الجمعيات الادبيه-درس العصر-رديف الارديه ....وحاجات كتيره خش شوف كدى

من طرف alklaklah الأحد يناير 24, 2010 11:20 am

السلام عليكم

تتذكروا الحاجات دى

الجمعية الادبية

درس العصر وجلد الماجاب قروش الدرس

الحصة الصباحية

التسميع

المدافره فى شباك البوفيه

طابور الصباح

نشيد العلم وكلمة الصباح

تلحين الاناشيد

تفتيش الملابس والاضافرين والشعر

تفتيش الكراسات ورعب الما مصححين اخر درس

تجليد الكراسات بالجرايد

تجليد الكراسات بالجلاد الاصفر مع تغليفه بكيس شوالات السكر

البشاوره بتاعة السبورة

الالفه ولستة المهرجلين

نظافة المدرسة لمن ننزل اول يوم من الاجازه الكبيره

النبطشيه بتاعة نظافة الفصل

الوسائل الكانت بتتعلق فى الحيط بتاعة الفصول

مازلت اذكر رسمة العين وتفاصلها القرنيه الشبكية العصب البصرى .......الخ . وكذلك خريطة السودان وعليها مجرى النيل

الحكم الكانت مكتوبه فى حيط مكاتب الاساتذة وفى الفصول من الخارج

زى من كد وجد ..... من طلب العلا سهر الليالي ....... العلم نور

الجرايد الحائطيه البعملوها ناس كل فصل

ستات الفطور والاسكريم - الداردومه - الكانو بيبعوا قدام باب المدرسه

اللهفه لوصول سنه رابعه عشان نكتب بقلم الحبر السايل

صيحات الطلبة حبر حبر حبر.......المليه كانت بكم؟؟

وبرضو صيحات دبس دبس دبس..... تلقى الواحد شايل دباستو والدبيسه بكم كانت يارب؟

قلم ابو سهم - كان عند اولاد المغتربين فقط -

قلم البرميل ذو الالوان المميزة - احمر,اخضر,ظهري - اما قلم البرميل دا فكان حق الغلابه -

ترديف الارديه وخاصه بتاعة الجنز تحت الردا الاصلى بتاع المدرسة خوفا من الجلد

الردا الكحلى والقميص اللبنى - دا فى الابتدائى طبعا -

الردا البيجى والقميص الابيض - فى المتوسطة دا كان -

الخرطوش الاسود - الضقل -

توزيع الكتب اول يوم النزول من الاجازة واشتراك اولاد الجيران فى الكتب

كراس الحساب وكراريس الدبل ابو 64 ورقه وكراسات الانجليزى فى المتوسط

جداول الضرب الكانت مطبوعه فى الغلاف الخلفى للكراسات دى

النايل كورس بوك ون وبوك تو وبوك ثرى والبطاقه ( الويرك بوك)

دكتور تروته dr trotter

فريده وامين

الاسبلنغ

عبارة see me للقادى فى الاسبلينغ

صيحات بيوووووووووووت بعد الحصة الاخيره

لمن كراعك تكون مجروحه - تجى لابس فردة جزمة فى الكراع السليمه وفردة سفنجة فى المجروحه

دفتر العيادة ولمن الدكتور يكتبليك متصنع

دفتر الغياب

الشف من بعض خاصه فى حل تمارين الرياضيات

جمع الكراسات عشان الاستاذ يصحح التمارين حقة الرياضيات

توزيع النتايج

السيرة البعملوها لطيش الفصل

-
-
-
-
-
-
-

كنا فى تلك الايام نتمنى ان تنقضى السنوات سريعا لنتخلص من عذابات الجلد وهموم التسميع والحفظ ونستعجل الدخول للثانوي العالي لانو الجلد هناك نادر جدا

هسى الواحد لو خيرهو انو يدفع كل ما عندو مقابل لحظة واحده من تلك الايام لما تردد

من طرف alklaklah الأحد يناير 24, 2010 11:26 am

اهم شى نسيتو ياخ
الحاوى والاركوز وبلع الامواس والتنويم المغناطيسى واسترح ومعرفة اسماء الطلاب وما يحملون من مساطر وغيرو ومعرفة اسماء اباءهم وامهاتهم وتحويل الورق لقروش ( والله كنا مساكين وسذج هو الحرامى دا لو اصلو بحول الورق لقروش جاى يلقط مننا نحنا المساكين ديل ) طبعا كان مرات كتيره دخول عرض الحاوى دا بقروش يدفعها الطلاب من حر مالهم ........... وكان مرات بجيبوا خميس ابو مريوما بتاع الدبايب داك او شمسون الجبار

ايام والله

تفتيش الشعر كان عشان شنو؟؟؟ أعتقد القمل
اختفى القمل واختفى معه الخير.......

المذاكرة بالليل لناس سنة خامسة وسادسة عدا يوم الخميس(الجمعة كان في؟؟ ولا مافي؟؟)

الإختبارات المشتركة مع المدارس القريبة(وأحياناً أولاد وبنات)[b]

من طرف عماد الشفيع الأحد يناير 24, 2010 3:07 pm

المدونة الطبيعية -- التمباك --- تخميس السيجارة والمظاهرات ---

من طرف alklaklah الأحد يناير 24, 2010 8:57 pm

يا معاويه ههههههههههه والله صحي القمل اختفى اختفا عجيب ومعاهو الصياب برضو.....زمان تلقى الواحد راسو زي لمبة النايلون بالصياب.....وبعد ثورة الانقاذ كنا بنسميهو الدفاع الشعبي ومرات الركاب.....يظهر لي كان الحكايه جهل وفقر وهسي الحمد لله اختفت الظواهر السالبة دي.......متذكر برضو كان من المالوف في ذاك الزمان العذب انتشار مرض انتفاخ الجضوم داك-غايتو كنا بنسميهو"ابووف"ما عارف انتو كنتو بتسمو شنو....وكان علاجو يلتخوليك جضوك بالعجين المر.
برضو كان البرجم منتشر جدا الزمن داك

من طرف alklaklah الأحد يناير 24, 2010 9:04 pm

هيثم نحنا غايتو المذاكرة بتاعة بليل دي ما كانت عندنا.....درس عصر بس حدنا وانا الظاهر لي كان بتكون اكتر في المدارس الفيها داخليات وبمناسبة مذاكرة بليل والداخليات دي اسمع النحكي ليك دي....عمي في الشماليه زمان في الستينات كانو في الداخليه وهو بذاكر زميلو قاليهو لمن تجي تنوم صحيني اقرا حبه...عمي قاليهو كويس...ووقت عمي انتهى من قرايتو وصحى الزول عشان يقوم يقرا قام زولنا داك مرق فانوسو من تحت السرير وجا يولعو ما لقى فيهو جاز قام قال الحمد لله....ورقد تم نومتو.

لكن صحي الاختبارات المشتركة خاصة مع مدرسة البنات اللصقنا دي كانت في

من طرف alklaklah الأحد يناير 24, 2010 9:14 pm

انت يا عماد المدونة الطبيعية دي بتاعة ناس في القولد التقيت بالصديق والزيارات ديك ولا كانت شنو انا ما متذكره كويس

وياخ الزمن داك الناس كانو سغار على التمباك والسجاير الا كان في المتوسطه معليش لكن في الابتدائي الناس كانو سغار

والمظاهرات صح كان بجو المدارس التانيه يفلقولينا الفصول لمن نطلع معاهم

من طرف alklaklah الأحد يناير 24, 2010 9:24 pm

يا جماعة نحنا في التمنينات كنا في الابتدائي لكن اخوانا الكبار واخواتنا كانو في العالي وكان في التلفزيون بجيبوا مسابقات المدارس....منافسات اكاديميه في كل المواد حيث يتم اختيار مجموعه من طلاب كل مدرسه للتنافس مع المدارس الاخرى...والاسئلة ابتداءا من العربي وانتهاءا باللانجليزي....وكل ماده كان بمسكها استاذ قدير ومتمكن...وكان يدير هذه المسابقات استاذ مشهور اسمو عوض ......منو كدا ما متذكرو اها انا لي سنة بفتش في اسم الاستاذ دا كامل...كان عندو صلعه وبلبس نضارات

من طرف **المشرف العام** الأحد يناير 24, 2010 9:28 pm

الكلاكلة يا مبدع ,,,المدونة دي كانت كراسة مجهزة بشكل خاص غير الكراسات الاخرى بهاعمود لحالة الطقس ,, وحركة الرياح ومعلومات أخري في الملحوظات مثل انواع الخضار المتوفرة في السوق .
أما ناس القولد ,,, وود سلفاب فهذه قصة أخرى ,,الاستاذ يخيل إلي أسمه عوض أحمد.
أحييك أخونا كلاكلة أيقظت أشياء كثيرة فينا ,, دائما في انتظار جديدك.

من طرف alklaklah الأحد يناير 24, 2010 9:57 pm

السلام عليكم يا مشرفنا وشكرا كتير على تعريف المدونه الطبيعية وحقيقه دي نحنا غايتو ما لحقناها لكن ناس في القولد وود سلفاب ديل لحقناهم تب....واسم الاستاذ دا لسه ناقص حاجه غايتو يا مشرفنا.
وانا البحييكم وبحيي منتداكم الرايع وان شاء الله نفيد ونستفيد

من طرف عماد الشفيع الإثنين يناير 25, 2010 8:08 am

الكنز والخريطة ...والجائزة دائما تكون حلاوة دربس --- صاح يا كلاكلة نحن ناس فى القولد ومنقو وصديقنا احمد ودسلفاب وبعدين ناس وليم تيل الوضع التفاحة فى رأس ابنه وبالسهم شطر التفاحة الى قسمين ولا ما اسمه كده يامرغنى

من طرف سلمى الشفيع الإثنين يناير 25, 2010 7:52 pm

الكلاكله يا لذيذ والله ماشاء الله عليك بالجد بترجعنا للزمن الجميل.بالمناسبه شوفو الصدفه الغريبه دي الاستاذ الكان بيقدم مسابقات المدارس الاسمو عوض احمد واحده من بناتو(شرط)جارتي والمسافه بين بيوتنا نص متر وانا لاقيتو عندها شخصيا في عيد الاضحي الفات..شفتو العالم ده ضيق كيف؟؟لكم الود

من طرف alklaklah الإثنين يناير 25, 2010 11:29 pm

سلام يا عمدة وصح والله الكنز كان حلاوة دربس ......هو غيرها كان في شنو الزمن داك؟
كنا تعبانين لكن في نفس الوقت قنوعين جدا وبعد الاكل المتواضع ما كان في سوء تغذية وامراض معقده زي حقة الزمن دا
وانا ذاتي من جيل في القولد اتلقيت بالصديق دا لكن وليم تيل دا ما متذكر قصتو دي والله

من طرف alklaklah الإثنين يناير 25, 2010 11:37 pm

يا سلالالالالالالالالام يا سلمي بالله الاستاذ دا لو لقيتيهو سلمي عليهو شديييييييييييييد وقولي ليهو في واحد من زمن مسابقات المدارس بسلم عليك وبس لو سمحتي عايز اسمو ثلاثي من بتو لو ممكن عوض احمد منو.....؟
ولو ما كانت متزوجه الشرط دي كنت قلتليك احجزيها لي ههههههه
لكن خسارة

من طرف سلمى الشفيع الثلاثاء يناير 26, 2010 8:16 pm

الكلاكله إزيك؟شرط النا قاصداها ما معناها وجيه معناها من غير لفه او بمعنى تانى( شيله ودقه) كدى اسأل مرغني من معنى الكلام البين الاقواس لو ما عرفت معناهو واسمو عوض احمدمصطفي فضل وسلامك وصل إنشاء الله.بعدين يا اخوي عماد شنو المن زمن في القولد إلتقيت بالصديق دي بيكون قراها لي اخوانو الصغار(هو ومرغنى طبعا).لكم جميعا الود

كلالكلة ,, كيف حالك ,, مستمتعين بسردك وذكرياتك,, واصل

عمده ,, ياهو وليم تيل ,, زمان لما الزول يكون نياش في البلي او بي النبلة يقول ليك الزول دا وليم تيل

عمدة بتذكر جورج اسيفن صن؟؟

سلمى ما تقعد ترمي في الكلام وتقول ميرغني يشرح ما بين القوسين !
تسووا الاقواس وترموها فينا؟

ملحوظة: أنا سعيد بكم ,,واصل يا كلاكلة.

من طرف سلمى الشفيع الأربعاء يناير 27, 2010 8:24 am

سلام يا سعادتك.نحن بنقول ليك اشرح ما بين الاقواس لانك اكبر الاعضاء سنا اقصد مقاما.لك الود

من طرف عماد الشفيع الأربعاء يناير 27, 2010 8:47 am

اى والله يامرغنى متذكر جورج استيفن صن وكمان متذكر X17-30A تعرف ده شنو يامرغنى ؟ ولا اقوليك ده نوع من الأقطان اظنه لفئة قصير التيلة ..

من طرف alklaklah الأربعاء يناير 27, 2010 9:28 am

الاخت سلمى كيف الصحة والاخبار.....ايواااا كدا يدوب فهمت شرط انا كنت فاهم غلط سوري جدا

وعماد لو اولادو قروا في القولد اتلتقيت-يكون عجز شديد-لانو القروها هسي كركبوا خليك من ابهاتهم

ويادكتور كيف الحال ونحاول نواصل لو في نلقى حاجه ما ذكرناها

عمدة كيف الاخبار

الجمعيات الادبيه-درس العصر-رديف الارديه ....وحاجات كتيره خش شوف كدى

الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى

رد: الجمعيات الادبيه-درس العصر-رديف الارديه ....وحاجات كتيره خش شوف كدى