عن الامثال السودانية

كنت صغيرا عندما كان ابى يواظب على قراءة مجلة صباح الخير المصرية فكنت اقرا ما تيسر منها..كنت اقرا باب شئ ما لنادية عابد...كانت تكتب شيئا(للاذكياء فقط)..فى احد الايام كان هذا ال(للاذكياء) هو..(الجمرة بتحرق الواطيها...مثل سودانى) شعرت بعظمتنا وعظمة امثالنا...
لكن ليس كل امثالنا عظيمة..كما ولا شك تعلمون..
سابدا اولا بامثال ليست عظيمة ولا احبها واعتقد انكم تشاطروننى الراى..
اولا: كان غلبك تسدها وسع قدها...اعتقد ان هذا المثل مستوحى من فكرة(على وعلى اعدائى) وهذا فهم سلبى ينسف كل شئ..فالواقعية تقول اذا غلبك تسدها فحاول ان تخفف الاضرار بقدر الامكان..وحاول انقاذ ما يمكن انقاذه..
ثانيا:كان كترت عليك الهموم..اتدمدم نوم..معقول ياخى؟؟تنوم كيف؟ وتنوم ليه..؟؟الاجدر ان تحاول حل المشاكل..ولازم تكون صاحى عشان تحلحل المشاكل دى...لو اتدمدمت نمت تبقى ميتة قلب ما بعدها..
المثال التالت للامثال السلبية هو:ابعد من الشر وغنيلو...ياخى انت بعدت منو...قبلناها...تغنى ليهو ليه؟؟؟دى سلبية تدعو لعدم مواجهة الشر وعدم تقويم المنكر..وكمان التهليل والتكبير له..ده مفروض يكون مثل مصرى ما سودانى..
المثال الرابع لامثالنا السلبية:الاضينة دقو واتعضر لو..يا خى هو اضينة ومسكين..الله خلقو كده..انت الحقارة ليك شنو؟؟ولو كان المثل ما عاوزك تبقى اضينة..كمان ما عاوزك تقبل الاعتذار؟؟؟
مثالى الخامس والاخير من امثالنا السلبية..المثل الذى اكرهه ولا اطيقه(رغم انو قصدو شريف)هو: خلى امك للرجال ما تخلى حقك للرجال...
كيف يعنى؟؟؟معقول اخلى امى للرجال؟؟امى ذاتا اساس حقى..ولو كان الكلام ما كدة فليذهب حقى للجحيم ما دايرو..لكن ما بخلى امى لى زول.. وطبعا اموت فداها...
خوفا عليكم من الملل اقيف هنا..
بكرة نتكلم عن امثالنا الذكية والايجابية..

اخونا معاوية / اضافة لما بدأت به من امثال انهزامية,,,ووو. اليك بعض مما لا تحب:
من اكثر الامثال تفاهة: الفايق يهمز امو,,,,, يا اخي ديل بالغوا عديل ,, دا مثل دا عليك الله!!!! لاتعليق
كان ليك عند الكلب حاجة قول ليهو يا سيدي!!! يا اخي معقول بس!!! ايضا لا تعليق

كنا قد فرغنا فى الحلقة الفائتة من بعض النماذج للامثال السودانية السلبية و(الكريهة) وقد ذكرنى الاخ مرغنى الزبيدى ببعضها..ومنها (الفايق يهمز امو)..ورغم اتفاقنا على ذم الفايق لكن ما للدرجة دى..ثم المثل القائلاكلوا اخوان واتحاسبوا تجار)..رغم ان هذا المثل تعمل به كل الشعوب(.ما عدا الشعب السودانى لكنه تسرب الى ادبياتنا..وانا لا اغالط من اقتنع به..لكنه مثل غير مريح..ما دمنا قد ارتضينا ان ناكل اخوان فقد سقطت التجارة هنا..لكن من اراد ان ياكل معنا كاخ ويحاسبنا كتاجر فمرحبا به..
انتقل الان الى ما اعتقد انها امثال ذكية وايجابية وابدا بما بدات به اولا وهو(الجمرة بتحرق الواطيها) اعتقد انه مثل حكيم وفعلا الجمر ة بتحرق الواطيها..والايدو فى النار ما زى الايدو فى الموية..وانا فى قلب المعاناة ما بكون زيك انت البتنظر لى من بعيد...
المثل الثانى الذى احبه هو(ما فى شيتا بضر الا الحديث المر) يدعو هذا المثل الى الدبلوماسية والابتعاد عن ايذاء الاخرين بالكلمات لانه فعلا تؤذينا الكلمات اكثر من اى افعال مؤذية...(اذكر اننى اشتبكت مع احد رؤسائى بسبب كلمات قالها..ووصل الى الامر الى حافة الاقالة ..لكن رئيسى تراجع..جاء احد الاجاويد وقال ان هذا الرئيس يتحدث بلسان حاد لكنه لا يتخذ افعالا مؤذية فقلت له :فليتخذ من الافعال ما يشاء لكننا نؤمن بانه..مافى شيتا بضر الا الحديث المر...
ومن امثالنا الرائعة:السواى ما حداث...لعله استلهام للمثل الانجليزى(الكلاب التى تنبح نادرا ما تعض)..ولعله من الحديث الشريف(استعينوا على قضاء حوائجكم بالكتمان)...او هو من الكلام العربى(اسمع جعجعة ولا ارى طحينا) فى كل الاحوال هو مثل رائع يدعو الى العمل وليس الى القول.....ونواصل.

الاخ / معاوية : اهو دا الكلام,,,,, خلينا من الفايق وامو,,,,,سمعتو أكيد بي {شملة كنيزر الهي رباعية وقدها تلاتي} اي ان الطلب اكثر من الموجود, ولا تغطي الحاجة دائما,,, ويظل يشد كنيزر الي رأسه فتنحسر رجلاه والعكس صحيح,,,,,,, وبلدنا طبعا الموضوع فيهو معكوس فالخير كتير لكن المتغطين بيهو قليل,,,, اما نحن كافراد نظل نجابد مع كنيزر من المهد الي اللحد...زن زن يا هيثم.. لك الود معاوية

الاخ معاوية ارجو قبول المساهمة المتواضعة لكن اوعد فى المرات القادمة بى مثل ليهو جضوم
يقول المثل القحة ولا صمة الخشم واظن ان المثل يشرح نفسه

اخونا عمر مرحب بيك في عودة قصيرة بعد الغياب{ والقحة ولا صمة الخشم} رضينا وسميناها رضينا.

دعونى اشارك اخوتى بمداخلات من الامثال السودانية الشائعة عند اهل غرب السودان
يقول المثل الاعرج ديرو من جقلو الجقلو ما مشى عرج
وذاك يعنى ان تولية الامر يجن ان تكون لمن هو مختص او صاحب دراية به والا فليبتعد الاعرج من الجقلو وتعنى الحفر .............................. ونواصل*

اشكر الاخوة على المرور..والاضافة..
مد رجلك قدر لحافك...مثل يدعو الى عدم التطاول ومعرفة الانسان لحدود امكاناته..ورحم الله امرءا عرف قدر نفسه.
.
..
التسويها بى ايدك..تغلب اجاويدك..على كل انسان تحمل تبعات اعماله وعدم القاء اللوم على الاخرين عن الاخطاء التى ارتكبها بنفسه
كتلوك ولا جوك جوك..ما اسخف الانتظار..يستحسن مواجة الاشياء وعدم التسويف..وقريبا منه البدار فى الوردى(الحمى) زين..
عيب الزاد ولا عيب سيدو..ومثله تماما بليلة مباشر ولا ضبيحة مكاشر..يعوان الى الكرم المعنوى(لو جاز التعبير) حتى لو تعذر الكرم المادى لضيق ذات اليد..
من حل دينو..نامت عينو..مثل مسئول..يراعى حرمة حقوق الناس.ومثله..فقيرا من الدين غنى..
الصقر ان وقع كترة البتابت عيب..وهذا المثل يقودنا الى الحلقة القادمة وهى عن الاشعار السودانية التى صارت امثالا..

عذرا الاخ معاوية/ لقد قمنا بجمع كل المشاركات في موضوع الامثال السودانية,,, في بوست واحد وذلك تسهيلا للاطلاع ومنعا لتناثر الافكار,,,,, دون اذنك فمعذرة,,,,

معاوية / كيف حالك!!!!!أريت حالك زين,,,,قالوا: أم سلمبويتي ولا كدكاي زول,,,, ولالوب بلدنا ولا تمر غيرنا,,,, أتري إن كنا عقلنا هذا القول,,, أكنا أتينا خلف الريال؟؟؟,,, الذي هو خير منه جنيهنا,,,, طلع لإي واحد يورو من جيب وجنيه من جيب,,, خليهو يقول ليك ام سلمبويتي,,,,أقول هذا القول وانا أستحضر للقروش ناسها,,, وفي خاطري زولها{ زولا} القصير المكير,,, لك ودي

ذكرنا امثال سودانية سلبية وامثال ايجابية..ولم نتطرق للامثال التى تخص المراة فقط وذلك لايماننا باننا نتحدث-كالامثال-عن الانسان من حيث هو انسان بغض النظر عن الجنس(او الدين او اللون...لقيتونى كيف؟) اقول بهذه المناسبة اننا لم نتحدث عن امثال ثالثة هى الامثال (الكضابة) وهذا ما ذكرنى التطرق للمراة..المثل القائل المرة كان بقت فاس ما تشق الراس...ده مثل كضاااااب ..والله ضربة من مرة واحده تصدع بيك العمر كلو..(ارجو ان لا يسئ الخبثاء فهمى..فانا احاول نقل الحقائق ولا اتحدث عن نفسى)نرجع لى موضوع الاشعار السودانية التى صارت امثالا..واولها.(الصقر ان وقع كترة البتابت عيب.والمقدور ان حصل ما بنفع الجلقيب)..جميل..الناس ترجل وتاكل نارا..
قول الحردلو(ان جادت بى خيت العنكبوت تنقاد..وان عاقت تقطع سلسل الحداد)..فى روعة اكتر من كدة؟؟وتلخيص لى حال الدنيا وكل امورا احسن من ده؟؟؟..ثم هناك(ابل الرحيل الشايلة السقا وعطشانة)..وهو اخر الدوبيت.:الناس فى العروض ما تقيسا بى تيبانا
ما يغرك لباسن والعروض عريانة
ديل حراس رزق زى التكنو امانة
زى ابل الرحيل شايلة السقا وعطشانة)
هذا المقطع الدوبيتى كلو حكم وكلو امثال..ثم نصل الى..(الليل والنهار واحد على العميان..واللوم والشكر واحد على السجمان)مش ده كلام صاح؟؟..اتوقف هنا واترك البقية لاضافات الاخوة لانو واضح انو حصيلة الجميع اغنى من حصيلتى..ولا يفوتنى ان اعتذر للاخت هالة لانى سطيت على موضوعا بتاع الدوبيت..بس انا سرقت منو-فقط- ما سار مسار الامثال ولكم -كلكم- الحب....

لست من الخبثاء معاوية ولكن هذا المثل {أعني بتاع المرة }لا يزال قائما عندنا حتي إشعار آخر,, ويغني المغني.........!!!!!
اما موضوع الصقر إن وقع يبدو لي ان العكس صحيح, فهو مثل قديم استعاره الشاعر في صدر البيت,,, علي كل الصقر ان وقع كترة البتابت عيب{ خبثاء ولا ما خبثاء؟؟؟},, لك مني الود.

الجن بيتداوي ,,,, كعب الاندراوة,,,, ماهي الاندراوة يا جماعة ,,,, يخيل الي دي حالتنا الفيه دي ,,, لاها جن عديل ولا نصاح عديل,,ولكم الود.

ياخوي مالك وقفت ؟؟؟!!

ولا أمثالك كملت

واصل وكان لقينا حاجة بنساعدك

الاضينة اضربوا واتعضرلو ،،،، ده مثل من اسواء الامثال السودانية

الاخ معاوية : تعثرت اليوم صدفة في هذا الموضوع الشيق وايك هذه الاضافة.

يقال إن المثل (الناس في شنو والحسانية في شنو) قد قاله أحد الحكام السودانيين في غابر الايام عندما قدم الي نخبة من أعيان قبيله الحسانية- التي تسكن بضواحي الخرطوم –يدعوهم لحض الشباب علي التجنيد لمؤازرة الجيش الانجليزي في الحرب العالمية الثانية والتي استعر اوارها في تلك الايام والجيوش الايطالية علي اعتاب مدينة كسلا,فاعتذر كبير الاعيان عن مساعدته في ذلك التوقيت لانه يصادف سباق الحمير السنوي للحسانية " وكان هذا السباق فريدا في نوعه لان الراكب علي الحمار او المتسابق يكون مقلوبا اي انه عكس جري الحمار"الذي كانوا يقيمونه مرة في كل عام ( والعاقبة عندكم في المسرات) ولسوء الطالع صادف سباق الحمير لدورة ذلك العام هذه الدعوة للتجنيد فما كان من الحاكم وقتها الا ان قال قولته الناس في شنو والحسانية في شنو؟؟ ..

الاخ معاوية تقبل في البدء تحيتي وسلامي واريد ان أرد علي موضوع الامثال السودانية وإن كان الرد متاخر وأخالفك الراي والفهم
1/ان غلبك سدها وسع قدها هذا المثل يدعو لعدم الاستسلام والرضوخ يعني لو وسعت قدها أكيد حاتسدها
2/كان كترت عليك الهموم ادمدم ونوم0يعني حاول تنوم لكي تنسى ألامك وهمومك حتى تكون ذو قوة وشكيمة وانت مرتاح اكيد حتفكر صاح
3/ابعد من الشر وغنيلو0اي ابعد من الشر وغني له حتى لا يقع فيه اي أنسان
4/الإضينة دقو واعتزرلو 0اي دقو حتي يفيق من نومو ويصحصح
5/خلي أمك للرجال ولا تخلي حقك للرجال 0يعني لو بتخلي امك للرجال خلي حقك ايضا لكي تحافظ على حقك حتي لايضيعومعروف ان الوالدة هي اعظم ما في الوجود يستحيل على كل شخص ان يهمل فيها ويقلل من قدرها
وارجو ان تتقبل وجهة نظري في النهاية
ولك ولافراد المنتدى الشكر والتقدير على خلق هذه المساحة الشيقة

فقراوي حبابك

والله قبلت وجهة نظرك في (كتر الهموم،وأبعد من الشر، وخلي أمك)لكن قصة القد البعد توسعو تتحمس عشان تسدو...
دي ماااااااااااا أقنعتني

بعدين أخونا الإضينة دة إنت دقيتو وصحصحتو....معتذر ليو ليييييييييييييه؟؟؟؟

ان شاء الله يوم شكرك ,,,, ما يجي

يعني نحن ما نشكر زول او نمدحه علي شئ فعله وهو حي ليزيد احسانا واتقانا,,, الا بعد ما يموت ,,وينفخ اولاده صدرهم استحسانا ,,,, وقد يكون نوما علي ما فعل الاب الميت ,, الذي مات وهو يحس بعدمالتقدير,,,لكم الود.

سلام..تصدقوا انى ما شفت أغلب اضافاتكم لأنى كنت بعيد من النت لزمن طوبل فمتأسف.. ورغم أن تعليقاتى جاءت متأخرة لكنى أجده لزامأ على الاعتراف بوجاهة منطق فقراوى رغم عدم اتفاقى معه وطرافة مثل قرفان جدأ..ونحاول التنشيط كما حاول مرغنى..
الرجال دناقر ما كبر عناقر
ورغم أننى لا أعرف- بالضبط- ما الدناقر لكنى أحس بأن المعنى واضح

دِنقِر بكسر الدال والقاف: النحاس الذي يُضرب في المناسبات,, قال الحمري يتغزَّل: كل ما تهجس عَلى بدِّي الدناقر لبعه
دُنقُر بضم الدال والقاف: الأرض,,, او ما انبسط منها
دنقر: خفض رأسه ,,,, ويقال في السعودية ,,, دنَق,, وفي الفصحي دنَق تعني أطال النظر

لا اظن المقصود من بيت الحمري ,, خفض الراس ,,يعني حتي لو حاولنا ان نقول انه يلبع المدنقرين كل ما تهجس عليه ,,, ماذا يفيده لبع المدنقرين؟؟؟
وكذلك الحال في المثل السابق ,, لان الرجل المدنقر دليل ذلة وخنوع.
المعني الثاني :الارض او ما انبسط منها ,,, يمكن ان يفهم من بيت الشعر ان الشاعر كل مازاد عليه الهم والغم ضرب في الارض,,, يمكن قبولها علي مضض.
كذلك بمضض اقل يمكن قبولها في المثل علي ان الرجال هم بما يملكون من اراضي,, وليس بضخامة عناقرهم,,, ولو انها يمكن استحسانها اذا قيل المثل حديثا ,, فالرجال الآن بما يملكون من أراضي وعقارات ,, وليس ناس قريعتي راح من ذوي العناقر مثلي.
أما الأرجح: في المثل وبيت الشعر,, أن المقصود هو النحاس او الطبل.
في بيت الشعر ,, قياسا ببيئة الحمري وزمانه ,,,فإنه كل ما زاد عليه الهم والغم لجأ الي الطبول وهنا اظنه قصد الطرب عموما للترويح عن نفسه.
أما في المثل المذكور فينطبق عليه المعني تماما,,, فالدنقر والنحاس كان في بيوت سادة القبيلة او الحي ,,, أصحاب الدناقر قطعا بهذا القياس وقتها هم رجال أكثر من ذوي العناقر......
للدنقر معني ايضا عند الرباطاب او الدناقلة لا ادري ,, يقصدون به قِن الدجاج ( اوبيت الجداد),,, لا أظنه مقصود في الحالين,,
اتمني ان أكون أضفت شيئا لما ذكر كجنكي,,, لكم الود.

إنتو الأمثال السودانية كملت؟؟؟؟؟

عندكم مثل يا اولاد الشفيع قاطعنو من مخ رأسكم بتاع البجعة ,,, هم تلاتة ولا اتنين البجعة أخير منهم :
الساكن مع نسابتو
والبلبس هدومو زاتها بعد الحمام
في تالت ولا مافي
ورونا المثل دا النجرو منو؟

سلام.في فرق بين المثل والمقوله بتاع البجعه ده مقوله ما مثل وهو فعلا مقطوع من الراس،الثالث شنو والله نسيتو لكن قطع شك هيثم بيكون عارفو واعتقد انو العزيز ياسرـرحمه الله ـ هو القالو. لك الود

سلمى الشفيع كتب:سلام.في فرق بين المثل والمقوله بتاع البجعه ده مقوله ما مثل وهو فعلا مقطوع من الراس،الثالث شنو والله نسيتو لكن قطع شك هيثم بيكون عارفو واعتقد انو العزيز ياسرـرحمه الله ـ هو القالو. لك الود

وايضا من المقولة المشهورة وقربت تبقى مثل وتابعة لأولاد الشفيع ( يالحسين جيب ...... يالحسين جيب ..... الحسين من وين يجيب ؟؟ )

التسوى كريت فى القرض تلقا فى جلدا
لا أدرى كيف استطاعت كريت أكل القرض...لكن فى هذا الزمن ياما فى( كريتات)
عملن عمايل فى القرض وازداد جسمهن جمالأ ونعومة..

سلمى الشفيع كتب:
الثالث شنو والله نسيتو لكن قطع شك هيثم بيكون عارفو

والله هيثم ذااااااااااتو ما عارفو

الاعور وسط العمى يقدل ....الأعور يقدل في بلد العمى (يتبختر)
المعنى واضح .. صاحب نقيصة أو عيب.. عندما يجد من هم أكثر منه عيوبا يذدري بهم .. ويشمخ بينهم رغم عيبه ... ومثله بلدا ما فيها تمساح يقدل فيها الورل ....تري كم من التماسيح حي يرزق؟؟؟
لكم ودي.

محاولة لإنعاش هذا البوست:

الما تقدر توافقه نافقه.

بالله في حاجة طلعت زيتنا غير نفاق من لا نستطيع أن نقول له لا ... دا مثل إنهزامي وصولي بكل معنى الكلمة .... وفتشوا معانا لي حاجات زي دي عشان نمسحها من خارطة الأمثال.
ولكم الود.

إنت ياميرغني متأكد مثل النفاق دة سوداني؟؟؟

بيكون مثل عربي وجانا زي وزي أي حاجة كعبة

دة مش تبرئة للأمثال والأخلاق السودانية من الكعب ، لكن أعتقد والله أعلم المثل دة ما سوداني