السباحة في اعظم بحور الشعر السوداني

فكرة تاسيس لمكتبة للشاعر الفذ محمد الحسن سالم حميد لعضو المنتدي وليد ابراهيم قدم له بالمقدمة التالية ,, رأينا ان نجمع كل ماكتب عن الحميد في المنتدي قديما وحديثا :
.............................مقدمة وليد ابراهيم............................................




القصايد ياسادتي كالاشواك في ارجل الفلاحين تؤلمهم ويمشون عليها.....

والعودو خاتي الشق ماقال وحاتك طق يـــــــــــا يابا يانــــــــــادووووو سٍ

اليكم

محمد الحسن سالم حميد البحر النابع من وجع الغلابة

الانسان الاجمل مما قال من شعر/ نية رسول انسان فقط ظهر في السرة بت عوض الكريم - الزين وحامد

ووووووووو وو......بصراحة لمن لابعرف حميد كل ماكتب لايساوي قطرة في المحيط الشامخ (الحميد )

اخوتي اوجه لكم الدعوة للسباحة في اعظم بحر للشعر الواقعي السوداني

فهلا سمحتم لنا بتكوين مكتبة بسم بحرنا (حميد )

ولكم الود

ثم هذي الاشتراك السابق قبل تاسيس المكتبة بواسطة هالة الزبيدي:


يا جمة حشا المغبون .. في الزمن الهلاك منجا
تكون حانت مواعيدك .. يكون وقت المطر قد جا
شرق ضو البلد عيدك .. وطابت نسمتو العرجا
نكون يا طيبة تمينا .. وبدينا ولفنا .. غنينا الغنا الراجا
وبدت كاس المودة تلف .. عشق من حلفا لي راجا
ألف في ألف .. حبابك ألف .. إيه يا عنزنا القرجا
يا لـبّانة في الزمن المراحو نشف ..
يا جـبّانة للخوانة .. للعوج البدور ويلف
دميرتنا البتروي جرف
ضفيرتنا وعرش بيتنا .. تميراتنا اللي كانو وقف
أصابعين الرجال رصاص .. صمغ راس البنية سقف
أصابعين الرجال رصاص .. عضم ضهر القضية سقف
تكون دارة الزمن عمرت ..
نكون لمينا في الفاتو
وتكون فاقت ملامحنا وتضاريسنا القبيل غمرت
دغش ساقت بوابيرنا وندت شتلات بعد ضمرت
ضراعيك يا الولد كبرت .. مراعيك يا البلد كترت
خدار .. خدرت
غزار .. غزرت
نضاراً زين
برغم الصيف وصناتو ..
وسموم البين وأناتو
عصافير الجلد قدرت تباصر غيمة منتحرة
تضاير نسمة مندحرة
تضاير الغابة والصحرا
من الغمة وضلاماً شين ..
ومنك يا دقين ننفك .. تكون فكت عقدة الدين ..
عقب سيرة البلد سارت على الدرب العديل والزين
بعد ها الحال بلا مرسال .. يجو العمال .. يجوز الزراع .. يجو الكداح
يجو الناس البخبرو شليل .. وشقيش راح
وقمريتين جناحن دلّ فوق الصاح
من الغفلة وعساكر الليل .. ولي الدنيا الجديدة جناح
صباح نندلّ شدة حيل ... بلدنا وما بنقيف بين بين
فيا خيالة عدو الخيل .. ولي الطيبة البتملى العين
مدى ونياه .. في حز القلب غنوة وآه
حنان بلدو .. وحنين منفاه
يا بت العز .. يا ست الجاه
يا هسع دية .. يا بكرانا .. يا ماضينا .. يا بعدين
نكون كنا .. وبقينا متين
وكيف تكدح مواعيدك مواعيدنا ونساورك وين

يا وطن عز الشدائد .............. تحية كبيرة للاخت هالة

ميرغني ابراهيم عمر كتب:هالة/ احييك تاني طيبة !!!! ومنك يا دقن ننفك,,,,لك الود.

مشكور اخي ميرغني باقي ليك الدقن دي في منها فكة بعد ده

عمر ابراهيم كتب:يا وطن عز الشدائد .............. تحية كبيرة للاخت هالة

يديك العافية ياعمر مشكوووووووووووور

عمر ابراهيم كتب:يا وطن عز الشدائد .............. تحية كبيرة للاخت هالة

يديك العافية يا عمر مشكوووووووووووووور

ميرغني ابراهيم عمر كتب:هالة / كتر الله خيرك ,, حقيقة كنت ابحث عنها كاملة,, لك الشكر

مشكووووووووووووور وانا تحت امرك يادكتور قول داير شنو افتش ليك
لك التحية

ياغيم بلا كلفة...اد الوطن بلال.
ناسا فرد وقفة...ابقالم الضلال
غنيت من المنفى...للحلم والاطفال
موالى ما كفى...ياغيم ارم موال
خدر حراز جف...رجع لو طيرا طار
قلبا بلاك خف...ما دار بلاك تقال

لسع بلال فى الضيق...مجرور على الرمال
ما صادفو الصديق...يا غيم بلال ما زال
ما بل فك الريق...ما قال احد ما قال
للصبر قادر يطيق ...الا الصبر هقال

غنى الشعاع الطال...غنينا كنا سوا
شال النغم عتال...بايتين عيالو قوى
باكرنا سترة حال...باكر رغيف وروا
باكرنا للاجيال...ينشر نور وهوا

باكرنا يا ملوال...كل الغلابه بلال
يا هاجر ال تسعى...بين الوطن والبال
باب الفجر يفتح...عن دقة الرجال
فتح اللبق فى الصيف...تالا الشتل تربال

لاقيت شعاع اسمر...عن ضو صباح الله
قاعد لو فوق بمبر
كاب المرس يسكر
قنبت جنبو معا
حدثنى بى حرقة
حبيتا حبيتا
حبيتا من جواى ...فىالحلوة والمرة
ادتنى واديتا
فى يوم من الايام...هلوست دون احلام
عن دشة الحجاج...ضل الشمش صقرين
واحد حواك يا ام زين
والتانى ختفك وطار
باعونى للفرقة...باعونى للدولار
منعول ابو الفرقة
منعول ابو الدولار
(محمدالحسن حسن سالم حميد)

حميد هرم الشايقية الشامخ ، حميد الانسان حميد القصيدة حميد البلد ، السودان ، العمال ، الناسا المطحونة ،الزين ود حامد ، ست الدار بت أحمد جابر ، راشد ، النوباوية ، نورا ، نعمة ، عم عبد الرحيم ، يوسف ) حميد الهم اليومي ما بين تقلبات الحياة وآمال شعب طحنته لعنة الظروف ( ومآل الحال ).

حميد غناء شعري تعدى حدود الوطن ليعبر عن قضايا الإنسانية

في فلسطين محتلة
وفي فلسطينات راح تُحتل

عبر حميد كل تلك الحدود بأدوات شاعر وهم إنسان ، حقق ثوابت في العرف والعقيدة والسلوك الاجتماعي فتحدث عن الكنيسة والمسجد على حد سواء ، وعن احترام الرأي الآخر في أرقى صورة وأن الإنسان يرقى بقدر ما يكتسب من تهذيب ويسعى لسلام اجتماعي له ولغيره .

وحميد لا يعطيك القضية ملفوفة بسولفان أو ورق ملون إنه ينقل الواقع ويعبر عنه بوعي إنسان قريب من كل من يكتب عنهم ، ينفذ للروح ببصيرة المجرب ، وتحس من أشعار حميد أنه عاش كل العصور في السودان ، كل الحقب ، عاش كل الإرتباكات والخيبات ، فصنع منها أسفاره التي تعبر بنا إلى حيث أفق يستوعب طموحنا
وآمالنا وأمانينا ومشاريعنا القادمة

في صدى فالك يا إنسان
نسمة تقولك بالإمكان
أحسن وأبدع مما كان

بل أكاد أجزم أن حميد أذكي شعراء السودان ، ودونكم ما جاء في شعر حميد عن الاجتياح الإمبريالي العالمي وما حدث بالفعل في العراق ، وأظن أن لحميد مزاج خاص مع الأمريكان و خبرهم وخبر مخططاتهم ، ووعى الدرس باكراً لطموحهم ، بفكر عالي

باسم الدين والأمريكان
أي عوج مبدي ومختوم
صوتنا هناك وهنا مكتوم
وما في فرق في الوقت الراهن
بين واشنطن والخرطوم

هذا ينقل حميد من خانة الشاعر العادي الذي يعبر عن دواخله بصورة تقليدية ، إلي مرحلة متقدمة من الوعي والحس ،فتحس من خلال مفردات أشعاره أن الشارع كله بالنسبة لحميد سكك وطرقات مشرعة ينفذ لها وينقل حواراتها بشفافية وتجرد

من الواسوق أبت تطلع
من الأبرول أبت تطلع
من الأقلام أبت تطلع
من المدفع طلع خازوق
خوازيق البلد زادت
يفيض النيل
نحيض نحنه
يظل حال البلد واقف
تقع محنة

وحميد شاعر كل الشعب السوداني ، بساطة أشعاره وملامستها الوجدان والضمير القومي ، وانحيازه التام لقضايا وهموم المواطن والوطن نصبت منه نصيراً لهم ، فهموا أشعاره وحفظوها عن ظهر قلب فبادلوه حب بحب ووفاءً بوفاء .

والبناء الفلسفي لأشعار حميد يكاد يكون متفرداً ومتبايناً ومتنوعاً، مرتبط يالتراث والفلكلور ، والحكاوي مرتبط بالإنسان وقضاياه وهمومه، تفاصيل حياته ، منغصاته ، أفراحه ، وهو يعتمد بصورة مباشرة على الصورة والمواقف والتشبيهات المعالجة بذكاء ونضج ووعي ، وحميد ينقلك في القصيدة من إدهاش إلى إدهاش فلا تكاد تفيق من وقع البيت عليك إلا ويأتيك بالذي يليه أكثر إدهاشاً وروعةً وهكذا ما أن تنتهي القصيدة إلا وتجد نفسك متشوقاً لسماعها أو قراءتها مرةً أخرى وهكذا ..

فما طال المطر بيصب
أكيد إنو البحر ما راق

كما إنو العكار من طين
كمان من طين بجي الرواق

ولحميد مخزون معلوماتي ثقافي ضخم استوعب كافة المتغيرات (البيئية والثقافية والفكرية والسياسية والاجتماعية والإنسانية) لتصب في معين تجربته الإبداعية ولتعلو بالنص كماً وكيفاً ،،،، ذلك المخزون النابض الذي استوعب طبيعة وتفاصيل الصراع المحموم بين السلطة القهرية والمد الجماهيري الثوري عندما تتقاطع الدروب والمصالح وتتسع الفجوة .

والصورة الشعرية عند حميد تكاد تكون مرئية تضع الكثير من التفاصيل عياناً ، فمن منكم لم يتخيل (عم عبد الرحيم ) وهو يصحو باكراً يصلي ويمارس طقوس يومه بكل تلك التفاصيل الحية التي رسمها حميد بدقة متناهية؟ من منكم لم يفجع لموت عم عبد الرحيم؟ ومن منكم لم يقف أمام نفسه ليشهد هذا النقل الحي لمأساة تكررت ولا زالت عجلاتها تدور في زمن الإنفلات والتهميش والمسغبة

يا طاحن الخبر
ما بين القضا ومرحاكة القدر
الشهدو الدموم والدمع النزل
إيدهم في التراب والعين في القطر

حميد غنى الوطن وعلمنا كيف نحبه وحمل الكلمات في حبه أقصى ما تحتمل

يا وطني
يا فردة جناحي التاني
وكت الناس تطير لي عالمها

أو عندما يصدح عاشقاً في حضرة الوطن الجميل :-

وطنا حبيبنا
رغم البيك (البين) هي الأشواق
حنينا إليك دوام يا زين
دفاق

وحميد شكل الضمير والوجدان القومي للملايين وهي تصارع من أجل وطن للجميع وبالجميع ، عبر عن آمال كل السودانيين بدون استثناء ، غنى الغربة التي كوتهم بنارها

كل ما تباعد بينا عوارض
كل ما هواك يا الطيبة مكني

حميد وقف بين الإنسان وإنسانه الداخلي وظل ولازال ينادي رحم الغيب ويعبئ آلاف الكلمات المترعة بالأصالة والإنتماء لتغازل عن قرب حلقات ضائعة إرتبكت خلال رحلة مضنية من السير عبر (تاريخ زمن خاسر) (تاريخ زمن خاسر هذه مأخوذة عن الرائع الراحل عمر الطيب الدوش ) ، ليعطي منجز الشعب السوداني ومخاضه من كل التجارب السابقة التي غلبت عليها الشموليات والدكتاتوريات شهادة رسوب وفشل وخسران ويدعو بكل شفافية إلى الوقوف ولم الشمل والتحرك من جديد في اتجاه جديد برؤية جديدة.

وأجمل ما في شعر حميد أن تسمعه لا أن تقرأه ، فهو يعطي القصيدة بعداً آخر أكثر تميزاً بقراءته المتفردة للنص ، ولعلنا جميعاً أو أكثرنا استمع للرسائل بين ست الدار بت أحمد جابر وزوجها الزين ود حامد وقد استمعت لآخر الأعمال الجميلة التي وُثقت لحميد في أشرطة كاسيت هي مرثيته الجميلة في صديقه الراحل الأستاذ / مصطفى سيد أحمد.

من كان بيسمع مصطفي
حي بي قضيتو وبس كفا

شعر حميد بحاجة لدراسة نقدية مسنفيضة تتناول مختلف الجوانب الفنية في هذه التجربة المتفردة برؤية نقدية علمية بحيث يمكن معالجة اشكاليات أي المزاوجة ما بين شكل الحرف والنطق في حالة القراءة لو أخذنا بعين الاعتبار فوق كل ذلك اعتماد حميد على اللهجة الشايقية في التعبير الكتابي أو اللفظي.
( نسبة النقل كبيرة )
والله يصرف الكيزان يا ود الشفيع انت باقي ........

الوليد ودالزبيدي
-إعتذار مسبق لكل من سيقرأ هذا الرد فأنا أتحدث عن نفسي-
أقول يا وليد ....هبشتني في حتة موجعاني ليها زمن وقد قلت كثيراً -لمن هم حولي- اني مريض بالشعر لكن لكن الفيروس الذي يسكنني من الشعر وأحس حال هيجانه بأحاسيس مبهمة لا أتبين منها إلا آلام عظيمة اسمه -حميد-
انا لا أظن أني أفهم في النقد كثيراً ،لكن إذا كان التناول أحد أدوات النقد فأعدك بأن أساهم في هذا الخط بكل ماأوتيت من معرفة بحميد وكتاباته ...وحتي نلتقى على صفحات هذه الموضوع باذن الله أنقلك لواحة الشعر السوداني حيث تجد نص لقصيدة أعتقد أن فكرتها غريبة بعض الشئ حيث قمت بكتابة مرثية لحميد وهو حي ، حتى لا يأتي اليوم الذي يقول فيه لنفسه(إنشالله يوم شكري مايجي)..قصدت منها أن أنقل له إعجاب الناس واحساسهم بكتاباته المذهلة.

(فسِواكَ ..…………
…………....لا يوجد سَوِيْ.)
( مرثية لمحمد الحسن سالم " حميّد" .. وهو حي)
• إضاءات:
- ( أدهشني فيك المحتوى..
... أجهشني كيف خاويتي بين برد الصحارى ..
....وبين هجير الاستوا.)

-حميّد-
- ( ما ذنب جلد الطار ....
... لو غنوا بيهو شتر ؟؟؟)

- عاطف خيري
_
_ ( لا أحد يحاكم أعمدة الإنارة..
بتهمة خدش حياء الظلمة..
لا أحد يتهكم من القبو ..
لأنه يجير الإظلام نهارا..
.........
الحرية هي:
أن تجوس فى حدود الآخر ..برضاه.)

- من سفر ((فلسفة الريح الكبرى)) لعبد الرحيم محمد عبد الرحيم)-




** النص:

كئيباً ...
كان ضوء الشمس ..
مبحوحاً..... ومجروحاً.... ومخلوطاً ببعض أسفْ.
ظلاماً ...
كانت الأحلام .. ترفل فى ثياب البؤس والأحزان
تنبش ذكريات البسمة_ المؤودة الأغلى_ ... تحسّ غيومها الهطّالة الأعين..
......... دموع ترفْ.
ضياء عتامها الإحباط..
ما فتئت .. سني العمر _ دنيانا _ ممزقةٌ خطاها التيه...
تسائل من تراه بدربها المشئوم إلحافا...
... تمد الكفْ.
.............
.............
وجيت ياسيدي رغم المُرَّة والأتراح ..
ومن بين ديل..
شرقتَ من الجفير مارق ..........تكورِك لما حِسّك راح :
" كفانا قرف"
هيا غافل................ها ياااااعميان:
منو العبّا الحُزُنْ جُوّاك
مسح من قلبك الفرحة
منو الكحّل رموش عينيك
مطر صبحك مساك سحّ............ لئلا سُدت الآمالُ في وجهك فلا تدري ...
..زمانك جاد أم شحّ
أفِقْ
إنّ العيون تراك ..-إذا نامت- كما الأحلام
وثِقْ
أنّ الظنون ثراك .. وطعم الشوك للأقدام
فيا وجع الذين أتوك...... من ماضٍ
الى حاضر
الى ماضٍ ... يؤطِّرُ فيك كلّ فواجع الأيام
ظلالُ الروح لن تفنى
وروحُ الروح لن تبلى
وفجرُ الغدْ .........
سيبقى أبيضاً كالقلبِ
يبقى مشرقاً كالحبِ
يبقى أخضراً .......كسلامْ.
فيا مولاي ...لا تقنطْ
إذا خذلوك..
تقطّر صوتهم في عمقِ أعماقك
تسرّب قطرةً .........قطرةْ.
أو...
فى زمان التار
أوفى الوعد مرة
لو لى عيونك زار
طيف الغمام سر
ما تنسى طعم الخوف
طعم الحياة المُرَّة
وكيفن حمامة الغار
طارت بدون أخبار
والعنكبوت فرّ
شقِّيش تقبّل همْ
زمن الشقا انشرَّ.
ولا تيأس ..
.. إذا باعوك ..
تراجع صوتهم فى غيهبِ الأيام مخنوقاً
وغُصَّ الحلقُ بالحسراتْ.

أو...
فى زمن غدار
أوفى الوعد مرات
لو لى عيونك زار
طيف السعادة المات
ماتنسى دم الجوف
دم الحياتو موات
وكيفن حمامة الغار
هجرت غنا الأطيار
والعنكبوت وين فات
شقِّيش تقبِّل همْ
زمنك نسى الضحكاتْ.
إذاً....
... فليسمع العالم:
أو...
لى زمن ملعون
أولى البشيل همك
لو قالو ليك مجنون
صدّق ولا يهمك
ماتنسى كيف الدون
عَبَرَوُلا فوق دمّك
وكيفن حمامة الغار
همَّاً وراهو ودار
والعنكبوت غمَّك
شقِّيش تقبِّل حقْ............. ينسج خيوط نمَّك.………
………
وأتيتَ يا سيدي رسولاً للقصائد
كي تعلّمنا معاني الشعر .....
كيف يبوحُ.....كيف يروحُ....كيف يصولُ.....كيف يجولُ
كيف يُقَشْعِرُ الأبدانَ يسكنها دبيباً .. رعشةً.... رعشةْ
وضعتَ على الجراح يديك
غسلتَ بماءِ كلماتك
عذابَ سنيننا العجفاءَ ......... والوحشةْ
وعلَّمتَ القصيدَ النطق.....
...... منك تعلَّم الدهشةْ
وبُحتَ لنا:
بأنّ الشعرَ سيدُنا
وأنّ الشعرَ كالأحزانِ..إن عشناه أدمننا
وإن قلنا عليه يفوت ..
تمطّى فى الدواخل سهل .... يزيد‘ ... يزيد‘ لا يخشى
وأنّ الشعرَ ..……
أنّ الشعرَ..…..
أنّ الشعرَ….
أنّ الشعرُ.. لما خاف منها قصمةً للظهرِ إن وضعوا عذاباتَك..
.......عليه .. قشةً ....قشةْ
………
لذا .....
قررت أن أنعيكَ فاسمعني...
ورائي ألف مرثية..:
شجر "نوري" ...دموع نورا
عليك مليون قميرية..
تنوح وتنوح ولابتسكت
كما قلمكْ
كما ألمكْ
إذا ظلمكْ
زمن أرواحو مبيوعة
زمن أقلامو مشرية
زمن أبخس من الذمة
التبدِّل في غنيواتك:
( حبيبة قلب "سودانية")
لى الدايرنو أسيادا
وبراهنو عليو...
..... " سواد نية"
…………………..
وإذْ ما مت...
سنسمع إسمك الرنان
ضمن قوائم الموتى ....تمام الثامنة العادي
نغلق دونه المذياعْ
ولن نسمع سوى ذلك ..
لأنك عندهم ...لاشيء
وبينك بين آذانٍ علاها الوقرْ
مسافة ألف جيل وجيل
مسافة ألف ميل وميل........ ومدُّ ذراع
لذا...أنعاك يا مولاي
هذا الآن
وفى صحوى ..... وحين أنام
فمِتْ إن شئت
عِشْ إن شئت
لكن شعرك السودان
أعني....
... وطنك السودان
سيبقى فى السماءِ نجوم
وفى صدرِ الجميع النبض
يبقى أبيضاً كالقلب
يبقى مشرقاً كالحب
وفى
الظلماتِ
ألف شعاع

في
الظلماتِ
ألف
شعاع .
-الخرطوم 31 يناير 2001 م -

عزيزى هيثم لك كل ما تساقط منا وما تناثر من دما وأن شيئت لك كل اللحيظات الغوالى ,الفكرة مجنونة وغير مسبوقة وحميد جدير بأن يرثى وهو حى .شكرا جميلا لك فقد أستلفت أحساسنا بة وأجدت لك التحية وجدير بلقب مشرف الاوجاع فوجعنا خرافى والى اللقاء حيث الحب وجغرافيا المحنة

شكراً وليد وبكور على المرور
دمتم ودامت الكتابة(رئة ثالثة للتنفس) على حد تعبير العزيز معاوية الشفيع

-------------
جاييك من آخر الريد مشياً
على الأشواق
عز الليالى البيد آنست
نورك باق
خبيت مشاعرى شديد
الدروخة الساساق
كلما لك انت بعيد
توميلي بالاطواق
بى آيه تفتحى الأبواب
للجاك عديل ودنا
داير عينيك قراب وتبقيلي
دار ودنا
لو بالمحبة حباب إبن الملوح أنا
لو بالنغم زرياب وما خلى
فيك غنا
لو بالعلم دا كتاب مفتوح لك
ألف سنة
لو بالضرب دي حراب عنتر
مدارقو هنا
لو بالرسم جذاب عند أمو كل جنا
لو مو الشمس كضاب البدر
يضوي سناء
لو بالقرش وين جاب ما جاب
براهو هنا
لله كم خطاب تتمنى حالو مني
يا بت بلا استغراب تكشحلى
جور وضنا
وأنا اجدر الخُطاب واكتر قلوبه عنا
راجيك تقولى حباب يا ......
ريدتى هاك كفنه
فالدنيا دون أحباب غيمة
الضباب دفنه .

هيثم على الشفيع كتب:

آخر الريد

محمد الحسن سالم حميد

لو بالمحبة حباب إبن الملوح أنا
لو بالنغم زرياب وما خلى
فيك غنا
لو بالعلم دا كتاب مفتوح لك
ألف سنة
لو بالضرب دي حراب عنتر
مدارقو هنا
لو بالرسم جذاب عند أمو كل جنا
لو مو الشمس كضاب البدر
يضوي سناء
لو بالقرش وين جاب ما جاب
براهو هنا

الحميد لا يحتاج لكلام عنه من اي واحد,,, الحميد سيد الكلام والنضم الصح,,,
لفت انتباهي المقطع اعلاه وفي رأي هو اجمل مافي القصيدة ,,,, لانه يدعم مداخلتي مع معاوية ,,, كون اعذب الشعر أكذبه,,,خصوصا حكاية القروش دي ,,, ويظل الحميد قامة ,,, ينام ملء جفونه عن شواردها,, ويتركنا للاختصام حول معانيه والفاظه. لك وله كل الحب.

هيثم على الشفيع كتب:

آخر الريد

محمد الحسن سالم حميد

لو بالمحبة حباب إبن الملوح أنا
لو بالنغم زرياب وما خلى
فيك غنا
لو بالعلم دا كتاب مفتوح لك
ألف سنة
لو بالضرب دي حراب عنتر
مدارقو هنا
لو بالرسم جذاب عند أمو كل جنا
لو مو الشمس كضاب البدر
يضوي سناء
لو بالقرش وين جاب ما جاب
براهو هنا

الحميد لا يحتاج لكلام عنه من اي واحد,,, الحميد سيد الكلام والنضم الصح,,,
لفت انتباهي المقطع اعلاه وفي رأي هو اجمل مافي القصيدة ,,,, لانه يدعم مداخلتي مع معاوية ,,, كون اعذب الشعر أكذبه,,,خصوصا حكاية القروش دي ,,, ويظل الحميد قامة ,,, ينام ملء جفونه عن شواردها,, ويتركنا للاختصام حول معانيه والفاظه. لك وله كل الحب.

خوفي من تلحق رفيقك
محمد الحسن سالم حميد
-*-*-*-*-*-*-*-*-*-*-*-*

خوفي من تلحق رفيقك
يا بريق نجم الحيارى
وإنت لا نّور طريقك
لا شرق فجر السهارى
من زمن يا صحوة طلعك
غصة في حلق الصحارى
حتى شال النمة فرعك
دودى زي وهج البشارة
قلنا يا سعد المواسم
عودك المليان جسارة
عودك الفجري المصادم
بالبصيرات والبصارى
مستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يااندلاع صوت الغفاري
في حلق دغش الغلابا
لو خريفك تاني يطرح
آهـ يا اخر سحابة
لمايا شرف المواكب
يبقى هم الناس إمارة
تندحر كل المناصب
ينكسر كرسي الوزراة
كنتو وين وين إنتو كنتو
كنتو وين
لما الشوارع ما ثبت قداما مرتق
نفضّت صمت المسافة
مّدت الشوق المضارع
للصباحات التجرتق
كف شهيدا البق مارق
من فرقة الظلمة فجرًا
تم بي دموّ الشرافة وضم حضن الارض عاشق
كنتو وين وين انتو كنتو
لما كان في سجنو ثائر
بي جلابة السونكي نومتو
ويصحى بي امر العساكر
قومتو في الزنزانة يمحى
ويفتح الاف الحناجر
ت.. الاطفال ويكتب انبل الاشعار لباكر
تشطب السجان وصوتو ويبقى فنانا البساسق
كنتو وين . وين انتو كنتو
لما فضل الدين عباية
تربي فوق كتف الغنايا
تنتصب في الجو طوابق
تنقلب في التو بنوكة
للبداهن
والبنافق
والبوافق
لما كان نفس العبايا
تتنفخ بي قدرةحبلا
لي قصار عمر الكحايا
من جُنب تنسلا سيفًا
عبّر السواهو سارق
شدة الفقر الخرافي
حدة الشغل اللي مافي
رُغم الاف المتاجر
والخوازيق والمرافق
كنتو وين انتو كتو
لما البيوت في الشمال قامت خنادق
بالكتابات البتنزل فوق ضهاريهم
مطارق
لما طلاب الحقيقة كانو بختارو المشانق
ولما لسة الله بموت في الجنوب
بين البنادق
كنتو وين وين انتو كنتو
آهـ يا وطني المستف
في المطارات القصية
آه يا كفني المنتف
في مدارات القضية
آهـ يا صمتي المكتف في العبارات الندية
آهي يا نفسي الملطف بالنهارات الصبية
آهـٍ من رفع المصاحف بالرماح الاجنبية
المعاطف اجنبية
العواطف اجنبية
الجلاليب اجنبية
الدولايب اجنبية
الدهاليز اجنبية
السراير اجنبية
المساير اجنبية
صبة الكآس اجنبية
ختت الراس اجنبية
رشة الدلكة اجنبية
رعشة الفركة اجنبية
طفية النور اجنبية
والخوازيق
عربية
عربية
عربية
فضي نارك يا محارب
ولا هات البندقية
غني عشقك يا صبية
احنا قدامك مدارك
غني للوطن المفارق
عشت يا وطني المبرق
بالندى ولون المشارق
يامحرق
يامحرّق
يا مجرب
عشت بي شرف البنادق
ويسقط
العفن ال بتلب فوقنا من شُرف الفنادق

مهداة للأخ/الرشيد الريح
والذي قال إنه يسأل بشدة عن هذا النص الذي نشرناه من قبل مكتوب
مع الود

http://www.alnsri.com/vb/showthread.php?t=6641

بالأمس كنت أستمع لشريط قديم للراحل"مصطفى سيد أحمد" عبارة عن جلسة استماع كانت بمدينة سنار وبنادي الشعلة تحديداً...
استمعت بتمعن لأغنية "يامطر عز الحريق" وتحديدأ للمقطع الذي يبدأ من "من الواسوق" وحتى بداية الأغنية كاملة...وأستأذنكم في أخذكم في سياحة سريعة في هذا النص الكثيف المكثف
ولنبدأ بالوقوف قليلاً في المقطع:
(يفيض النيل......نحيض نحن
يظل حا ل البلد واقف ...تقع محنة)
ففيضان النيل أمر ابدي لم ولن يتوقف سنوياً ، فاذا صار ملازمه من حالنا "الحيض" فهذا ببساطة يعني أن لا مواليد جدد ....وتظل الوجوه هي نفس الوجوه بلا تغيير ف"يظل حال البلد واقف...تقع محنة"

ثم:
(نعاين لي الجروف تنهد.....ولا يانا
رقاب تمر الجدود تنقص.....ولا يانا)
أي سلبية هذه؟؟؟؟
وللأسف هذا هو ما يحدث الآن {فاذا كانت هذه القصيدة كتبت -حسب علمي-على عهد نميري}..إذا فزرقاء الشعر لدى حميد قد ابصرت شجراً يسير قبل أكثر من عقدين من الزمان...ولم نصدقها

وأخيراً:
يظهر التفاؤل الملازم لغالبية - إن لم يكن جميع- قصائد حميد ليبقى على احساس الأمل بالدواخل
(عقب يانيل تكون ياكا
ونكون أهل البلد بالجد)
إذاً ...فرغم بساطة الكلمات وقلتها فقد احتاجت لجهد ووقت لقراءة مابين سطورها وما وراء معانيها وهو لعمري ما يسمونه بالسهل الممتنع
..........
.........
....ونواصل

تعلم تماما ياهيثم اننى اوقن ان حميد أشعر سودانى,,, ولكننا ياهيثم فى هذا البلد نعانى من تساقط اصحاب القضايا سواء ان كانوا سياسيين او شعراء,,, فأين هو حميد الان و أين القدال,أزهرى محمد على,هاشم صديق,عاطف خيرى,يحي فضل الله,الصادق الرضى,الخ....
اين هؤلاء العمالقة الذين تغنى لهم مصطفى سيد احمد.
ياخوى الكيزان ديل ماخلو زول على حالو,,,,

الرشيد الريح نورالدين كتب:تعلم تماما ياهيثم اننى اوقن ان حميد أشعر سودانى,,, ولكننا ياهيثم فى هذا البلد نعانى من تساقط اصحاب القضايا سواء ان كانوا سياسيين او شعراء,,, فأين هو حميد الان و أين القدال,أزهرى محمد على,هاشم صديق,عاطف خيرى,يحي فضل الله,الصادق الرضى,الخ....
اين هؤلاء العمالقة الذين تغنى لهم مصطفى سيد احمد.
ياخوى الكيزان ديل ماخلو زول على حالو,,,,

الجعلي آخوي
إنت سألت وجاوبت ....(.ياخوى الكيزان ديل ماخلو زول على حالو)

عاطف خيري ويحى فضل الله تلقفتهم المنافي

وحميد وازهري وقدال وهاشم صديق يصارعون البقاء من داخل مقولة حميد{ماضاق الوطن....بس كبرت الزنزانة}
وليس اعتذاراً عنهم ...لكن برأي المتواضع هم (والحديث عن الرباعي الأخير)أثروا مرحلتهم وزمنهم بالكثير ولا أقول إن من حقهم الإنكسار لكن من حقهم الالتفات لشئونهم الشخصية - ....وبالطريقة التي لا تشوه هذا الإئراء الجميل

انا مع القصيدة التي تحمل مقومات الصمود ولاتسقط
لوتركنا هؤلاء الناس في حالنا لكان ذلك في مصلحة البلد
**********
*الرمز في القصيدة يعود لاكراهات اجتماعية وضعوط سياسية هل توافق على هذا المبدأ ومارأيك فيه؟

ـ انت تقول في كلام صعب جداً وأنا لا أعرف ولكن تبقى لي القصيدة والشعر السوداني من بدايته وبالذات في مجال الأغنيه قام الخليل ورمز بعازة ليغني و«عزه» أخرجها الخليل بالرمز قبل أكثر من اربعين عاماً ظل هذا الرمز مشكلة حتي اليوم ولو كتبت اي قصيدة حتي ولو لابنتك واسمها «عزه» يقولون عنك انك تقصد «عزه» الخليل ولكن اريد ان اقول لك ان الشاعر بني ادم وهو «زول» ومن حقه ان يحمي نفسه وانا لا اريد ان اقول لك ان الرمز ستار للشخص بل لا يكون ضرورة ما لم يكن من مقومات القصيدة وانا عندما اتحدث عن الرمز فلا أعني الرمز المتعارف عليه مثل «عزه» وكذا وكذا ولكني اتكلم عن الرمز الغامض البعيد وانا مع كل الرموز الشعبية حتى النهاية وانا مع القصيدة الواصلة التي يحتفي بها الناس بما فيها من رمزية ومباشرة وأي شكل من الاشكال طالما احتفى به المتلقون واصبحت قصيدتهم فأنا معها طالما انها تحمل كل المقومات التي تجعلها تصمد للغد ولا تسقط وان شاء الله القصيدة السودانية لن تسقط في يوم من الايام وفي تقديري انها سوف لن تسقط لكن فلنعطيها البراحة حتي نتطور ونخطو للامام ونحن شعراء عاميين ولو تركنا هؤلاء الناس في حالنا فإنه من مصلحة البلد ان يسمع الاخرون هذه العامية وبمثلما نتحدث اليوم بالعامية المصرية فدعوني اسألكم جميعاً فالسودانيون يعرفون «نيرودا» بكل تفاصيله وبكل اشيائه، الابنودي مثلاً لو جاء لقراءة شعر فهل سيمنعونه .. ابداً سيتركونه يقرأ الشعر ويصفقون له والابنودي وصل اماكن كثيرة وبعيدة وهو يستحق لكن هذا الابنودي لم توصله قصيدته فحسب بل تمت مساعدته بالثقافة الموجودة والاعلام الموجود والطرح في الساحة باعتبار ان المفردة العامية يجب ان تسود وهناك بعض الشعراء العاميين الذين استطاعوا وبقدرة قادر ان يقرأو اشعارهم في الخارج ولكنهم لم يكونوا يعلمون ان في السودان اشياء بهذا الشكل ونحن وحتي يوم الدين سيبقي غناؤنا ولن يتغير.
وعموماً نتمني ان يأتي اليوم الذي يكون فيه الوطن متعافي وشديد وسليم وطيب وخالي من كل الاشياء التي تنسق كل اشكال القبح هذه حتي نغني للزمن الجميل والا نبشر الناس بمسألة خيالية وغير موجودة..
***************
سعدت عندما وجدت صوت «النصري» القادر على الغناء
***************
*الاغنية القضية بالتحديد هل هي صدفة أم وجدتم انفسكم مع بعض انت ومحمد النصري ام انك تري ان محمد النصري امتداد لحميد وتجديد لمصطفي سيد احمد؟
ـ بالنسبة لمحمد النصري لابد من كلام طيب وكثير جداً يقال في هذا المخلوق الرائع القوي الشجاع لكن كل هذا التراث هو تراث المرحوم يسن عبدالعظيم مثل«العرب النوبية» وانا سعدت جداً عندما وجدت صوتاً مثل صوت محمد النصري قادراً علي الغناء بقوة وهو اضافة لغناء الطنبور ولكن للاسف الشديد ومثل ماقلت لك سابقاً هذا المسكين كان يعاني من ان الاغنيات لاتجاز او يتم تقطيعها ويبقي من الاغنية القليل ومحمد النصري وغيره من الاصوات الجاده سأجلس معهم ونغني مع بعض وسنتواصل وفي تقديري ان محمد النصري اضافة لاغنية الطمبور والاغنية السودانية بصفة عامة ومع بعض سنستطيع ان نخرج مايرضي الناس ان شاء الله.
*********************
سبحان الله .. السلطة تخاف من مصطفي حياً وميتاً
حزين لموقف المصنفات من رفض اشعار تتناول مصطفي
يبدو لهم ان العود الذي كان يحمله مصطفي كأنه«طبنجة» او كأنه مروحية اباتشي
ربحت بعودتي الى اهلي وهم الخاسرون بهذا الحصار الثقافي
************
*كتبت لمصطفي «يوت تنادي وطن .. وطن.. مع انو اداك الغربة واستكثر عليك كفن» وعاد مصطفي ولم يمنحه كفن كما ذكرت وعدت انت تردد «اغني لشعبي ومين يمنعني .. اغني لقلبي اذا لوعني» ومع ذلك استكثر عليك الوطن المنبر وفرصة اللقاء مع الاحبة .. فهل الحرية التي «تحندكنا» بها السلطة انكرتك ام انت انكرتها؟!
ـ اقول انه عندما تأتي ذكري مصطفي وسبحان الله فهذا مخلوق تخاف منه السلطة بحالها تخاف منه حياً وميتاً ويمكن وحتي اليوم انهم لم يصدقوا ان مصطفي قد رحل وهنا لابد من أن اطمئنهم تماماً واطمئن كل الناغمين ان مصطفي مات ولاقى ربه مطمئن القلب مطمئن البال لكن هذا المصطفي سيظل حياً حتى يوم القيامة وليس لمشروعه الغنائي ولكن لاشياء بسيطة وماتركه من غناء سيظل خالداً رغم وجود كل الانظمة وكل انظمة القبح ويبقي الحزن عندما يحتشد احباب وعشاق مصطفى لاحياء ذكراه فقط فيتم منعهم وكأن مصطفي سيخرج من وسط هؤلاء الناس حاملاً عوده ليغني وعندما اقول ذلك فلابد من ان اقول ان غناء مصطفي يشد الناس ويرتاحون إليه لكن يبدو ان العود الذي يحمله مصطفي كأنه«طبنجة» او كأنه اباتشي وغير ذلك، فمصابيح السماء التي ذكرت من خلالها كل هذه الاشياء فأنا حزين جداً عندما تكون هناك لجنة لما يسمي بالمصنفات حينما يرفضون نصاً كتب عن مصطفي باعتبار ان الشئ السياسي فيه كثير ومن هنا اقول ما لكم والسياسة وهل تم تكليفكم بالبحث في الامور السياسية حيث كان يجب ان تتم المناقشة من ناحية نص وليس من ناحية سياسة ولقد قمت بتقديم نصين«مصابيح السماء الثامن» و«حجر الدغش» فقاموا باجازة «حجر الدغش» وكتبوا عنه كلاماً جميلاً جداً وقاموا بارجاع الاخر ويبقي السؤال عن ارجاع هذا النص هل سأقوم بكتابته من جديد او ماذا افعل به وهذه واحدة من الاشكاليات وانا بالنسبة لي يبدو الامر باني لم اخسر المنبر ولكني ربحت الكثير لأني عدت وانا الان وسط بلدي ووسط اهلي وهم الخاسرون بالرغم من مايطرحونه من ان الخرطوم عاصمة للثقافة في 2005م والحصار الثقافي يصبح منتهياً في ظل وجود الانترنيت والهواتف النقالة والان وعلي مستوي خارجي واسع كل الناس يعرفون انني جئت لاقامة ليلة شعرية وتم إلغاؤها ويبقي السؤال اذا لم يتحمل هؤلاء الناس عودة حميد فكيف سيتحملون عودة سيدي الميرغني وكيف سيتحملون عودة قرنق والسياسيين المعارضين ويبقي الواقع بأنني لم اخسر بل هم الخاسرون باستعداء الناس عليهم وكل الناس الذين جاءوا لحضور الليلة وعادوا مكسوفين سيكونوا غاضبين لما حدث وغير ذلك فإن وزير الثقافة عبدالباسط عندما التقاني في الرياض في تكريم عز الدين عمر موسي لماذا ناداني واحتضنني ولماذا صفق لي عندما كنت اقرأ في الشعر ولماذا كرمني السفير السوداني في الرياض واحمد الله اني وبالصدفة وثقت هذه الاحداث والقنصلية في جده تستدعينا في المناسبات للقراءات الشعرية وتقوم بتكريمنا فلماذا يكرموننا فماذا يعني هذا وهؤلاء الناس يخدعون من؟ ولو كنت مسؤولاً عن الثقافة لأقمت مشانق في الطرق للذين خدعوا الشعب السوداني وخدعوا السلطة ذاتها بالاغاني الجهادية المغشوشة والالفاظ الهتافية الفارغة التي لم تأت بنتيجة وهؤلاء هم الذين من المفترض ان امنعهم واحاكمهم وليس محاكمة القبيلة الشعرية من امثال حميد..
***************
اركز على شئ آخر في زمن حرق المنابر
**************
*بين «ست الدار بت احمد» و«الزين ود حامد» و«السرة بت عوض الكريم» و«الضو وجهجهة التساب» «طيبة» .. «نورة» و«عبدالرحيم» و«الحسين في الرجعة للبيت القديم» بالاضافة الي شخصيات عديدة تحركت عبر نص حميد داخل وعي التفاصيل في القرية السودانية الي الوعي العام واصبحت تمشي عبر نصوص حميد في كل شوارع الخرطوم اين هذه الشخصيات في نص حميد الان؟
ـ اقول لك شيئاً وهي حقيقة اقدر علي ان اؤكدها ان النصوص الاخيرة التي تتحدث عنها الان وتقول انها غير موجودة او غابت عننا فدعني اقول ان الشخصيات لم تغب عننا بالمعني الكامل لكن ذات الهم الموجود في هذه الشخصيات يظل سائراً حتي اليوم فقط أنا في هذه الايام ركزت على جانب واحد اعتبره اهم في زمن حرق المنابر وهو شكل الاغنية ولعلك تعرف مايتطلبه الجو النفسي والجو العام للاغنية ولذلك رايت انت ان هذه الشخصيات اصبحت غائبة لكن هؤلاء الناس لم يذهبوا بعيداً بل ما زالوا يتجولون ويعملون في عملهم «فالسره» شغاله وتتجول معك في الخرطوم وبكل تكويناتها و«ست الدار» مازالت وحتي اليوم تكتب في خطاباتها و«الحسين» وحتي اليوم مازال يحارب في الجنوب ويقتل وهؤلاء يؤدون عملهم وسائرون ومعهم شخصية اخري لعلك نسيتها الا وهي «عيوشه» ولعلك متى ماخرجت ستلتقيها وكل هذه الشخصيات موجودة وبكل شراستها ولو سمعوا حديثك هذا فإنهم سوف لن يغضبوا فقط بل سيعتدو عليك«بالعكاز» اما عن النص فدعني اقول لك انني محتاج لشكل الاغنية والظرف الذي يعيشه الناس وتعيشه البلد والقصيدة نفسها بدليل ان «السره» و«ست الدار» تحتاج لخشبة مسرح حتي تتم قراءتها مثل زمان لكن الوضع اختلف حيث احترقت المنابر وليست هناك طريقة للوصول الي الناس الا عبر الاغنية واتمني وفي عودتي هذه ان اقدر علي فعل ماعجزت عنه في السنوات السابقة.

شكرا" ودالذبيدي شغل رائع ربنا يديك العافية

مين اختصاصى الأوجاع السودانية يا فردة؟؟؟؟

صياعة مع الغفاري وأهل الله في زمن غلط
حـميد

تستغرب يا رسول الله
يا أول وتاني الخلفاء
تستغرب يا أبذر لو جيت
في هذا الزمن الجهجاه
لو فيكم حد يا حنفاء
إتجاسر وقال ما معناه:
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء ..النار ... وفي الماء
أو حاول ينصح ويتطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسه أقلاه
السيف فوق رأسو مخاواة
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا راجي الراجا
يا واقف فوق عمق الدين
يا شايف لي آخر دنياه
يا طيب ... يا إبن الغبراء
الشركة يسارك يا أب ذر
من إسمك واللا من الذر
الكسحت ديكا كريسيدا
داك سيدا أب دقنا شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
دا الدين ... المقلعة ده الدين
والمزرعة من فضل الله
سال سيفك داقش شقيش
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا إنتحرت بي بترودين
وعصفورك منزوع الريش
أجلاف كنزوها بلايين
والناس بي الله ويا آمين
بتحلحل دين الكنتين
تنلفت كايس لي مين
الأمن ... محاكم التفتيش
وأصحابك جوة زنازين
وأسيافن صقروا ما فيش
ما إنبعنا وباعتنا قريش
ولأمريكا وبي حبة عيش
والحاكم قبض البقشيش
سال سيفك داقش شقيش
الأمن ... محاكم التفتيش
جنسيتك...بظبورتك...الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
والكضبة عمايل الأمراء
سال سيفك داقش شقيش
إتراجع يا أبن الغبراء
يا صاحب النفس الأمارة
بالثورة القادرة الجبارة
إتراجع وأنسى الفقرا
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفس يا أب ذر
سيب خونة مكة وتجارا
إتراجع يا إبن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
سرقتني بدمي الصحراء
أب ذر لا سمعني ولا تبعني
طبطب على همي بيسراه
وكان دمي إنماذج بدماه
بي دم الغبش الشهداء
من اول وتاني الخلفاء
إتجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
وما صرخت بنت أبي بكر
وا إسلاماه ... وا إسلاماه
كانت هي الأخرى وراء القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين عمياء

عمنا لك الود وشكرا على المرور

وحميد ياهو البيقول البيحسو وبيخجلنا ويخلينا صغاااااار . احبة جدا وعلى

كيفو يسوى فينا الدايرو .




وصدقونى بكرةأحلى

والله يا بكور كللللللللنا بنحبو لامن كاسر فينا ضلعة عديييل(بي شعرو طبعاً)

لكن قصة بكرة أحلي دي ......................واسعة شوية

هيثم الشفيع بركة السمعنا صوتك وبكرة أحلى دى الفضلت لينا

بالمناسبة عيدك سعيد
وبرضو بكرة أحلى

ابو الزفت زاتو وبالناسبه ابو ذر كان اول القرفانين الحقيقيين اشكرك

شكرا يا قرفان على المرور لكن ما قلت لى القرفة دى يفكوها كيف

شكرا حزينا على ما يدور حولنا


لكن والله بكرة أحلى

يا جمــة حشـا المغبــون : محمد الحسن سالم حميد
يا جمة حشى المغبون .. فى الزمن الهلاك من جاء

تكون حانت مواعيدك .. يكون وقت المطر قد جاء

وشرق ضوى البلد عيدك .. وطابت نسمتو العرجاء

و نمون يا طيبة تمينا .. وبدين ونعنه وغنينا الغنا الراجا

وبدت كاس المودة تدور عشق من حلفا لى راجا

حبابك ألف .. حبابك ألف

وياعنزنا القرجة

ويا لبانة فى الزمن المراحو نشف

ويا جبانة للخوانة والعوج البدورلو ولف

دميرتنا البتروى جرف

مسيرتنا وتميراتنا الكانوا وقف

أصابعين الرجال رصاص سعر راس البنية سقف

تكون دار بى زمن عندك

نكون لمينا فى الفاتنا تكون فاتت ملامحنا وتضاريسنا

القبيل غمرت .. عرش بتنا وطوابيرنا

وبدت شتلات بعد غمرت

ضراعيك يا الولد كبرت

مراعيك يا البلد خدرت

خضار .. خدرت غزار غزرت

خضارا زين برغم الصيف وأناتو

عصافير الجلد كبرت

تباصر نسمة منتحرة

تطمن غيمة مندحرة

تضاير الغابة والصحرا

من الغمة وظلاما شين

ومنك يت قرير تنفك

وتكون اتحلت عقدة الدين

ويا جمة حشى المغبون فى الزمن

الهلاك من جاء

تكون حانت مواعيدك .. يكون وقت المطر قد جاء

كتمة ومطر



أملي قلبك بالوطن ... بالصُّغارْ

قومة العمال دَغَش ... بالنّضارْ

المزارعية الغُبُش ..

بالجنود الوين تخش ؟؟

في سبيلك كالنهارْ

بالمداد الما بيغُش ..



بي وتر جاء من الجحيمْ

أملي قلبك بالنسيمْ

ملِّي بالطير الرطنْ

طالما العالم قديم ...

ينكسر ريح ... المحنْ

خلِّي بالِك مستقيم

دغري وإن مال الزمنْ

راحل الليل البهيم

والبصيرات ما عِمَنْ

الظروف الليلي أبن ...

روقي لا خوف لا حزنْ

باكر التِّقْيات تنورق ... وتنملي الضرعات لبنْ

أبقي زي ما هي القماري .. ما بتدور عن سكنْ

ببصاره تلد صغاره .. لا مضادات لا حقنْ

لا قياصر لا طواريء .. وعمره حسها ما انسجنْ









يا هشاب كل الحنين ... كلما طقّاهو همْ

لا في آهة ولا أنين ... لا بيروع ليحو دمْ

من مرارات السنين .... من عصارات الألمْ

بيمرق الشوق الدفين .. بي كعنكيل العشمْ



احكي ليك يا طيبة حكوة

ذات زمان من ضيق وقسوة

وكل يوم من بارحو اسوأ !!!

والمراحات قاطي قطْ

فجأة في قلب السماء ...

غيمة

غيمتين ..

غيم ربطْ



كتمة حتى الطين عِرِقْ

والشجر قرّب يَبِقْ

إلا يا طيبة الخَلِقْ ...

من بدل تفرح تَنِقْ

الشِّكايات ...و السّخَطْ ..

لا السِّحاب داير يَصُبْ

لا الهبوب دارت تَهُبْ

نسمة نسمة آ رب نقط

من شمالك من جنوبكْ

الهبوب يا رب هبوبكْ

من شروقك من غروبكْ

من تحت من فوق هبوبكْ



كتمة كتمة معاها ضيقة

نسمة يا رب الخليقة

سكت الأطفال دقيقة



نبكي خُشّع .. حول في حول ...

ظاهر الحال ماهو مخفي .......

وفالنا فيك ما فيهو قول

يا المبرِّد والمدفِّي ..

نسمة يا رب الفصولْ

نسمة كل راس ساعة تكفي .......

نسمة واحدة لألفِ زولْ



ينطلي الجو بالَحمَارْ

فجأة من حر لي غبارْ

الطشاشات الدّوارْ

السبابات النِّقارْ

نقة الضيق تنطلقْ

قلنا فاقت باتت أزحمْ ...

الغبار من كتمة أرحمْ ...

أرحم الحر البيلحم ...

لا ده لا ده ولا فَرِقْ

طيبة تمِّي الحكوة قولي

الصّبرُ خلقوهو هولي

ده الزمن يقسى ويَرِقْ ..

وانتي يا كتمه تطولي

اليطول بال الخلق ..

طَرِّقْ الغنوات يا زولي

وتم نشيدك في الحلقْ

عدّ فات الريح شَرِقْ

من بعد جاب السِّحاب

من بعد قشّ التراب ...

مشّط القش والشجرْ

رجّع الطير للوكرْ

ها البرق شال البرق ..

الرعد ريحة الدعاش

عاش بريق القبلي عاشْ

ابشروا بالخير نقطت

أي والله المطر !!!



ترحيب بالاخ هيثم الشفيع ويا معاوية الشفيع ويييييييييييييييييييييييييييييين

ها يااااااااااااااااااا الوليد حبابك

وبركة الجيت(رمتني بداءها وانسلت)

شوف لينا اقتراح سعادة المدير العام دة واوعدك بساعدك بكمية من الأشعار لل"ماطبيعي" ...حميد

مع الود

ولي ,,, كيف حالك ,, هاك الهبشة دي:

[

وهذه واحدة من بديع ما كتب (حميد) ويقيني أنها لو أدركت زمن المعلقات لعلقت على استار الكعبة

الضو.....وجهجهة التساب



ودّاها فوق قوز الرماد
كان ظنُّو يوم يومين تلاتِة
المُوية تنزِل والبحرْ يشرد شُراد
يفضل تَرا .
يبراهُو بالسلُّوكة من ورا لا ورا
والعِيوش والخير يعم يرقد رقاد
والناس تخُمْ خمّ السرور ، وماهُو البرا ..
ناساً كُتار فاكرين كدِي .
يومين تلاتِة ، الحالة ترجع حالَتَا
ويبنوا البيوت هُو وشفَّعوا وأم الوِلاد ..
ينجمَّعوا ، ويسترجعوا الماضي وشتاتات السواد في صالَتَا ..
شِيتاً ضحك .. شيتاً بِكِي
ويبقى الخراب دا رهاب رِهابْ
عِبرة وحكاوى بتنحكي ..
بلدك مِتلْ كمِّين بلادْ ..
بدت الدقون فيها الخَتَا
نجَّس تراها المُتْرَفين .. كِترتْ مواعين الفسادْ
وكان كلمة الإسلام غُتَا ...
جاتْ الَلَتْ الله وشالتا .
******
كان ظنُّو يوم .. يومين .. تلاتِة ..
مشى السِبُوع والتاني جا
والمُوية كلما ليك تزيد ... ويقلْ رجا .
قوز الرمادْ الكان قِريْب .. فات بعيد بقى ماب تخُوجْ
قوز الرمادْ ... يا الضوْ فِضِلْ جزيرِة ضاربْ فيها مُوجْ
وحصار حصارْ كيف النَجَا
عاينْ البلد دي دمار دمار .. فيها إيش فِضِلْ ؟!
لعبة قصب فِ إيدين طفلْ !!!؟
الحِيطة وكتينا التقع
تقع ألفِ وجعة على الضُلعْ ..
دخانه يمرق في السما .. آهاتو تنزف في الأرِضْ
بحر الصَبُرْ والاحتمال بيناتو ينقطَّع تُرعْ
لا يلقى يربُط لا يحِلْ .
لا حولة يا الكتب .. الكراريس .. المكَرِّنِة في الشتِلْ !؟
التَخْتَة .. أقلام الرصاص .. كنَب المدارسْ .. كُور يلُوجْ
باب الفَصِلْ كاسح بو موجْ
لا قوَّة يا ورق الجرائد .. يا المصاحف ؟؟
والصحيحات .. المَجَخْسنة في الذِبلْ ؟؟!!؟؟
ورافعين دواليبن بعيد .. طابلين خَوازِيقُن طَبِلْ !!
لا حولة .... حال ... ماب تِنْقَبِلْ ؟؟
يا مسلمين ؟؟.......؟؟
وين لي تَسابْ عشرة وتَسابْ كم وأربعينْ ؟
دا يمِين خرابْ كمِّين سنة .
يا الضوْ .. مِنُو الفي الكون يصدِّق كان هِنا
ليلة ذِكرْ .. حلقةْ مديح .. دارةْ غُنا ..
هيصة ورقيصْ .. القرمصيصْ .. سيرة عريسْ .. وحلاةْ عروسُو محَنْنَة ؟؟
يا الضوْ .. مِنُو الفي الكونْ يصدِّق ؟ كان هِنا
شُفَّعْ بيلعبوا جَمْ بَعَضْ .. دِيكْ لِفّتُنْ .. في الدِشِّي _ غَبْشِي _ مَشكَّنَة
واللاَّ الشَتِلْ خايِفْ لها .. فارِدْ ضَفايرُو وحاضِنَا .
فِيقْ ... لا تضيقْ
باتْ الفَرِيقْ بَهَجِي ومَتَمْسَحة بالمِي .. وين يا الضوْ نَقاقِير الهَنا
ووِيننْ مشاوِير الفرحْ .. غَزَلْ البناتْ .. الهُودَنَة ..
حَشْ البراسِيمْ العصُرْ .. الليلْ .. وَنَسْتُو .. الشيْطَنَة ؟؟؟
وعِندْ الفَجُرْ كمْ مِيضَنَة ؟!؟
وهَذَرْ التلاميذ _ الصباح _
بِي جَمْ رواكِيبْ الحَلَبْ ؟؟
يا الضوْ بِيُوت الناسْ حياتا مَبشْتَنة ؟؟
الحِلّة كلَّها في البحَرْ !
كَسَر البحرْ .. ؟؟ ..
ولاَّ انتَحَرْ قلبْ المياهْ ..؟ ..
واِنكبَّ قَبَلَكْ وحْدَكْ ؟؟؟.
ضاضاك فِ بلدكْ شرَّدَكْ
نَفَدتْ قوافلْ الأغنياء .. وجملك على الحصْحاصْ بَرَكْ ..
مرتاح حمامُن في البروجْ .. وإنت أب حماماً طاشْ يلُوجْ
لا سوَّى عشْ .. لا ركَّ .. رَكْ .


يا الدنيا .. كيف مِتْقلْبِنة ؟!
تصحَى العصافير الودِيعة ، مع الصباحْ مِتْخلْقِنَة !
وشرْ الكلابْ مِتْمسْكِنة ؟
وين نْترَّتا وهِوْهِيوَا وينْ الليلِة غابْ ؟
كلبْ الجَنائنْ زيُّو زيْ كُل الكلابْ
كلبْ الغلابَة المُسْتَغلِّينْ العَبِيدْ .. الليلِة سِيدْ .. سيِّدْ مُهابْ ..
كلبْ أبْ زَهانَة تَهِينُو هانة ، مِن المهانة تقولُّو تَكْ .
حُكْم اِنقلاباتْ التَسَابْ !؟!
دوَّارَة .. دنيا فَرنْدَقسْ
نِنْجارَى فيها سبقْ سبَقْ .. نخسرْ بعض في هِينْ ترابْ
نتلاوَى عند فتحْ اللَبَقْ .. فاكرين برانا أهل العقابْ
تارِي البحرْ .. عَوَّافِي .. عندُو معانا حَقْ ؟..؟
يا الدنيا .. زيْ سكْرَة وتَفِكْ مِنْ راسُو فَكْ .!.
بعضْ المسافاتْ اِتْلَغَتْ
الفارغِة طَنْبَجَا والملانِة اِتفرَّغَتْ ..
الدَنْدَهُوباتْ زيْ بعضَ ..شكل العِديدِى ورَصّها
نَفس العَنَاقْريب نَفْسَهَا
عَفَشَك دَة ، حَقْ غِيَرك تَشِك .. يَدَخل فى بَالك أَلفْ شَكْ
مَا الحَالة اصلاً مِن بَعض
حكم إنْقِلابات الَتَسَاب
الدِنْيا كُلَهَا حِلّتك
تَنْضُم مَعَ اَلَفِى آخْر الَبَلَد .. مِن غِيْر تَفُوتَا مِحِلّتك
تَحْكِيْلُو قِصَة تَقِصّها
إِنْ نَفَسُو فِيْهَا تَحِسّها
إِنْ مَاها فِيْهَا تَحِسّها
حَتَى الأحَاسيِس نَفَسَهَا
مَا الَحَالَة كُلَهَا مِنْ بَعَضَ
إِلا الَمَسَاخِيْت الَدِقُون ... خَتَوُهَا بين أَهَلَك قَرَضَ
بالَدِيِن وبالَطِين بالَنَسَب ... بالَمَيكْرَفُونَات بالَخُطَبَ
بالَبَنْطَلُونَات بالَرُتَبْ
فرِّق تَسُد
تَاخُدْ قَنَادِيلَك تَفُوت .. وإنْكَتَلُو فِى حِزْمَة قَصَب
ويَوْم التّصُد تَلَقَى الَبِيُوت فِى أزْيَارَهَا بَانِى الَعَنْكَبُوت
والَحِزْمِة شَاَهَد فِى التُّرَب
حَرَسَك يِظَمْبِر مِنَهَا
وفَرَسَك يكُد .. لا اسَيَادَهَا تَسَأل عَنَها .. ولا زُوْل يَرُد
أرْخِيلِى اضَانِكَ يا بَلَدَ
مَرّة اسَمَعِينِى مِن الَبَعِيد وإنْطَارَشِينِى وللابد
فِى حَبْلى مَاتَت شَتَلتِى .. مَاْت بيْتى مَاْتَت حِلّتِى
لَكِنِى يُوم مَاَت إِتْولَدْ جُوَاَى الفَ إنْساَن جَدِيْد
وانَا ذَاِتِى مِن ذَاتِى إِتْوَلدْ
وَرَتْنِى مَلَتَى مِلّتى
والمُوْية بَدَلت الوجُوه
يا بَادِى مِن بيتَكَ تَتُوه
تَضهَب ضِهِب
لَوْ بَاَبُو مَافى أو العَتَبَ
تَحَسِبْلو مِن قَوْز الرَمَاد
أو بِيْت أمِيْر المُؤمنِين الِلِسة حِيطُو تَسِوى رَبْ رَبْ در.. دَرَبْ
والَدنْدَهُوب إنْدَكّ دَكْ
هَرَسْ القَزازْ .. المُوية جازْ .. والجازْ وَدَكْ
بِينُو الدقِيقْ إتْلكَّ لكْ
ضِلَفْ الدَواليب الكُبارْ .. عائماتْ خَشَبْ
المُكْحَلِة .. الكُشتينة .. مِيزانْ الدهبْ !!
ضُوقْ الغضَبْ .
ضُوقْ المَذلَّة الدُسْتَبا الناس العُزازْ
سِيدك دخرنالُو المطرْ .. أمَّا إنت يكفيك الرزازْ
خدرّتَ تاني يجي الجَرادْ ..
أقوى الحقيقة من المجازْ ..
وهِنا المحكْ .؟.
يا أرزقي .. يا نسلِ حمّالةْ الحطبْ
يا مستفيدْ مِن بذَّةْ أطفالْ السوادْ الما نزلْ فوقُن ملكْ
بالسُكرْ .. العيشْ .. السمادْ ؟؟؟؟!
المُويَة أوْلى من العبادْ ؟
في ياتْ كتاب دين ياتْ حديثْ .. يا فاجِر الله بيسألكْ ؟
يا حَسرةْ الإتغشَّى فيك ... كَبَّر وراكْ ... جاهد جهادْ ...لامن هلكْ
يا حَسْرةْ الصدَّق صلاتكْ .. وموعظاتكْ في الفسادْ .. بان الشَرَكْ .
أيْواتَ ليك ..
أيْوَة ... أيْوَة .. يا بحرْ التسابْ ما أعدلكْ .
شُكراً جزيلاً يا بحرْ .. رغم الكَساد
بحَّتْ لنا العَفَنْ المَكرِّنْ في الزمنْ من عهدِ عاد
والضوْ وليداً ما قرا
خرَّجتو منك باقتصاد ... قانون ... فلكْ
جَفَّ المِداد .. ما أعدلكْ .
جَفَّ المداد ما أعدلكْ
ما أعدلك ... ما أعدلكْ
بالسكَّر .. العيشْ ... السماد
المُوية أوْلَى من العباد ؟
يا شارعْ الثورة القصاد أهلي المسالمينْ البعادْ
يا بندقيتو ...هِنا المحكْ
وقَبَّل على القِبلة ونَدَهْ
قُبَّالْ يمد إيديه إنتَبَهْ !
حِسْ المطرْ .. بين الشدرْ .. والضوْ مع الفيها إنشَدَهْ
بَرَّة ..... المطرْ
في الدَنْدَهُوبْ برضُو المطرْ
خَتَّ البِرِشْ فوق راسُو ... لكِن المطر
أوْوْوْوْ .. والهوَا
وراسْ تمرة فوق عَقَشْ المسيكينِة
الجَرِيدْ رمَى دَنْدَهُوبا .. العدِّة فاتتْ بالبحرْ
بِرِشْ الصلاة اللافْحُو الهوا .. وإبريقْ يثرثرْ بين كَررْ
يا الله سِتَّها في السفر
والضو ينط من دنْدَهُوبُو ... يجيبُو صاد صوت المطرْ
في إيدو كوز .. سبْحِة و كَكَرْ .
حَلَّةْ مُلاحْ .. كرَّاسْ غُنا .. إعلانْ قضية .. عِلمْ طلبْ
.. بروازْ قديمْ .. حاضن عَروسْ وعريسْ وسيم بين كمْ نفرْ
السِبْحة والكُوز .. مُو اللَتَا
تشبهْ أمير المؤمنين .. باكر يقولُوا سرقْتَها
فنـَ ــنـَـ ــنْْْْْْ ... يفِنَّها في البحرْ !؟
أقوَى البحرْ .. واللاَّ المطرْ ؟ أوّّوّّ والرياحْ
بتَصحِّي في الجو الجراحْ ... بِتَحِتْ من الجوفْ الفِكَرْ
إشْْْْ في الوعر ..
عِشْ قُمْرِي بي فرخِينُو كان من حظ وَرَرْ
يا رازِقْ الحيوانْ أخُو ...؟!؟
يا رازقْ الحيوانْ أخُو .. الينْجَا مِن كِيد البحرْ .. ما ينجَى مِن إيد المطرْ
والينْجَا من إيد المطرْ .. ما ينْجَى من كِيدْ الرياح ..
والينْجَا من كيدْ الرياح .. ما ينجَى من كيد الفِقَرْ ؟؟!!؟؟
يِي .. دا القدرْ .
ما أعتى حربك يا بشرْ .. إنت الغريبْ
والموج يشيل غادي ويجيبْ
ينكَرْبَشْ النيمة الدَبيب ... والضوْ مُو جايب لك خبرْ
طقْْ ..
دندهُوبْ ناس ستِ نُور .. عودُو إنكسرْ .. وفاااات بالبحرْ
تِحت السماوات ما في أرِضْ
في الموية .. في الريح .. في المطرْ
في الدَابِي .. في التمْر الخطرْ
وإنسان يصُبْ _ قبل السمِا _ عرَّاقِي والوشي والشَعرْ
غيَّرْ وقفتو .. الدندهوب زالَفْ هَبَرْ
يا غيمة ..هوي .. دا وكِتْ مطرْ ؟؟


واِرتجَّ جوف الجوْ رعدْ
يا الضوْْْ كفرْْ ...
يا الضوْْْ كفرْْ ...
من بعدما نفد الصبُر .. والإحتمال في الجوف دَشَرْ
صنََّّ المطرْ .
والجوْ صِفا .. بنْقَرْ حجرْ بتْ الرسول .. لكِن بعدما الضوْ كفرْ
ضربتْ شعاعات الشمش في دوشة فوق قوز الرماد ..
.. كلبةْ مدينِة نِعِيجَتَا .. ديكا العجوزْ .. وكدِيس عماد ..
.. طيرةْ بقرْ .. ودِحِيش غريبْ .
شوف الظروفْ ؟!
دحَشكْ .. حمارتَكْ .. والضيوف !
قلعنْ يَحَفْتِنْ في الرماد ؟؟
وبالسكَّرْ ؟؟ العيشْ ؟؟ السماد ؟؟
الموية أوْلَى من العباد ؟؟؟؟
وبالفِيتَرِيتِة العِيشْ حُكُمْ ... الموية أوْلَى من البُكُمْ ؟
ومَلَصْ العِرِيرِيقي ولباسُو .. ومصَّرِنْ .. ما غيَّرِن
خمْخَمْ عقابْ الكسرِة .. واللابْرِي القديمْ ..
من دندهوبو المنْتَكِلْ فى النيمة .. شال باقي الأكلْ
خمََّّ الرياح .. خمََّّ المطرْ .. خمََّّ الجراحْ ..
خمََّّ الدَبِيبْ في القُفّة .. مو جايب خبرْ
قصَّالُو فرعين منقة .. بالمِنْجَل هبرْ
حشْحشْ صَبايْطاً هِن صُفُر .. لكِن غُُلاد
البدري لسه على الحصاد
في أرواحْ على قوز الرماد
يا الضوْ بقالِنْ أعزَّ زاد ,,, ونجاضو زاد .
وإنكابَسَنْ فوق وجبةْ الزمن الغريبْ ، كلبةْ مدينِة ... كديس عماد ..
يا الضوْْ دبيب .؟.
وطيرةْ البقرْ .. في الجوْ تغيبْ ..
دلَّتْ من الكازُومْ
دبــ يـ ـب
والضوْ يَصنْقِع والوررْ
يا رازِقْ الحيوان أخو
نختا ... وتصيب .
نتحدَّى كيدك .. يا بحرْ
نتحدَّى إيدك .. يا مطرْ
يا آفة .. يا ريح .. يا فِقَرْ
نتحدَّى بالصبرْ الجميلْ ... بأعمالنا ... بي طيرةْ البقرْ
وطيرةْ البقرْ ، في الجوْ تغيبْ
دلَّتْ من الكازومْ دبيب .
وإنكاتلنْ في آخر التمُرْ
كلبةْ مدينِة ...نعيجّتا .. ديكا العجوز .. وكديس عماد .. حمارتو .. والدحشْ الغريب
ودِحِيشو فوق قوز الرمادْ .
عَكْمْنا فينا من الغلِي ، وعِيشةْ الجلاجلْ والشتاتْ ؟..
وبالسكَّرْ .. العيش .. السمادْ
الموية أوْلَى من العباد ؟؟؟
وبالفِتَرِيتِي .. العيشْ .. حُكُمْ
الموية .. أوْلَى من البُكُم ؟؟؟؟؟
ولمَّـَّــَّــس دِحِيشُو ..
الضوْ بكى . .
بكى ما بكى ؛؛؛
بكاّهو حِسْ الطائراتْ
بكَّاهُو قُدْرَتُو تنتهي ؛؛؛
بكَّاهُو يرجى المعجزات !!؟
بكَّاهُو قُولةْ الموية أخفَّ .. وأقلَّ من كمْ وأربعين
بكَّاهُو كضَّبْ حاســـَتُو .. وصدَّقْ أمير المؤمنينْ
بكَّاهُو ما رَمَى للكُرِيق ، زاغْ في أوائلْ النازحـينْ
مع إنُّو أدْنَى الناس شِتُول ، وأخفَّ سُكْنَة ، وأقلَّ طينْ
وإنضرَّ أكترْ منَّهُمْ .. لكِنُو .. ما ندمان .. يَمِينْ
بِيتُـــو اليَرُوحْ ..
عَفَشُو اليَرُوحْ ..
غنَمُو التَرُوحْ ..
ما طالَ عايِشْ .. وفِيهُو رُوحْ .. وأمُّونَة نفَدتْ بالعَوِينْ .
في اللُجَّة يفْضَل كالسَفِينْ .. أكْرمْ لُو من جرحْ النزوحْ .
ولمَّـَّـس دِحِيشُو .. الضوْ بكَى
بكَى ما بكَى
بكَّاهُو يرْجعْ لِي ورا
بكَّاهُو رادِي الدنْدَهُوبْ الغادِي
وأم دُرمان تغنِّي .. حبيبتي آه .. وودادي وين .. وحَبيبي وُوبْ !
والباقي كلُّو مقابلاتْ ..
ضِدْ القوانينْ البدِيلَة = مع القوانين البديلة
اليَسْوَى ما يسْوَى الرَزِيلة
جهنمْ .. الجنَّة .. الفَضِيلة
؟؟ .. ؟؟ .. .. ؟؟
ولا خَتَرْ في بالُنْ الحالْ الكَدَرْ
لا علَّمُنْ سِيلْ الجبالْ الشَاتْ مواريث القَبيلة مع الحجرْ
لا حِكمةْ البحرْ الكَسَرْ
ما ليهُو مُسْلِمْ لا الكَفَرْ
هَبَدْ الجوامع من طَرَفْ .. غَمَرْ الكنيسة مع الغَمرْ
ما علَّمُن
ما علَّمُنْ
والألَّمكْ . ما ألَّمُنْ
ما ألَّمُنْ .. ما ألَّمن
ضِدْ القَوانين الهَزيلة مع القوانين العديلة ، الماب تَمرْمِطْ للبِلاد .. اللابْ تَصنِّفْ للبشرْ .
والضوْ زَفَرْ
استغفر .. إنشهدْ .. تَلا
في سِرُّو سُورة الزلزلة ... دُونْ بِسْمِلة .
قاوم عَنَا .. نفَّضْ عِرِيرِيقِي .. ودقرْ طاقيْتُو لي ورا .. وإنحنى
شدََّّ الحَبِلْ .. بالطُوفْ دَنَا
جَمْ تمْرَة مِن دُون التَمُرْ .. ماب تنْطَلِعْ .. طالت كُدُرْ .. يقَّن عفاها وسبَّله
سابْ الحِديَّات تَسكِنا
بمْبُونَة مِن كمْ وأربعين .. وحِّيدا ما خَلفتْ جَنَا
مِن جابا جدُّو من المَحَسْ .. من هي الصغيرِة محانِنَا
يسقيها بالجُوزْ ما فَترْ .. قَدْر اليَرَجِيها المطرْ .. والليلِة حظَّها طُوفَنا .
شرَّقْ .. بحرْ
غرَّبْ .. بحر
شـمَّل .. بحرْ
جنَّبْ .. بحر
دنـ ـقـ ـرْ .. بـحـرْ
صنْقَعْ .. بـ ـكـ ـى .
بكَى ما بكَى
بكُّاهُو حِسْ الطائراتْ
بكَّاهُو قُدْرَتُو تنتهِي
يكَّاهُو يرْجَى المعجزاتْ
؟؟؟؟ .. ؟؟؟؟ .. !


وبآخِرْ نَفَسْ .. والحِيلْ كِمِلْ
بِي طُوفُو صدَّ الدنْدَهُوب .. بين الضَبابِينْ والنملْ
نامْ نُومةْ الدِيكْ في الحَبِلْ ....
صحَّاهُو آذان العَصُرْ .. يا الضوْ مَفوِّت كمْ وَكِتْ ؟
نـ ـقْـ ـنَـ ـقْ بَراهُو تِحِتْ تِحِتْ
رقْـ ـرقْ دموعُو بِقَتْ تَحِتْ
صلاَّيْ من القرآن غُنا
صلْ يا حمام قِدَّامي .. أنا .. غرقان لِي فِ أنجاسْ لِي هِنا
ما شال جداولنا البحر
شال مُسْتَراحاتنا وهَبَرْ
طفَّحْ زَفارات كم سنة
مِرحاتنا والكُوشْ القُدامْ ماصِن وَكِتْ ماصَ الهَنا
بـ إيه إغتسِلْ ؟
وإتوضأ بـ إيه ؟
غير الصَبُرْ ... يا ... ربَّنا ؟
بكّاهُو .. خَلَّ البال نَبلْ
قُولة .. عقابَكْ في الجبل ، من زيْ دِي بشْرَبْ يا جَنا ؟
هُونَق دِحِيشُو .. الضوْ بكى
بكى ما بكى
بكَّاهُو رادِي الدندهُوب الغادِي
وأم درمان تَنُونِي .. حبيبتي آه .. وودادي وين .. وحبيبي وُوب
والباقي كلُّو مقابلات ..
والنشرة .. مافي .. ولا خبرْ عن بلدُو .. عن شِدَّة عَناهو .. عن البحر
عن سر نَفي
ودِي الوكْتِ لندن ماب تبين ..
حالاً دَحِين .. زيْ حالُو .. فِي .
يا الضوْ
قَبُلْ غِيبةْ الشمشْ
قَبْل القَعُو .. قبْل البعوض .. قبْل الدَعَتْ
والمُويَة كُل ما لِيك تَزِيد .... والزَاد نَفَدَ
قَبْل الحِصار .. يا زُول أخير تَخَتَا البَلَدْ .
يا زُول قُعادكْ شِنْ يفِيدْ ؟?
شِنْ حارسُو شِنْ خائف عَلِيه ؟?
أكترْ من الطين الوقع في الطين شهيد ??؟
صُور التَمُرْ .. يا الضوْ .. أمِشْ
عِينْ الشَمِشْ .. يا الضوْ .. أمش
البُرْتُكان والمنْقَة والنِيمْ .. تِنْطَقِشْ .. يا الضوْ أمِشْ
الدنْدهُوبْ .. يا الضوْ .. أمِشْ
حَدَرن لُو من قوز الرماد .. رَمَن الرِمشْ .. قالن لُو أمش
قبْل الحصار .. يا الضوْ أمِشْ
نَبْيَ الله نُوح .. قال لكْ تَمِشْ
من ضو ترُوح .. يا الضوْ أمِشْ
يا زُول قٌعادكْ شِن بفِيد
شن حارسُو شِن خايف عليهْ ??
دكَّانك الغايةْ العَرِشْ !
دولابك !
العَفَشْ الجديد ! الحافلة ! بيبان الحديد !
تاوَلِيتكْ ! البايرَكسِ !
إيه خايف عليهْ !!
أكتر من الطين الوقع في الطين شهيد ؟?؟
داك الفَرِشْ ..
والعدِّة في السحَّارَة .. خُتْ فُوقَا البِرشْ
ومن ضو أمِشْ .
عارفين قليبك طبعُو حار
وبيَهِمَّك الروح مو القِرِشْ .. لاكين أمشْ
في الفيها ما عندك خِيار .. غير ما تَمِشْ
إنسان معمَّرْ بالحياة
ما ترْمِي نفْسكْ يا حِمِشْ للتهْلُكَة .. خلِّينا أمِشْ
شِنْ حارسُو ؟
شن خايف عليهْ ؟
أكتر من الطين الوقع في الطين شهيد !؟
وملَّـَّـَّـس دِحِيشُو ..
الضوْ بكى
بكَّاهُو حسْ الطائرات
بكَّاهُو قُدْرَتُو تنْتَهِي
بكَّاهُو يرجَى المعجزات
بكَّاهُو يقْنَع بالرحيل
بكَّاهُو ما كان الشُدَرْ .. ما الطير .. وما كان النخيل
بكَّاهُو كِيفِنْ سَدْ شِبِرْ من مُويا يصْبِحْ مستحيل
بكَّاهُو يَلْوَطْ في البحرْ .. والغِيرُو يشربُو سلسبيل
بكَّا البِينضُمْ في الغَلطْ .. يا قالُو مُلحِد يا عميل
بكَّاهُو .. آه ..
ما هُو .. الإله
يا دَكَّةْ السُلْطَة
ودُخانا .. وشمْلَتا
وفي شرْعَك الإنسان يموت
إن زادت الموية ويموت من قِلَّتا
لو سامحك في حقُّو .. سِيدي .. العُمدة ..
هُوي
تبْ ماب تسامحك بِتْ أبوي في شتْلَتا .
يا مَسَمِّي مِحْنَتنا :-
إمتحان !
مرَّات قَدَرْ !
حِيناً غضبْ !
!! ؟؟ !
ناكِرْ جِبِيهاتنا .. وصلاةً صلَّتا .
يوم يمْحَق الصاح الخطا
وين ؟ تمشي من غضب الغلابة اللا بَكتْ لكْ نازِلاتَا .. ولا شَكتْ لكْ عِلَّتَا
لمْلِمْ خُرافاتكْ علِيكْ .
ما حرَّقتنا ضَرِبةْ إيديك .. بسْ روحنا حَقَركْ سلَّتَا
وبِنَجِيبَه ضرْبتْنَا .. وتَصِيب .. في حَزَّتَا
وفي حَزَّتَك .. يا بيتنا كَبْ
ويا بيت أمير المؤمنين إنت اِتْنَـكبْ .
والضوْ شَطَبْ جِيهةْ اليمين ..
حجَّاً ........ إلى ان آمنين
وبي خط خَلاَوِيهُو المَكعْوَجْ والحَرِفْ واضِح تَخِين
بي دمْ .. و .. طِين
الضوْ كتب فوق باب أمير المؤمنين
(ما ضرَّ بيتَ أبي لهبْ
لوظلَّ بينَ المسلمينْ
لوْ جاء فينا لِما ذهب
يا مؤمنينَ بغير دِينْ)
ومَضَى اِسمُو بين قوسين ****غضب****