مبدعون لم يسمع عنهم أحد

وأنا بكتبك

وانا بكتبِك ...
شولة وسكون .. بى لون ولون ...
والضمة برضو بتكتبِك ...
في كل حرفين من غنا ...
وفي كل اصبع مرتبِك ...
اللمسة والخدر البناوش في المسام ...
أنفاس تحاول تجذبِك ...
وفي كل حالاتك معاي ...
بلقاكي كلمة شوق تتور فيني حاجة تدوّبك ...
وانا فيكي دوبني الكلام ...
والفاظ كتيييييرة بتكتبِك ...
لو عارفة يا سفري الطويل !!!
ميل القليب والخطوة ميل !!!
جوايا شايلك وبحجِبك ...
عن حتة فيها الشوق خطر ...
عن عيون كل البشر ...
وناس بترمي عيونا فيك تتوهطك ...
ما اجملك ...
وانتي بتشوفي الدنيا الوان من قزح
تضحك سماك يوم تدخلك ...
والقمرة شالت نورا منك واختفت ...
مااااااا إكتفت ...
بس إستحت !! من تاني تظهر وتشحدِك ...
وانا شمعة سارق ضوي منك ...
نفخة منك تكتليني ...
ونظرة منك اضوي ليك
الباقي من دربك معاي ...
يا ضل ضحي ...
راكوبة الساعة الهجير ...
يا شقشقة كل العصافير
التّرِك جواكي زيي تعشّشِك ...
ما تتني عودك للرياح ...
ما تكوركي لو طلع الصباح ...
وتقوم عصافيرك تطير ٠٠٠ وتمقلبِك !!!
دي الوحدة شينة علي البِرِيد ...
والشوق برااااااااهو بقردنِك ...
وخلي طاقتك فاتحة فيك ...
بابك عيونك ... ضلفة ليك ....
والتانية لى قاسي الظروف .. يوم تغلبِك ....
وما ترمي روحك لاحتمالات المقاس
وتختاري زول ما بلبِّسِك
ما تعايني فوق !!!
دي النجمة لو قالت تَخُر في يوم .. أكيييد ما بتعجبك ...
وما تدسي في قلبك كلام عارفاهو مُقلق .. وبِِتعِبِِك ...
وما تنسي يوم .. احمر شفاك ...
برواز مثيييييير لى بسمتك ...
دي البسمة لو هجرت ملامحك ...
ما بتعود ...
حتى المرايا الما بتحس ... ما بتقبلِك ...
شن باقي من عمرك فرح ...
شن باقي من جرح الزمان الما نتح ...
والباقي من عمرك سنينو بتحسبِك ...
والباقي من كلك جسد ...
نظرة الناس الحسد ...
بتخشي وين .. يوم تدخلك ...
إتحصني وغطيني بيك ...
إنستري ...
ما تبقي نقناقة كلام ...
كُتر الكلام والنقة ما بِتوصلِك ...
وابقي عشرة على العيون ...
البشرة بى لون .. أو بدون ...
وحاجات كتييييييييرة بتعرفيها براك ...
بدونا مين يستحملِك ...
خليها انفاسك عطر ...
وما بين شهيقك وزفرتك .. تلقيهو بين رئتيك عِتِرْ ...
يستنشقك ...
أو مِدّي حبل الصّرة دم ...
ما دمو كان نفس الفصيلة .. وبشبهِك ...
أبقى جواك كل شى ...
وتبقي جواي أغلى شي ...
نعلّم الروح المشي ...
تاتيها لو مرقت عليك ...
دسيها لو كان فيها شي ...
دقاتو في قلبك تئن ...
والآهة لو عصرت قليِبو ... ينبّهِك ...
خليكي زي ما إنتي .. إنسان فيهو زول ...
بقى كلي شي ...
دمّك ...
عرِوقِك ...
وبصمتِك ...

رحيـل

دسيت اللآه القتلت حيلِك
لميت الحيرة الصبغت فجرك باللون الأسود
وكتبتِك في دفتر أحزاني شهيدة
يوم إتشالق شوقي إليك من خطوة عنيدة
كان الليل أداك وشهُ
والصحراء الفي عينيك افتكرتني برش
نومي ... أحلامك ما بتبقى سعيدة
حزنك دشر الفجه الفيها وحيده
وطريقنا بعيدة ......
طلعي مويتك !
أروي يباس السعن الفاضي
لوني حنقوق السعف الناشف
أنا واقف مستنيك
متـوتر وخائف
طين ومشقق ... عروقي حراز
منتوفة وتسـأل مطـرك ويـن ؟
نشافك ما تخليه يعتب بابك ... سدي !
هدي ملامحِك في جِلْدي
لخبطي لونك واديني عقابِك
أرسم ليكِ الحلمْ الوردي
أمدْ في عيونك سكه تودي
وارضية لهفه ...
حروف بتندي ... لو اندفقت على مويتك
أو نامت على قشي …

كبي عيونك في وشي
إفرح من نومي قضاك
يا السمحه كفــاك ...
ما ودرت شواهدك تبْ
واتغابيت في خيالِك عِرفَة
أديني الضو الفالِت من جواك
وديني لأقرب مرفأ
اتقدَ شراع الريح العاصف
وانا واقف مستنيك
بتلفت وخــائف

متوقع إنك تمسحي من ضُلي اللون
وتفرتقي فيني نسيج المخ
باريتك عشمان
ظلمتك شكيت فيك
إنك بتريدي الهم من شكلهُ
وانا مهموم بيك
أعزك ما فتشتك في رغوه
ولا دكيت أسوارك عنوه
ما أفشيت أسرارك ...
إلا مرصص من جبخانة عينيك

ساورني شعور!
مسقوف من موية وعدك
ومفروش بالدم الساخِن
إني ... بحبك
كلمه تقـــــردن أي مســـــام في جلــدك
كلمه تهبش بى طرف الأصبع في خدك
تضحك قدامك نص الليل قُبال ما تنومي ...
تحلمي بيها تطايب خاطرك
تمسح ليك في خصـلة شعرك
تتمردغ فيـك
تجفل لو مس الكاف حلماتك
متهورة خوفي عليك
غطيتك من شوقي إليك
مخده لقيتك وانا تعبان
...
حركتك من خدري
لخبطتك وانا مكسوف
لحظة شرقك عسل الكلمه سرقتك
ولم العين افتعلت غمضه غمستك
غرستك في الجوف لى بكره
نبتت جواى يرقات الفكره
وفرهد فيكِ شتيل العافيه
...
غريق جواى الخندق بِسأل!
الدم الساخن لمتين ؟
الشريان الصّنقر فوق جلدك سوط !
مغبون من مين ؟
دنقر وشي وعديت من واحد !
ما اتفكيت من جنزير الحال
ما فـارقتَ الهـم القاعد
ما لجمت صهيل البــال
اضاريت في قمرك شـاهد
ويوم سبناك ما كانت حال
كلمي لينا الصبر العـائد
لملمي لينا عقاب الفـال
فارقتِك مجبور ... فارقتيني محنه
...
مبتور الفرح الفي عينيك يوم قُلتَ سلام
قدامي خريطه واسفلت
قدامي نزيف الكيلو الزفت
أتحاوم ما عارف وين
اتمطيت ما قدرت أطولك!
اتلفتَ محلْ قبلتَ مهنضبْ ...
مهنضبْ بالوقت الشَاهر سيفهُ وراى
...
غنيتك يوم كحل مروادك صبري
الصبر جميل ...
لون مروادك من عينيكْ
وعيونك أجمل
نسفت صمت الشارع لحظة شوفك
شوفك خنجر
خنجر طعن البال
وكان في البال إني أشوفك
والبال أشتر
بكيتي وسكت الشارع ...
استغرب خوفك !
دميرة النيل من دمعك
عِرِقْ اتلف في جوفك
سكت صوتك ... نشف ريقي
صِحَتْ بحة عيونك موج
وانا ... ضفتين حاضنين دميره وموج ضِهِبْ
ضهب في الجرح وانتح
خيال يفقس أمل حفيان
أمل حفيان وبترنح
تواريب العروق تتبل
تمر شدر النخيل إفرح
وتتبدل مواسمك لي مراسم عز
وكل الورد إتفتح
خلفك وأمامك
نشني للزمن الجاي سهامك
دشني أحلامك طوق
أنا واقف قدامك ... هدفك
منتظره شنو ؟
...
مسمم بالزمن العد
ومعتق بالعشم المات
وكت نعرف زمن دقشِك خيالي وفات
أصغر من خطواتك
واكبر من مشواري وآهاتك
صوري مأساتك ...
لى برواز الهم الفيني
واطرحي مشوار أحلامك لوحة
للسكة البتطول قدام عيني
تزرع فيني مواجعك
تسرق مني حنيني
تقتل قهقهة الضحكه الكانت فيك وفيني
...
اتمسكي بالنفس الطالع ونازل ليك
ادفقي في الروح المشتهياك
اشتتي بين الخطوة وبن الدرب المليان أسرار
أنا محتار ...!
ما عشرق فيني صباحك
وما اتلفت وراك فنار
جبين كل المدن ضلمه
فراغ كل الفجج زحمه
وانا الممتد على مد البصر تذكار
أشاورلك ...
عدد ما الموجه تدفر قيف
ولا هضمت خطاك مشوار
مستف بالتعب دربك
منتف ريشك الناعم
حبل أفكارنا مترارك
ومترارك هرب منك غياب
ودعتك للجياع قندول
رسمتك في الخيال ورتاب
واصابعك ماسكه زمباره
بتعزفي غنية التيراب
وراسمالك ملود
رافعاه في وش الظروف القايمه ساكت للشقا
حِشيها ما تخش في التقا
شيليها لينه مفرتقه
شريها فوق راس التكل
تاج الفتاه الشقيانه صاج
ومطموره من عُسر الزمن
قضيه في الحب والزواج
...
ولونتك بلون أسود زفاف أحباب
منو اللون زفاف الناس بلون أبيض؟
سؤال ؟
...
سرحتِ وفي سوادِن حزنِ داكن
في بياضن مزنِ ساكن
بوادر زحمة في الدمعة التفج رمشين
تفصد خد وتتبعثر تفتش حد
رماديه بتتاوق لي
...
أنا وانت وحبل صبرين
مشربك في طرف غيمه
بتسقي المر
وكان المر تحت رجليك صفق نيمه
كشحي للعصار خصلات
عشان تدي الغبار قيمه
دَفِن سرّك
حفِر ساسك على إيدي
بياض شاشك على عيني
خلي الغبار إكتر
وبلاك شن عيني
حزن شامل
سكوت
...
سكوتك في الحقيقه عذاب
مصرتك ما نشف همك
سكنتك ما سكت نّمك
مسح منديلك الأبيض عرق طاعم من الأهداب
مشوش بالحزن شوفك
خَرَتً من الخدود لونك
كشحتو على الضلام روًاب
خاف الليل على نفسو
وفتًح للصباح أبواب
عتقتك للمطر والغيم
عشقتك ما أظن كضاب
مكانك وين ...
عيونك وين ...
ومين حقن السفر فينا
ورمانا ورا الحدود أغراب
ومين حقن السفر فينا
وخلانا...
بدون أحباب …


محمد أبوعاقلة الطريفي
منتصف الليل ـ حسب التوقيت المحلي لمدن عينيك