قصيدة جديدة

بداية : لعل الجميع يتفق معي على أن المستفيد الأكبر من إطلاع أكبر عدد من الناس على النصوص(ايا كانت..شعرية، قصصية،..الخ) هو كاتب النصوص ذاته {وبالأخص في حال وصول رجع صدى المتلقي إليه} إذا فمتعة الكتابة ونشر ما نكتب لاتكتمل إلا بمشاركتكم جميعاً ، عليه...أضم صوتي لصوت أخينا عمر الزبيدي وأطلب من الجميع المساهمة بشئ أكثر من الإطلاع.
ودمتم.
ـــــــــــــــــــــــــــــــــ
كان خريف هذا العام قاسياً على الشعب السوداني وأذاقه صنوفاً من العذاب ، وذات مصادفة خلال هذا الخريف التقيت بالشاعر الفذ/محمد الحسن سالم (حميد) وبينما نحن معاً بدأ المطر بالنزول ، واختفيت عن أنظاره للحظات ليفاجئني بمقطع شعري جميل عبر SMS ولما التقيته بعدها بدقائق قال لي(عليك الله تم الشي دي....عافرا ...لا تخلها)..فكان أن أكملت النص كما سيأتي:



بتسأل...
والسؤال واقف على حلقك
وقوف حالك
بتسأل عن بلد منسية من ناسا
لاشرقت عليها شموس
ولا داعب ...صباح - بي غلطة – إحساسا
وتسأل عن عيون الناس
وكيف – بي قدرتك ربي – بقت عميانة
لا شافت ولا بتشوف ....سوى موج الحزن غرَّق
جروف أحلاما من ساسا..........ولي ..........راسا
.......
......
محاصر ..
لا طريق تمشيهو .... لاترجع
مطر..........فيضان
نزل فوقك......
على الخوف السكن جوّة المسام عشعش
ملاك أحزان
محاصر...
من جهاتا الستة يا مسكين:-
شروقك .......نوح
وغربك مافي قيفة تلوح
شمالك..........غم
جنوبك ديدبان الهم
سماك .......مقدود
وأرضك – حول لا قوة –
ممدد زي حشاك مهرود
.........مذلة ......هوان.
ووين تمشي؟؟؟
تقبِّل وين؟؟؟؟
...كأنها حتى هي انسخطت : -
بدل كانت ...:
كما وحي السما بتنزل
........دوام بالخير علي بلادك
كما لحن الخلود يعزف
...........تخاها رخا على اولادك
رذاذ ......عشاق
خدار.......مشتاق
نغم يرويلو كم عطشان
بقت مرّة طعم غصة.........تهد لي الجايي فيك والكان
تشوِّه ذكرياتا معاك
تنشِّز كل غناوي زمان:
(نغني تملِّي للمطرة
رشيعتا نبدا ننجارى
تارة نصن تحت شدرة
وتحت كفة يدين تارة
فهل خوفاً علي طينّا
أم أنّ الطينة تاوارة
جدل ياخلقة المخلوق
حكاية الموجة والسارة)*
............أو ...ال....طوفان...
وتتمدد..
كما جبل الهموم فوقك
خراب من كسلا لي بارا
....تقيف.............تسمع:
(نغني....تملّي...) ...لا ...لا اسكت
(بقينا نخاف من المطرة
رشيعتا كيّة بي نارا
تارة حيطنا تتوقع
وسيل يلفح عفش تارة
فهل نقنع من الحاضر
ام انّ النفس أمّارة
وجل يا روح خلق مخلوق
وحل ورّانا أسرارا)
.............أو ....ال..غثيان
.....
أمش آخوي
أمش لا تقيف
وما ترجاها تستناك،،،،،،،،أصل لي عندها وأسأل:
متين آدنيا نتصالح؟؟
متين تديني كل حقي؟؟
متين بالبسمة نتصابح؟؟؟
أجر آخوي
أجر لا تقيف وقوف حالك
......
وشيل نفسك
وعلِّم لي زمانك كيف ...
إرادتك فوق قساويهو
.......بتبني من الخراب أوطان
إرادتك يافجر نرجاهو وان طوّل.....
كما نجم السما – تضوِّي- .....وتزيدو الضلمة في اللمعان
كتلك الكان يمين موسى
بتلقف أي كيد صنعو
عدوك وعدوها وين ما كان
كما العنقاء
بتطلع من رماد احباطنا..، تحضن لي حلمنا تطير
ويفضل فينا..
لا بنفارقو يوم في نوم ....ولا صحيان
إرادتك يا حلمنا تظل
وتفضل فينا
لابتفوتنا يوم في نوم
ولا صحيان.

- بحري 8/8/2007م-

*المقطع لمحمد الحسن سالم(حميد)

هيثم صدقني,,,,,,,,, بقرأ في القصيدة من الاول وراجي الحميد ينتهي عشان تبدأ,,و لقيتك ما بديت لسه,,,,, وانا ولا مصري ولا حاجة,,,,,,, جد بي الجد ابداع,,,, والنقول بنعرفلنا شاعر, لك الود

هيثم جد مافى كلام أحلى وأبلغ من كده وخصوصا مقطع
أمش آخوى
أمش لا تقيف .......
وما ترجاها تستناك ,,,,,..........,,, أصل لى عندها وأسأل؟؟؟؟ إلى آخر المقطع .

أولاً

حبابك عشرة أختنا إنتصار في بيتك ودارك

ومشكورة كتييييييير على المرور والمجاملة

مع عظيم التقدير

ما أول مرة أشوف القصيدة لكن أول مرة ألقاها في المنتدي

و

الجميل في الموضوع ..... إنو

اتخيل لي لو جابوا حمّيد زاااااااااااااتو

ما أظنو يقدر يفرز مقاطعو الكاتبا من الّت آخونا بشو ..

وياااااااا ود عمتي عفّارم ,, عفّارم

..................................
..................................

إنتصار

والله عندنا بوست خاص للترحيب

لكن أعضاءنا يعانون من علة غياب المدير

فلذلك

نستميحك عذرا"

وتقبلي ترحيباتنا الحااااارة

ها هنا وألآآآآآآآآف المراحب بك في دار

تنتظر منك المزيد والمزيد ..

وتاني مرحب