ركن المدائح والادب الصوفى

يا رحمان ارحم بى جودك

يارحمـان ارحم بى جودك دلى الغوث ينزل فى بلودك
سم يا فمى اذكر معبودك قول يا واحدا حى فى وجودك
يا مسعد اسعد بسعودك ونحن نصلى على مريودك
*****
يا رحمان ارحم بى برك يا حافظ فى بحرك وبرك
فى وليانك اطلق سرك خل نيشاتن اليتحرك
*****
آمين آمين يا كاشف الغمه جنب ها الدابى تصبحو رمه
تسلط واحد ايدو مدمه يعجل قتلو قبيح القمه
*****
يا الخلفا الحالكم مرضيه يا اهل البيعه العقدوا النيه
التمساح سكن الشايقيه خلو اليروح نسيا منسيا
*****
يا ابن ادريس عدل نيشانك فوق الكل عامر ديوانك
هم يا شيخ الناس حيرانك فى التمساح بين برهانك
*****
يا ابن ادريس شيخنا النورانى يا صاحب الفتح الربانى
يا ابنو العركى ويا السمانى ارمو سهامكم يا فرسانى
*****
شئ لله يا ذات التجلى صاحب السر والفتح الكلى
يا الغوث البى الكون متولى التصريف هيلك عجلى
*****
يا عبد الوهاب التازى يا اب درعا منسوب بى حجازى
التمساح تمساحا خازى درنا العوم ادونا الاجازى
*****
يا الداسوقى وشيخو رفاعى يا حسن التواع كون واعى
الشبلى وشيبان الراعى ارمو سهامكم يا شجاعى
*****
شئ لله يا اهل الدايره يا الفى الكون اسراركم سايره
ارخو السر فى السحره الغايره خلو الدايره التصبح نايره
*****
وينكم لى وينكم يا قومنا سهرانين نحسب فى نجومنا
التمساح حجر لى عومنا ان ما جيتونا عليكم لومنا
*****
وينكم وينكم يا ديله يا اهل ا لحضره الليله الليله
اجتمعوا وخلوا البهديله التمساح احموهو الشيله
*****
وينكم لى وينكم يا كمل يا لحاق فيكم بتأمل
يا الفوت البى الكون اتحمل عرض الدار روح يتهمل
*****
وينكم لى وينكم يا كسر يا لحاق فيكن بدثر
التمساح بلحيل انجسر امرو عليكن ماب يتعسر
*****
شئ لله يا حسن البصرى صهيب الروم ذا النون المصرى
يا الدباغ ابو سرا يسرى يا ابن المحجوب الناس متحسرى
*****
شئ لله يا اب جلابيه يا عثمان شيخ الختميه
يا الصلاح جمله الاولياء التمساح شوفولو اذيه
*****
شئ لله يا راجل البقعه يا اهل الحضره البعد الهجعه
يا الفكى شيخ الهام اب تسعه شيل الدابى تحتكم بدعه
*****
شئ لله يا عبد القادر محى الدين البحر السادر
يا ود زينب قوم لى مبادر يا ود حاج قول جيتكم حاضر
*****
شئ لله يا راجل البركل يا قايم الليل ماب تكسل
يا عايم بالله اتوكل قول للدود من بلدى اتفضل
*****
يا اهل الركب الفات بى ليلو ما فيكم واحدا شاد حيلو
احمد واحمد واحمد شيلو ود عدلان فوق راسو اديلو
*****
يا ياسين يا ود حميده يا اهل القبه الباقيه فريده
انتو ما ابتا طيتو اكيده ما بتغلبكم هذى الصيده
*****
يا رجاله نورى اتلموا خلو الغفله جميعكم هموا
محمد صالح قام بى عمو لطم الدود بالسر فوق فمو
*****
يابا حمدتو اب نايبا شوكه صاحب سر وايدك مبروكه
يا اب نيران الحقنا بابوكا هم يا شيخ الناس زموكا
*****
يا الفكى شيخ العبد الصالح يا لحاق فى بحر المالح
ود بيلى و عووضه القارح وين حاج عيسى القدر الطامح
*****
يا اب شارب واولاد السته امانى عليكم ليش ها السكته
اسمع يا شيخ القول ليك انت جرت الحين فى بلادكم نكته
*****
الزرق ابوات ود حاج موسى يا الكمل ما فيكن دوسه
البلد الكانت محروسه اتحجر العوم والناس محبوسه
*****
يا ود جابر ليك بنادى قوم با خوانك لا البولادى
يا العجمى اب رزقا صيادى اخدوا الشكره العادى العادى
*****
يا اولاد جابر بى عجميكن قوم الخمسه واكربوا سريكم
نادوا اب رابعه وخلوا يجيكم قتل الدود مو قاسى عليكم
*****
يا وراق يجن حوباتك فى التمساح بين آياتك
خلو يصوب من بلداتك لا يتمسخر فى زوراتك
*****
شئ لله يا رجالتنا شرف الدين فرسان المتنه
صالح السلمى اسمعوا كلمتنا احبسوا الدود لا يطل صفحتنا
يا النبى بى جاهك ثبتنا احفظنا واستر عربتنا
اكوى اعدانا وكيد شامتنا فى الدارين اكتب راحتنا
*****
البنيان يا جمله صحابى الغوث يا قطب الاقطابى
الشبلى وبدوى النشابى ارخو السر فى هذا الدابى
*****
على المحبوب صل يوت يا برا عدد مخلوق جميع لا الذره
نظملوا الماحى قصيده وجرا تنجى الامه فى يوم الحرا
*****
صلاه الله عدد ما لبا وقاف الحج وطواف الكعبه
سلاما جابوا الماحى معبا يعم السيد والال والصحبا

شوقك شوى الضمير

شوقك شوى الضمير أطراك مناي أطير
أنا حابك من صغيـــر بريدك يالبشيــــر

بسم الله يــا قديـــر يا عــالي يا كبيـــر
يا جابر الكسير دبرنا يا بصيــــر
بي أحسن التدبير من فضلك الكثير
جود يا كريم بي الخير أنصرنا يا نصير
ويسر لنا العسير
ثنيت بالبشير محمد النذير
شفيع القمطرير يوم موقف الهجير
والشمس تستدير يجري العرق خرير
تتفلت أم زفير جانا النبي الأمير
بي كفو حين يشير يخمد حمو العسير

يا فمي جيب تشكير لي الكمل أهل الخير
ناس سيدي بابكر كان للرسول وزير
الفاروق مع الحبر لا زالوا بي تكبير
الرابع القاهر كرار علي الظاهر
زام صدرو بالكرير بي سيفو ذو الفقير
كم رامي لي زنطير قال فاسق الحمير
أخير لنا الفرير قاليهو يا خنزير
ما بينفع التعذير جنزر كلاب النير
ملاهم جنازير

وين ستت التدبير السامو للعمير
ناس طلحة والزبير سعد و سعيد صفير
ياعبيدة العمير عمار بن ياسر
الكندي متبدر ضرغام ضرار شاطر
سيدي ابن عوف عاشر كاد بولس العوير
ابن الوليد نادر في حمزة يستتر
هو الحلل الكشير الصقر اب قراقير
فوق العلوج نفير

ياخواني لا البااقير لا قوز البسابير
مويس والسناهير السيال مع الجوير
كرقوس والمغاوير الدامر والعشير
الباوقة و البنقير مقرات مع اب سدير
بي داير المناصير جيراني الكجاجير
قريب الكواوير جريف الحواج نير
سقاي ولاد بشير عمران و السواعير
دويم ود حاج شهير تنقاسي و القرير
الدتي و الحجير حلة ولاد بصير
جزيرة ود سرير عربان الهواوير
في أبقش التجاجير لاتنس الجبابير
سوابق والبدير لا أرقو و الحفير
ابريم كنوز والدر مايشوفو زمهرير
في زفة الوزير

صليت ألوف تكرير سلاما غير تعبير
بي عد التفاسير عدد الدواب و الطير
الصقور و الزرازير الجراد و العصافير
ونبات و العتامير القوي والقرير
الحنطة و الشعير من عبدك المحيسير
الماحي المغيرير خايف من الكرير
يوم يقطع الفرفير داير الرسول يحضر
عن ضمة القبير يحبس سؤال نكير
في بيتو مستتر لا يومت النشير
في تاجك ننحشر

هذه القصيده نظمت فى سيدى الشيخ الطيب ود البشير وهى تروى رحلته من الحجاز الى السودان

يا ليلى ليلك جنّ ** معشوقك أوّه وأنّ


أم مرحي فوق جبلنا ** أصلو الإكسير معدنا


السر بالكوب والشنه ** كل الغشاهو تهنّا



مطر الفيوض ما ونى ** ونبعن سروف الجنه


تربالنا سامر وغنى ** علّج رقابو تحنّا



لي خدمتو إتشهلنا ** وخلفن دناقر الطنه


بي همة ما بطلنا ** كالرمشة ما تعطلنا



فرسانو حولو يدورو ** ناس ود علي المنبورو


يعقوب والمصري حبورو ** بله اب حجول والنورو



خدموهو لبسو شرايتو ** وكل زول فرش سرايتو


عدد السبعين مضرايتو ** صبروهو وعلو رايتو



هب وطلق نسّامو ** نبّه للأمة وسامو


وقف البصير قسامو ** والقرشي طابق اسهامو



التوم الفي عزازو ** بي إشارة من عزازو


وصلو وملك ميجازو ** مفتاح الشونة حازو



خلفن دناقر عزي ** يا قوم الطيب هزي


جاب لي البيهم عزي ** بشرى وشيخون الوزي



الطيب سيد من سادو ** كم أصلح الفسادو


الفي سلانج صلحلو فؤادو ** تت والدويحي أولادو



طيبا وسيلتي وكابي ** كدي مهما أقول في صوابي


النادر عودو نابي ** في أولادو الصابونابي



راجل القويز عبد الله ** نفسو وقرينو ذلّ


بي كاس الطيب علّ ** جاب الأسد في الحله



الشيكيتابي الفي غروبو ** والصليحابي المهيوبو


ود مكي والمجذوبو ** أسقاهم صافو كوبو



فيضك نزل هطّالو ** حسيب ود طه ابطالو


من كاسك السطّالو ** شربو بي طولك طالو



الشيخ مصطفي عركينا ** شوف قسمتو وتمكينا


من الرسول سيركينا ** ياتو البجي يحاكينا



الدايرنا والمابينا ** ثابت فضايلو ابينا


ذو قربى عن نبينا ** كفى نفلو الفي المدينه



قام من طبية منارة ** في اخميم دخل بي اشارة


ذكر القلل بي عبارة ** وعشر تالاف سكارا ** والعلما اندهشو حيارى



اتوجه مصر المعلومه ** وجاتو الخلوق بي علومه


في الأربعين عيزومه ** اتجزأ وفى لزوما



في مصر سوّ بيانو ** واتوجه لي سودانو


جوهو الخلوق بلدانو ** رووا من دنانو وزانو



في ام مرحي دق ساسو ** عم البلد انفاسو


احيا البقع بي كاسو ** جاحد الفضل شن باسو



شيخ النقل في زمانو ** بيعطي المدد لي الآن


والجاهو من عربانو ** حالا سقى القرآنو



جوهو الخلوق من درو ** لا تصمدو ولا فرو


للطيب في مقرو ** اسقاهم صافي درو



محمود لي قومو روّ ** اشرق لي ضحي ضوّ


فوق الأمانة اطوّ ** ابن البسوي وسوّ



الصلاه والسلام ما لاحا ** برق ونسيما فاحا


تلثم ضريح مصباحا ** يجد المكاوي رباحا

سوف اتناول بالشرح لبعض ما جاء من ابيات فى هذه القصيده وكما ذكرت سابقا انها نظمت فى القطب الشيخ الطيب ود البشير

الكرامات
قام من طبية منارة ** في اخميم دخل بي اشارة
ذكر القلل بي عبارة ** وعشر تالاف سكارا ** والعلما اندهشو حيارى
اتوجه مصر المعلومه ** وجاتو الخلوق بي علومه
في الأربعين عيزومه ** اتجزأ وفى لزوما

قيل ان الشيخ الطيب بعد ان درس الفقه وتعلم بالمدينه .. وفى طريقه للسودان مر بمصر وهناك و فى الازهر حصلت له الكرمات بجامع اخميم .. وقد قيل ان القلل زكرت معه وكما قال الشيخ البرعى فى مدحه ( طيب امرحى ) ( زكر الحيات زكر القلل الاسعد فى مصر تجزاء للاربعين احد ) هذا فيما جاء من زكر القلل
وقيل انه قد قدمت له دعوه لتناول وجبة افطار رمضان من اربعين من علماء الازهر وقد اجاب جميع هذه العوازيم بدليل انه فى اليوم الثانى اصبح كل شخص يقول ان الشيخ قد افطر معه فطور رمضان ..

نواصل شرح المدحه لاحقاً

الاخ محمد / نشكر لك هذا الجهد المقدر في هذا الضرب ,,, واصل ,, وفي انتظارك.

شيخ النقل في زمانو ** بيعطي المدد لي الآن
والجاهو من عربانو ** حالا سقى القرآنو

هذه كرامه اخرى من قصيده يا ليله ليلك جن
ويواصل المادح المكاوى فى نظمه الى ان جاء الى القصه التى تروى عن الشيخ فى انه ذات ليله وحول نار القران كان الطلبه يدرسون .. فجاء اعرابى وقال للشيخ الطيب نفعنا الله بمدده ( ابونا الشيخ انا داير اسوى ذى الجماعه ديل .. يعنى قراءة القران ... قيل ان الشيخ اداهو الفاتحه .. ومن هذه اللحظه قام من الشيخ حافظاً للقران ..... وكما قال شيخ المادحين البرعى ( قصيدة يانفسى ) العربى سقاهو قرانهو جود من كونه حاوى اسرار موسى اب جد

ونواصل كرامات الاولياء الوارده فى الادب الصوفى