لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

من طرف alklaklah الإثنين يناير 18, 2010 7:40 pm

السلام عليكم

الايام دى عندى نوستالجيا ماضويه

طاقينى حنين للذكريات

لذلك استعدوا لتقليب صفحات منسيه

نبدا بالسلع القديمه

لبان سندباد ومتذكر انو كان مع اللبانه بتلقى ورقه فيها علم دولة معينه وعدد سكانها وعاصمتها
وتانى لبان كرونا دا كان معاهو الورقه الفيها الرسمه المخفيه ديك كنا بندعك الورقه فى شعرنا عشان تظهر الرسمه المخفيه وفى ناس كان بشخبتوها بقلم الرصاص وبتظهر
تانى برضو بتذكر حلاوة حربه وكانت بنكهتين ولونين ببسى وميرندا يعنى بنيه وصفرا وكانت بتكون مقسطره فى شكل سلسله طوووووويله لمن تجى تشترى بقطعوليك منها
تانى برضو فى حلاوة دربس وحلاوه كرمله
ولبن بطانه وزبادى ريره ملون وابيض وزبادى ديرى لاند
وعصير تروبى حتى كان دعايتو بتقول عصير تروبى عصير فنان فواكهو طازجه من السودان
تانى كان فى بسكويت كرم وبسكويت كمبال ودا كان دعايتو بتقول بسكويت كمبال بسكويت كمبال طعموا لذيذ ماليهو مثال
وتانى كان فى مربة روزا ودعايتها المشهورة بتاعة روزا حاديكى حته
وتانى زيت عافيه ودعايتو كان فيها احمد ادم قون الهلال وبجيبوهو يصد ليهو ضربة جزاء ويقولوا عافيه بالصحة والعافيه
تانى برضو زيت ابوسمكه للتقليه وللتحمير يدى الاكل طعام كتير

-------
ويتواصل التداعي

من طرف alklaklah الإثنين يناير 18, 2010 7:50 pm

برضو كان في حلاوة كسلا (المربعه السغيييره الورقتها بنيه فيها مثلثات دهبيه )
تاني برضو اتذكرت
لبن كاني - طبعا كان شعار المريخ والفورموست شعار الهلال - ,والفورموست موجود الى الان اما الكاني فاختفى ليهو زمن طويل
تانى برضو السيريلاك بتاع الشفع داك الفيهو صورة الولد الرابط المريله وامو بتاكلو ما متذكر اسمو والله .
تانى من الملبوسات شورتات (طبعا شورتات دى اسم الدلع لكن معروف اسمها البلدى شنو) - كنا بنسميها شورتات العزابه- وكانت بالوان خضراء وحمراء وصفراء وفيها بالجنبات على طول الشورت 3 خطوط وكنا رضو بنسميها الرقيب اول
متذكرينها؟؟؟
برضو كان فى جزم باتا وساتا
واهم حذاء فى تاريخ السودان والذى كان شعارا للمهمشين ودليلا على ابداع العقل السودانى
انه التموت تخلى
وللاجيال الجديدة وناس الشهادة العربيه نعرف ليكم التموت تخلى
هو عباره عن شبط (مربوط) ومرات شبشب فاتح ( والفاتح دا بكون النوع ابو اصبع داك) اما الماده المصنوع منها هذا التموت تخلى فهى لساتك العربات حيث كانت الارضيه من اللستك البرانى والوش من الانبوبه او اللستك الجوانى
وكان بعيش كتيييييير لذلك سمى بالتموت تخلى
وكانو بروجوليهو بالنداء الدعائى
تموت تخلى تحيا تلاقى

من طرف alklaklah الإثنين يناير 18, 2010 7:58 pm

وعمك بتاع الحمار البكوريك يقول المعا قزاااااااااااااااااااااااااااااااااااااااااز شوالات صفاااااايح يا

هاهاهاهاهاهاهاهاها ............كلين

الكلاكلة ياأخي إنت حلاوة كسلا بس !!!
وين إنت من زمان ,,, نحن كايسين لي نوعك دا من زمن !!!
سعيد سعيد بك ,,, واصل إمتاعنا .
سعيد بالصاحب الجديد ,,, ونقطة تميز أولى مننا لك.
لك الود.

من طرف alklaklah الثلاثاء يناير 19, 2010 10:28 am

ميرغني ابراهيم كتب:الكلاكلة ياأخي إنت حلاوة كسلا بس !!!
وين إنت من زمان ,,, نحن كايسين لي نوعك دا من زمن !!!
سعيد سعيد بك ,,, واصل إمتاعنا .
سعيد بالصاحب الجديد ,,, ونقطة تميز أولى مننا لك.
لك الود.

والله انا الاسعد يا دكتور وباذن الله تستمتع وتضحك من جوه قلبك مع احلى ذكريات .سبحان الله الحاجات دي كانت روتين عادي في الحياة لكن شوف الليله لمن تتذكرها بتضحك كيف.....غايتو تابع ولسه في كتير وكتير .....وانا ذاتي من زمان كايس لي لمكان زي مكانكم دا واظني لقيتو تب.

من طرف alklaklah الثلاثاء يناير 19, 2010 10:42 am

استراحه مع فاصل اعلانى من الزمن الجميل

اولا دعاية عصير تروبى

عصير تروبى عصير فنان
فواكهه طازجة من السودان
معبأ ليك اشكال والوان
عشان تشيلو لكل مكان
كمان للعايلة فى الجركان
موز وجوافة
ومنقة لذيذة
حاجة جديدة وحاجة فريدة
----------
ثانيا زبادى ريرة

ريرة ....ريرة
ريرة ....جديد
ريرة ....مفيد
اشكال والوان
كل يوم بتزيد
ريرة ...ريرة
ريرة ياراقى
الذ زبادى....الذ زبادى
منو الابيض دا الما عادى...دا الماعادى
ريرة
كل ما ينافس يفوز بالجولة
نكهة جديدة وطعم فراولة
---------------
ثالثا باسطة سلا

سلا يا سلا
حلاوة حلا
اول انتاج كان فى السودان
للحلويات اشكال والوان
سلا يا سلا
حلاوة حلا
لذيذة وطاعمة فى ام درمان
وصناعتها ناعمة مدنى كمان
فى كوستى وبحرى
وبورسودان
جوة الخرطوم
برة السودان
حلاوة حلا
------------
رابعا حلويات مامون البرير

حلاوة جديدة من نوعها فريدة
لا شرقية ولا غربية صناعة
بلدى مية المية
لف العالم كلو وطوف
وزيها ابدا مش ح تشوف
جرب وشوف جربى وشوفى
حلاوة مشكل حلاوة طوفى
طوفى ...طوفى ...طوفى
كمان حلاوة مرات بفستق
مرة سادة ومرة ببندق
سوبر لبان حاجة تمام
لبان بازوكا كمان فنان
انتاج مامون اكيد مضمون
لاشرقية ولاغربية صناعة
بلدى مية المية

-----------
خامسا مربة روزا

روزا ..روزا ....روزا
دى مربة حلوة جديدة
وكمان مفيدة
روزا للصغار
روزا للكبار
انتاج مصانع
مصانع صبار
فيها الفواكه الطبعيبة
مية المية
مصانع صبار
مصانع صبار
روزا....ح اديكى حتة

-----------
سادسا : مناديل كارولين

وطبعا هى باللهجة المصرية

واحد اتنين تلاته
كارولين كاروليتا
سافولى سأفة وانا (صفقوا لى صفقه)
انط نطه
هيه هيه هيه
كارولين شيك عشان العربية
ادى كده هو عائلية
كارولين شيك للجيب
احمر واخضر واصفر وازرق
هيه هيه هيه
******
سابعا :فيمتو

اشرب اشرب ....فيممممممممممتو
اشرب اشرب ......فيمممممممممتو
اشرب فيمتو ...تعرف قيمتو
يعدل كيفك وينعش ضيفك لو قدمتو
وكانوا بختموها ب انتاج مامون اكيد مضمون S & M

ثمامنا: فوفو

كريمة فوفو يافول سودانى
يابت المطبخ والحلوانى
فوفو....... فوفو
تاكل بشهية .......فوفو
كل اكلة هنية ......فوفو
لذيذة وطاعمة .....من فوفو هدية

تاسعا : حلويات سيما

سيما سيما سيما
المزاق الطيب ديمة
بسكويت مغذى مفيد
بيتى بير ....لوكس ......جلكوز ...ويفر
والحلويات ...الحلويات
كوجاك ...طوفى ...فورست ...بنبون
لذيذة لذيذة
وكلها ميزة
من مصانع سيما
المذاق الطيب ديمة

برضو من الدعايات الكانت سائده فى ذلك الزمن دعاية مصنع المسرة لمنتجات
الاسمنت بلاط مزايكو....... بلاط ساده

واظن برضو كان فى المسرة للاقمشة ودى لغاية هسى فى عمارة الشيخ مصطفى الامين موجوده
تانى اتذكرت برضو كوفير ميرى شارع الجمهوريه زيارة وحده وتكون زبونه ميه الميه طبعا كانت الدعايه باللغه المصريه الجيم "ق" بنطقوها
برضو دعاية صابون البدره بتاع كلين المشهورة بتاعة الضحكة هاهاهاهاهاهاهاه كلين
وصابون فونا ولونا (فونا فونا فونا 14 قمر 14)
وكريم نيفيا يحمى ويعتنى
وكريم توسكا (توسكا لمسة حنان)..ولو متذكرين في دعاية توسكا دي كان بجي راجل يمسح على يد البت برقه وحنان ولشفافية الناس الكبار الزمن داك كان بقولوا للشفع الدعاية دي فيها قلة ادب....ولمن تجي الدعايه دي تلقاهم يتنحنحوا ويتململوا....زمن والله شوف كنا وين وهسي نحنا وين كليبات عاريه والاب يحضر في نص بناتو واولادو.

للامانة الاغاني بتاعة الدعايات دي من ذاكرة اخ فاضل اسمو مصطفى (اداني ليها لمن نزلت الموضوع دا في احد المنتديات السودانية فهو سبحان الله ذاكرتو فولاذيه ربنا يحفظها ليهو)

كلاكلة ,,, امتعتنا كثيرا ,,,
رأيك شنو أديك إعلان أقدم من الكسرة وتقول لي بتاع شنو,, الاعلان بيقول:
آلام ظهر تضايقني !!!

يقولها الرجل بألم حقيقي ,,, أرشح عمده للاجابة.

من طرف قديس الأربعاء يناير 20, 2010 12:48 am

وسالي سالي صابونتي الساحرة

احتكاك على الركب ..كريم نيفيا يحمي ويعتني(بجيبوا فيها شافع بيحبي )

ليست واحدة ولا اثنتان بل ثلاثة رشات قاتلة(سوبر ريد)

وطق طق طق ....سندبااااد سندبااااد(لبان سندباد،،كانت الورقة بتاعتو بتجي فيها رسومات ممكن تطبع على اليد او القميص)

في دعاية كده انا ناسيها والله،،دعاية لبان برضو على ما اعتقد،،بجيبوا فيها مرة كبيرة كده بتنفخ اللبان ومشخلة كمان

واللول لوول العروس..حلاتو صابون فونا

دي جدعة سريعة كده من غير تفكير كتير،،والذاكرة لو اسعفتنا ح نوافيكم مرة تانية بالقديم مش الجديد

من طرف alklaklah الأربعاء يناير 20, 2010 5:07 pm

ميرغني ابراهيم كتب:كلاكلة ,,, امتعتنا كثيرا ,,,
رأيك شنو أديك إعلان أقدم من الكسرة وتقول لي بتاع شنو,, الاعلان بيقول:
آلام ظهر تضايقني !!!

يقولها الرجل بألم حقيقي ,,, أرشح عمده للاجابة.

الدكتور الكريم.....والله انا بتذكر من 1983 ولقدام اقل من كدا ما متذكر اي شي....واعلان وجع الضهر دا ما اتذكرتو والله الا نرجى ديناصور قديم يورينا ليهو

من طرف alklaklah الأربعاء يناير 20, 2010 5:12 pm

قديس كتب:وسالي سالي صابونتي الساحرة

احتكاك على الركب ..كريم نيفيا يحمي ويعتني(بجيبوا فيها شافع بيحبي )

ليست واحدة ولا اثنتان بل ثلاثة رشات قاتلة(سوبر ريد)

وطق طق طق ....سندبااااد سندبااااد(لبان سندباد،،كانت الورقة بتاعتو بتجي فيها رسومات ممكن تطبع على اليد او القميص)

في دعاية كده انا ناسيها والله،،دعاية لبان برضو على ما اعتقد،،بجيبوا فيها مرة كبيرة كده بتنفخ اللبان ومشخلة كمان

واللول لوول العروس..حلاتو صابون فونا

دي جدعة سريعة كده من غير تفكير كتير،،والذاكرة لو اسعفتنا ح نوافيكم مرة تانية بالقديم مش الجديد

ههههههههههههه يا قديس والله طلعت قديييييييييييم

لكن بمناسبة سوبر رييد شوف الصورة دي

وانا عملتليها كابشر من فديو اليوتيوب التحت دا وفيهو الدعاية كاملة كدي اعرف الزول الشعروا ابيض دا بتعرفوا؟

https://www.youtube.com/watch?v=xiW4WalfQZE

من طرف alklaklah الأحد يناير 24, 2010 10:35 pm

السلام عليكم ياناس المعاشات

متذكرين الحاجه دى؟

لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه Ddl5kk

من طرف alklaklah الأحد يناير 24, 2010 10:36 pm

[quote=alklaklah;471557]

والحاجه دى كان عندها صوت مميز متذكرنو كان كيف؟

[/quote]

من طرف alklaklah الأحد يناير 24, 2010 10:44 pm

برضو كان في دعاية:

أندروس أندروس منعش فوّار
يريح المعدة ليل ونهار
يخلي المعدة مافي حموضة
دايماً منعش
منعش فوّاااااااار
أنـــــــدروس

alklaklah كتب:
ميرغني ابراهيم كتب:كلاكلة ,,, امتعتنا كثيرا ,,,
رأيك شنو أديك إعلان أقدم من الكسرة وتقول لي بتاع شنو,, الاعلان بيقول:
آلام ظهر تضايقني !!!

يقولها الرجل بألم حقيقي ,,, أرشح عمده للاجابة.

الدكتور الكريم.....والله انا بتذكر من 1983 ولقدام اقل من كدا ما متذكر اي شي....واعلان وجع الضهر دا ما اتذكرتو والله الا نرجى ديناصور قديم يورينا ليهو

كلاكلة القال ليك ديناصور منو؟ الله يقلع العمده؟

الدعاية دي كانت بتاعة اسبرو وكانت في الرادي زي بتاعة الاندروس.

كان في حلاوة إسمها اصبع ضوه
وكان في بسكويت اسمو ماجد ,,, وجكسا .
وكنا نردد لحن أغنية مشهور للفنان مسكين " من ارض المحنة ومن قلب الجزيرة ,, برسل لي المسافر , أشواقي الكتيرة" :
تريا ري لا الا ,, حلاوة جكسا.

وحلاوة مطي
وحلاوة حلي
وحلاوة لكوم " دي طبعا كانت للناس المقرشين أصحاب المزاج لأنها صغيرة الحجم وغالية " بي قرش كامل يعني تجيب ليك عشرة حلاوة دربس ووقيتين طحنية " في ناس طبعا حكاية الطحنية دي بي الوقية ما بتكون واقعه ليهم لكن أسألوا عمدة وكجنكي.

وجعل الله ايامكم كلها حلاوة ,,
ختام : حلاوة يا كلاكلة.

من طرف **خالدعمرحسن** الجمعة يناير 29, 2010 7:41 pm

زووووووووووول جاب سيرة لبان 104 مافي ...!!!

مالكم ما بتعرفوا ولا ما حاضرنوا ؟؟؟

وبسكويت بركة دا لي هسي شغااااال .. مـــــــــــــــــــدني ياخ مارنجان السودان

رائع يا كلاكلة صحيت شي في الديناصورات .

واصل وأكمل متعتنا متعك الله بالصحة والعافية ..

من طرف alklaklah السبت يناير 30, 2010 12:36 am

سلالالالالالالالام

بجييييييكم

بس

القى فرقه

يا ميرغني

في دعاية حقت أسبرو بتاعة :
هذا مراقب الورشة
يعمل طول النهار
لكنه يشعر أحياناً بالصداع

...........

ماعارف كدة انتهت ولا في حاجة حتى يقولو : أسبرو

والله ما متذكرها تخيل ,,, بتذكر الام ظهر تضايقني بس .دي تكون في الفترة اللي كنا فيها في جوبا ,, فاتنا الكثير.. لك الود.

لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه

رد: لبان سندباد بسكويت كرم لبن ديرى لاند وبطانه حلاوه دربس حلاوه حربه -سلع منقرضه