الفافنـــوس

مناحة قد يعرفها الجميع ـ تغني بها الكابلي ، تزخر بشتي ضروب
تراثنا الشعبي الغني بالمعاني الثرة
قالتها بنــّـونــّة بنت إبنة المك نمر في اخيها عمارة الفارس المغوار الذي مات
علي فراش المرض الشيئ الذي لم ترتضيه له
قالت بنونة

ماهو الفافنوس ماهو الغليد البوص

ود المك عريس خيلا بجن عركوس
أحيّ علي سيفه البحد الروس

******
ما دايرالك الميته أم رمادا شح
دايراك يوم لقى بدميك تتوشّح
الميت مسولب والعجاج يكتح
أحيّ علي سيفه البسوي التح

******

إن وردن بجيك في أول الواردات
مرنا مو نشيط إن قبّلن شاردات
أسد بيشه المكرمد قمزاته متطابقات
وبرضع في ضرايع العنّز الفاردات

*****
كوفيتك الخوده أم عصا بولاد
ودرعك في أم لهيب زي الشمس وقّاد
وسيفك من سقايته إستعجب الحدّاد
وقارحك غير شكال ما بقربه الشدّاد

****

يا جرعة عقود السم
يا مقنع بنات جعل العزاز من جم
الخيل عركسن ما قال عدادهن كم
فرتاق حافلن ملاي سروجهن دم


الفافنوس = نبات رخو ينمو علي ضفاف النيل يسهل قطعه
عركوس = الكثرة والتجمع
بيشة الواردة= المنظقة المعروفة بهذا الاسم الان عرفت قديما بضراوة سباعها
الخودة= الخوذة
بولاد=فولاذ
أم لهيب= من اسماء الحرب