مندوكورو

قصيدة هاشم صديق ... تعبر عن واقع الحال ... إخترناها لتكون في إفتتاح مكتبة الشاعر


مُوندوكورو

شعر : هاشم صديق
(1)
مُوندوكورو
وانا انفصلتَ
وانقسمتَ عديل
- ياميرى -
قبال الجنوب

عشرين سنة
وجوايا مندلعا
الحروب
هلكان مقطّع
بين مشارق
وبين غروب
جواى شمال
واقِع شَرٍق
جواى جنوب
ضهبان غَرٍب

ناشونى
ما فَضّل سهم
سامونى
ذى زفة بَهَم
نشلونى
فى حبر القلم
عصرونى
لاذوق لافهم
حِس الفرح
جوايا نِضِب

مُنشار اكل فينى
وشِرب
جلدونى
ما قالو الرقم
كِمْلَتْ على ضهرى
وعَضَاى
كل ( الجداول)
فى ( الضَرٍب ).

مُوندوكورو
زى التقول أنا
ما أنا
حتى الزمان
والأمكنة
مشهد ( كريسماس )
و ( راس سنه )
سحر الطقوس
الممكنه
اتهدّا حيل
شَرَف الغُنا
جمحت
خيول العكننه
الجوع سكن
غُرف الحشا
(الدهشة ماتت )
مُدهشه
عِشق القدم
لَسع الحفا

دار الزمان
لف الروييس
عصف الهوان
ِلمس العذاب
كتف السما

وأنا… ما أنا
(2)

ضاق براح(2)
طول المسافة
بين لهب
غُبن القصيدة
وبين زناد
البندقية
الثورة
فى رفّ المتاحف
القادة زاحفين
زى سلاحف
الوالى مزّق
للمصاحف
والأُمة
فى حمى الأذية

أدينى يوم
وطناً مُفَدّا
شديهو
فى سرج المخدّه
أدّى خيل أحلامى
دفرة
خلى يا روحى
الحوافر
تطوى ظلم الليل
تسافر
لى فوانيس المجرّه
وبين شفايفك
والمسره
أطفى كم جرحاُ
وجمرة
وادفا
من تلج العشية

أدينى يوم
وطناَ موالف
ينقذنى
من جنّ الخواطر
ومن تباريح
المعارف
ومن مراجيح
المخاوف

أدينى يوم
وطناً شفيف
يحمينى
من حمى الرغيف
يرحمنى
من نصل الرصيف
(حزن الحقايب )
والنزيف
من شرود
قدم المسافر
من مناجاة
المنافى
ومن دموع
سفر الوداع
ومن شبابيك
التذاكر
ومن قطار
المغربية

أعذرينى
أصلى ما بعرف
شنو الفرح
الموالف
الا بس
لهب المسارب
والمواقف

(3)
منو السرق
البلد والقوت ؟!!
منو الخَزّن
شوال السُكّر
المكبوت
(عيش الكِسرة)
(المكرونة)
و (الشاى)
وحتى قماش
كَفن للموت

وكم كضاب
خطب فى ( الرادى )
و ( التلفاز )
وكان فى أصلو
( زول هلفوت )

شوفو الخُلعه
يا صابرين
قوت الشعب
أصبح لعبه
لو بالجمله
أو فى (بقالة )
أو ( كنتين )
ناس
أهل الله
خشّوا السوق
وسابو الدين
تمام فالحييين

وانت تهاتى
يا مسكين
بين ( زقلونا )
و (الشقلة)
و (الحارات )
بين (المية )
و (السبعين ) .
عُصار ساكيكْ
تقول ( هايس )
ما خلاك
تقيف تِنجمّا
فى ( الكاملين )

انت كمان
أخير (تِسَْتفتا )
فى حالك
تسوى شنو ؟!
تَقبّل وييين ؟!!

وكت (ضاقت
بما رحُبت)
وفات صبرك
عذاب ايوب
تفوت لى وين ؟!
تهاجر من شمال
لجنوب ؟!
تفوت لى ( واو )
تسيب ( حنتوب ) ؟!!
بدل ( شايقى )
تصير ( زاندى ) ؟!!
تكون ( دينكا )
وتسيب ( جعلى ) ؟!!!

تقول الروووب
- انا مهاجر
مسافر
من ديار
أهلى
لا لى ( كندا )
لا ( لاهاى )
لا ( للدوحة )
لا ( سدنى )؟!!
أنا استفتيت
براى حالى
مشيت
لى (نّومولى )
بى كرعى ؟!!

هجرت العِمة
والطاقية
والمركوب.
اتسلفت
من (سِلفا )
كمان كسكته
بالمقلوب .
لبست البدله
واتفنجرت
بى كرفته
واتعلمت
عربى جوبا
لا ذاكرتو
لا مكتوب

واتبدّل
عديل الحال
بقيت مسؤول
فى بير بترول
بدل (حسنين )
بقيت ( ملوال )

موندوكورو
قَلِب أباهو
ما يجينا
ولا نجيهو
ما ندورووو


(4)
جابت ليها (3)
يا عبد الله
كتاحه

زيطه وعرضه
ذكّارا
وشكّارا
دق نُقارا
مداحين
وطمبارا

بلد واقع
وده الواقع
بُكره القسمه
والتقطيع
قص الخرطة
والتطبيع
مافى ( خلاص )
ومافى شفيع

جرايد شوفا
طشّ وطاش
ودنيا غباش
صف كورس
من الغُربان
صِبِح هتيفه
فى الأعشاش

مسّاحين
من الأقلام
من الأقزام
و… ترزيه
فنانين
فى قص الكضبه
فوق للرُكبه
و… غنايين
ورقاصين
( هنود أفلام)
وجزارين
محترفين
فى قطع العيش
وعميانيين
حطابين
يجزو هواك
بضربة فاس


شوف الكتمه
يا عبدالله
زول الله
قِل المويه
موت النسمة
دمع البسمة
عدم الزاد

شوف أوجاعنا
كيف صِْبحَت
نبيح ومزاد
شوف واعقل
باسم الرب
أيا عبدالله
كيف ( اتسنسروا)
الآيات
وكيف اتباقصت
أوراد

حفرتو غريق
نشفتو الريق
دقيتو الطبلة
وشلتو الناى
قفلتو دَغَشنا
بأكبر طبلة
زقتّونا
كلام فى كلام
وصالح عام
بقينا زباين
ست شاى

قاضى المِلة
باع اتراحنا
يا مولاى
واتلفّتَ يا عبد الله
زول الله
جاى بى جاى
لقيت
حتى المثل مقلوب
- الحداس
صِبِح سوّاى
اتشنقلنا
جوه وطنّا
اتظلمنا للقاضى
شال الباقى
واتحاكمنا
راح ( فايل ) المظالم
ساى

مسكين الشِعِر
مكسور
وكت صبح الوزن
لافتات
مسكينه الصُحف
سوّت
نشاز( ناس هاكا)
زى (موزارت )
مسكينة الرفوف
بى حالها
كان لحسوها
كم نصّاب

عفيت منك
حيلك لسه
يا عبدالله
ماشاالله
ما رفّس وفَتْفَت
مات
وما أغناكْ
بالقرشين
والعراقى والسروال
وجُغمة روب
وكيس تمباك
وما ابهاك
وانت تشابى
للجايات
وما اتحسرت
لى رايحات
وماهماك .
ما اقواك

(5)
كمْلت سنة
سفّاية
من حلق الرماد
لو كان شرح
قلب البيوت
قمرا مِصَنقر
فى جواد
أو نَقْرَش
الوتر اليتيم
وصّحا عين
أو رنّ حافر
فى خواطر
وقمنا من صوم
الرقاد
أو انكسر
طوق الكدر
وردمنا
فى السكه الحُفَر
ووقفنا
فى وش الخطر
كنا…….
كان…….
صار……
وغسلنا ذُلنا
فى المطر

الا العشم
مرات
يفرفر
فى العدم
الشمس تشرق
من نغم
(التيمه) تطلع
من ألم
الدنيا
ترجع للنظر
فى شعّه
من ومضة
وتر


(6)
كل عام
وانتى غيمه
تبارى نيمه
فى حوش غلابة
كل عام
وانتى وردة
فى حُضن عروة
وطيره حره
تناجى غابة


كل عام
وانتى لمه
وحوش وحاره
صفقه
عرضه
ولمبه خضرا
على الاشارة
كل عام
وانتى صاحيه
وبت شطارة
وكلمه طيبه
وبشرى ساره.

كل عام
وانتى شارقة
وناضرة
مرجيحه وضفيرة
كل عام
وانتى طوق الزفة
فى غضب الدميرة
كل عام
وانتى نخلة
فَراش ونحله
وصوت بِيهدر
فى مسيرة
15/12/2010