إرشيف البنبر

عماد الشفيع كتب:وبما اننى سوف اختار الشخص الذى يجلس فى البنبر لشهر مارس 2008 م فأننى اضع الأخ العزيز مدثر الجاهورى واول سؤال اطرحه له هو 000عرفنا بنفسك :
01/ انت منو ؟؟؟؟
عمرك / جنسك / من ياتو منطقة / شغال شنو / هسع انت وين /الحالة الاجتماعية / ولازززم وقبل كل شئ تورينا صورتك 0 طبعا الشئ الوحيد الذى اعرفه عنك انك هلالابى متعصب وما أكلت الموليته مع خالص تحياتى وامنياتى لك بالتوفيق وشيل شيلتك انا شردته 0 عذرا السيد المدير نأمل الموافقة والاعتماد على جلوس هذا العضو فى بنبر ياسر المولع 0

الأخ عماد الشفيع .. أول حاجة كتر خيرك وبارك الله فيك والفيك اتعرفت تسمع لي كلام ميرغني وتورطني في بنبركم ده .. بعدين أنا محامي بسأل مش بسألوني .. الظاهر موضوع الشعار وهلاليتنا ألقت بظلالها .. عموماً بناء على طلبات الجمهور وحرام بعض الشباب بنقعد في البنبر المولع .. بسم الله الهبشك ما ضراك ..
الأسم : مدثر عثمان الجاهوري
الجنسية : سوداني بالميلاد .. وإن كنت تقصد القبيلة شايقي والحمد لله
العمر : مواليد 1/12/1963م مواليد منطقة الجزيرة نسري جنوب شندي
المنطقة : سكان الحصاحيصا ده أخر مدينة أتحركت منها وجيت السعودية لكن لمن أرجع بستقر في الخرطوم محل الرئيس بنوم والطيارة بتقوم
شغال شنوا : في السودان كنت شغال محامي وكان عندي مكتب بالحصاحيصا .. حالياً شغال مستشار قانوني بالغرفة التجارية الصناعية بمدينة حائل بالمملكة العربية السعودية
هسع أنت وين : أنا الأن بالمملكة العربية السعودية مدينة حائل
الحالة الاجتماعية : متزوج ولدي بنت أسمه إيلاف تسعة سنوات ومصطفي خمسة سنوات
صورتي : برسلة للمدير بالمسنجر عشان انزله
أهم حاجة : أنا هلالابي موت وبشجع برضوا ريال مدريد الفريق الملكي الأسباني أنا وصاحبي متي .. وكذلك الانتر بإيطاليا
وبكره أي حاجة حمراء يعني تور .. الإشارة الحمراء .. النار الحمراء .. الشطة الحمراء تتصور بأكل الشطة الخضراء فقط .. الشاي الأحمر بشرب شاي بلبن
أي سؤال نحن جاهزين بس ما تسمع كلام الحاقدين .. لك الشكر والتقدير الأخ عمده

المدير العام كتب:لقد تم تثبيت الموضوع وفي انتظار اخونا الجاهوري,,,,, للرد علي اسئلة الاخوة الاعضاء

الأخ المدير .. مدير الهناء أنت بس قاعد للتثبيت .. يعني تعكسه وتجري تلحقه تحرز الهدف عموماً مؤمرة وكشفناها

الاخ / مدثر تحياتى شكرا على الاسهاب لكن سبحان الله انت طلعت هلالابى وبتشجع ريال مدريد والأنتر ( رأيكم شنو يامرغنى ومعاوية ) عكسى تماما انا بشجع المريخ + اسى ميلان + برشلونة عموما نواصل اسئلة البنبر :
01/ ليك كم سنة مغترب وهل السعودية اول دولة اغتربيت لها 0
02/ طبعا مهنة المحاماة من المهن الفيها خلاف فعايز اسألك بمنتهى الصراحة والشفافية اذا عرض عليك ان تترافع على المجرمين الذين انتهكوا عرض الطفلة مرام وقتلوها ( القضية التى شغلت الشارع السودانى قبل فترة ) هل سوف توافق ولماذا ؟
03/ هل يمكن للمحامى ان يترافع عن اى قضية لمتهم مع علمه التام بان المتهم مذنب ؟
ونواصل 00000000000000 ولك التحية 00

عماد الشفيع كتب:الاخ / مدثر تحياتى شكرا على الاسهاب لكن سبحان الله انت طلعت هلالابى وبتشجع ريال مدريد والأنتر ( رأيكم شنو يامرغنى ومعاوية ) عكسى تماما انا بشجع المريخ + اسى ميلان + برشلونة عموما نواصل اسئلة البنبر :
01/ ليك كم سنة مغترب وهل السعودية اول دولة اغتربيت لها 0
02/ طبعا مهنة المحاماة من المهن الفيها خلاف فعايز اسألك بمنتهى الصراحة والشفافية اذا عرض عليك ان تترافع على المجرمين الذين انتهكوا عرض الطفلة مرام وقتلوها ( القضية التى شغلت الشارع السودانى قبل فترة ) هل سوف توافق ولماذا ؟
03/ هل يمكن للمحامى ان يترافع عن اى قضية لمتهم مع علمه التام بان المتهم مذنب ؟
ونواصل 00000000000000 ولك التحية 00

الأخ عماد شكراً على المرور بالنسبة للأسئلة
لي عشرة سنين بالمملكة السعودية وهي أول وسوف تكون الأخيرة بإذن الله عايزين نستقر في السودان
طبعاً قضية مرام قضية رأي عام هنالك سلبيات وإيجابيات في الترافع عنها للأتي :
1ـ القانون بحدد أنه كل متهم يجب أن يترافع عنه محامي فإذا درست القضية ووجدت مبررات للدفاع عن المتهم من واجبك كمحامي الدفاع عنه وتوضيح كافة الاحتمالات التي يمكن توقعها
2ـ المتهم قبل مرحلة المحاكمة يعتبر بريء حتى تثبت إدانته
3ـ المحامي الذي ترافع عن المتهمين في قضية مرام دفعتي وصديقي الأستاذ ساطع الحاج ومن حقه قبول الترافع عن المتهمين
المحامي يمكن أن يترافع عن متهمين ارتكبوا جرم معين لكن وفقاً للمسببات وملابسات القضية ممكن يكونوا غير مدانين وفقاً للقانون لذلك ممكن تدافع عنهم طالما توجد ثغرات في القضية ودوافع ومبررات والأمر يطول بالنسبة للمحامي ويختلف تفكيره عن الشخص العادي في مثل هذه الأمور
بالنسبة لتشجيعي للهلال وريال والانتر الحمد لله جميعها فرق قوية وليلة البارح خير دليل فوز لريال وهزيمة للبرسا وشجع يا سلام

ميرغني ابراهيم عمر كتب:الاخ مدثر / مرحب بيك كتير في البنبر الساخن ,,,,,
من مواليد الجزيرة نسري ,,,, وتاريخ الميلاد لا يتطابقان ,,,, اول حاجة نسري دي جنبنا وبسؤال الوالد اكد لي بما لا يدع مجالا للشك ,,, ان الجزيرة نسري وحتي نهاية السبعينات لم يكن بها قابلة قانونية ,,,, واي شخص ولد قبل هذا التاريخ كان بي داية حبل وبالتالي لم تكن هناك شهادة ميلاد,,, وعلي ما اظن شهادة تسنين تستخرج حين الدخول للمدرسة الاولية علي ايام اخونا مدثر ,,,, ووقتها كان الطالب بيخش عمرو 8_9 سنوات يعني بعد التساهل معك شهادتك تسنين 1/1/ 1956_1958 علي اقل تقدير ,,,,, وهذا استنادا إلي تقارير ديوان الاحصاء بولاية نهر النيل ,,,, والغريق لي قدام.
لك الود.

الأخ ميرغني سلام ..
أنا مواليد الجزيرة نسري وده جزيرة محاطة بالنيل من جميع الجهات وتعتبر الأشهر في ولاية نهر النيل بعد شندي وعطبرة والدامر .. بعدين القابلات كانن موجودات في الجزيرة نسري .. وأنا شهادتي ميلاد وموجودة ولو عايز برسلة ليك عشان تختها في المنتدي كعب الناس الما عندهم شهادات ميلاد ولا شهادات تسنين طلعوهن لمن جوا امتحنوا الشهادة السودانية طلعوا شهادة التسنين والجنسية مع بعض .. بعدين نحن درسنا الروضة والإبتدائي والثانوي العام والعالي وجامعة النيلين أنت من زمن خور طقت وحنتوب ووادي سيدنا وجامعة جوبا بعد السلام الأول بتاع نميري يعني أول دفعة اتخرجت من جوبا وحضرت هلال مريخ بتاعت جوبا بالمناسبة الكورة انتهت كم يعني أنت لمن جات الرياضة الجماهيرية كنت كبير في الجامعة وقالوا كنت زعلان لمن وقفوا التوتو كورة .. يعني أنت من زمن ناس قرعم وجقدول

مدثر الجاهوري كتب:
بعدين نحن درسنا الروضة والإبتدائي والثانوي العام والعالي وجامعة النيلين

أخونا مدثر حبابك
وانشالله بنبر تقوم منو نجيييييييييييييييض
والله أنا كنت متخيل ميرغني زول مغرض في قصة العمر دي لكن النص أعلاه يبين إنك بديت بنبرك بالزوغان والتلفيق
الثانوي العام دة أنا الصغير وجاهل ماحضرتو تكون حضرتو جامعة النيلين السواها الكيزان بعد 89؟؟؟؟؟؟؟؟
استغفر وقول القاهرة فرع الخرطوم
والكبر ماعيب ياخ
كعب الزول الللامي سجم الكورة الفي الدنيا كلو(الهلال-الريال-الإنتر) أحلف عليك مشجع متعصب للهلال السعودي-أعوذ بالله -

هيثم على الشفيع كتب:

مدثر الجاهوري كتب:
بعدين نحن درسنا الروضة والإبتدائي والثانوي العام والعالي وجامعة النيلين

أخونا مدثر حبابك
وانشالله بنبر تقوم منو نجيييييييييييييييض
والله أنا كنت متخيل ميرغني زول مغرض في قصة العمر دي لكن النص أعلاه يبين إنك بديت بنبرك بالزوغان والتلفيق
الثانوي العام دة أنا الصغير وجاهل ماحضرتو تكون حضرتو جامعة النيلين السواها الكيزان بعد 89؟؟؟؟؟؟؟؟
استغفر وقول القاهرة فرع الخرطوم
والكبر ماعيب ياخ
كعب الزول الللامي سجم الكورة الفي الدنيا كلو(الهلال-الريال-الإنتر) أحلف عليك مشجع متعصب للهلال السعودي-أعوذ بالله -

الأخ هيثم الشفيع سلام مربع
يأخوي أنت لو دفعة ميرغني وصاحبوا تكون قريت العام كيف لازم تكون قريت الأسطي في مدني الأميرية ولا مدرسة أحمد على جابر في رفاعة قبل السلم التعليمي .. أنا قريت الثانوي العام والعالي وجامعة النيلين لمن كنت في سنة رابعة غيروها بقت النيلين واتخرجت منها الجابني ليك أنت وميرغني الأكلتوا الموليتة ولبستوا اللامبرك والترفيره .. بعدين الصورة واضحة وضوح الشمس برضوا زورناها .. بعدين الفرق ده ما فيها كلام الهلال بغلب المريخ وريال هزم برشلونة في عقر داره والانتر فاز على أي سي ميلان أخر مرة والهلال السعودي بقوز على النصر من أربعة سنوات ماضية يعني في رايك نشجع منوا

مدثر الجاهوري كتب:

ميرغني ابراهيم عمر كتب:الاخ مدثر / مرحب بيك كتير في البنبر الساخن ,,,,,
من مواليد الجزيرة نسري ,,,, وتاريخ الميلاد لا يتطابقان ,,,, اول حاجة نسري دي جنبنا وبسؤال الوالد اكد لي بما لا يدع مجالا للشك ,,, ان الجزيرة نسري وحتي نهاية السبعينات لم يكن بها قابلة قانونية ,,,, واي شخص ولد قبل هذا التاريخ كان بي داية حبل وبالتالي لم تكن هناك شهادة ميلاد,,, وعلي ما اظن شهادة تسنين تستخرج حين الدخول للمدرسة الاولية علي ايام اخونا مدثر ,,,, ووقتها كان الطالب بيخش عمرو 8_9 سنوات يعني بعد التساهل معك شهادتك تسنين 1/1/ 1956_1958 علي اقل تقدير ,,,,, وهذا استنادا إلي تقارير ديوان الاحصاء بولاية نهر النيل ,,,, والغريق لي قدام.
لك الود.

الأخ ميرغني سلام ..
أنا مواليد الجزيرة نسري وده جزيرة محاطة بالنيل من جميع الجهات وتعتبر الأشهر في ولاية نهر النيل بعد شندي وعطبرة والدامر .. بعدين القابلات كانن موجودات في الجزيرة نسري .. وأنا شهادتي ميلاد وموجودة ولو عايز برسلة ليك عشان تختها في المنتدي كعب الناس الما عندهم شهادات ميلاد ولا شهادات تسنين طلعوهن لمن جوا امتحنوا الشهادة السودانية طلعوا شهادة التسنين والجنسية مع بعض .. بعدين نحن درسنا الروضة والإبتدائي والثانوي العام والعالي وجامعة النيلين أنت من زمن خور طقت وحنتوب ووادي سيدنا وجامعة جوبا بعد السلام الأول بتاع نميري يعني أول دفعة اتخرجت من جوبا وحضرت هلال مريخ بتاعت جوبا بالمناسبة الكورة انتهت كم يعني أنت لمن جات الرياضة الجماهيرية كنت كبير في الجامعة وقالوا كنت زعلان لمن وقفوا التوتو كورة .. يعني أنت من زمن ناس قرعم وجقدول

الاخ مدثر / تحياتى صدقنى اول مرة اسمع بجزيرة نسرى دى وكمان محاط بالنيل اربع اتجاهات عشان كده بتوقع كل سنة الناس ضاربة السكلاب من الغرق وبينى وبينك ما اظن فيها داية حبل كمان و انا خايف يكون ولدوك فى مركب وبالمناسبة دى بتعرف تعووم ؟

ما قلت ليكم؟؟
طلع بشجع الهلال السعودي ،،،وإنشالله كمان من أنصار المنتخب السعودي (أووووووووه ياسعودي)

يا مدثر أنا أخوي الكبير " معاوية" بالنسبة لي ميرغني شافع ساكت ، تقول علي أنا دفعتو؟؟؟
شوية كدة وكنت بطلع دفعة ياسر ولدو

بعدين قلت لي: إنت قعدت في الفرع لمن بقت النيلين؟؟؟ كان كدة نشوف سؤال تاني غير العمر دة.
مدينة سودانية ساهمت في تكوين شخصية مدثر

مدثر الجاهورى أول مرة يقف امام القاضى كانت متين ووين وشعورك فى تلك اللحظة ؟

الاخ مدثر / تحياتى صدقنى اول مرة اسمع بجزيرة نسرى دى وكمان محاط بالنيل اربع اتجاهات عشان كده بتوقع كل سنة الناس ضاربة السكلاب من الغرق وبينى وبينك ما اظن فيها داية حبل كمان و انا خايف يكون ولدوك فى مركب وبالمناسبة دى بتعرف تعووم ؟[/quote]

الأخ عماد .. الجزيرة نسري ده مشهورة ومعروفة وإذا ما سمعت بيها تكون مشكلتك كبيرة معانا .. وناس الشمالية كلهم عايشين في الجزر وعلى ضفاف النيل وما سمعنا واحد ولدوهوا في مركب ولا طوف .. أما عن العوم نحن بنقطع البحر بي ضهرنا .. ونسوانا بعرفن يعومن مش نحن .. ولك تقديري وشكري

هيثم على الشفيع كتب:ما قلت ليكم؟؟
طلع بشجع الهلال السعودي ،،،وإنشالله كمان من أنصار المنتخب السعودي (أووووووووه ياسعودي)

يا مدثر أنا أخوي الكبير " معاوية" بالنسبة لي ميرغني شافع ساكت ، تقول علي أنا دفعتو؟؟؟
شوية كدة وكنت بطلع دفعة ياسر ولدو

بعدين قلت لي: إنت قعدت في الفرع لمن بقت النيلين؟؟؟ كان كدة نشوف سؤال تاني غير العمر دة.
مدينة سودانية ساهمت في تكوين شخصية مدثر

الأخ هيثم شكراً على الأسئلة الجميلة .. نحن أي هلال بنشجعوا حتى هلال ماليزيا وسنغافورة رايك شنوا ... بعدين بالنسبة للعمر أنا والله ما عارف أعماركم ولا شفتكم لكن طالما أنتوا أصحاب عمو ميرغني بتكونوا قريبين منوا في العمر ..
بالنسبة للمدينة التي اسهمت في تكوين شخصيتي هي مدينة الحصاحيصا الجميلة بالرغم من أنوا درسنا فيها الثانوي العام والعالي وعشنا فيها حتى بداية غربتنا فهي المدينة التي ترعرعنا فيها وعشنا فيها احلي الأيام ولدينا ذكريات جميلة بالحصاحيصا سوف تظل عالقة بالأذهان

ميرغني ابراهيم عمر كتب:مدثر الجاهوري ,,,, وتجربة الادارة كسكرتير لاتحاد كرة القدم بالحصاحيصا

الأخ ميرغني لك تحياتنا .. عملت لينا شنوا في موضوع الأسم بتاع المنتدي .. بعدين يأخي مافي ناس بسالوا غيرك وأولاد الشفيع نشفتوا ريقنا وين البؤنات ...
بالنسبة لتجربتي في اتحاد الحصاحيصا تعتبر تجربة مفيدة بكل المقايس وإدارة الكورة لاتحادات بتخلق للإنسان علاقات مع كافة القطاع الرياضي فكانت لنا علاقات مميزة مع إداريي الأندية واللاعبين والمدربين والحكام والمشجعين .. كما أن التجربة وطدت من علاقاتنا بالرياضين في مدن أخرى بالسودان .. إضافة لذلك تعرفنا بشخصيات كروية مثل البروف شداد والمحامي مجدي شمس الدين وطارق عطا المنان وغيرهم .. كما أتاحت لي المجال للسفر مرتين لمدينة بورتسودان مع هلال ومريخ الحصاحيصا باعتبارهم أحد اندية الممتاز في تلك الفترة وكذلك مدينة كسلا .. كما تعرفنا على كافة القوانين واللوائح المنظمة لكرة القدم واللجان المساعدة مثل اللجنة الإدارية والتي تنظر في شكاوي الفرق ولجنة الاستئنافات ولجان التحكيم والتدريب وغيرها .. عموماً العمل في مجال الرياضة يعتبر ممتع للغاية .. وبإذن الله عند عودتنا للسودان سوف نواصل مشاركتنا بالعمل الرياضي .. والأن أنا الأمين العام لرابطة أهل الهلال بمنطقة حائل بالمملكة العربية السعودية

تحياتي اليك أستاذ مدثر والاسرة الكريمة ( أقول ليك حاجة بموضوع أعمار ميرغني الذبيدي وعمدة ديل طبعا" في مقام أعمامي لانو صراحة أبوي حين كان بيدرس بالمساء في القديمة هم صراحة كانو في الاسطي وليس الاعدادي والكلام دا قالوا لي الوالد وموثق طبعا" وميرغني قبل ان يذهب الي جامعة جوبا كان شغال أستاذ إبتدائي في قرية أسمها أم شديدة بالقرب من 24 القرشي اشتغل 3 سنوات وعمدة كان سائق لاول بنطون جابو الحصاحيصا وطبعا" الجماعة ديل انا عارف تاريخهم كويس وعمدة لعب في دفاع هلال الحصاحيصا قبل ناس (كاكري وكلمدو) لك التحايا

يامدثر يا جاهورى مالك نطيت سؤالى الفات كدى ارجع شوية وجاوب لينا عشان عندنا اسئلة كثيرة وما دايرين نفط لينا سطر 000000000 مع تحياتى

معتصم يوسف كتب:تحياتي اليك أستاذ مدثر والاسرة الكريمة ( أقول ليك حاجة بموضوع أعمار ميرغني الذبيدي وعمدة ديل طبعا" في مقام أعمامي لانو صراحة أبوي حين كان بيدرس بالمساء في القديمة هم صراحة كانو في الاسطي وليس الاعدادي والكلام دا قالوا لي الوالد وموثق طبعا" وميرغني قبل ان يذهب الي جامعة جوبا كان شغال أستاذ إبتدائي في قرية أسمها أم شديدة بالقرب من 24 القرشي اشتغل 3 سنوات وعمدة كان سائق لاول بنطون جابو الحصاحيصا وطبعا" الجماعة ديل انا عارف تاريخهم كويس وعمدة لعب في دفاع هلال الحصاحيصا قبل ناس (كاكري وكلمدو) لك التحايا

والله زى مابيقولوا سكت دهرا ونطق كفرا (استحى ياوآد000ياو آد ) لغة اهل مكة 0
المهم حرااااااااااااااااام عليك يامعتصم وبطل التع00000000000دى والله ماغلطان عليك كان قلبك وطلع د0000 وكسر اصابعك من عمايلك 00000 اتعظ التالته وآقعة 0000 مع تحياتى للأسرة

بداية أخونا معتصم : حمدلله على السلامة ومنور المنتدى
ثم
يامدثر : أصلو هو المنتدى إسمو الشفيع والزبيدي يعني مافي زول هيهريك غير أولاد الشفيع واولاد الزبيدي ...فشد حيلك معانا الغريق لي قدام
على طريقة زوغتك من سؤال العمدة شايفك عملت نايم من سؤالي عن المنتخب السعودي(تكون بتشجعو برضو وخجلان منها؟؟؟)

عماد الشفيع كتب:مدثر الجاهورى أول مرة يقف امام القاضى كانت متين ووين وشعورك فى تلك اللحظة ؟

الأخ عماد
أول مرة أقيف أمام قاضي كان في رفاعة أمام قاضية وهي أبوها كان عسكري وصعبة خلاص با زول من الخوف دخلت المحكمة ما لابس الكرفته ، لمن بدت القضية دخلت على طول المحامين قنبوا يضحكوا أنا إتعقدت يأخوانا في شنوا الناس ده بتضحك في شنوا .. عموماً القاضية عرفت غني جديد رفعت الجلسة وسألتني يأستاذ وين الكرفته؟ .. قنبت أضحك وطلعت من المحكمة ولبست الكرفته وجيت بعد داك الجلسة اشتغلت ومن ديك وعيك

ميرغني ابراهيم عمر كتب:مدثر الجاهوري / الغربة ,,, هل جاءت متاخرة ,,,, ولو رجعنا بي الزمن لي وراء كنت حتغترب ولا لا؟ ماذا اضافت وماذا اخذت؟

الأخ ميرغني بالنسبة للغربة هي ما جات متأخرة لأنوا ما كنا مفكرين فيها من أساسوا لكن الظروف حتمت الاغتراب .. ولو الزمن رجع لوراء ما كان بغترب لانوا الغربة أخذت مني أشياء كثيرة أتمني أن تنتهي باسرع وقت ممكن ونعود لسودانا سالمين .. الغربة علمتنا أشياء كثيرة كيفية التعامل مع مجموعة من الأجناس ما كان الواحد بقدر إقابلهم لولا الغربة إضافة لانوا الواحد قدر أعمل حاجات بسيطة واساسية

معتصم يوسف كتب:تحياتي اليك أستاذ مدثر والاسرة الكريمة ( أقول ليك حاجة بموضوع أعمار ميرغني الذبيدي وعمدة ديل طبعا" في مقام أعمامي لانو صراحة أبوي حين كان بيدرس بالمساء في القديمة هم صراحة كانو في الاسطي وليس الاعدادي والكلام دا قالوا لي الوالد وموثق طبعا" وميرغني قبل ان يذهب الي جامعة جوبا كان شغال أستاذ إبتدائي في قرية أسمها أم شديدة بالقرب من 24 القرشي اشتغل 3 سنوات وعمدة كان سائق لاول بنطون جابو الحصاحيصا وطبعا" الجماعة ديل انا عارف تاريخهم كويس وعمدة لعب في دفاع هلال الحصاحيصا قبل ناس (كاكري وكلمدو) لك التحايا

الأخ معتصم يوسف سلام وشوق كتير وتحياتي ليك ولأسرتك الكريمة .. والله كلامك جميل وحقائق مهمة مديتنا ليها ما كان الواحد عارفة .. ميرغني عامل لينا فيها من مواليد 1965م الزول طلع شغال معلم وأمتحن الرقعة وايام البوكسن ثلاثة مواد .. بعدين أم شديدة ده وين والله محن .. أم شديدة والشقاق وودراوة ومعيجنة الزول ده ما خلي ليهوا حلة ما شافه الحمد لله الاستقر وبقي يعمل لينا في المنتديات

عماد الشفيع كتب:يامدثر يا جاهورى مالك نطيت سؤالى الفات كدى ارجع شوية وجاوب لينا عشان عندنا اسئلة كثيرة وما دايرين نفط لينا سطر 000000000 مع تحياتى

عمده سؤالك ردينا عليهوا .. بعدين المعلومات الجميلة بتاعة معتصم ده رايك شنوا فيها

عماد الشفيع كتب:[quote="الله زى مابيقولوا سكت دهرا ونطق كفرا (استحى ياوآد000ياو آد ) لغة اهل مكة 0
المهم حرااااااااااااااااام عليك يامعتصم وبطل التع00000000000دى والله ماغلطان عليك كان قلبك وطلع د0000 وكسر اصابعك من عمايلك 00000 اتعظ التالته وآقعة 0000 مع تحياتى للأسرة

الراجل وضح حقائق الزعل في شنوا بعدين الزمن ده الحقيقة مرة .. معتصم بالله اتحفنا بالدرر ده

هيثم على الشفيع كتب:بداية أخونا معتصم : حمدلله على السلامة ومنور المنتدى
ثم
يامدثر : أصلو هو المنتدى إسمو الشفيع والزبيدي يعني مافي زول هيهريك غير أولاد الشفيع واولاد الزبيدي ...فشد حيلك معانا الغريق لي قدام
على طريقة زوغتك من سؤال العمدة شايفك عملت نايم من سؤالي عن المنتخب السعودي(تكون بتشجعو برضو وخجلان منها؟؟؟)

الأخ هيثم : ما قلنا حاجة المنتدي حق أولاد الزبيدي وأولاد الشفيع لكن ما في أصدقاء .. بعدين المنتخب السعودي بنشجعوا وبنطلع معاهم في السيره مالهم ما لعابين أسي لو مشوا غانا كان جابوا الكاس .. أنتو الكاس ده لا بتشربوا لا بترفعوا يا كافي البلاء

ياجاهورى بالله صف شعورك عندما تعرف ان المريخ فاز على نيل الحصاحيصا والبارشا فاز سلتيك واسى ميلان فاز على الارسنال ( مع انو الاخير خزلنا ) لكن افرض انو فاز ؟

ميرغني ابراهيم عمر كتب:من يطربك من المطربين ,,,, والغناء زمان والان,,,,؟
يقال انك تستمع الي ندي القلعة بمزاج شديد!!!!!!!!!!

يطربني الراحل المقيم الأستاذ / مصطفي سيد أحمد خاصة بالعود .. ندي بتطرب العين قبل الأذن و...

ياجاهوري الله يرضى عليك ما ترد على سطر وتفط سطر
قالو ليك (الغنا زمااااااااااااااااااااااااااااااااااااااااااااااااااااان والآن)
عامل فيها ماشايف؟؟؟؟ والسؤال دة طبعاً باعتبارك من المعاصرين لشعراء حقيبة الفن

ميرغني ابراهيم عمر كتب:أحرج المواقف ,,, في تجربتك المهنية ,,, والقانون هناك وهنا كممارسة ومهنة؟

أحرج موقف مر على كنا أنا وصديقنا أحمد حسن الجمل جاين من المدرسة وكان عندي قروش في جيبي ممكن نسدد بيها أجرة البوكس لشخصين ، أحمد قال لي نركب البوكس قلت ليهوا أنا عندي قروش لكن بتسدد لاثنين نقوم نركب البوكس نلقي واحد بنعرفوا نتحرج أحسن نمشي بكرعينا .. أحمد أصر نركب وقال لي اديني القروش وأركب لو لقيت واحد بعرفوا بعمل نايم .. قمت أديتوا القروش وركبنا .. فجأة جات بنت من بنات الحلة الجديدة وبنعرفه الاثنين سلمت وقعدت .. لمن جاء الكمساري أحمد أداهوا القروش وقال ليهوا اثنين وأشر على البنت ونساني .. الكمساري يحسب القروش ويقول يأخوانا في زول ما دفع أحسن يدفع وأنا ساكت .. كرر الكلام ده كتير وأنا ساكت .. أخر النهاية الكمساري سألني يأخونا أنت دفعت ؟ قلت ليهوا أيوه دفع لي أحمد .. أحمد أتنكر لي وقال لي أنت لمن ما عندك قروش راكب ليه .. اتحرجت والبنت أخر حاجة دفعت لي .. زعلت من أحمد لمدة اكثر من سنة .. وده أحرج موقف مر على ...

تجربتي مع المحاماة ... تعتبر مهنة المحاماة من أروع المهن والواحد أتمرس على الفصاحة والكتابة وقدرة مواجهة مواقف حرجة .. يوجد فرق كبير بين ممارسة مهنة المحاماة في السودان وهنا وفرق الليل من النهار

عماد الشفيع كتب:ياجاهورى بالله صف شعورك عندما تعرف ان المريخ فاز على نيل الحصاحيصا والبارشا فاز سلتيك واسى ميلان فاز على الارسنال ( مع انو الاخير خزلنا ) لكن افرض انو فاز ؟

تتصور كورة مريخ نيل ما حضرتها سمعت كورة الهلال وهلال بورتسودان في الراديوا .. أنا ما عندي شغلة بالنيل ولا المريخ هلال بس .. وأمس فوز البرسا بطعم الخسارة بفقدان ميسي ... أما ميلان ده سجمان ورمدان منه العوض وعليهوا العوض السنة الفاتت شال الكأس من الفرق الإنجليزية ساكت بالكجور هاهاها

هيثم على الشفيع كتب:ياجاهوري الله يرضى عليك ما ترد على سطر وتفط سطر
قالو ليك (الغنا زمااااااااااااااااااااااااااااااااااااااااااااااااااااان والآن)
عامل فيها ماشايف؟؟؟؟ والسؤال دة طبعاً باعتبارك من المعاصرين لشعراء حقيبة الفن

السؤال ده شايفنوا ومفروض اجاوبوا عليهوا الناس الاشتغلوا مدرسين في أم شدادة ((أمس بقرأ في المعجم السوداني لقيت أم شدادة ده ولدوا فيها حامد شداد أبو البروف والله أعلم))

المدير العام والعمدة ليه زعلتو من كلامي مع الجاهوري دي الحقيقة كبببببببببببببببببار وتشببببو معانا خليكم من النت وخليكم في ( التبروقة والابريق ) وانا الابريق بجيبو ليكم

الاخ هيثم تحياتي اليك وشكرا" على السلام ( لكن شايف في ريحة عنصرية طلعت شوية وذي ماقلت للجاهوري المنتدى حقنا وبس يعني اسمو ) هههههي انا الشافو خلو انا الجرجخيص النبق الرخيص بكرة بتشوف محرك البحث اسمو النسيم مش منتدى وسلم لي على الباتنجان

معتصم يوسف كتب:الاخ هيثم ( لكن شايف في ريحة عنصرية طلعت)

أخونا معتصم حبابك ألف وأنت تعود بقوة
ياخوي ماتبهتني وما تتهمني بي حاجة أنا ماقصدتها ....أنا قلت كدة للجاهوري قاصد أكتر الناس مداومة على المنتدى هم أولاد الشفيع والزبيدي-عندك اعتراض؟؟؟-
بعدين قووووووووووووووول عاوز اتعنصر ..مافوق عديلي....
ولا أقول ليك؟؟؟ سحبت كلامي
{ إنت والجاهوري شكلكم ناوين تعملو حرب أهلية في المنتدى ،ولحرصنا -كحكومة- على شعبنا حنطول بالنا ....نعمل شنو يعني؟؟}

معتصم يوسف كتب:المدير العام والعمدة ليه زعلتو من كلامي مع الجاهوري دي الحقيقة كبببببببببببببببببار وتشببببو معانا خليكم من النت وخليكم في ( التبروقة والابريق ) وانا الابريق بجيبو ليكم

الأخ معتصم قلت الجماعة مفروض يكونوا ناس أخره أنا مني السبح والمصاحف ((صدقة جارية))

[quote= هههههي انا الشافو خلو انا الجرجخيص النبق الرخيص بكرة بتشوف محرك البحث اسمو النسيم مش منتدى وسلم لي على الباتنجان[/quote]

ويين محركات بحثك ,,,, يا معتصم ,,,, المنتدي زعلت خليتو ,,,, تجد مداخلة بخصوص هيثم في الرد علي انسحابك باشلاق دوت كوم ,,,,وكنا نرجو ان تواصل بنفس روح الدعابة.

ميرغني ابراهيم عمر كتب:الاخ مدثر الجاهوري :

ديل بيعنو ليك شنو؟؟؟
الشبيبة الحصا حيصا
موقف فور مزاد
علي كجرة.

الشبيبة : يعتبر نادي الشبيبة عالم بكلياته لانوا لو وصفتوا يالمدرسة ولا المؤسسة بكون قصرت في حق الشبيبة الحبيبة لا أخفي بأن الشبيبة تعتبر بيتي لقد دخلت الشبيبة وانا في الثانوي العام وجدنا كل شيء الأخوة الصادقة وتربينا على أخلاق وسلوك الشبيبة وتعلمنا الكثير وفي فترة من الفترات ابتعد الجميع عن الشبيبة وظللنا ثلاثة محاربين من أجل الشبيبة وكانت في الدرجة الثالثة وكان اللاعبين بسألوني يأخي بتتزوج متين قلت ليهم لمن الشبيبة تطلع الثانية وبالفعل صعدت الشبيبة للثانية وقررت الزواج والحمد لله من تلك الفترة ظلت الشبيبة في تصاعد حتى عادت للدرجة الأولي ومازلنا صامدين في حب الشبيبة ولم أصفق لفريق بالحصاحيصا سوي الشبيبة رغم أن العديد من الأخوة في فترة من الفترات تشتتوا بأندية الحصاحيصا ثم عادوا بعد أن استردت الشبيبة صحتها وعافيتها .. أمنياتي للشبيبة الحبيبة بالتقدم والإزدهار

موقف فور مزاد : من أجمل الذكريات وأحلاها كانت بموقف فور مزاد سواء كان بالسوق أو في نهاية الموقف بالمزاد ويعتبر موقف فور مزاد محطة من المحطات التي لا يمكن لمخلوق عاش بالحصاحيصا وخاصة الأحياء الشمالية إلا ولديه ذكريات بفور مزاد .. وحلة فور ده حكاية تانية وعالم جميل العشاء والباسطة والحليب مش حاجات تانية وناس حلوين لمن تعاشرهم وبسطاء للغاية عندما تتعامل معهم ..

على كجره :
لم يكن لي شقيق أكبر مني فشقيقي الوحيد أصغر مني لكن الأخ على كجره يعتبر الشقيق الأكبر لنا فهو فنان في كل شيء الكورة والكوشتينة .. وكانت توجيهاته لنا مستمرة عندما يرانا قد انحرفنا يميناً أو يساراً وآسرة أبو شورة تعتبر إمتداد بالنسبة لأسرتي ورغم صداقتي للأخ هاشم إلا أن الأخ على كان من المقربين بالنسبة لي ... وأجمل مافي على كجره عندما يصر وجهه لكن ما كان بهمنا نشالغوا ونغلبوا في الكشتينة ويشتته ويدكها وبرضوا نواصل معاهوا اللعب وربنا يدي على كجره طول العمر

السؤال الدائم للمغتربين:

ماذا أضافت الغربة للجاهوري وماذا خصمت منه ؟؟

مدثر سلام..اوعى تكون انت دفعت العمده ومرغنى؟

هيثم على الشفيع كتب:السؤال الدائم للمغتربين:

ماذا أضافت الغربة للجاهوري وماذا خصمت منه ؟؟

الأخ هيثم صباحك زين ورسالتك بالموبايل وصلت وسعدنا كثيراً بها وبمعرفة رقمكم لكن يأخوي عليك الله نشجع الهلال وريال والأنتر لانهم الأفضل .. المريخ أول أمس فاز على هلال الساحل بالتحكيم .. والبرسا بقي أي زول أغلبهم في ملعبهم وخارج ملعبهم .. أما ميلانوا ده خلاص بقي فته ..
بالنسبة للغربة أخذت الكثير البعد عن البلد والأهل والأحباب والشباب وحياة السودان الحلوة بمعاناتها .. لكن الغربة أضافت الكثير معرفة سهولة الحياة لدرجة الملل وحققنا القليل من الأحلام التي ما كان يمكن تحقيقها لو كنا بالسودان والحمد لله .. وحجينا وعمرنا الحمد لله

سلمى الشفيع كتب:مدثر سلام..اوعى تكون انت دفعت العمده ومرغنى؟

الأخت سلمي كيف حالك وأحوالك يأختي الفاضلة ميرغني شنوا وعمدة شنوا الأنا قدرهم .. أنا عمده ما لاقيتوا لكن لو قدر ميرغني تكون مشكلة ومفروض ما يدخلوا المنتدي ده (المسجد ـ البيت ـ الشغل ) وبالعكس .. تتصوري أنا لمن كنت في أولي ثانوي عام ميرغني كان في جوبا بقرأ في الجامعة بعدين ميرغني ده ما لاقيتوا وصاحبتوا إلا في نهاية التسعينات والله على ما أقول شهيد .. فتحتي علينا نيران جهنم الله يستر

الاخ / الجاهورى تحياتى ممكن تلقى نظرة على المنتدى الرياضى وبصفتك محامى عايزين تعليق من سعادتكم ومعاها فتوى قانونية فى حكاية تتويج الثالث افريقيا ( ممكن اتحاد الحصاحيصا عندو قانون كده ) باقى كاتب المقال يتبع اداريا لإتحاد الحصاحيصا ؟

الاخ الجاهورى هؤلاء فى كلمات :
01/ النويرى
02/ على ود كدودة
03/ بله ودعويضة
04/عباس ود الهِدى
05/ ود شايقى
06/ ود عابدول
والجاى احلى 000000000000000

المدير العام كتب:الاخ مدثر / كيف حالك ؟؟؟؟؟
ياسر عثمان عراقي ,,,,, كيف لماذا واين ؟؟؟؟
لماذا الحلة الجديدة وليس اشلاق البوليس؟
هل الدنيا عالم مثالي ,,,, يعني من كد وجد وما الي ذلك ؟

السيد / المدير العام تحياتنا
الأخ ياسر عراقي هو الشخص الصاح في الزمن الخطأ لذلك تجد طريقة تفكيره صحيحة 100% لكنها تظل غريبة مع هذا الزمن فهو واضح جداً لكن الناس تهاب الوضوح متصالح مع نفسه وتجد الجميع متناقضين مع انفسهم لا يهاب الحق وتجد الكل يتملق ويكذب دقيق في كل شيء ومرتب في زمن الفوضي والنفاق والرياء لذلك تجده يشيد في مدن فاضلة لنفسه لذلك تجده غريب إلا مع من يعرفون ياسر .. كل ما أتمناه هو أن يجد ياسر الحياة التي يبحث عنها وعندما يجدها اتمني أن تصدق معه

الحلة الجديدة .. مرتع الصبا والجيران الأهل والذكريات الجميلة وأصدق وانبل المشاعر مع الكل .. تعتبر الحلة الجديدة من أجمل الأماكن بالنسبة لي وبالذات بيتنا الأول لي فيه ذكريات ومخزون من الأشياء الجميلة ... السبب في سكن الأسرة بالحلة الجديدة وليس الإشلاق عندما أتينا للحصاحيصا قادمين من ودمدني قصدنا بعض أقاربنا وهم العم على بله صالح والمرحوم حسن الجمل وأل نور الهدي والعم عثمان جابر وعند وصولنا وجدنا منزل بالحلة الجديدة جيران العم على بله فاضي طوالي الجماعة ديل نزلوا العفش في ذلك البيت وهو بيت جالوص مكون من ثلاثة غرف متفرقة جلسنا بهذا المنزل حوالي العشرين عام وهو بيتنا الأول بالحلة الجديدة سكنا مؤجرين كل تلك الفترة ، وحاولنا بكافة الطرق شراء هذا المنزل لكن لم نوفق بعد ذلك اشترينا بيت أخر في الحلة الجديدة وساكنين فيهو إلى الأن لكن المنزل الأول هو عزيز على نفسي لذكرياته ..
الدنيا عالم جميل يمكن أن تعيش حياة سهلة وبسيطة وتشعر بسعادة وممكن تعكنن على نفسك .. أما بالنسبة لمن كد وجد هذا كلام فاضي في ناس لا كدوا لكن وجدوا بسبب التوفيق أو لأسباب أخرى منها الصحيح والغير صحيح .. عموماً الأنسان عليه أن يسعي ويرضي بواقعه وأن يكون طموحاً لأبعد الحدود فالإنسان لو وضع هدف معين يمكنه الوصول لهدفه ويكون في قمة سعادته

عماد الشفيع كتب:الاخ / الجاهورى تحياتى ممكن تلقى نظرة على المنتدى الرياضى وبصفتك محامى عايزين تعليق من سعادتكم ومعاها فتوى قانونية فى حكاية تتويج الثالث افريقيا ( ممكن اتحاد الحصاحيصا عندو قانون كده ) باقى كاتب المقال يتبع اداريا لإتحاد الحصاحيصا ؟

ود الشفيع العمده تحياتنا .. بالنسبة لحكاية تتويج الهلال ثالث أفريقيا فإن الأخ أبو بكر الزبيدي لا يأتي إلا بالأخبار الصحيحة 100% وأنا أثق فيهوا وفي مصادروا بعدين الفيفا صنفت الهلال ثالث أفريقيا أكثر من كده عايزين شنوا .. كلام أبو بكر صحيح 300%

عماد الشفيع كتب:الاخ الجاهورى هؤلاء فى كلمات :
01/ النويرى
02/ على ود كدودة
03/ بله ودعويضة
04/عباس ود الهِدى
05/ ود شايقى
06/ ود عابدول
والجاى احلى 000000000000000

الأخ عماد من وين المعلومات ده :
1ـ عمنا النويري عليه رحمة الله يعتبر راجل مرح جداً ومشهور بأنوا صاحب مركب أسمه مركب النويري وهذه المركب تعتبر منتدي بحالوا إن صادفت عالم النت فيها يجتمع الأهل صباحاً قاطعين البحر من الغرب للجزيرة نسري وفي المساء يعودون من الجزيرة لسكنهم بالغرب (الكمر) وكل الطرائف والجكايات تنسب لمركب النويري وكان ذالك الزمن الجميل
على ود كدودة رحمه الله يعتبر زعيم من زعماء منطقة الكمر والجزيرة نسري وهو شيخ وصاحب نفوذ وإذا قصدته في شيء لن تعود إلا وتجد ما طلبته أشهر أولاده المحامي الذايع الصيت أستاذي المحامي صديق على كدوده ..
بله ود عويضه رحمه الله هو جدنا ويعتبر من مشاهير الجزيرة نسري والكمر بيته في الجزيرة نسري فيهوا شجرة منقا كبيرة تلقي الناس قاعدين تحته يفطروا ويتغدوا وزوجته الله يرحمه حبوبتنا ستنا بت مصر تعتبر أم للجميع .. أشهر ابناء المرحوم بله هو العم على بله ومعانا بالحصاحيصا واخوي متزوج بنته
العم عباس ود الهدي رحمه الله هو عمي إبن عم الوالد كان له دكان بالجزيرة نسري والكمر ويعتبر دكان العم عباس هو النادي الثقافي الاجتماعي .. وكان عمنا المرحوم عباس الهدي رجل نكته وكوميدي من الطراز الفريد تجده مبتسماً هاشاً باشاً إستحيل تجده عابس الوجه .. أولادوا الأخوان عثمان والسر وعوض ربنا يطول في عمرهم
ود الشايقي ود عابدول والله ديل ما عندي أي معلومات عنهم للأسف الشديد

الجاهوري أخوي صباحك زين
شايف الموضوع زي بدا ينوم كدة قلت أصحيهو لقيتك طنشت سؤال ميرغني الأخير دة، عموماً عندي ليك اقتراح تعمل زي ما عمل العمدة وتستغل الهدوء دة وتزوغ ,,,وما تنسى تقعد زول وراك

الاخ الجاهوري / نسال عنك وبشدة,,, اظهر وبين وعليك الامان .

ميرغني ابراهيم عمر كتب:طبعا يا اخونا ذهبت الاجازة السنة الفائتة ,,, واكيد استرعت انتباهك نغييرات كثيرة في مجتمعنا السوداني ,,, ما هي اكثر الاشياء التي لفتت انتباهك ,,, السلبي منها والايجابي ,,,, لك الود.

الأخ ميرغني سلام .. ذهبت إجازة شهر سبعة الفات في تغيير في كل شيء الناس دايره تكون كلها غنيانة الفقر أصبح عيب وهذا مفهوم خاطيء الفقر عمروا ما كان عيب .. العيب إنك تصل للمحرم وهو أن تكون عندك قروش بطرق غير صحيحة .. بعدين لاحظت إنوا أي واحد عايز إتزوج الثانية والثالثة والرابعة وهذا مفهوم غلط من وجهة نظري لانوا إمراة واحدة تكفي بل السعيد من لم يفكر في هذا الموضوع من اساسوا

هيثم على الشفيع كتب:الجاهوري أخوي صباحك زين
شايف الموضوع زي بدا ينوم كدة قلت أصحيهو لقيتك طنشت سؤال ميرغني الأخير دة، عموماً عندي ليك اقتراح تعمل زي ما عمل العمدة وتستغل الهدوء دة وتزوغ ,,,وما تنسى تقعد زول وراك

الأخ هيثم كيف حالك وأحوالك مع البرسا قلت ليك أي واحد بقي يكون لاعب معاكم يكون ضامن الفوز عليكم حتى طيش الدوري الله يكون في عونكم ... ما علينا والله الأيام الفاتت كنت مشغول حبة ومديرنا إتفقدنا كتر خيروا .. لسه عندي أسبوع وأول أبريل بنزل ليك واحد في البنبر ده بس جهزوا أسئلتكم ليهوا

ميرغني ابراهيم عمر كتب:الاخ الجاهوري / نسال عنك وبشدة,,, اظهر وبين وعليك الامان .

يا دكتور أهو ظهرنا ونشكرك على تفقدنا .. مسئول من الخير ياسر الخير وين ما تدخلوا معانا في المنتدي ده