اسماء لها ايقاع .... وضاعت وسط الزحام !!!!

من طرف هالة الزبيدي الأحد نوفمبر 04, 2007 8:17 pm

اسماء لها ايقاع .... وضاعت وسط الزحام !!!!

اسماء لاشياء كثيرة كان يستعملها اهلنا فى القرى والحضر لوقت قريب ولكن فى زحمة العولمة والفضائيات اندثرت وانزوت فى ركن قصى واصبحت ضمن قائمة الفلكلور باعتبارها تقاليد ومسميات قديمة لا تصلح فى هذا الزمن
وهذه سانحة لكى نبرز القليل من ذاكرة النسيان ونذكر ما ضاع وسط الزحام مع تعريف بسيط للمعنى مثلا :-

النفاج
وهو باب او مدخل يفتح بين الجيران لتسهيل حركة التواصل والتنقل بين الجيران وهذا لا يتطلب ان يكون الجار من الاهل ، ويعكس مدى عمق العلاقات والصلات والتراحم بين مجتمع زمان وتفيذا لوصية نبى الانسانية والسماحة رسول الله صلى الله عليه وسلم على الجار

عنقريب القد
الهيكل يشبه العنقريب العادى ولكن يجلد بالجلد ويكثر استعماله فى مناطق دارفور

المشلعيب
يصنع من السعف الذى يستخرج من اشجار النخيل
ويمكن ان نطلق علية ثلاجة لحفظ الطعام فى زمنا مضى ( اذا جاز التعريف )

ونترك لكم مساحة لاضافة ما يتعلق بالذاكرة ليعرف جيل اليوم عن ما كان فى الماضى

ودمتم

الكجيك/ وهو السمك الناشف

ميرغني ابراهيم عمر كتب:الكجيك/ وهو السمك الناشف

تحياتنا أخي ميرغني مشكور علي المرور
السلاد: وهو اللحم المشوي على الحجر.

السارقيلا: وهي دودة لصيد السمك ويشبه بها الشخص النحيف الطويل.

النملية: دولاب مربع من النملي لحفظ الطعام والأواني.

البرش: مفرش من سعف النخيل للصلاة أو كفرش للعنقريب وهناك برش العروس الملون.

فروة الصلاة: وهو فرش مصنوع من صوف الخروف للصلاة.

إبريق الوضوء: وهو إبريق من حديد للوضوء.

الشرغرغ: أداة حديدية مثل الكوز لها يد تغلى فيها القهوة بعد تحميصها وطحنها.

الجبنة: آنية من الفخار تصب منها القهوة.

الوقاية: قطعة دائرية من القماش مقوى دائريا ومفرغ من الوسط وتزين بالسكسك وتوضع عليها الجبنة.

الزير: حاوية فخارية لحفظ المياه باردة ويوضع على حمالة حديدية لها أرجل في المزيرة ويشرب الماء بالكوز.

القربة: حاوية مصنوعة من جلد الخروف لحفظ الماء فيها باردا..كما يخض فيها الحليب لصنع الروب واستخلاص الزبدة.وقد تستعمل القربة للعزف عليها وتسمى موسيقى القرب.

الفرصة: هي الزبدة.

البوش: وهو مرقةالفول مع خبز.

الدمعة: وهي ملاح الطماطم مثل دمعة الجداد وتأكل مع القراصة.

النعيمية: ملاح الحمة المفرومة بالويكا والدكوة والزبادي وتأكل مع العصيدة أو الكسرى.

مراح: قطيع من الغنم والمواشي.

ملاح السبروق: وهو ملاح نوع من الخضار يسمى السبرق.

ملاح الورق: ملاح ورق اللوبا بإضافة الويكا.

المديدة: تحلية مثل الكسترد من الحلبة أو الدخن أو البلح..

الحلومر: عجينة يابسة من الذرة المطحون والبهارات والكركدية والغرنجال تنقع وتحلى.

الشربوت: منقوع البلح والبهارات(لا يخمر) يصنع عادة مع عيد الضحية للهضم.

سكسكانية: تحلية تصنع من نوع من الشعرية وهي على شكل كرات صغيرة كالسكسك.

الكبك: حذاء رياضة للأولاد.

المركوب: حذاء من جلد النمر للرجال.

المرفعين: الضبع.

وتقديري للجميع

لو سمحت اختنا هالة لنا ببعض التعديلات لفارق العمر هناك اشياء عاصرناها ولم تعاصرها ,, نعتذر عن التداخل ولكن لابد مما ليس منه بد::
الصارقيل وليست السارقيلا.
الابريق ليس من الحديد فقط كان في زماننا اباريق فخارية.
القربة: للماء فقط ,,, اما مايخض فيه الحليب فهو السعن.
البوش : ليس هو مرقة الفول قطعا{ هذه تسمية حديثة} البوش هي الوليمة.
ملاح السبروق: ليس هناك خضار اسمه السبرق بل يصنع من ورق البامية.

مشكور اخي ميرغني
منكم نستفيد
لك التحية

اختنا هالة يبدو ان التصحيح قد اثار حفيظتك ,,,,, الرجاء عدم التوقف لانني لا استطيع ان اسكت,,,,, استحملينا شوية يا ام فاطمة.
لك الود.

من طرف زائر الأحد نوفمبر 11, 2007 6:40 pm

هالة اتحفينا بالعامية

من طرف عمر ابراهيم الأربعاء نوفمبر 14, 2007 8:17 pm

الاخت هالة رغم ان الدارجة السودانية زاخرة بالمفردات لكنك لم تغفلى عن الكثيرمنها اعدك بان اشارك فى القريب انشاءالله

من طرف هالة الزبيدي الأحد نوفمبر 18, 2007 3:22 pm

مشكورين علي المرور الاخوان حامد وعمر في انتظارك يا عمر الزبيدي
لكم التحية

الهمبتة
الهمبتة هي طريقة في الحياة تقوم على سلب ونهب الإبل عن طريق الغزو والإغارة كما كان يفعل صعاليك العرب ، وكان مجتمع الصعاليك يتكون من مجموعة من الشعراء من مختلف قبائل الجزيرة العربية عرفوا في تاريخ الادب العربي بالصعاليك ، وكان لهم شعرهم الذي يحمل طابعهم ويعبر عن معتقداتهم ويصف دقائق حياتهم وتفاصيلها ، والهمبتة والهمباتة في السودان هي مرادفات للصعلكة والصعاليك في تاريخ الادب العربي ، رغم أن لفظ الهمبتة والهمباتة اشتهر للدلالة على هذه الظاهرة والمشتغلين بها إلا أن هنالك الفاظ اخرى تختلف باختلاف البيئات وتستعمل للدلالة على هذا الاسلوب في الحياة
نموذج لشعر الهمباته فى الفخر والحماسة على لسان اشهرهم الشاعرالطيب ود ضحوية

نـــــــــــــــــاس أب آمنة شدوهن مع الاوكــــــــات

عقدو الشـــــــــورة من تقلي وعقيدن فـــــــــــــــات

ابوك ياالزينة الخجــــــــــــــــّا المديريــــــــــــــــــات

ابوك ياالزينة عكـــــــــــاز التقيلــــــــــــــة إن جـــات

من طرف عمر ابراهيم الثلاثاء نوفمبر 20, 2007 6:49 pm

سلام .................. مافى كلام
وهاكمجدعة الدوبيت دى

اب عراق فتق قرنو المبادر شرى والباشندى عمت مهششيب الدرة
من النقرة فى كل حين عليه منصرة شاحد الله الكريم يسقيها فى هالمرة

عمر ابراهيم كتب:سلام .................. مافى كلام
وهاكمجدعة الدوبيت دى

اب عراق فتق قرنو المبادر شرى والباشندى عمت مهششيب الدرة
من النقرة فى كل حين عليه منصرة شاحد الله الكريم يسقيها فى هالمرة

مشكور عمر الزبيدي

ده شنو يا اخوي انجليزي
لك التحية

لك يا هالة من شعر الصعاليك
اذا مابرزنا من ثنية لفلف
فخبر رجالا يكرهون ايابى
وخبرهم انى رجعت بغبطة
تحدد اظفارى ويصرف نابى
وانى ابن حرب لا تزال تهرنى
كلاب عدوى او تهر كلابى
(الصعلوك عروة بن الورد)
ومن شعر الهمباتة
باكل حارة ما اضوق باردة ماك دارينى
واسعل منى ربعاى البعرفو قرينى
حس اب جقرة والقربين دوام بارينى
وانا اخو(هالة) كان يبقى الكلام عانينى
لك التحية

من طرف هالة الزبيدي السبت نوفمبر 24, 2007 4:21 pm

معاوية علي الشفيع كتب:لك يا هالة من شعر الصعاليك
اذا مابرزنا من ثنية لفلف
فخبر رجالا يكرهون ايابى
وخبرهم انى رجعت بغبطة
تحدد اظفارى ويصرف نابى
وانى ابن حرب لا تزال تهرنى
كلاب عدوى او تهر كلابى
(الصعلوك عروة بن الورد)
ومن شعر الهمباتة
باكل حارة ما اضوق باردة ماك دارينى
واسعل منى ربعاى البعرفو قرينى
حس اب جقرة والقربين دوام بارينى
وانا اخو(هالة) كان يبقى الكلام عانينى
لك التحية

مشكور علي المداخلة اخي معاوية
بس مالكم قلبتو لينا البوست دوبيت انت وعمر عشان ما تزعلو بعمل ليكم واحد لي الدوبيت دة خلو لي السحارة والكرار والحلو مر
لك التحية

من طرف عمر ابراهيم الأربعاء نوفمبر 28, 2007 9:00 pm

شكرا الاخت هالة للاهتمام والفتة البارعة بى بالبوست بتاع الدوبيت

التكل: المطبخ
كشا مشى: لاطائل منه
تتي: البنت اليافعة

قال الشاعر: الجامعة ام بناتن تتي,,,,,, وا شوقي عليك وا حسرتي
علي ايامنا عنما كان بالجامعة بناتن تتي
مجاراة لمدحة حاج الماحي: الجنة النخيلها مشتي,,,, وا شوقي عليك وا حسرتي

الراجل البدور الشكرة مابتلام
يخلف ساقو ويخت (اب عشرة)من قدام
كان بردن نجيبهن محلب وهدام
وكان حرن نقابل (الجلة)مافى كلام
والجلة هى الحرب
ليتنى كنت همباتى او صعلوك..فهم متمردون ..لا يعترفون بما هو سائد ومعروف من تقاليد وضعها اغنياء القبائل...
ينهبون من الغنى ليعطوا الفقيرتماما ك(سعيد مهران) بطل رواية نجيب محفوظ..(اللص والكلاب)..ادعو جميع رواد المنتدى لقراءتها..

من طرف اياس الأحد ديسمبر 02, 2007 12:22 pm

سلامات ال الذبيدى
اولحاجة يا ام فطومة مش احسن كان تقولى التبروقة(التبروكة) بدل فروة الصلاة اتخيلى تبروكة اعمق شوية
تانى حاجة ياريت تعرفى لينا
1/ام بقبق
2/الواسوق
3/ الدندهوب
4/ الشاشاية
5/البربندى
6/المحاويت
7/ الكنش
8/الريكة
9/الكاويق
10/ ام رقيقة
11/ السخل(العتود)

الاخ / سرو مرحب بي طلتك ولو انها جات متأخرة لن اجيب عن اسئلتك لانها مفترض انها موجهه لهالة,,,,,, لكن كيف دابي بابرص معاك,,,,, لك الود

من طرف اياس الإثنين ديسمبر 03, 2007 10:38 am

سلامات العزبز مرغنى .... انت فى دابى بابرص لا شراب التنكة(القهوة) طبعا عمك لما كان بيحكيها انا كنت بخش جوة اضافرى عديل كدا ماكنت قايلها قهوة طبعا....
لوفى صور حديثة للذبيدى وبت البسابير رسلها لى فى الاميل حقى

الاخت هالة التاخير فى الرد شنو؟؟؟؟؟ مشيتى تزاكرى الامتحان صعب Sad

اياس/قال التنكة كان بيشربها مع حمد النيل ضيف الله, ناظر مدرسة حنتوب الثانوية عام 1964,,,,,,, في صور حديثة عمك الزبيدي والسيدة حرمه يلعبون الورق,و سأرسلها لك.

من طرف اياس الثلاثاء ديسمبر 04, 2007 8:32 am

فى انتظار الصور..................... بس خليهم كتااااااااار وما تنسى صور الشباب وخصوصا خصوصا الانسة قندفة (عزوز)

مشكورررررررررررررررررين يا جماعة الخير
بعدين يا سرو ما لكم ما بتفوتو حاجة
اما بالنسبة لي اسئلتك
ام بقبق ده ملاح البامية المفروكة
الكنش والريكة ديل ما عارفة اوصفم ليك كيف ياخ انت ما عارف بتسأل مالك يعني ما عارف الكنش
ام رقيقة (او الملاح الزي الموية علي قولة فطومة فهو عبارة عن ياخ ما بالغت يا أياس أسال بت البسابير
المهم كل الحاجات الباقية بحولة لي مرغني الزبيدي (وعمر الزبيدي لانو بحب الحاجات دي يا اخوي انا اسألني عت الحلو كريمة ها ها ها

قال حلو كريمة قال,,,!!!!!!!!!!!!!!!

يا اخوانا اتخيلو معاي بوست جميل زي دة يقعد سنتين بدون يتكتب فيهو ولا حرف!!!

مش عيب الكلام دة؟؟؟

يللا ورونا معرفتكم بالعامية السودانية

بتعرفو ( المحويب)؟؟؟؟؟؟؟؟

أنا معاهم؟؟؟

من طرف عماد الشفيع الإثنين ديسمبر 14, 2009 8:21 am

ميرغني ابراهيم عمر كتب:اياس/قال التنكة كان بيشربها مع حمد النيل ضيف الله, ناظر مدرسة حنتوب الثانوية عام 1964,,,,,,, في صور حديثة عمك الزبيدي والسيدة حرمه يلعبون الورق,و سأرسلها لك.

عشنا وشفنا الزبيدى وحرمه يلعبون الورق ويشربون ( ....) القهوة بالتنكة ........وشنو يا ولدنا ماعندهم صورة وهم يتصفحون الأنترنيت ... يا حليلك ياحامد وانت شايل جردل اللبن بعد حلب البقرة قبل صلاة المغرب دنييييييا

ميرغني ابراهيم عمر كتب:أنا معاهم؟؟؟

إنت وعمدة وكل الحبوبات

عاوزين نثقف الجيل الجديد بي تراثو

ويكون أفضل لوجاوبت وجبت معاك أسئلة جديدة

هيثم / كيف حالك ,, أجاب عمده من حيث لا يدري !
المحويب حبل تربط به الارجل الخلفية للبقرة أثناء الحليب.
لكم الود.

طيب

وين الأسئلة الجديدة؟؟

الكاويق؟

أعتقد إنو أغصان وأوراق نباتات جافة مكسرة

كلامك ,, صاح
هو كل ما جف أو صار قديما من نبات واكثر ما تقال للبامية وهي بعد لم تقطف ,, وما كاوق من البامية يجفف ليصبح ويكة,,, وتقال لاشياء أخري مجازا,,, يعني مثلا في المنتدي عندنا هنا في المنتدي عمدة مكاوِق

آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
لكم الود.

طيب

(الهبو) يطلع شنو؟؟؟؟؟؟
و(البسديق) يكون شنو؟؟؟؟

الهبو علي ما اظن هو الهبود أو ما تطاير من الرماد
والهبو ايضا مصطلح طبي ,,flushing, وهو أعراض تحدث عند انقطاع الطمث عند النساء ,,,, تشعر المرأة بحرارة في منطقة الصدر والعنق والوجه" بوخ" قد يصحبه تغيير في اللون عند النساء ذوات البشرة الفاتحة ,, أحمرار وفي بعض الاحيان دوار وتعرق.
خلونا في موضوعنا ,,, هل الهبو هو الهبود ولا لا؟؟
علي فكرة في فنان في المعيلق " قديم شوية " اسمو عبد الله الهبو.

لكم الود.

الهبو هو الهبود صااااااااح

لكن أنا عدلت البوست وأضفت كلمة جديدة

بتعرفا؟؟؟

البسديق ,, او البشديق,,, المعراكة.
لك الود.

يعني أنا كل مرة أقعد أذكرك؟؟!!؟؟

جاوب سؤال

جيب واحد بدلو

وماهو الارص والإسناج؟؟؟؟؟؟

الاسناج هو ما يوضع علي رقبة الثوار للحراثة ,, الارص ما بعرفو.
لك الود.

لو ماعرفتو انت يادكتور معناها مافى زول ح يعرفو ,,,, كدى ننتظر العمده !!!! اصلو الافنديه اولاد على الشفيع مابعرفو الحاجات دى !!!!

خلوهو الارص بتعرفو:
1- الصُرار
2- الضبه
3- المسمس
4- البرنبدى
5- الكعكول

إنت آالجعلي ربتك حبوبتك؟؟؟!!؟؟

دي مركبات كيميائية؟؟؟؟ شنو أرص وإسناج !!!!!!

الصرار : دة بيعملوه للغنماية
الضبة الأنا بعرفا حقت الميكانيكية وما أظنك قاصدا
البربندي : وتد لربط البهائم

المسمس دة يطرشني
الكعكول دة بعرفو لكن راح لي (أعتقد قطعة الصمغ الكبيرة)

أصلو أنا كان ما اتشالقتا ما برتاح ؟!! عارف رقبتي

الصرار للغنماية أأي يا بشو ,, لكن كمل عشان ما ترضع (السخوّول) دلع السخيلات ,, والناس الما بعرفوهن أولاد الغنماية الجداد ..

البربندي نعم بالحيل وتد ,, لكن من الحديد وتقريبا" خاص بالابقار والحمير يعني غنم وخرفان ما معانا

المسمس دا البصل لمن يكون صغير أو يجيبوه للشتل

الكعكول دا إتخييل لي فرع شجرة العشر الناشف

أم الارص دا اطرشني؟

والضبة دي زي ما قال هيثم!

من طرف عماد الشفيع الأربعاء ديسمبر 16, 2009 9:39 am

[quote="الرشيد الريح نورالدين"]لو ماعرفتو انت يادكتور معناها مافى زول ح يعرفو ,,,, كدى ننتظر العمده !!!! اصلو الافنديه اولاد على الشفيع مابعرفو الحاجات دى !!!![/quote

وأنا كمان والله زيهم ماعرفتها

من طرف سلمى الشفيع الأربعاء ديسمبر 16, 2009 8:48 pm

السلام عليكم ياشباب
الارص هو الحبل الذي يربط به الإسناج مع المحراث اثناء الحرث اما الضبه فهو جلد ذيل البقر وتزين به العصى(العكاكيز).ده كمان داير ليو درس عصر فضحتوني يا اولاد الشفيع.
طيب بتعرفو:
1-الضناب(النون مشدده)
2-التربيقه
لكم الود

سلمى الشفيع كتب:
ده كمان داير ليو درس عصر فضحتوني يا اولاد الشفيع.

والله على حسب علمي المتواضع -يابت الشفيع-

ولحد شهر ستة سنة 2006م إنت ولا حاجة من الإتقالت دي ما بتعرفيها

قال تربيقة قال..

ودااااااااااا إنجليزي دا يامرسي؟؟؟؟؟؟

الصرار هو للغنم ,, لمنع الوليد من رضاعة الام ,,, ومافي داعي للتفاصيل المقرفة
الضبة للعكاز ,,, قطعة من الجلد يكسي بها العود ليزداد متانة,, يقال عكاز مضبب.
البربندي ,, هو وتد من الحديد.
الكعكول : هو قطعة الصمغ علي الشجرة ,, وتقال ايضا للقطعة الواحدة بعد حصدها,, يقال طويل وما بلحق الكعكول,,, وهي غلوتية يقصد بها الطريق ,, الذي قد يكون طويلا ولكن لا يستطيع ان يطول الكعكول اعلي الشجرة.
الضناب : هذا هو حبل او ما شابه ,, وعادة ما يكون مفتول من قطع القماش ويربط السرج الي ما تحت ذنب الحمار.
الارص؟؟ ارجع الي سلمي الشريف قاسم
التربيقة : نوع من الكسرة ,,, ما متاكد.
بعدين رجاء يا جماعة بالله واحدة واحدة عشان نفهم حاجة.

كلمونا عن معني : المررو

المررو:

-والله أعلم-
مشروب المكون الرئيسي فيه عجين الكسرة