التشفيير أو الرندوق

(التشفيير أو الرندوق)
إجتهادات من تخاريف وزاكرة شخصي الضعيف ..

يا أهلنا طبعا" ملاحظين إنو في الأونة الأخيرة في بعض المصطلحات المستخدمة غير مفهومة للجميع والتي يستخدمها
(أولاد اليومين ديل) ...!!! بكثثثثثثثثثثرة ,,, ولكنها موجودة منذ القدم ...
أها ..
نحاول نخش في الموضوع :- بسسسسسسسي ملاي

... من ما تسمع (شفرنا ليهو) أو (شفروا) أوتعال (نرندق) أي نتعاطي (الرندوق لغة للحوار) تعرف إنو الناس ديل حا يستعينوا بمصطلحات (سجيبة عجور) عشان يمرقوك (سرة بربور السبكة شمار)
وسأحاول أن أبحث في هذا الموضوع وأستعين بما تجود به زاكرتي الخربة ,, وأطرحه عليكم قليلا" قليلا" حتي تستوعبوه وتكونوا (مفتحين وناقشين الوهمة) ...؟!!
والكلام الفوق داك معناهو إنهم حا يستعملوا مصطلحات (عجيبة) وحا يمرقوك (برة الشبكة) خاصتهم ,,, وما حا تعرف (الرآآ من الواو الضكر) في الكلام البقولوا فيهو ..
حلو الكلام..............

حلو الكلام ...!!

وحا نبداء (نشخ ليكم بحة بحة حتي نفوش) الغريق عشان الفهم يصل للجميع لأنو في (بشرية تغميدة لكو لكو ) وكدة ...!!
(الشرح لاحقا" لو ديل ما واضحات) ..

أها مثلا" بتلقي مفردة (يا عمك)
المفردة دي بتستخدم ل لفت إنتباه الشخص (الضكر) آي الرجل ..
وأذكر هنا أني سمعتها لأول مرة أثناء تأديتي للخدمة الوطنية ومندهش منها للأن ,,, أي في العام 2001 ولي هسة شغالة ..
(والله ماشاالله) عممرت ...؟؟ ولمتين ؟؟؟
دا غير ناس (يا ود سنترا ,,, ويا ود قلبا)
كمان فرخت ليها وحدات سغاار (يا حبة ,,ويا قلب ,, ويا حنين ,, ويا بلة) وبلة دي أظنها جاية من الاغنية بتاعت (بلة يا بلة دقا الرقم جلا) ..
بالله دي أغاني دي ؟ حليل زمن (جابا بالبكسي وسقاها الببسي ,,, جابا وجا ,,, جابا وجا ,,, قععدة في التندة وسقاها بيرنداا) أي ميرندا ؟!!
وهذه المقطوعة الجميلة للذين ليس لديهم علم بها ,, كانت تقال
ل إستقبال العروس عندما يحضرها عريسها (نظام زفة وكدة) ..
خطيييييير أنا ياخي !!

وسأتناول ثانيا" مفردة (التتي) ودي كانت (الجكسي)
ومفردها (الجكسوية زي ما قال العمدة) وإتحرفت ولا اتقلصت ما عارف لكن إتخييل لي مأخوذة من واحد أللّجن ما بقدر يقول جكسي ومصر ينطقا ف مرقت منه تتي والجماعة علقوا فيها ...؟!!
وهي تطلق للبنات ,, وبالبحث والسؤال عنها إكتشفت إنها قديمة وقديمة خالص كمان ... قيل : إنها كانت مستخدمة من قبل ظهور التايوتا في السودان ....!!
حتي إنها مذكورة في أغنية ,,,
(حني علي أنا يا تتي الحاصل بي سببو إنتي)
وعندما أرادوا تسجيلها للإزاعة تم تعديلها إلي
(حني علي أنا يا ستي الحاصل بي سببو إنتي)
لكي يكون وقعها طبيعيا" وجميلا" علي الأذن يعني
(حتي الذمن داك ما كانت مقبولة) ,,,
خليك من زمن الإستاييل وشيل الموبايل داا؟؟
و المرقة تاني هسي شنو ما عارف ؟؟!
وأضيف عليها زيادة" (قطععة(بكسر القاف) ,, دامة ,, حآاجة ,, نجف ,,
بهجة شديدة ,, حسس ,, شططة ,, البنبوون ,, حمّّام ,, وإيييييييييييك ,,, حدث ولا حرج ) وصولا" إلي (طبي ,,, وأظنها الموديل الأخير من إنتاجهم الوافر)

تمــريــن

ترجم إلي العربية المفهومة ما يلي :-

(قال ليك: (لكمساري شغال بطقطق في الفردة) :-
الشرتيت يا فرد . . .
كمية قالوا : طلبة
رد الكمساري : نشو يا ناس الفردة دي ما عملت فيتنام عدييييل كدا، حافلة دي ولا فصل ؟؟
طقطق للبعدو :
قال ليهو : فاااااااااام يا عمك
رد الكمساري : فام فيك يا ؟؟؟
رد صاحبنا : كنت خاتي الشرتيت في الطلوس ، واحد انترناشيونال عمل ليهو ياع
رد الكمساري : دقست يا فارة ، كان تخت الشرتيت في النكسون وتمشي فلطسين , يااا) ...
... تجي هنا تقول لينا فااااااام ....؟!!!!

الجائزة مقدمة من سعدالله للأساس والديكوور ..

ونواصل إن كان في العمر بقية ..

ياااااااااا بحة ما وريتونا كتابكم ؟؟
الفهم شنو نقلع يعني ..
(سلاي ورور سيرتونا حرير) ؟؟؟؟؟؟!

وعلى طريقة "الأستاذ" بلال موسى

باااااااااااااالغوا والله!!!!!!

والله يا هيثم ما قصرتا ..

الباقين ,,, زوووووول قال لي بتقول في شنو مافي ؟؟؟
والشكر موصول للمدير

زكرتوني بتاع أورنيش في موقف مع طالب

- الطالب بعد ما ورنش بقي يجادل في القرووش
وبتاع الأورنيش زهج وبقي يسوي في والله يا أمك (عمك)
إنت شغلك داا هنك (حنك) أدييييييييييل (عديل)
لكن أقول ليك يا فردة أنا ما داير منك شرتيت
قد بس ,,, وورينا شكل التلاشي من هولك (حولك) ..

ومن بديع ما ورد في تراث الراندوك بالكاف(وهذه رواية أبي الهجرس):
إن مجموعة "الموقف" -أي مكان وقوف البصات والحافلات والأمجادات- ذهبوا لأداء العزاء في زميل لهم ، وبعد الإنتهاء من الواجب تحدث مندوبهم مع والد الفقيد قائلاً:
(الجلك أبو الفردة...
والله الفردة كان أمين لي الدين
لكن
دقس واتلحس
أمسك شوية ال"بُقْ بُقْ" ديل
أنحن مشتتين)

صديقي الغالي شبرا
احكي لينا (وهمتك) مع الكمساري بتاع الحافلة
وعشان تذكر (لقيتونا حدينا)

الله يخرب بيتك ؟!!

حاضر يا وليد بس تاني ما تكررا ..

القصة قصة طلبة ,,, لمن كنت بدرس في (البرنامج التأهيلي) في الجامعة ..
راجع بالموصلات وراكب تحديدا" من صينية بري موصلات المركز الإسلامي عشان أنزل شارع المشتل أركب الجريف غرب قاصدا" (بيت العزابة) .. ودة كلوو موصلات ودفع ؟؟
لكن طبعا" بنص القيمة ..ب (بطاقة الترحيل)

أها
الكمساري كالعادة أديتو 200 جنيه نص الأربعمائة (بالقديم) ؟؟
قال لي ,,, دة شنو يا أممك (عمك)
قلت: طالب
بتاقطك: وريتو البطاقة (حقت السنة زااااااتا) !!!!
كنت قريب ليهو ..
قال لي: بطاقتك دي منتحية ؟؟ (منتهية) (أي الصلاحية)
قلت كيف ؟؟!!!!
قال بثقة: دي منتحية من شحر (شهر) نفمر؟!! (نوفمبر)
وحسي أنحنا في شحر ستة ؟؟
قلت: لا ياخي ؟؟ شهر نوفمبر دا معناها شهر خمسة !!!
يعني أنا يادووب طلعتها لي شهر .. شكلو صدق وقلب الحوار ,,,
وراكب قدام ليي؟؟ انتو مخسسين ليكم الكنبة الوراآ ؟
أنا زهجتا ..
قلت ليهو : ياخ ما بركب وراآ ما كلها مقاعد جوة الحافلة ؟
الكلام ما عجبو ..
قال لي : تعرف يا أممك بس لقيتنا حدينا (هدينا) أأأأآآ لو ما كدة
ولاي كان بنتقتقك(بنطقطققك) وندووسك أآآدي ؟!!

وبالجد كان بطقطقني 4في4 دا غير اللهجة المعروفة ؟؟

زكريااااااااااات ... عجيبة !!!

ح أواصل وأعمل (حميل) من تطنيشكم ؟؟؟

شرح لبعض المفردات :-

الحاجة دي دسيسة يعني سمحة مبالغة..

- قاطعة فيني عرق يعني مكسر فيها للأخر

- نار منقد أو نجاضة يعني شديدة شدة كدا مباااالغة (خطرة)

- شتات خالى محطات يعني مشي أو جري بدون توقف

- تفتيحة وشايل مفاتيحا يعني ده زول مقرم شديد خالص وعارف الحاصل

- شرط للأرض يعني دي بت سمحة سماحة غريبة

- زول ما عندو حديدة يعني زول عدمان التكتحة (مفلس)

- نحل الحفلات يعني ناس لا معزومين ولا معروفين

- كاسر كرونة يعني قاعد في حته بحبها ... زي لما اقول خالد كاسر كرونة في المطبخ

- حبكانة يعني حب و ريدا

بجن بعد داك حاجتين بعد الحبكانة

- ضوء البيت قدم الخير (تتقدم لي أهلا)
- أو كوستى ربك (الحب شبك) (وتصهيين علي كدة)

طبعا لو ضوء البيت قدم الخير، حا يكون في احتمالين :

الأول = أبو البت يعمل إيهاب توفيق (يوافق)

التاني = أبو البت يعمل الجزيرة ابا (يرفض)

لو حصل الاحتمال الأول حا تكون النتيجة
يعني عقد الجلاد (العقد) وبعدين عرس الزين (العرس)
وبعداك برج الحمل .. (واضحة دي)؟!!

ولو حصل الاحتمال التاني (الرفض) حا يكون هناك احتمالين
الأول العريس يركب راسوا ويتمم العرس نظام ام ضريوة..(بالدس)

أو يستسلم ويعمل فتيحاب (ينسي الفكرة) بالنسبة لعرس الزين وكدا.. وكمان كان جنتر يعني (جنّا) (يمشي يلقط ورق) وكدة ..

ديل براهن :-
عشمانة أو عائشة الفلاتية =العشاء
ابو الجعران = جعان
عمل نايم = طنش
قزاز = حاجة جميلة
كسر تلج = عمل فتنة او بتاع فتن
حمد لبد = اتدسا او زاق
شرتيت + تشدير + قنزب + تفتوفة = قروش
شرحبيل احمد = مشرور
بايركس = بت بايرة
دقا جرس = يعني اعترض بشدة (زيي كدة) ؟!!!!!

- وكان حيين بنواصل ..

شوف يابحة

يا إنت داقس
يا في روايات عديدة للراندوق:
لأنو أنا بختلف معاك في :
1- كسير التلج : تعني التملق والمداهنة
2- شرحبيل أحمد : تعني شرح المحاضرات أو ما شابهها

أها:

بقيت على شنو؟؟!!؟؟
إنت دقوس ولا في أكتر من رواية؟؟؟؟؟؟؟؟

يا عمك نحنا بالنسبة للوهمة دي
مدني مرضعانا ليها وجارية في دمنا ,,

بس الروايات بتختلف من مدينة لي مدينة
ومن حضارة جيل لي جيل ..

وأشكرك علي المرور والإهتمام

مساء الخير
بالنسبة لي موضوع شرحبيل ده يا هيثم للزول اللي ادوهو شره جاااااااااااااااااااااااااامده
اما كسير التلج ده واسالني منو انا ده (لوح تلج في فتيل بنسلين) هو فعلا زي ما قلت للمداهنة والتملق

خالدعمرحسن كتب:
يا عمك نحنا بالنسبة للوهمة دي
مدني مرضعانا ليها وجارية في دمنا ,,

وإنت وكت مقطعا كدة............

عملت نايم من البوست دة مالك؟؟؟

زّهجووني ناسكم ديل بي تهميشم للمعلومات الثرة

والتي كنت قد نويت بصبها في هذا (البويــست)

ففتحت ليهو وعملت حمّيل ...

والله يا خالد كان البوست بتاعك ده فيهو فايده ما كان في زول همشو ليك.بعدين إنت ما عامل فيها مفتح ما تفهم ياخ معناها بوست بايخ ودمو تقيل وما بشبهك وهيثم وصاحبك كمان مطاوعنك علي البياخه خليك كما كنت راجل ظريف ودمك خفيف بلاش من كلام الكماسره ده.لك الود

المديدة حرقتنى