محجوب شريف وقصيدة كرت للطيب مصطفى

منقول

محجوب شريف يرد شعراً على الطيب مصطفى : لا فاحش ولاني بذئ ولا نسناس وما بجرح مشاعر الناس
April 12, 2012

(حريات)

قصيدة جديدة لشاعر الشعب الأستاذ محجوب شريف رداً على مقال الطيب مصطفي الذي تهجم فيه عليه وعلى الشاعر عمر الطيب الدوش .

تنبش حي وميت

سكاكينك تسنها بالكراهية

معلم تنتج الكربة

وتدي الفتنة ماهية

تدس في إيدا كبريتة

بخيت وسعيد عليك إنك

مكانك من ذوي القربى

وعندك من كراسي السلطة

مسند للرفاهية

مالك ومال قريبك ساكن التربة؟؟

منو البسرق عشم ميت

أمام الله والحكمة الإلهية؟؟

يمين الله

كاتب حر

نسيج وحده

ومن طبعو الفروسية

وأصدق من ملامح طفلة

وسط اللمة منسية

عصافير الكلام ركت

تحت شهقة غنا الفواح

مع الموجة الصباحية

أدى الود

وشال الود

وجمّل للحزن ممشى

لا كذّب ولا غشّ

وما منو الضمير طشّ

وما شنّق

بريق الشهرة من فوق راسو طاقية

أبسط من حرف كسرة

ومن بذرة

ومن نقاع سبيل يوماتي

تشرب منو تحت النيمة قمرية

كذلك لم يكن يوماً

هوين قابلاً للكسر والذلة

أما العبد لله

إذا ما عارف أعرفني

من غير الله ما خايف

ولا شايف هنالك

من يهد حيل الثبات فيني ويخوفني

فما خجلان ولا نادم

وما متوجس الإحساس من القادم

لا طعّان ولا لعّان

ولا فاحش ولاني بذئ

ولا نسناس

وما بجرح مشاعر الناس

وأنبل من حليب السترة

ما عبّت مشارب كاس

أدوسا محاكم التفتيش

بأعلى الصوت علانية

تخربش في مسام الروح

وتتجسس علي النية

بسوء الظن والمكرِ

ضميري لم يكن يوماً

من الأيام ولد مكري

شبر والله في البكري

ولا الفلل الرئاسية

وطن حدادي مدادي

ما بنبنيهو فرادي

ولا بالضجة في الرادي

ولا الخطب الحماسية

وطن حدادي مدادي

قد شفناهو يتقسم

ذبائح وإنت تتبسم

لديك الخضرة تتفحم

وتصبح في الأيادي عصي

وأوتاداً بلا خيمة

وصحراءً بلا غيمة

سلاماً يا وطن بحلم

أشوفك يا وطن آمن

حر وسعيد ومتفتح

محل ما يمشي إنسانك

عزيز النفس مطامن

ومتضامن

والخير الظاهر والكامن

في الأيدي جميعاً قدامن

تعيش إنت ونموت نحن

لكي يا غالي ما يكبر جنانا

تحت شرا المحنة

جرحنا إذا بفرهد فيك

ح نمشي علي البجرحنا

وحزننا لو يضوي سماكا

هو الحزن البفرحنا

ودمنا لما يسقي ثراكا

ينزل من جوانحنا

وإن راحتنا ما ترتاح

نقول إنشاءالله ما ارتحنا

تضيع أيامنا بس ما تضيع

ملامحك من ملامحنا

بنرجع ليك توصينا

ونسمع ليك تحدثنا

ولو علّينا صوتنا عليك

يا والدنا سامحنا