ملتقي الاصحاب

خالدعمرحسن كتب:حريم اخر زمن مقلوب زمن افاتو منتشره ... زمن يوماتي في تطوير ويومي قيمنا ماشي وره
زمن فيهو الحريم فد لون حليل الخدرة والسمره.. كل علي بعض مخلوت ودنيا مقلبات صورة
وعليك بالله ديل حريم ؟؟ زمان اماتي زمنا شين وضع مااظن تطيقو مره
صبرا رغم ضيق الحال وتعبن وضاقن المره وديل اسع زمانن زين وكل حاجاتو في وفره
ورغم عن صفا الايام عايشات عيشه الامراء في البيت في وزي المافي خيط ماتختو في ابره
وكل طلباتا تبقي مجابه قدامه وقصاد نظره تقوم نصت نهار من نومه تلقي فطوره في الصفره
تساهر الليل مع الديجتال وترجاك نايمه لي عشره وعليك بالله ديل حريم ؟؟
ولاده تمسكن خدامه قاعدى شغاله بي شهره تغسل وتطبخ الخدامه ده ان ماجابوه من بره
ودايما مرهقه وتعبانه يوت مشغول دوام فكره بي الموضات واخر صيحه لون منكير صباع ضفره
كليب باسكال مسلسل نور ونانسي الادمنت زكره سهره صاله الضباط تي شيرت المرقه والسهره
اكل الجبنه والرجيم دهان ونعومه البشره قوام هيفاء وعيون نرمين تامر حسني والكاميرا
تهمل زوجها واولاده همها منظره وشعره وعليك بالله ديل حريم؟؟
زمان زمن الحريم بالصح زمن العيشه نار حمره زمانن لا فرن لا غاز كانن يوقدن العشره
يعوسن مره بالكروق ومره سعف جريد تمره عقاب كاويق نكت واشميق يجازفن ويرمن الكسره
تلحقه بي تحت فسراع تفطرو عامل الاجرة قراعين وقفازين تلحق شاية للغفراء
تسوي القهوة في الصبارة للمكنيكى فى المتره تلم المنسي والمجدوع وزوجها ماحصل نهره
لايوم مرة عابت زول ولازول بي كعب زكره بسيطة بشوشه والجيران يدورو كلامة شان درره
تداعب دا وتلاعب داك تضحك وديمه منسره وتزعل يوم يقولو فلان مرتو مقصرة وهجره
وقبل ماتمرق الجيران تقوم تنزل تقص وكره تطلق الفي الحبل ملويى تسقي العجلة والبقره
تكنس وتقطف الازيار تغسل شان ترد بحره تنضف عيشة للطاحونة درسا حافظة من صغره
تشد حلة غداها تقوم وتتوضأ وتصل ضهره يكون الفي المدارس جوها ياداب مارقي لى بره
توصى بطانه احرسو البيت ولاتمرقو النهار حره العبو غادي من القلة لاالقالي زول كسره
توصى توصى لما تفوت وبابه تكشرو بالوشره تمشى تصبح الملدوغ وتسالم الجن من العمره
تراعي الجار وسر الجار وسرها مابيفوت صدره تغيب ساعة زمن فسراع تشيل الفاتحة بالمره
و تقابل اخواته والبكاى وسفار البكي الجو وراء تسابق الليل قفاها اعوج تعود قبال اذان عصره
وراها غداء وصرار وحليب عواس قراصة بي تمره شاي مغرب ..نضاف فانوس ..غسيل العدي والعمره
تسوي شنو وتخلي شنو تلاوي اقدارة بي صبره قبل لون الحمار ينزل تغيب ويطول كمان سهره
تصل كفاي جدادة هناك تخافلو السرقة والصبره تسدو تصد ..حتالت البيت يكون فرحان ومنتظره
غامت السخلة بالبستله جارها من اضانة وره مسافة تنتهي وتحلب يكون فكاها فات وجري
تنادي يفوت تقيف تهرج صغير وشان طفل عازره صغير ماعرف لليلي بكرة بتلقي في كبره
ورغم تعب نهاره الطال ورغم شقاوة وفتره تنوم اخر بشر في البيت تحس قبال اذان فجره
تقوم تدقش تلوت الليل وترجاك حايمة في المطره تغتغت في التمر والعيش باقي خلاص عقاب مسره
تضايرو وتدخل الواقود تخاف يتبلا لابكره تفتش في الضلام فانوس وتوقدو تتور البيقرأ
جوه البيت مراة وراجل غباشة كمان كلامو بره شلوخة مطارقن نازلات جماله يحير الشعراء
تلبس من سويق ابودوم وديل لبسن تياب عفراء قصير مخملي وشفاف مخرم ومن طرف قاصره
تعطن راسه زيت كركار ولو في كريم ولابدره ولابتعرف درب كوفير ولامسحت كريم عمره
ولاودت هدوم غسال غسيلة تتمو بالظهره رفوف ثلاجتا المعلاق وتحت الزير وطين وترى
تعطنو خداره في شوال فريز تلاجة الفقراء تخيش فارغ الجركان مسلتا والحبل حبره
جريد الدوم تبلو سعف صنيع من امهر المهره اصابعه بالشلخ والجر يبردن من كتر ضفره
دا كلو عشان يفرشو بروش سباته ان جاها يوم شكره عندها تلقي كل معدوم ولاما علي طرف صاره
فايضه في السنة المحلاني يمسك حله بي اسره تشر الويكي بالهبود وتملأ غبار وشوك وشره
سعن مزرود غباشة روب وايى لبن تفرزو بره تهزو تخشو خش معلوم وشايل جناها في حكره
ايدا مخدة اللولاي ..تلولي متل حلم سفره حسابه تجردو راسا يشيل حسابه النقدي والجاره
حساب الواطه والبابور تسمعو من ضمن سوره تقييد وتقسم المحصول وتمرق الكلفه والبذره
عقل انضف من التاريخ زكاوتو تحير المدراء عايشي علي فرد موال تعب مكتوب وكان قدره
ابدا ماشكت لي زول ولاحسبت سنين عمره يقينه الدنيا مسرح ليل... نجم وتفرقو القمره
نهاية كل شين وسمح ولمة ناس تحت شجره عايشي زي الارض اسرار غلب دافناهو بين حفره
عارفه الدنيا اخرة كوم نهايتا صادي لي قبره لاغراها طين لابيت لابسي تيابة شان ستره
مانامت وساده حرير ولا عشمت تعيش بكره كفاح انسان نهايتو الموت حياتو يعيش زي الزهره
تعطر ساحة البستان تفرهد وديمه مخضره تموت تيبس زي الاحلام ولافد زول يجيب خبره
وعليك بالله ديل حريم ..وديل حريم.. وأمى مره ؟؟


مرحبا بك يا دكتور ومرحب بكل الناس