نفسي أبقى رئيس ياخ

بقلم طارق جبريل:

الحبيبين كيفنكم
وحاتكم فترت من الشغل
ياخي انا ليلي ونهاري في جريدة الجن
لا سوينالنا قريشات
لا كمان ارتحنا
وحات نضري اشتهيت ابقى رئيس
اماني ما قاعدي تعجبني العربيي السودا ديك وبتلمع
والعلم يرفرف قدامها علي الملايي الجديدي مفروشي في عنقريب في حوشا فيهو زيفي وهمبريب
وتكون ماشي وسط الناس وتقول كدي تتفتح من لااااافوق زي غتا البير وكتين تجي تنشل المويي
وتخت النضارات ألات البيرسون ديك وتمرق رويسك ويدينك وتقعد تحي في الجماهير
والهوا يدقشك في اضنيك..
والخرابين البي الجنبات ومغزغزلهم سماعات في اضنيهم يحرسوا فيك
والجماهير دي تسكت توجوج وتهتفلك
وانت لاك عارفو هتاف لاك عارفو نبز
وتقعد تشتح في يديك يمين وشمال لامن اباطاتك يعرقن
وريحة الصماح دي تجي داقشاك
وكله من اجل الجماهير الابية
ووكتين تصل الساحة الداير تخطب فيها يقولوا كدي المواتر
الزي زينة الحفلات ديلك يوجوجوا ويييييو وييييو
ويقولوا كدي يفتحولك الباب..
وتجي نازل كلك تلمع وعصايتك في ايدك
وتقولهم جهزولي ساحة كبيري فشان النقزي
اصلو نحن نقزينا ماهو زي أليل الجعليين فوق ضهور السيارات
ويقوم كدي ود النصري يديها نقرة في الطنبور
وتقوم كدي تديها نقزي نقزتين وتترتر من هني لا هني
وامة الله دي تنقز معاك وهي الجوع كاتلها
ويقوموا يدوك الميكرفون وتقعد تفسي
والناس دي توجوج وانت تزيد في الفسو: حا نسويلكم وحا نبنيلكم
نضمي كله فسو وطرورة كدي
والجماهير دي تقاطعك في الكلام
وانت تزيد في الفسو وتختمها بي كم الله اكبر كدي وتنزل تمشي علي قصرك
وتقعد في الكنبات المنجدات بالجلد ديلك وتضرب في الكنادش
وتستقبل دة وتوصي دة وتدي النصايح
وبعداك تمشي علي الاقامة الرئاسية والتباخين يختولك الغدا الماهو خمج
وتقعد تلوغد في طيبات الله دي وتنسى اللوبي عفن وصحن البوش
وســخــينة الدكوة والعجور بالشطة وعفنة التركين وملاح البطاطس ابو زيتا مطفح
وشويتين يجيبولك التفاح والاناناس وتسرح وتتذكر زمن الدوم والقنقليز
وتكجم في التفاح وتتمطق..
وتقوم تاخدلك غمدي صغووويري
وبعديها تدخل علي الحمام الماهل داك
والمقعد الابيض العلي صابونة اللوكس داك
وتسكت تمرق في الخيرات الضربتهن قبيل ديلك
وتنسى المستراح والضبانة الخدرا التنوني ديك
ورجلينك التنمل من القعدة فوق حفرة الادبخانة
والعجب ان كان عندك امساك تقعد تتعصر وتعوج في وشك
والعرق يخرخر فيك ويتسايل من تالا رقبتك
ووكتين تطلع تلقى رجلينك منملي وواجعاك تقول كنت بتسوي في سويدي
وصماحك يرمي الصقر..
تنسى دة كله وتقعد في المقعد المريح داك اليشهيك الهُرار (اكرمكم الله)
وتقول كدي تديها غتسة في البانيو المرشوش بالكلونيا
وتقوم كدي تدخل علي الجاكوزي والموية دي تفور فيك زي القاعدين يسلقوا فيك
وتقوم تتمشك بالليفي الليها مساكات ديك ماها متل الليفي ام بذر ديك
وتقوم تتنشف بالبشاكير العلي الجلاليب ديك وليها تكي
وتنسى بشاكير الجن ديك لا تعرفها بشكير ولا تعرفها صنفرة
وتلقى الكريمات دي مطنبجة وتسكت تتمسح وتدلك في صلعتك
وتطنبج اباطاتك بالريحي السمحي
موش البخاخ العلي النفتالين داك ويسويلك حرارة في ابطيك
وتقول كدي تنضف اضنينك بالخرابة الفي راسو قطن داك
وتنسى بعبيص اعواد الكبريت في اضانك والحركة ألت حلقك معاها كض كض كض كض
وتمرق علي الاوضي الفسيحي ألتك وتشوف داير تلبس شنو
ومنو الحا يجي يغنيلك وسط الاقامة الرئاسية دي

الرسول فيكم وروني ابقى رئيس كيفن

أواقف الأخ / طارق جبريل في كل ما ذكر ولكن لا أتفق معه في حكاية الغميدي دي ... الناس ديل النوم يضرو ليهم ... نحمد الله علي الضبانة الخدرة والنوم العميق,,, ولو عايز يبقى رئيس ما يكتب جنس الكلام الكاتبه دا ... السياسة مافيها زول بيدي النصيحة !!
اليفك درب النصيحة وبيصل كان ما رئيس قريب منه .... شكر على الإنتقاء الجميل هيثم .

نفسي أبقى رئيس ياخ

نفسي أبقى رئيس ياخ

رد: نفسي أبقى رئيس ياخ