فردة حذاء مهملة

هل كان في الامكان اسوأ مما كان ,,,؟؟
هكذا كنت أسأل نفسي في الايام السابقة وانا ارقد كفرشاة أسنان قديمة لاكها الزمن حتي اهترأت ,, أوهكذا تصورت حالي وانا أرقد علي أحد الأسرة الحديدية ,, التي أكاد أحسه عبر الحشية المهترئة,, التي تضعها مستشفيات وزارة الصحة وتسميهامجازا مرتبة,,
كل شئي صدئ وقديم ,,, بدأ بالمنضدة الحديدية الموضوعة امامي والتي رغم الطلاء المتكرر تبدو كعجوز متصابية لا تستطيع اخفاء عيوب سنها الحقيقية رغم مساحيق التجميل,,, ماذا بقي اصلا ليُجمل؟؟ وانتهاء بمصراعي النافذة المتآكلين.
الرجل الراقد بجانبي في انتظار الموت أو الموت ,, لا خيار ثالث,علي الأقل لديه إبن يتكئ عليه ويهش به أحزان الزمن,يزوره نهارا, بينما نقضي الليل ,,هو يسعل ,وأنا أصغي لسعاله البائس,, متحفزا لسماع مايتلوه من بصق علي الإناء الحديدي الراقد أمام سريره ينضح,,برائحة الموت والمرض,,,لاشئ مبهج او حتي نصف نصف؟؟؟

حتي الزوار وجوههم كالحة بشعة ومقيتة,,,هل أنا في مسرحية سوداوية,,؟؟
اختاروا لها هذا الكم الهائل من الكومبارس التعساء,,
لو كانت كذلك فإن عبقرية المخرج تتجلي في كل الانحاء,, كل السكنات والحركات,,, موت,, موت,, موات..
.حتي الديكور حولي اجادوا اختياره ليناسب الموقف,والزمان,,والمزاج.
تري ما دوري في هذه المسرحية,,,؟؟
لا يمكن أن أكون بطلا لهذه المسرحية وحدي,,,,!!
لا يمكن أن تغفل دور الممرضة العجوز,السارة, وهي أبعد ما تكون من السرور,تدور بيننا لتوزع علينا العبوس والقنوط والدواء,,,
كيف لها أن تبتسم وهي تحمل هذا الوجه العجوز الكالح.
:أرقد.
هي كلمة واحدة لا غيرها,, بعدها استلقي علي بطني,,ووخزة لا بل طعنة حقيقية بعدها لا أراها الا وهي تجوب الاسرة بحثا عن موضع طعنة
أو جرح متقيح,,
يبدو أنه بتقادم السنين وروتين العمل صار جسم الانسان عندها,,مجموعات اعصاب وعظام يكسوها اللحم,, كقابس كهرباءأو سلك عند كهربائي,,أو قطعةخشب لنجار,,هو شئي شاءت ظروفها ان تعمل عليه وتنتظر الراتب آخر الشهر وهذا ما يهم!!
ياتي المساء بطيئا ,, ومعه يأتي ابن العشرين ,السر الممرض, ليتسلم نوبة ايلامنا ليلا,,يبدو سعيدا,,رغم كآبة الجو والمهنة,, بملابسه البيضاءو,وذلك الشريط الاحمر الصغير الذي يرقد علي كتفيه نيشان تفاهة علي ما اظن. .
علي نقيض صاحبة الوجه الكالح وجهه ينضح شبابا وغباء يحوم بيننا موزعا تلك البسمات البلهاء,,,
سعيدا بشبابه الغر,,الذي يحسه أكثر حين يكون بيننا وحين يجوب آخر الليل بين العنابر,,الاخري تاركا رائحة الموت والمرض لنا,,,أظنه لذلك أختار العمل ليلا!!
في كثير من الاحيان الوم نفسي علي الهزؤ منه بيني وبين نفسي,, محدثا نفسي بانني حاسد ليس الا؟؟
ازددت حسدا وانا انظر اليه عن قرب و هو يقوم بتغيير الكيس البلاستيكي اسفل سريري والذي يمتد لانبوب بلاستيكي قذر ملئ بفضلاتي المائية
والذي اصبح ملازما لي من اول ايام دخولي وتصنيفي كمتضخم بروستاتا,, ومعها تضخمت مخاوفي وتعاستي,,وبراعتي في السير وانا ممسك بذلك الكيس البلاستيكي من أحد أطرافه وأنا أجول بين الأسرة,,,
تذكرت أيامي وأنا بعد في المدرسة الأولية عندما نزور العيادة الخارجية,,كنا نري المساجين المرضي يسوقهم السجان ذو الثياب التي كنت أظنها قد صبغت بالجردقة الترابية,,(أتري من منكم يعرفها,) كان السجين الخطر منهم يساق وهو يحمل سلاسله بيديه,,بينما يخطو مباعدا ما بين رجليه كحالي الآن,,أو كحالي يوم الختان
اليوم الثالث ولم يزرني أحد!!!
حتي الياس اصبح شحيحا بالزيارة,, كان في أول الايام يأتيني كل يوم تقريبا,, ولكن مع طول اقامتي قلت زياراته مثل كل شئي,,, وحتي عندما يأتي لا يجد ما يقوله!!!
هكذا كل شيئ هذه الايام,,متعب وواهن وممل.
ثم إني حقيقة صرت أخاف زيارته بدلا عن ترقبها,,,أخاف نظرة الاشفاق في عينيه,,
أتري حدثه الطبيب بشئ لم يفاتحني به؟
أخاف نظرة اللوم والعتاب,,لا بل هي نظرة لا أدري كيف أوصفها,, ولكنها كمن يقول لي: ألم أقل لك؟
هاأنت الآن ترقد وحيدا كحذاء مهمل علي قارعة الطريق,,لا فائدة منك وحتي دورك الصغير الذي كنت تلعبه في الحياة قد انتهي,,, أتري إن أحسنت الأصغاء لي لكان هذا حالك؟؟
حين أحس عينيه تحدثني هذا الحديث ,, أعود لسنين مضت,, ونحن بعدفي ما بعد ريعان الشباب:
:سليمان يا أخي موضوع العرس دا ما تاخدو هظار!!
:كدي كَب والله كريم
:الله كريم نعم لكن قال خدوا بالاسباب,,بعدين خليك جادي مرة واحدة
:انت جادي يا الياس؟
اهه أفرض عرست يعني شنو,, ولا أقول ليك عرس أنت أول وبعدين وريني الحاصل شنو,, ؟
:رغم إني عارف.الموضوع مش أنا اعرس ولا ما اعرس,, الموضوع أنو انا مقتنع بالحكاية دي وماشي فيها,, وربك يسهل,,
لكن خايف عليك انت,, لي متين؟
:طيب,, ما دام بقيت لي في العزاها الله ,, أقول ليك رأيي صراحة لمرة الالف:
أنا بفتكر إنو الدنيا دي مدوراها النسوان,وأنا ما عايز أخش اللعبة دي, قول لي كيف؟
:كيف؟
:نمسكها ليك من قبل العرس,,, في أي علاقة بين راجل ومرأة البيكون حريص أنو العلاقة دي تتقنن وتبقي زواج منو؟
:المرأة طبعا.
:ما تقول لي الستر وما الستر,, طيب الخواجات مالن ومال الستر,, برضو تلقي الواحدة ساكه الواحد لمن تجيبو الجَك,,في حين انو المجتمع عندهم مابيرفض العلاقة خارج اطار الزواج,, تقدر تقول لي السك في شنو؟
أنا أقول ليك ,,, عايزه تخت ليهو الحبل دا في رقبتو وتسوقو,,أنا مالي ومال كده,, رقبتي عندي,, أشيلها أختها في حبل ماسكاهو مرة؟
طيب بعد ما عرسنا,,,الشايل هم البيت منو؟
ماأنا؟؟
برضو ما سبب مقنع!!
:يا ود الحلال الدنيا مدوراها النسوان من رونالد ريغان لي خضر الغفير!!
النسوان نوعين اساسيين وممكن يكون لكل نوع فروع أخري ,, لكن النوعين كالآتي:
النوع الأول البهرش الراجل عديل كده ,, ويسيطر عليهو عينك عينك,, ودا أسهل النوعين!!
النوع التاني وهو الأخطر: ديل ياسيد اصلو ما بسألوك ,,, تعمل زي ما عايز ,, تقوم تدخل في اضافرينك,, وطبعا بتكون عارفها عايزه شنو,, تقوم عمرك كلو داخل في اضافرينك,,, وتشيل وتعمل عشان ترضيها وترضي نفسك وتمرق من اضافرينك ,,, وطبعا الحكاية دي بتكون مدورة لحدي ما تتلحس,, وانت في اضافرينك,, وطبعا النوع دا هو الانثي الحقيقية ,, التي تعرف كيف تدير امورها من غير صدام!!
طيب عشان اوريك,, زيادة,, انكم بغال والنسوان مدورينكم زي ما عايزين:
عايز تركب العربية معاك مرتك,, البيفتح الباب منو ليها؟ ما إنت؟

عشان تكون جنتلمان,, لازم تعمل ليها البيعملو ليك السواق الخصوصي بتاعك.
طيب لو عايزين تقعدو في تربيزة أكل في مطعم مثلا,, عشان تكون جنتلمان وبتاع اتيكيت منو البجر الكرسي ليها عشان تقعد أول؟
أنت طبعا!!تقوم بدور الجرسون,, عشان تكون جنتلمان.
خليك من دا أي حاجة ليديز فيرست,,, عشان تكون جنتلمان,,, ولو عايزني احسب ليك من هنا لي بكرة خمسمائة مليون مثال,, ما عندي مانع
مفهمنك يا سيد انو انت جنتلمان وانت تقوم بدور,, الجرسون و الخادم والسواق,,وووو.
خليك من مسألة الانفاق دي علي جنبة,,, الماسورة الاتحلجت,, الترباس البايظ,, التربيزة الاتكسرت وعايزه ليه مسمارين بس؟
ما تقول المسائل بتاعة القوة والحاجات الغاشننا بيها دي ,,دق مسمار دا عايز ليهو قوة؟؟,,تقول ليك دا شغل الراجل ما حقي,, ولما نجي لي غسيل العدة والمكوة,,يسموهو مشاركة زوجية,,, ياأخي أنت باختصار بغل.. جمل عصارة تدور كده وتجيب القروش واي حاجة عليك وبعد دا يا ريت لو رضيانات,,حقوق المرأة وشنو ما عارف,,زي اليهود بالضبط؟
يا حبيبي انت فردة حذاء واحدة مافي أي زول شغال بيك ,مرتاح,,براك تقوم تشوف ليك فردة تانية عشان تبقوا جوز ,,,وتُستعمل وتطأك الدنيا والناس والغاشي والماش؟؟
أتعرف أن أعظم ما يفعله الاغبياء انهم يجعلون الحياة سهلة علي الاذكياء,,, من حقك ان تختار تكون غبيا ولكن لا تسلبني حقي في ان اكون غير ذلك,,, المرأة تستغل غباؤكم ايها الرجال لتصبح حياتها اسهل واكثر أمنا وراحة.
أرجوك يا أخي لا أستطيع أن أنتمي لهذا القطيع ,,, يكفيني أن أرعي نفسي ,, لكن أجمل مافي الزواج أنك تختار راعيك الذي يقودك طول حياتك ,لكن هو من يختار المرعي وإلي أين يسوقك ومتي !!!هنيئا لك ولهم.

يا اخوي,, المرأة مابتعرس ,, بتمتلك وبس!! انا كده براي الله وروحي,, وامشي عرس انت.

تذكرت هذا الحوار بيني وبين الياس وكثير مثله مع أقراني....أتري كان الياس محقا؟
لاأدري
هل أنا محق؟
لا أدري
كان يمكنني الحصول علي حياة حقيقية من رحلات حفلات وقرحة واوداج منتفخة وتصلب شرايين وزوجة لا تشعر بالاكتفاء
ونوم لا ياتي ابدا.
لكن يجب أن يكون الرجل حرا رغم كل شئي.
"طيب لو ما البروستاتاالزفت دي كانت حتفرق شنو,, يعني عشان ما جنبي زول يوم ولا يومين أقعد أولول زي النسوان كده,,,ما ممكن كان ماتجيني اي حاجة واتلحس في حادث حركة مثلا,,ولا الياس ولا بغال ولا نسوان,, سيب الجرسة ونوم ليك نومة وصباحاتو بيض"

تقلبت في فراشي,, وصرير السرير الحديدي من تحتي أعادني,,إلي المسلك البولية رجال,,ورجال الاخيرة هذه لزوم ما لايلزم,, ما علينا!!
أعود لليل ينتظرني فيه طنين بعوض,وشكوك,, وسعال مريض ورائحة بول ودواء ومرض,,, تختلط في انفي.,,
وربما أذني قد يشنفها عويل نساء مكلومات في عزيز فات.
ننتظر,,, ماذا وراءنا؟؟؟

تعودنا منك -كقراء- على هذه الصراحة الموجعة ، ووضع اليد على موضع الجرح مباشرة وبدون تحذير مسبق......

أظن أن المدرسة الفرنسية في القصة هي التي تتعمد طرح الفكرة كثابت رئيسي فيها ، ومتى ما أحس الكاتب أن فكرته قد وصلت ينسحب تاركاً إياك وسط أمواج الحيرة ..،
ولو لم أكن مخطئاً فهذا هو طابع هذا النص ، والذي يبدو -للوهلة الأولى- مبتوراً ، لكن إن أعدت قراءته يمكنك أن تتوصل الى أن الكاتب تعمد جرك لهذا الإعتقاد.....وبالطبع: ينشد الزمار ماشاء وكل بهواه

كل الود

لا شيئ ... وكما هيثم

جميل يا دكتور ...

................ معبر ,,, عميق ,,, ومحيير !!

اشكر حضورك ومرورك الممتع دائما ,,, الفكرة وصلت؟؟
عايزين جية تانية وبي رواقة,,, وقول النصيحة ,, قول يا حبيب
لك الود.

خالد / كيف حالك ,,, أقرأ القصة تاني وقول لينا,,, مافي زول عارف غيري أنا وهيثم ...
لك الود.

؟؟؟؟؟؟؟؟؟؟؟؟؟؟؟

قريتا تاني وبتمهل

ولا جديد عندي لأضيفه

سوى

جممممممممممممميل

أنا لسة بقراء ,,, لكن ظهرت لي حاجات غريــــــــــــــــــــــــــــــــــــــــبة ؟!!

غير الدهشة

بعد أصل لي نقطة معينة كدة برجع ليك ..

خالدعمرحسن كتب:لا شيئ ... وكما هيثم

جميل يا دكتور ...

................ معبر ,,, عميق ,,, ومحيير !!

قريتا ,, وتعددت المراير (جمع مرات) حسب الموّد الدخلت فيهو حال قرائتها !!!

وكما أسلفت . . .

جميل ,, كسوداننا

معبر ,, كحالنا

عميق ,,, كحقيقتنا

ومحيير لإحساسي في كل القرأت بأن دهشتي , ووجعي ... في إذدياد
حتي كادوا أن يسلموا ,, بأن هذا الشخص هو أنا

فهربت من القرأة ؟؟؟

خالدعمرحسن كتب:

خالدعمرحسن كتب:لا شيئ ... وكما هيثم

جميل يا دكتور ...

................ معبر ,,, عميق ,,, ومحيير !!

قريتا ,, وتعددت المراير (جمع مرات) حسب الموّد الدخلت فيهو حال قرائتها !!!

وكما أسلفت . . .

جميل ,, كسوداننا

معبر ,, كحالنا

عميق ,,, كحقيقتنا

ومحيير لإحساسي في كل القرأت بأن دهشتي , ووجعي ... في إذدياد
حتي كادوا أن يسلموا ,, بأن هذا الشخص هو أنا

فهربت من القرأة ؟؟؟

خالد اشكر مرورك ,,, وتعليقك ,, اسعدتني كلماتك... لك الود.

العمدة كيف حالك ,,,, شكرا لمرورك وكلماتك المشجعة دائما ,,, دمت صاحبا,,, لك الود.

شوف يا دكتور البتاعة دي كانت واقفة لي في حلقي ؟!!!

تاني رجعت ليها ...


وال................ أعمّق ..

الله يديك العافية يا صديق ,,, وتعبر لينا عن المسكوت عنه عمدا" !!!

الصديق خالد / شكرا لمرورك تاني وتالت ورابع ,,, ودمت صاحب جد جد .

الاخ ميرغني تحياتي من على البعد وبعد:
اسمح لي بهذه المداخلة في موضوع القصة القصيرة واركانها الثلاثة المقدمة العقدة والحل في هذه القصة بالتحديد لو قبلنا العقدة على مضض وهي حيرة بطل القصة في موضوع الزواج لا نجد الحل .
ثانيا الديالوج او الحوار الداخلي ياخذ حيز كبير من القصة وهي من العيوب البارزة في هذه القصة فكلما قل الحوار داخل القصة القصيرة كلما زادت نضجا .
في العموم الموضوع والفكرة فيها خيال جيد لكن اظن ان القالب هو من تآبى عليك. رغما عن هذا استمتع بما تكتب .