قصة ثورة ـــ هاشم صديق

من طرف مدثر الجاهوري السبت فبراير 02, 2008 11:34 am

لما الليل الظالم طوّل

وفجر النور من عينّا اتحول

قلنا نعيد الماضى الأول

ماضى جدودنا الهَزَمُوا الباغى

وهدّوا قلاع الظلم الطاغى.

وف ليله وكنا حُشود بِتصارع

عهد الظلم الشبَّ حواجز

شبَّ موانع

جانا هتاف من عِند الشارع

قسماً...قسماً

لن ننهار

طريق الثورة

هُدى الاحرار.

وغضب الامه اتمدد نار

والكل يا وطنى حشود ثوار

وهزمنا الليل

هزمنا الليل.

والنور فى الآخر طل الدار

والعزة اتهادت للأحرار.

وطنى أنحا سيوف امجادك

ونحنا مواكب تفدى تُرابك

ولِسّه الشارع بِشهَد لينا

فى يوم الغضبه حصاد ماضينا

مشينا نَعَطّر حقل الثوره

بِدَم نَفْدِيبُو بلادنا الحره

وكان اكتوبر فجر الغضبه

كسرنا قيود الماضى الصَعَبه

لما مشينا مواكب صَامده

تهدر- وتغلى ... وتهتف راعده:

الرصاص لن يفنينا.

وسال الدم فى أرض الوادى

فَدينا النور بالروح يا بلادى

وكانت صفحة حكاها العالم

وفجر اكتوبر طَلّ وسَالَم

كان فى الجامعه موكب هادر

صمَّم يجلى الليل السّادر

وكان الليل السادر غادر

فجّر غدرو سموم دخان

ورُصاص من صوته صِحَا السودان

والشعب الثائر

صمّم هادر

يصرع ليلنا الداجى الطَّوَّل

وكان القرشى شهيدنا الاول

وما اتراجَعنا

حلفنا نقاوم ليلنا وسِرنَا

نذرنا الروح ومَسَكْنَا دَرِبنَا

للشمس النايرة قطعنا بحور

حلفنا نموت أو نلقى النور

وكان فى الخطوه بنلقى شهيد

بى دمه بِيِرسُم فجر العيد.

يا اكتوبر

أنِحْنا العِشنا ليالى زمان

فى قيود ومظالم وويل وهوان

كان فى صدورنا غضب بركان

وكنا بنقسم بالاوطان

نَسَطَّر اسمك يا سودان

بدمانا السّالت راويه الساحه.

وحلفنا نسير ما نْضوق الراحه

شهرنا سيوف عِصيانّا المدنى

إيد فى ايد حلفنا نقاوم

ما بنِترْراَجع وما بِنءسَاوم

بينّا وبينك تار يا ظالم

خُطانا تسير فى درب النصر

هتافنا يدَوّى يهز القصر

كسرنا حواجز ..أزِلنا موانع

صفنا واحد

عامل.وطالب..زارع وصانع

وهزمنا الليل

هزمنا الليل

والنور فى الآخر طل الدار

والعِّزه اتهادت للأحرار

يا ساحة القصر..يا حقل

ويا واحهَ بتَحَضِن روح(نَصّار)

روينا ورودك دم ثوار

وشتَلنا فضاك هتاف أحرار

خَطّينا ترابك احرف نايره

بتحكى سطور ايامنا الثايره.

وشلنا الشهدا مشينا ونهتف

وجرح النار فى قلوبنا بينزف

سَجّينا الشُهدا وجينا نقاوم

ما بنِتراجع وما بِنساوم

وفجأه ونحنا صفوف بتصمم

زغرد فجر الثوره الحالم

والنور فى الآخر طل الدار

والعزه اتهادت للأحرار

قسماً..قسماً يا اكتوبر

نحمى شعارك

ونجنى ثمارك

ونرفع راية الثوره الغاليه

عاليه ترفرف فوق الساريه

عليها شعار الثوره الأكبر

رسُمه النادر زاهى واخضر

ولِسّه بنقسم يا اكتوبر

لما يطل فى فجرنا ظالم

نحمى شعار الثوره نقاوم

نبقى صفوف تمتدّ وتهتف

لما يعود الفجر الحالم

الاخ مدثر/ شكلك بادي من فوق ,,,, ياربي المشاركة الجاية دي حتكون شنو؟
للملحمة يا مدثر وقع خاص بالنفس لا استطيع ان اوصفه,,,, ربما بتذكرنا باحلي الايام بالجامعة,,, لك الشكر والود.

ميرغني ابراهيم عمر كتب:الاخ مدثر/ شكلك بادي من فوق ,,,, ياربي المشاركة الجاية دي حتكون شنو؟
للملحمة يا مدثر وقع خاص بالنفس لا استطيع ان اوصفه,,,, ربما بتذكرنا باحلي الايام بالجامعة,,, لك الشكر والود.

الأخ ميرغني سلام .. أيوه قلنا نبدي من فوق .. المرة الجاية من الحقيبة (زنقار) .. أما بالنسبة للملحمة تعتبر من أروع الأغنيات القومية وصحيح بتذكرنا بالجامعة زمان لمن الواحد أدخل الجامعة يلقي الملحمة شغالة ويمشي الكافتيريا يفطر على انغامها لكن الآن تسمع حاجات غريبة ما أظن الزمن الجميل يرجع تاني

قصة ثورة ـــ هاشم صديق

قصة ثورة ـــ هاشم صديق

رد: قصة ثورة ـــ هاشم صديق

رد: قصة ثورة ـــ هاشم صديق