الصعيدية
وياجهرة نهار الليلة بدرية
رحيح جنياتنا فى
الحدبة الصعيد الحلة
يا قمحاتنا هو لبلب ...
يا سمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب ..
ويا حجواتنا يا دعواتنا هو لبلب
سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
وزى برق السماك الجابها دغشية
وزى زغرودة البطن الكبارية
مرق من شامة القمرة
مهيقت بى وداعة الله
ومقدم بالعديل يبرا
تعالوا ابشروا ياجنيات
شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
مزارع بات على عشقين
تراب بلدو
وسماح فوق بت
مزارعية

طيبة: محمدالحسن سالم حميد

كل ما تباعد بيننا عوارض ..

كل ما هواك يا طيبة مكني

تلد الغربة القرب الواحد ..

بيك أسمي الشوق وأكنّي

لما أفوتك من دون خاطر ..

أو دون خاطر مني تفوتي

بلقى حبايب فى كل حتة ..

وكل بيوت الفقراء بيوتي

لا غيرت وراك الجتة ..

لا بدلـت ملامح صوتى

لا غافلنى وهادن فنى ..

رمل المدن الما عرفتنى

تبن الشوق الصبرو مصوبر ..

للارياف الكم وفتنى

وللاطفال الناشفة ضلوعها ..

ونازفة بغنى

أطّمن روعها واهدّى دموعها ..

ببسمة بكرة الماها تمنى

ولا مصنوعة

أغنى لشعبى ومين يمنعنى ..

أغنى لقلبى إذا لوعنى

مخير دربى اللي ما رجعنى ..

إذا طلعنى نخلة القر

ولا الغربة الكدرومية ..

تنزل غنوتى بقمرية

أو وقعنى فى بطن الجب ..

يطلع يوسف بألاغنية

أغنى الناس الما بتسمعنى ..

المنى بعيده المبعد عنى

النادى نشيدها وكنت المعنى ..

الأيدى فى إيدها..

وإيدها بتبنى

فى دنيا جديده

اليوم راح تبنى ..

واريت غنواتى فى ناس شغالة ..

تكون سندالة

وعود طورية ..

ضراع رجالة ..

كتاب أطفالها ..

وجملة فالها الما مكرية

سدة مالها وبقة فالها ..

فى ليلة الدخلة على إسمى قضية

حبيبة قلبى يا سودانية ..

يا أسمى معانى فى زول بيعانى

يا ود ضكران يا بت دغرية ..

وانا إن سامعانى فضلت

أغانى غبش فقرية وروح ماليانى ..

هويتك منك يا دافعانى

..براحة يدى كما الأشواق

ويا جابدانى برفق على

وما بتحير بين الفوق ..

وبين الناس التحتانية

إلا مغير ولا عقوق ..

ولا كفيف الإنسانية ..

ومنك وين يا كاشفة عيني ..

بنور الإلفة ضي الحنية

وحلم العالم ناس تتسالم ..

والبني آدم صافي النية

للاطفال الناشفة ضلوعها ..

بطمن روعها وتبدا تغنى

غناوى البكرة الكم مسموعة ..

حسيس طنبارة مع نقارة

صفقة حارة ودارة تغنى ..

فيا حلتنا عليك ترابك

وأنت شبابك زينة الجنه ..

أحلى عروس البلد إلتنا

ولا الغبش الرابة تهنى ..

ولاهدير المدن التصحا

وتمحى ظلام الحاصل عنى

من طرف عمر ابراهيم الأربعاء يناير 09, 2008 7:46 pm

شوك الشوق
محمد الحسن حميد
*********
شوك الشوق لى الشوف آ خَىْ
ضارب قطن النسج الحى
يا منقاش أحزانى إنشرت
وادى الفرح إتمدد صَى
يا راحلين عِـنْ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
*************
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو

من طرف عمر ابراهيم الأربعاء يناير 09, 2008 7:50 pm

طوريتك فى الطين مرمية –مصطفى سيد احمد – كتبها ثلاث شعراء

كتب مصطفى رمية القصيدة.وهى حتى الفصول صابة الجفاف ...ثم الشاعر محمد المهدى عبدالوهاب المقطع الاول طوريتك فى الطين ...الى كلمة "مبلوعة" ... و اكملها الشاعر صلاح حاج سعيد بطلب من مصطفى ليكون ذلك النص العجيب لشاعرين مختلفين اضافة الى مصطفى نفسه..والغريب ان القارئ لا يلاحظ اى اختلاف فى وحدة النص او اتزانه وكانما كتب من مرة واحدة بواسطة شاعر واحد
...........
طوريك فى الطين مرمية
وكوريتك يابسة ومجدوعة
لا غيبتك كانت مرضية
ولا فوتك كانت مبلوعة
***********
اللهب الضوى الليل قناديل
فى عيون النجمة القطبية
والتعب المد ضراع النيل
سجادة فقرا مزاورية
سائلين عنك ويوماتى رحيل
لموانى المدن النفطية
شقيش ما تقبل يا ابو الحيل
فى قلوبنا مواجعك متكية
****************
وابعتلك شال الحب مرسال
تايهين فى بحرو مراكبية
بكتب على صدر الموج امال
اطفال عمال ومزارعية
كيف حال يا ابوى
كيف حال يا خال
بتمسى بيوتنا الكاكية
حزنانة بتبكى مال الحال
والزمن السابكم ايدية

مكتبة للراحل الخالد مصطفى سيد احمد

مكتبة للراحل الخالد مصطفى سيد احمد

رد: مكتبة للراحل الخالد مصطفى سيد احمد

رد: مكتبة للراحل الخالد مصطفى سيد احمد

رد: مكتبة للراحل الخالد مصطفى سيد احمد

رد: مكتبة للراحل الخالد مصطفى سيد احمد

رد: مكتبة للراحل الخالد مصطفى سيد احمد

رد: مكتبة للراحل الخالد مصطفى سيد احمد

رد: مكتبة للراحل الخالد مصطفى سيد احمد