نصائح ام سودانية نجيضة لإبنتها

نصائح ام سودانية نجيضه لابنتها .....؟

يا بت هوي فتحي عينك و ابقي نجيضة وفالحة..... قدر ما اجي داخله عليكم القاكي .... هي هي هي .... و قر قر قر .. تضحكي مع عبد الله دا
الراجل ما تضحكيلو كتير..... يسعالني الله، يحقر بك....الراجل اديهو
العين الحمرا. وان قدرك الله ايدك تلحقيها ليهو لحقيها...ابقي نجيضة.....آآية..... زي امك.....الله بسعلني وقت ابوكي يقول حاجة تضحك.... امشي اتحشر في الاوضة واضحك زيييين واجي مارقة صارة وشي.... وبعدين اوعك واوعك وبعدين تااااني اوعك... تقوليلو الجلابية دي سمحة والله العمه اللابسها دي سمحة... نفسو تقوم تعجبو يعرس فوقك.... وبعدين تشربي ما تروي....واكربيهو بالطلبات.... اوعي تخلي لك قرش يبيت في جيبو...واوعك تخليهو يشوف ال...... بيخربن الرجال... و وقت المسلسل داك يبدأ شفتي جيبي فندكك واقعدي دقي أي حاجة جنبو ويا ريت لوكانت شطة... ولا كان شافعك جيعان وداير يرضع وبيبكي خليهو في بكاءهو داك لمن المسلسل ينتهي....
وبعدين ما يجى داخل يلقاكى تغنى حتى ان بقيتي دايرة تغني اوعك من الغنا الخايس ناس حبيبي حبيبي.... امسكي في الغنا الحار زي البيجري نسيبتو و مرتو طلقانة ولا اندب حظي ولا دفاعنا الشعبي ياهو ديل ولا النار ولعت بقلبي بطفيها.....اااااااااااي.... عشان تربيلو الزلعة .....والخلعة....بس اوعك تغني ليه الليلة يوم الرجال.... بيقوم يصدق و يتحنفش فوقك ساكت........ واوعك تشكريلو حاجة جابها.... ان جاب لك لحم ختي ايدك فوق راسك وقولي لو ووب علي ووب علي ووووب علي غشوك وادوك الجلافيط.....وان جاب لك فتيل ريحة اول ما تفتحيهو وتشميهو طوالي صرى وشك وقبلي غادي وابزقي وقوليلو دا شنو يا عبدالله؟......الريحة المتل ريحة الفسيخ دي جايبها من وين؟ غايتو انت مغستك تقد
وان جنك نسوان ولا بنات....ما تخليهو يقعد وسطن....ويتونس.... طيريهو من البيت
وان ابى يمرق... قدرمايقول ليو نكته ولا يخفف دمو قدامن صري ليهو وشيك.... وقوليلو انت يا عبد الله ما عندك غير النكتة دي؟
يا خي عملت لنا بها وجع وش
اصلهم الرجال عارفاهم... الواحد فيهم من يشوفلو لمت بنات يقعد يخفف في دمو ويعمل فيها ودنفاش.....وتلقيهو يضحك بلا سبب... حتى ان واحدة قحت ساكت ... يقعد يضحك ويصفق اديهو....واوعك تخليهو معاهن وتدخلي المطبخ تسوي لك شربات .....وحات الله بنات الزمن دا ان غفلت من راجلك دقيقة بس تلقيها عرستو... ااااااى
اسمعى كلام امك يا بت حشاى
امك دايرة مصلحتك


اعجبني جدا فنقلته لكم بس اوعو من نس السكاكين

الاخت / ام حنين والله اختيار رائع لكن سؤال الكلام ده جربتيه مع بكرى 2 ؟
ونحن فى انتظار المزيد 00

وين ياحليلنا نحنا ماذبحو لينا الكديسة من اول يوم لكن الظروف مامعروفة
تسلمو يااعمامي للمرور

انتو يا جماعة مالكم زعلانين من أعمامى دى البت دى أبوها زاتو قدر ابوعبيدة وكجنكى وامها قريبة لى
خلو روحكم رياضية الموت كان خلاك الكبر مساك


وبكرة بقى أكبر

بيييست يا عمك والله الروح هى الشايلة الجتة والله روحك للحقيقة والتاريخ يا عمنا ما لقيتا فى الاصغر مننا
وخلىك مواصل على كدة وما تتعقد من كلامنا ده محبة وأحترام يا عمنا والما عندو كبير يكوس ليهو كبير
دمت ودامت أيامك دايما شباب

بالمناسبة نيو لوك لذيذ وشبابي يا عمك ما قلت ليك الروح !!! والجسد مصلاية الروح الروح المفوتة كم
وكت براك منادى وبراك متلفت





بكرة أحلى وشباب يا عمنا

الله يلكلك 00000 افهموها بآآآآ راعونا نحن الكبار ديل 00 بقينا ناس نظارات وولدنا مرغنى والله مجتهد ونحن مع التغيير لكن عليك الله بسسسسسسسسسسسيت اعمل لينا حساب فى الشوف 000

ياحليلك يا عمدة بقيت تشابى للحروف والله أحسن تتكامل أهلك قبال ما يقودك