قوات الهجين / صديق النصرى

بسم الوطن الدابو صحح للمسار
وبسم الوطن الدابو اتمطق حلاوة الانتصار وبدأ العمار
يكفي الدمار بيروت وبغداد وقندهار وزي ديل كتار
دي وصية للساسة الكبار النختلف يمنه ويسار
بس بالهداوه وبالحوار لا مدت ايد لا ضرب نار
ممكن نصل حد الكجار بس مانكون في يوم صغار
جايينا هم اكبر من الكرسي الرحيب
وقدامنا غم يتساوي فيهو عدو وحبيب
الفرصة جات النتفق أنا وابن عمي علي الغريب
بعدين كدي النجي نختلف بعد الجراحات ماتطيب
بعد الدخيل الجاي ظنو كمان يخيب
يلقانا قشطة علي عسل يلقانا كباية حليب
يلقانا فنجان جبنه فوق هباب في ضل الدليب
يلقانا دخان الرصاص حولناه نسمه وهمبريب
ويلقانا سودانية صح لا فينا جساس لا كليب
ايدينا في ايدين بعض يلقانا فوق فد عنقريب
نتناجا في الوحده السلام نتناجا في العشم القريب
بعدين كدي النجي نختلف بعد الجراحات ماتطيب
يامسلمين الراس منكس لا متين
دارفور منارة الصالحين نرميها في حضن الهجين
وحنمشي وين
اقسمة بالله العظيم وأقسم يمين
لو شارون لقينا يصلي في جامع الضعين
ماتطولنا قوات الهجين
أقسمة بالله العظيم وأقسم يمين
لو بوش يأم الجمعة جوة معسكر أبو شوكة الحزين
ماتطولنا قوات الهجين
أقسمة بالله العظيم وأقسم يمين
لو اولبرايت جات منقبه صايمة صوم الزاهدين
ماتطولنا قوات الهجين
أقسمة بالله العظيم وأقسم يمين
لو كان بلير يدينا نبذه عن الرسول واصحابو عن موته وحنين
ماتطولنا قوات الهجين
أقسمة بالله العظيم وأقسم يمين
لو مجلس الامن اجتمع في مكة جوها معمرين
ماتطولنا قوات الهجين
ماتصدقوهم ديل أبالسه ومجرمين
ديل حكمتم فرق تسد ديل مكمن الحقد الدفين
قوات سلام هن السلام جابوهو وين وزرعوهو وين وعرفوهو وين
نحنا السلام بنعرفو بس في دولتين ياطوكيو يا اما بكين

( وانه قسم لو تعلمون عظيم )
يا ربى قسم الريس وصاحبو وقع ويييييييييييييييييييين

اشكرك يا عمده,, لكن صحي يا العمده القسم بتاع الراجل ده مشي وييييييين ,, لك الود

من أمبارح كنت عاوز أعلق على الموضوع دة لكن انشغلت

ويطلع مين (صديق النصري)؟؟؟!!؟؟

أنا يادوب عرفت الجاب ليك الضغط شنو ياالعمدة