خالد عباس.....مرة أخرى

أدناه نص لقصيدة للشاعر/خالد عباس الطاهر بناء على طلب أخونا علي عبدالعال{سننشرها على حلقات نسبة لطولها} وآمل أن أحصل على أعمال أخرى للشاعر المعني...

تفضلوا:

الدلكة دميرة هذا العام
خالد عباس الطاهر


ناديت السكات سلم علي يمي
وراني السلام خيلي وبنات عمي
قصيت الأتر دخل الدرب ألمي
وياني رديف الموج
علي هايل الزرقة
وقصاب حيتان المالح
مشطور بي سيفي وملهوف
بين شهوة سيف ابن ادم
وبين غفلة ناقة صالح
مشدود كالزمن الكالح
الدلكة دميرة هذا العام
قراءة جديدة من تحت خيول الترك
من ظهر خيول المك
للدم السايل من قدح الدفتردار
نص :
غابت شمس الحق
طلع البدر علي نخل الاجساد
وبلال العبد الحبشي
إتوازي في صدرو العام بالخاص
غضبة مملوك ومقاتل
أحد أحد أحد
ينثر ريحان الاخلاص
شايل جسدو من عباد الشمس
معالم واضحة
والحر دافق في وشوا بحيرات افريقيا
ناده من تحت حوافر الخيل
شو بيك يابلال عمال تطلع وتشاور
داير علي حجي وهواش
يا بن القهوة الحبشية
يابن القهوة أي والله
يا زلمي البن اللي يسيل
من بطن الوادي للدلة
من نهر القاش
شو بيك يابلال عمال تطلع وتشاور
داير علي حجي وهواش
تنجي ولا ينجي البطال
أذن عصفور الجنة
وقام الناس للحن
صلي الصخر قيامة
وصلي النهر صلاة البدء
غابت شمس الحق
طلع البدر علي نخل الاجساد
وإتوازي العام بالخاص
في صدر الرمح الحبشي
وعبء الفعل
بحيرة تانا حبر اسود
وسال النيل الأزرق
بركة وبكري تني
يتقهوج منو المك
إذ طلع البدر علي نخل شجرة المك
والمك منقول من ساحة القول
لي ساحة الفعل السيد
يحرق طلح التاريخ
ويودي المحلب كم مشوار
بين درع الجعلي
وبين نهدين لي صبية الريح
اشرب يا سيدي اسماعين
ديل شعب الوادي الطيب
حطوك ع الراس
حط الاورطا
علي جرح كبير الناس
تسلم ياسيدي اسماعين
ناولني الكاس......

ونواصل

بدأنا بنشر هذه القصيدة منذ زمن وانتظرنا ظهور من طلبها ولكن لا حياة لمن نادينا ...عموماً أواصل اليوم كما وعدت بقيةالنص حتى نهايته .........وإنشالله علي عبدالعال يقراهو:

غابت شمس الحق
طلع البدر علي نخل الاجساد
عربان الضهرة
إتيمموا قبلة جلد التور
إذ دقة نحاس الموت
وإتلفو صلاة الميت
اعقل يامك
اسف مش قادر اقفل باب الشريان
قربوا ابعد حتة متمة
وابروا الموج من سدر النيل
لي ضراعوا الراقد ريح
وجالب البن لي مك يتقهوج
فضلة خير النيل الازرق
وقال بالحالة نجاشي
يخت السيف في العقدة أم زمة
قربوا ابعد حتة متمة
اعقل يامك
اسف مش قادر اقفل باب الشريان
القوة بنية السيف
تاتت في سدور الجعليات
نخلات العباس
لبنة وفكة ريق ونحاس
وكبرت جوة القفص الصدري
وحقت راجل ساعة ضيق
ساعة يقنزح باشا
اعقل يا مك شان ترضي ملك وإله
ده الدين الطاعة الأمر
ده النخل الحت سبيطوا المطر امبارح
ده التمر الجابوا السيل
شن فايدة تمرا جابوا السيل
ناولوني القربة المريوقة
حلابن وأنا ح آكل الويل
مسيتكم في صدور الريل
صابحوني فوق ضهر الخيل
اعقل يا مك
آسف مش قادر اقفل باب الشريان
قربوا ابعد حتة متمة
وابروا مدافن السيل
دايرين اللي شان ألمي الزرقا
يلوا ضراعي ويلوا ضراع النيل
اعقل يا مك
اسف مش قادر اقفل باب الشريان
اذن عصفور الجنة وقام الناس للحن
إستوت القصيدة
فطالت اعناق المغنين
إهتزت شوارب البدوي
حين سال الوادي في جبه الغناي
وكان مزيكتوا قرنة تور
وطبل ونحاس ومركوبين نمر
نمر البارودة حماد الهجة
شكار العودة قراع النازلة
سواق القودة سراي الفنقة
بي خيرا وجودا يا الساق الناصح
ما انطال لي قودة ،
واشرب ياسيدي اسماعين

اعقل يا مك
اسف مش قادر اقفل باب الشريان
قربوا ابعد حتة متمة
وابروا مدافن السيل
دايرين اللي شان ألمي الزرقا
يلوا ضراعي ويلوا ضراع النيل
اعقل يا مك اسف
مش قادر اقفل باب الشريان
المك الماسك حبل الحيل
يرفع في الارض افعالوا الصعبة
يمكن تستاء القلابات
يمكن تشرع في تكيف الحال
بالدم و الرقص الشعبي
تحتمل الثورية الفذة
الجرح المقروء عليه تحاصين الدعوات
لي حبيبي وسيدي فاروق
الملك السايل زي ريق الحمضيات
متوفر ولازع في ألسن الشعب الكادح
الراكع لله حتي تنتهي الخطبة الرسمية
وحتى يؤذن أن لا يركع للجوع
لي حبيبي وسيدي اسماعين
برده من الوصفة الملكي
لي خديوية اسطنبول
المك يعقل عن صمت
ينهزلوا نحاس في طبلة اذنوا الخاصة
يهزم كائن من كان
إذ خت قبيلتوا تحت شنبوا
وبيناتا جنيات الريل الطايف
كعبة صدروا نحاس ودرع
شنبك يحمي قبيلة
شنبك والقربينة ولاد تسعة وتسعة
ضلك رقدن فوقوا خيول الريح والسافل
الراسوا نحاس دواس وبكاتل
طاقيتك تحكم نيلا وشنبك يحمي قبيلة
قبيلتي السيف و النيل وضراعوا الراقد ريح
سارقوا الدم في الروح والجتة
يطلع فارس درويش
يسارق الدم في الروح والجتة
يلبس علي شكل الارض مرقع
غابة وصحراء ونيل
يسارق الدم في الروح و الجتة
يملص درعوا في كرري
يلبسوا فارس بي كسكتة
ويخطط اوردة الجسد النور
للنيل الوهج الازرق
شارعين ومحطة وغيم رحال
شوا بيك يابلال اسماك في الغيم
بي كنية كان ومجاز
الدم يتسرب لي شجرة المك
في حالة الغاز
مبعوت للقمة وسلطانة
التمر الجابوا السيل
الدفتردار إتوكا عصا الإستانة
في البدء المك إتوكا حما طياع الخيل
في سفر الدم التاني
المك إتوكا النيل
ويمكن تستاء القلابات
والجعليات تمرات القيف الما طالن هدام
الليل العاقر ديسن تاه ونسوا الشافوا
مهرات من ساسن يا قايد زحف الإستانة
فين تبقي تنام ياسيد امبابة واسوانة
عمرك جربت بنات الوادي الأعلي
ديل عطر الروح وسلطانة
يمكن تعزرنا لهوانا
للمية واسماك النيل
والجعليات تمرات القيف الما طالن هدام
الليل العاقر ديسن تاه ونسوا الشافوا
واتمهل غادي وبين اكتافن نام
يا قايد غضب الظالمين
عمرك جربت تنوم
فوق حد السيف والسكين
ولبست دماك سديرية
وريهوا يااختي قميرية
اديني مسيرتك وخيرتك
يلي نقالد النيل

ونحدث سمك البحر بسيرتك
يمطر عضموا شليل
ياشليل للمك للمك الجود
الجعليات امات السود
عافن جلد الباشا وقلدن جلد الدود
والدلكة دميرة هذا العام
والمك بيخت الروح في راحة الايد
مش قادر يقفل باب الشريان
والدلكة دميرة هذا العام
والمك ضل شنبوا مقعد فوقوا قبيلة
ومحدد ابعد حتة متمة
وكل الدنيا سلاطين
والدلكة دميرة هذا القرن الواحد والعشرين
سارقوا الدم في الروح والجتة
يطلع مك من يات من حتة
تشرق شمس العرس الغابت
يمشي الحق ويخت الختا
ما لاقيت من غير الصامد
ما لاقيت من غيروا البتة
يمرق حاضن الفعل السيد
شال نوار الثورة وحتة
وحددوا ابعد حتة متمة
حددوا ابعد حتة ............ متمة

العزيز هيثم


ادام الله عزك !!!!!!!!!!!
متوقعة منك ... وماتسمع كلام عمك دا . كل الحاصل مشاوير الطب المبتخلص دي لكن وعد بالمواصلة قريب.

مرفق أختيارك الجميل بصوت الجميل خالد عباس
http://www.esnips.com/web/aliabdelaal

ودمتم