كتمت

كلمة كتمت ... مصطلح دخل جديد فى الثقافه العاميه السودانيه ذى ماسوره وفرده وغيرو

كلمة كتمت جاءت من الكتم وكتم الشى يعنى اخفاءه عن الناظرين ( لقيتونى كيف ) ... وكلمة كتمت جاءت مع القعده بتاعت السكر فى البيوت المشبوه عندما تاتى الشرطه للكشه


والزول البشوف الشرطه بيكوريك كتمت

واصبح المصطلح شويه شويه يدخل السوق والاسعار بتاعتو طارت السماء فمثلا الكشات بتاعت المحليات للباعه المتجولين ( بقولو كتمت )

وناس الورنيش ( بقولو كتمت )

وناس الركشات مع ناس المرور ( بقولو كتمت )

ودخل المصطلح الموسسات الحكوميه فاصبح الموظفين عندما ياتى شخص راكب عربيه مظلله (بيقولو كتمت )

وفى البيت عندما ياتى الوالد الطفل الصغير ( بيقول كتمت )

وفى الجامع عندما يحضر الامام للخطبه ( يقول احد المصلين كتمت )


وعندما ينظر شخص ادنى صفحة المنتدى ويرى احد المشرفين يقول فى نفسو ( كتمت )


كتمتتتتتتتتتتتتتتتتتتتتتتتتتتتتتتتتتتتت فك البيرك ( والبيرك هو العلم .... يعنى تقوم جارى ) ومعروف فى الحرب ان العلم اهم شى ولمان تفكو الموضوع يعنى انتهى ( وقعت الرايه )