إفتتاحية ناس جوبا

من طرف **ميرغني ابراهيم** الأحد مايو 09, 2010 3:16 am

طرأت لي الفكرة في الايام السابقة ,, وأنا أحاول تجديد تواصلي مع زملاء سابقين من اوائل الثمانينيات الي أواخرها .... أيام قضيناها بجامعة جوبا
كانت من أنضر سني حياتي " وهكذا حال كل من ناهز الخمسين حين ينظر الي عشرينيات عمره".... وجدت أنه يمكن إيجاد مساحة للإلتقاء هنا ومعرفة أخبار زملاء الدراسة , على الاقل وتجديد صداقات جار عليها الزمن والظروف.
أتمنى أن تثمر الفكرة .. فلنبقى على اتصال

ميرغني إبراهيم / فرنيب

فرنيب الله يديك العافية الفكرة اكثر من رائعة و موفقة و اظنها جات في وكت الناس محتاجة تسترجع تلك الايام الرائعة روعة جوبا و ناس جوبا وجامعة جوبا
الشكر لك علي المبادرة و ارجو ان يستجيب الجميع

ملاحظة هامة يا فرنيب بالله غير العنوان دا لانو كان معانا اخوات فضليات لازم نحفظ حقهن.

زين العابدين جدا نغير العنوان لكن أولاد جوبا كانت تطلق علي الجميع.... لك الود.

من طرف جعفر دفع الله الأربعاء مايو 12, 2010 11:29 am

إزيكم يا جماعة
إن شاء الله تكونوا مبسوطين
وين الناس السجلوا جديد ما ظهروا ليه
عاطف عبد المجيد و نادرة حسن
وريهم الطريق يا فرنيب

الاخ/ جعفر.... لك التحية .. تعرف أن كل الاشياء الكبيرة تبدأ صغيرة ... حتى الان سجل أكثر من 12 عضو جديد بمن فيهم الاخت نادرة والاخ عاطف ... المشاركات ستأتي ... المهم تفعيل الملتقى وتنشيطه بالمشاركات ... وسيأتى الآخرون وسيتداخلون إن شاء الله بس ما تقيف .. وما شاء الله نشاطك واضح ... لو لقينا 2 او 3 بنفس النشاط ستتسارع الخطى إن شاء الله... لك الود الكثير.

سلامات يا ناس

من طرف Seif eldin Alin Mahdi الإثنين مايو 17, 2010 5:50 pm

جوبا وما أدراك ما جوبا ... الواحد لو قالوا ليه طلعت من الدنيا دي بشنو ... ممكن وبدون مبالغة يقول طلعت بجوبا ... جوبا الأخوة .. الصداقة .. الحب .. الشعر .. الأسابيع الثقافية .. الخضرة .. الجمال .. حي الجلابة .. نمرة تلاتة .. اطلع بره .. رجال مافي .. جوبا .. السماني هول .. السيهات .. البيهات .. التمثال .. الراوند تري ي .. جوبا .. أحمد الطيب .. الصافي قباض .. سمية الجوخ ((لها الرحمة )) .. جوبا .. برلين وما أدراك ما برلين .. المهم يا ميرغني وبقية الأخوة الله يعطيكم العافية .. أن تعيدوا لنا الحياة ... وتزرعوا في قلوبنا الأمل الأخضر بعد كل هذا اليباب فهذا أمر يجد منا التقدير والثناء .. ويا ليت شعري ......

من طرف NADRA HASSAN ALI الخميس مايو 20, 2010 12:24 am

سلام انا جيت ياجعفر السلام عليكم , وياالزين في جوبا كان في جنس خشن وجنس خشن جدا , وانشاء الله اقدر اشارك معاكم وماقصر , والشكر للدكتور ميرغني لدعوة الانضمام .

احلي يوم سعيد معرفتي بيكم واحلي جامعة عرفتني باحلي ناس - شكرا للدكتور ميرغني علي المجهود الكبير - تقبلوا يحيات جميع الاخوة بالدوحة - الابوابي - زاهر -عبداللة عابدين وبقية الشلة

من طرف Seif eldin Alin Mahdi السبت مايو 22, 2010 6:39 am

كيفك يا أخونا صلاح ميرغني مكاوي الشوق مطر ... سنين طويلة ... أتمنى أن أسمع عنك كل خير

من طرف NADRA HASSAN ALI السبت مايو 22, 2010 2:20 pm

سيف الدين على مهدي كيفك وكيف اخبارك ؟ وتحياتي لناس الدوحه

من طرف زاهر عبد الرحيم السبت مايو 22, 2010 8:25 pm

االسلام عليكم يا ناس جوبا
أنا سعيد جدا بهذا التواصل و أتمنى من الجميع مداومة التواصل و التوثيق لأيام جميلة محفوره فى الذاكرة. سيف مبروك الكتاب . جعفر إزيك و أنا مقصر فى الإتصال .ميرغنى صمت دهرا و نطق دررا أحيك على هذه المبادرة.الزين الزين و الاخت نادره وامال و صلاح من الدوحة لكم التحايا جميعا.

من طرف Seif eldin Alin Mahdi السبت مايو 22, 2010 9:26 pm

أوووووه أمانة يا ميرغني ما جوك رجال .. زاهر عبد الرحيم بجلالة قدره ... زاهر ده طلع من السودان 1989م طلعت زول زعلان ... زعلان عديييل كده ... وما داير يعرف أخبار أي زول ... يعني لدرجة الانترنيت دي مقاطعها ... فهذه بشارة خير بأن هذا التجمع ح يكون محفل ودوحة أكبر من دوحتكم يا زاهر وصلاح ... خلوا الناقصة تتم وأدعو لينا الفاتح الأبوابي ... ((صاحبي))
نادرة حسن علي كما عهدناك مشكلة حضور جميل ... ياريت لو يوم شلتي اللاب توب بتاعك وعلمتي اقبال هارون أ، ب، ت ، ث، الانترنيت

كيفك ياسيف الدين علي مهدي والله والله والله مشتاقيين جدا جدا انشاء اللة تكون بخير وصحة وعافية وبقية الشلة - نادرة حسن كيف اخبارك ان شاء الله تكوني بصحة وعافية عايزين نسمع كل شي جميل عنكم - شكرا يا ابو الزهور وان شاء الله دائما لامين وسالمين.

الاخوة / المتداخلين

نادرة حسن علي مرحب كثير جدا بطلتك ... خشن ولا ما خشن برضو نور بيتنا.

الزاهر: يا اخي شوق بحر مرورك بالدنيا ... معتمدين عليك تعمّر الحكاية.

صلاح ميرغني : أهلا بيك كثير ...سعدنا بمرورك نتمنى ان يكون دائما.
التحية لسيف علي مهدي وزين العابدين ....
لكن لا حظت حاجة ... أنو كل الناس بمروا على البوست دا بس ... توجد بوستات أخري .. الرجاء أختيار القسم المعني" صفحة عامة أو صور أو أجتماعيات" .داخل كل قسم توجد عدة مشاركات ولكن تظهر المشاركة الاخيرة فقط .بالضغط علي القسم نفسه... ستجدوا بوستات أخر..... ودام الود بيننا.

يا ناس جوبا هوووووووووووووووووووي سلام

أولاً حبابكم عشرة كووووووولكم ومنورين منتداكم

ثانياً : أنا لا قريت جوبا ولا قدركم -حلاااااتي يا يمة وليد صغيرون لسة- بس جيت ناطي ليكم عشان كسر الحواجز

تالتاً : بالتاء......ودة الأهم

عندي إحتجاج :
إنتو ليييييييييييييييه مركزين على ناس جوبا وما بتشاركوا-بكثرة- في المنتديات التانية؟؟؟؟؟؟؟؟؟

راجينكم بي غادي

عليييييييييييييييييييييكم الله أظهروا

من طرف الطيب الأربعاء يونيو 16, 2010 12:36 pm

شكرا على القائمين على المنتدى والله فعلا مبدعين ، الحمد لله الذي سخر لنا التكنلوجيا للتعارف ، احبتي ابناء جامعة جوبا لكم كل التحية مني ان الطيب عبدالكافي

الطيب / كيف حالك ؟؟
شكرا لمرورك ومساهمتك ...أكثر ما يسعدنا تواجدك معنا ... لك الود.

من طرف سلمى الشفيع الخميس يونيو 24, 2010 8:26 am

يا ناس جوبا السلام جاكم..اسعدني تواجدكم بالمنتدي..آمل ان تنتشروا في باقي المنتدي للتتعرفوا علي كل الناس الجميلين.زي ما قال صديقنا هيثم انابرضو ماقريت في جوبا لكن اعجبت بالفكره الجميله من المرغني الرائع وهو دائما يأتى بالجديد المبتكر كما عهدناهو.اهلا بيكم بيناتنا ونورتو كتير..لكم وللعزيز مرغنى كل الود

من طرف fton الإثنين يونيو 28, 2010 7:35 pm

بعد التحية والسلام احب اعرفكم بنفسى انا خريجة جامعة جوبا كلية المعامل 2005 ومقيمة خارج السودانوتعرفت على المنتدى عن طريق الصدفة وهو منتدى اكثر من رائع لانو برجع بينا لاحلى ذكريات وياريت كل خريجى جوبا يشاركو معانا

شكرا أختنا سلمى على المشاركة والدعوة...
الأخت فتون ياألف مرحب بي ناس جوبا ... ووجودك إضافة وسعيدين جدا بإنضمامك إلينا .... والمنتدى مفتوح على أبوابه لأي إضافة .. والدار دارك .. لكم الود.

إفتتاحية ناس جوبا

إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

الزمن الزين

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا

رد: إفتتاحية ناس جوبا