كلام خارم بارم

منقولة عن صحيفة قوووووون ومهداة للاخ الجاهوري ينشغل بيها شوية لانو نحن اليومين دي ما فاضيين لهو مشغولين بالنهائي بين البرسا والمان

*في الهلال اشياء تحتاج الي نظام .. تحتاج الي ترتب .. (شغل امسك لي وانا بقطع ليك لن ينفع الهلال).
*في المجلس فوضي .. في المعارضة فوضي ... والتخبط يوجد هنا وهناك.
*الناس ديل صعدوا للمجموعات باقل مجهود .. وتصدروا الدورة الاولي للممتاز .. وعاوزين ينوموا علي كدا.
*نبدأ اولا بالكاردينال.
*الكاردينال هذا ظل الفترة الاخيرة يتواجد في الصحف بصورة كبيرة ومخيفة.
*بقينا ما بنشوف البرنس ولا كاريكا ولا مهند الطاهر .. بقينا نشوف فقط الكاردينال.
*الراحل الزعيم الطيب عبدالله اعظم رؤساء الهلال لم يكن يتواجد في الصحف بهذا القدر الكاردينالي.
*لو اتبرع الكاردينال للهلال ... يصرح.
*ولو ما اتبرع برضو يصرح.
* لو تبرع الكاردينال بربع تصريحاته تلك لبني الهلال سبعة طوابق في استاده.
*ما قدمه الرجل للهلال حتي الان يحمد عليه .. لكن الذي قدمه اظنه اخذ اضعافه وذلك بان اصبح مادة رئيسية في الصحف .. في المانشتات .. في الاعمدة .. واليوم والتاني نجد الكاردينال في حوار صحفي يكشف فيه المثير.
*نترك كل ذلك ونتجه لموضوع قودوين الذي قال الكاردينال انه تولي ملفه.
*وان الموضوع محسوم.
*المعروف ان اعادة قودوين للهلال مرة اخري امر غاية في الصعوبة .. والكل يعرف خلاف اللاعب مع صلاح ادريس .. والكل يعرف ان قودوين عنده حقوق علي الهلال.
*والكل يعرف ان وكيله بوضياف .. يعقد الامور ويلعب لصالح اخرين.
*مع هذا فان الكاردينال قال انه كفيل بان يحل كل هذه المشاكل.. وبشر الاهلة بحل هذه العقبات.
*واصبح الكاردينال في كل سبت يقول قودوين سوف يأتي الاثنين القادمة.
*رسلت التذاكر ورسلت التأشيرة.
*قودوين يتحرك .. زوجة بوضياف تمرض وتأجل سفر قودوين.
*والكاردينال يصرح ويتحدي ويقول ان قودوين سوف تشاهدوه السبت القادم في الخرطوم.
*وسبت يجي وسبت يفوت ولا شيء غير السراب.
*اخر حاجة كدا الكاردينال يفشل في اعادة قودوين ويخرج لنا مصرحا ان صلاح ادريس وراء عدم احضار قودوين.
*هذا الموضوع كان الكاردينال قد اشار من قبل علي قدرته لحله ...
*والكاردينال يتحدث ان ما قدمه للهلال في شأن قودوين لا يستحق الشكر عليه وانه سوف يظل يخدم الهلال.
*كأن قودوين يلعب الان في دار الرياضة ام درمان.
*والكاردينال بعد قودوين يقول انه سوف يتفرغ لايداهور.
* اذا كان الكاردينال سوف يتعامل مع ملف ايداهور بنفس تعامله مع ملف قودوين فانه من حقنا ان نبشر المريخاب بان ايداهور سوف يلعب عشر سنوات اخري في المريخ.
* تخيلوا مثلا ان يصرح قطب هلالي ويملأ الصحف ويقول سوف يأتي بالارجنتيني ميسي ليلعب في الهلال.
* ميسي اتحرك .. ميسي وصل .. ميسي .. ميسي..
* اخر حاجة القطب الهلالي يقول ليكم في هلالاب وراء عدم حضور ميسي.
*ما يفعله الكاردينال خارج المجلس يفعل اضعافه اعضاء مجلس ادارة الهلال .. ورئيس النادي.
*تصدقوا ان كتابة مذكرة من قبل مجلس الهلال للمحكمة العليا لمراجعة القرار .. اصبحنا نقرأ عنها في كل يوم خبرا يقول ان المجلس سوف يقدم المذكرة اليوم.
*تقول عاوزين يقدموها لمحكمة العدل الدولية.
*كل يوم تقرأ ان المستشار القانوني للهلال اجتمع مع مجلس ادارة الهلال لوضع اللمسات الاخيرة للمذكرة.
*ويمر يوم ويأتي اخر ونقرأ نفس الخبر .. مجلس ادارة نادي الهلال يقدم مذكرته للمحكمة العليا اليوم.
*اذا كان مجلس ادارة نادي الهلال سوف يتعامل مع مذكرة قانونية تبحث عن حقه الشرعي بهذا التساهل والتمهل .. كيف يكون تعامله مع الاشياء الاخري (السور والنجيلة والكراسي).
*تصدقوا ان المجلس الهلالي يتعامل مع قرار المحكمة الذي اشار الي عدم قانونية المجلس باستهتار يصل حد ان يصرح رئيس النادي ويقول ان مجلسنا شرعي ونص وخمسة.
*هل هذا كل ما قدر عليه المجلس؟.
*والمجلس يتمهل في تأهيل الاستاد .. ربما رضي ان يقيم كل سبت (نفرة) .. ويخلي الاستاد في حاله.
*منذ زمن طويل ونحن نقرأ عن امر التأهيل ..
*منذ زمن طويل ونحن نقرأ عن النجيلة.
*النجيلة اتحركت.
*النجيلة وصلت.
*النجيلة ضبحوا ليها ... النجيلة زروعها.
*انتهينا من النجيلة فتحوا لينا موضوع (السور).
*السور من بلجيكا.
*اذا كانت النجيلة من الامارات احتاجت الي اربعة شهور عشان تصل الي ام درمان .. تفتكروا كدا (السور) العاوزين تجيبوه من (بلجيكا) عاوز ليه كم سنة؟.
*والسور ذاتو قصتو قصة.
*كل يوم نقرأ عن توقيع عقد السور.
*يا دا السور !!!.
*سور الصين العظيم يقصر.
*اذن نحن نحتاج الي 50 سنة عشان موضوع استاد الهلال دا ينتهي علي خير.
*علما ان تلك السنوات التي نحتاجها لتأهيل الاستاد سنوات ضوئية.
*عشان من هسع نكون واضحين معاكم.
*نخلي النجيلة ونخلي السور .. ونمسك موضوع المدرب.
*كل اسبوع يقولوا لينا في مدرب جديد سوف يصل الاتنين القادم لتولي امر تدريب الهلال.
*باتريك قالوا حسموا امره .. خلاص سوف يصل ويتولي تدريب الهلال.
*فجأة كدا يصرفوا نظر عن باتريك.
*يقوم يقولوا شنو؟.
*يقولوا فييرا البرازيلي سوف يصل الانتين القادمة.
*انا ما عارف الاتنين القادمة دي قصتها شنو مع الهلال.
*نحن فترنا من الاتنين دا.
*كل اتنين يطلعوا لينا بي مدرب جديد.
*فجأة كدا يقوموا يصرفوا النظر عن فييرا .. يقولوا سيرته ما فيها انجازات.
*طيب يا جماعة انتوا الزول دا فاوضتوه من غير ما تعرف سيرتو.
*بقت علي السيرة.
*يقوموا تاني يرجعوا لي (دي سانتوس) الذي اقالوه.
*دي سانتوس ذاتو خبرو ما معروف.
*مرة يقولوا ليك دفعوا ليه 70 الف دولار .. عبارة عن حقوقه.
*ومرة يقولوا ليك دي سانتوس جاءه عرض من الامارات.
*ومرة يقولوا ليك زوجة دي سانتوس زي زوجة بوضياف عيانة .. ودي سانتوس لازم يكون قريب منها.
*ودي سانتوس مرة يقولوا سافر .. ومرة ما سافر.
*الهلال الي الان لم يحسم موضوع تأهيل الاستاد ولم يحسم امر المدرب ولم يحسم موضوع التسجيلات.
*والكاردينال ذاتو انا ما عارف بتفاصح علي شنو بعد ان فشل في ان يحسم موضوع قودوين.
*الكاردينال طلع لينا بعد ثلاثة شهور من موضوع قودوين ليقول لنا : قودوين عندو مشكلة مع صلاح ادريس.
*طيب نحن ما عارفين .. والعالم العربي كلو عارف الكلام دا.
*الزمن يمضي وما في حاجة عملوها.
*المجموعات تقترب ونحن الي الان ما عارفين دي سانتوس هل سيستمر مع الهلال ام لا.
*قودوين برجع ام لا؟.
*المجلس شرعي ام غير شرعي؟.
*والنجيلة ح تقوم ام ما ح تقوم.
*الكاردينال معارض .. ام مع صلاح ادريس.
*نذكركم ان مجلس الهلال ظل يتعامل بهذا التمهل والاستهتار مع كل القضايا التي تستوجب السرعة وتستوجب الحل السريع.
*جنسية داريوكان دي ناس الطاش ... سنة كاملة بحاولوا فيها.
*امبيلي لاعب الهلال وصل في اخر لحظة وبسبب تمهل مجلس الهلال فقد الفريق فرصة ضمه افريقيا ولم يستطع ضمه للكشف الافريقي إلا في دور الـ 16.
*وكان يمكن ان يطير امبيلي او علي الاقل يفشل المجلس في ضمه للكشف الافريقي.
*الزمن لم يعد في صالح الهلال ومجلس ادارة الهلال مطلوب منه ان يكون اكثر وضوحا وان يكون عارف بعمل في شنو؟.
*مع الاعتبار ان (الحسم) اهم مقومات النجاح.
*الهلال لا نعرف ان كان سوف يشارك في سيكافا او لن يشارك.
*ولا نعرف كذلك كيف يخطط الهلال لمعسكره القادم الذي نتوقع ان يظل امره هكذا معلقا لا يعلم احد عنه شيء.
*قد تبدأ المجموعات ويكون امر مجلس الهلال غير معروف ان كان شرعي او غير شرعي.
*وقد تبدأ المجموعات ورابطة الهلال تنتظر حتي ذلك الوقت وصول قودوين .. والكاردينال فيما يبدو ان زخيرته من التصريحات لا تنتهي.
*وقد تبدأ المجموعات والسور البلجيكي يكون وقتها في (الفضاء) في طريقه لام درمان.
*وربما تكون (نجيلتنا) في ذلك الحين طفلة تحبو.
*ونحن ما عندنا صبر للحاجات.
*ملحوظة: نحن من النجيلة للسور.
هوامش
* اي حاجة في الهلال جائزة.
* مكن تصحي الصباح .. تلقي سيد سليم مدربا للهلال.
* ويمكن سيد سليم ذاتو يعتذر عن تدريب الهلال.
* ويمكن بعد اعتذار سيد سليم ناس الهلال يشوفوا جعفر ضرار.
* ويمكن ضرار برضو يعتذر.
* اي حاجة جائزة.
* يمكن السور يجيبوه من بلجيكا .. ويمكن بعد ما يصل من بلجيكا يكتشفوا ان سيرة السور ضعيفة.
* يقوموا يرجعوه.
* ويمكن بعد ما يرجعوه يجيبوه تاني.
* اي حاجة جائزة.
* يمكن النجيلة الجابوها من الامارات تطلع (ضريسة).
* يقوموا يرجعوها .. ويجيبوا ليهم (نجيلة) من الهند .. بتتكلم براها.
* اي حاجة جائزة في الهلال.
* يمكن قودوين بكرة يكون في الخرطوم... ويمكن يكون في نيودلهي.. عشان وكيلو عندو ضرس عاوز يقلعوا في (مومباي).
* يقوم شنو؟.
* يقوم قودوين يأخر سفرو.
* اي حاجة في الهلال جائزة.
* يمكن يكون مجلس الهلال غير شرعي.
* ويمكن يكون شرعي.
* لكن هذا سوف تكتشفوها سنة 2010 مع كأس العالم.
* يمكن الكاردينال يبقي رئيس الهلال .. وصلاح ادريس يبقي رئيس المعارضة.
* يمكن قلق يوقفوه سنتين.. ويمكن ما يوقفوه.
* لكن في كل الظروف الهلال ح يضرب المريخ سبعة في شهر سبعة.
* اعملوا فيها ما سامعين.
* بي دي سانتوس .. بدون دي سانتوس ح تأخذوا سبعة.
* بي قودوين .. بدون قودوين ح تأخذوا سبعة.
* واي حاجة بي سبعة.
* طمبل معاكم .. معانا ما بتفرق.
* كلتشي .. جوة .. برة .. برضو ح تأخذوا سبعة.
* واي حاجة بي سبعة.
* في ملعبكم .. بدون ملعبنا ح تأخذوا سبعة.
* واي حاجة بي سبعة.
* خبر عاجل: نجيلة الهلال قالوا ما بتشرب غير موية الصحة.