قصيدة لسان الحال غلب للشاعر حاتم حسن الدابى

هذه القصيدة مهداة لكل مغترب معذب ماعارف يعمل شنو ولا يقبل وين ؟ ( قبلها يمين مانفعت قبلها شمال ما لتقت ) وانا شخصيا القصيدة دى كوتنى كى المشكلة الايام تجرى والسنين كمان والعيال كبرت وامهاتن كمان ونحن الواحد ناسى نفسه (يلاقى ليه واحد من الاولاد او البنات الخلاهم صغار وهسع اتزوجوا واغتربوا ) نقول قولتنا المشهورة ( العيال كبرت ) والواحد نسى نفسه انو هو الكبر 00 الرأس امتلأ بالشيب وكيس الدواء بقى ملازمنا محل مارحنا ومحل ماجينا والشى التانى داك خلوه ساى ؟؟ المصيبة انتو ماعرفنها والمطلعة صليبنا هى عودة المغتربين من الاجازة ( الرجال البقدروا يمشوا السودان ) مازى جماعة تمتعوا باجازاتهم خارج السعودية فى دول اخر غير السودان وناس عملوا التأشيرة يقدمو فى رجل ويؤخروا فى الرجل الثانية لآمن التأشيرة انتهت المهم الذين عادوا بعد انقضاء اجازاتهم تسأل الواحد يقول ليك البلد حلوه بس عايزة قروش وكلمة بس دى ياها المطلعة 000 والجماعة التانين يقول الواحد فيهم احذر واياك والسفر00 واحنا نبقى زى العايم وقرب يطلع للبر وفجأة تلفحو شيمة تغرق بيه وقلنا الروووووووووووووب واتجرسنا عشان كده انا بطلب من المدير بأن يفتح لينا باب للنقاش وامكانية وضع الحلول ده اذا كانت فى حلول ونحن بنقول معاهم لسان الحال غلب ونص 000واليكم القصيدة :
********
للشاعر حاتم حسن الدابى
***********
معذره لو معاك منى الكلام حره
معليش الخطاب كاتباهو مطره
حرام والله مننا انت تتبره
وخمسه سنين تفوت وتجى فيها فد مره
وراك انا كم شقيت وعشت فى مره
وبقيت مع الصغار الهوم للعيون قره
بخاف الغرق الاصلو لا دره
وقالو ادب الصغار والعقده من خدره
حليلى انا الزمن ضى خاطرى مانفره
وخمسه سنين غياب مابتحملن حره
انا الحاضن العذاب وامالى محتضره
وانت الفى النعيم ماخات حساب بكره
مسكين التقول فى الاغتراب ستره
وتتناسى القروش فى يوم تكون ضره
حليل زمنك وكت عايشنا بالاجره
ياريت لا عرفت ولا مرق بره
الكاتمه فى جواى كتير متملكه الجوف والعصب
ماكت دايره اقولو ليك لكن لسان الحال غلب
مابنسى يوم ودعتنا وسافرت فى غرة رجب
خليت وراك الدار حزين تتباكى والدمع انسكب
اعذرنى والله العظيم لو ما الضروره انا ماكتب
وانا خايفة من بعدك يكون الضاع هو ضعف المكتسب
اليومو داك ناس البلد هنونى شايقية وعرب
قالو لى مبروك خير وجاك يكتب سلامتو اللى اغترب
قالو لى دووب نجم السعد طلاكى من بعد احتجب
يادوب بالك استريح وتنسى العذابات والتعب
فضلت احسب فى الشهور قاعدالى فى نيران لهب
صابره وحريصه على الولاد لايبقو للريح فى المهب
سديتا خانتك من مشيت قايمه بى واجبى كام واب
والاسره يضنيها المسير تتهاوى لو مافيها رب
والله مابنكر جميلك لينا برضو ثناك وجب
موكب هداياك مانقطع كان ستره فى الزمن الصعب
لابسين وماكلين والنعيم كايلنا فى يوم ما نضب
وعايشين معيشة المترفين طولنا والطبع اتخرب
حامدنو كان قلت الاكل والله للتين والعنب
اما الجناين شيله كاب وافرى الفواكه والرطب
البيت مفروش بالحرير ومليانه ايدى باالدهب
لكن خساره على محل عاش سيدو خمسه سنين عذاب
الشئ المهم ماقلت ليك ليه انت ماظنيت حسب
كبرو الصغيرونين خلاص خايفالن الطبع الكعب
وصلوها مرحلة الخطر والامن مازال مستتب
وانا كت قادراهم زمان لكن بعد كبرو اتغلب
حصلنى قبل الجد يفوت دوبنهن فوق العتب
قبال نحصد الخير ندم ولابيجدى كان لمت او عتب
خايفالن الطيش فى الدروس ومابرضى لو واحد رسب
خوفى المتعبنى الكبير بعدين يمرقو بلا ادب
وريتك الحاصل على لا فيه ثوره ولا غضب
شان الحديث مايبقى نى والواحة يكتنفا الجدب
انا قلبى مازال لسه حى ونجمو الملهلج ماغرب
اخر كلامى تردو لى لا ابقى بكره انا السبب

والله ياعمدة انا غايتو تعبت ومليت خلاص من الغربة 27 سنة وبعد شهور بسيطة بتلقاني لافي مع القد (قدوووووووورة) دا عذاب مالية نهاية خلاص كفانا (لاقروش إتلمت ولاشعر الراس مسكناه من البياض)

شكرا مرغنى ومعتصم على المرور وافتكر يا جماعة الموضوع عايز نقاش والسؤال موجه بالأخص لناس السودان لأن رؤيتهم اوضح وبنستنجد بأخونا الصغير هيثم وبقول ليك يا لحاق بعيييييييييييييييييييييييد قلنا الروووووووووووووووووووب