قصيدة للسر عثمان الطيب

منقول عن جريدة الوطنباســـم الأرض



قصيدة من- زولاً- أحب الارض.. وغنى لها وهو فيها.. أو في اقاصي الدنيا وبعيد عن الأرض.. السر عثمان الطيب- نجح الإبداع الحلو مثل البركاوي.. والقنديلة.. والتمودة.. وأم رأس.. اكرم حفلة بيت الكودة بهذه القصيدة الجديدة..
ونحن هنا ننشر جزءاً على وعد أن ننشرها كلها عندما يأذن لنا السر ويسلمنا نصها النهائي المطبوع كما وعد.
باسم الارض
باسم الأرض واللوبى والعيشريف وأطيان الجروف
وندى الصباح والحني والطنبور ولمعان السيوف
باسم الوجوه السمرا دي
شايلي الحنان والطيبة والريد والوفا
تدي القلوب كل الأمان من كل خوف
باسم الشمامير والضراع مفتول يشق
جوف الأرض شان تحيا ناس
وقع الطواري حلاتو لما يمازج ايقاع
باسم التمر بركاوي قنديل والمدين
وكتين يسوي أم رأس يزربوا من العوين
قلب التمر وضفر البروش.. وقطع الجريد ونقريشو
لي ضلالة أو واقود وكت في بلدنا ناسنا
يسووا بوش
باسم التُّكل.. ودخانو فوق الدار تعوس
سوالو ضل
الصاج وصنقيرة البُّقل حتى اللدايات والدُّقل
والكسرى والقراصة لي عند العجين الزادو موية لأنو مُرْ
باسم الأرض وحرت الأرض
والكمتر الشالوهو مقلوع منقرض
والبوقة والموية التدفق تنكسر
وطير البقر دا الماهو داير يتنهر
باسم الكفاح والطين وحبات العرق
والفي الشمال رغم العنا ورغم الضنا
قام هبَّ من البيت مَرَقْ
وعاد المغيرب للفريق تعبان رقد
وطعم الكفاح باقيلو أحلا من الشهد
ومرتو اللي جات شايلي الكبابي ملاني شاياً بي لبن
هي تقولوا قوم:- الشاي برد!!
وولادوا جمبو: أبوي قوم!!
هي لا تنوم!!
دايرلي قرشين يابا قوم!!
دايرلي نعلين يابا قوم!!
دايرين طرح يا يابا قوم
باسم الفرح تلقاهو قام
وباسم الفرح أنا داير اقول..
باسم الرتاين الفي الديار متوهجي
عاينوها جَهَرت ود هِنَاي.. يا أمُّو شيلي ورقدي
خلق الله لا تتحاججي
ما الدارة ذاتا معجعجي
وأنا قولي لسع ما كِمِل!!
باسم القمر وكتين يهل
باسم القدير دا غني وفقير.. وكبير وصغير
حتى الجداول وكل بير
باسم الدلو.. وساعة النشل
باسم الخلاوى وشيخنا ابراهيم ولد شيخنا العوض...
باسم الكتاب الآيتو تشفي من المرض..
والأردواز وشدر الحراز
وحتى الطلح وريحة الطلح
والدوِمي والخرومة والبرم السمح
والساقي والقادوس وسنبلة القمح
والطير جميع اصنافو قمري وقينقرد
جميِّر وطير الجني والكرجي وحسين كضاب
وجنا الوزين يعوم.. والليل برد!!
باسم الشعر من عِنْ حسونة ولا مُحُمًّد حتى ود زينوبة
قوته.. بت أد محاري وفارس الحوبات حسن!!
باسم الجمال والخضرة والوجه الحسن
غنالو يوت حُمَّد سعيد عبر الزمن
«زولو الوسيم» «وطيفو الرحل» و«قلبو الجريح»
وطيرو اليخافلو يجينا بي جاي ينخمل
يوصيهو يمشيلو ويزور
يطلعلو بي فوق للحفير
والعيد كمان وقولو السمح:-
أهدي السلام لي أهلي ديك حبان قساي
داني وبعيد
وقول الخلوق الفيهو يوقد النار يقيد
شان قالوا:- كيف عايش سعيد!!
إن شاء الله يا حُمَّد سعيد تصبح سعيد
باسم المشاوير اللي عشتها شايل الافراح معاك
لي كل زول..
سهران زمن.. وغلبان زمن.. كم حُول و حُول
لا قت فترت.. ولا بتقول..
ذاكر الأهل.. وتغني دايماً للأهل
خلَّد اسم ناس بت بتول
ومع الزمن يخلد كمان اسمك يمين
رمز الخلود..!!
متل الشديري القايمي فوق قوز أم شديرة
سنين.. سنين..
تدي الحياة ومعنى الحياة
وكل الصمود الماب بلين
...
باسم القرابة وإلفة والريد الشديد
ونغم الطنابير الترن تعزف نشيد
دقت على دُفْ الزمن إيقاع جديد
ورسمت على طين القرير
الوان حجر بت الرسول
يتراقشن متل الحرير
ويمازجن لمعان هلالك يا عريس
يا خوي.. واخوي حُمَّد سعيد
أعذرني.. أبيات القصيد..
خذلتني ما بقدر أجيد
ما انت وحدك في دروب الفن
بقيت أمير وسيد..
ونحن التلاميذ الصغار
من فيضك إِتْ تكبر تزيد
أعذرني داير استمر
لو كان يطاوعني الشعر
أنا كت بقول:- باسم الملأ
والليلي بعلن للملأ
يا كرنفال أفراحنا طوف كل البيوت
واحضن بلادنا وغازلا
ويا عُشَّهن.. ضلل سحابة خير عليهُن ورشهُن
بي كل عديل.. بل كلِّ زين..
وإن شاء الله بالرفا والبنين
وباسم الوجوه السمراء دي
حبوبة قومي وزغردي
حبوبة قومي وزغردي
حبوبة قومي وزغردي



السر عثمان الطيب
كتبت بمناسبة زواج الشاعر محمد سعيد دفع الله عام 1976م

عزيزنا عمدة
حبابك وأنت تنثر الدرر عبر بواية استراحة الشعر السوداني (منتداى المفضل داخل المنتدى)
والسر عثمان الطيب برأي المتواضع واحد من أهم الأقلام السودانية التي لم تجد حظها من التناول والإنتشار - كشاعر متمكن وليس كشاعر أغنية-
عموماً شكراً على القصيدة وزيدنا من النوع دة

الاعزاء / مرغنى وهيثم شكرا على المرور والتعليق طبعا اخوكم متيم بالشعر الشايقى وغنى الطنمبور وامس كانت فى تلفزيون السودان سهرة جميلة بس صادفت منافسات تصفية اندية اوربا والسهرة واكيد ماحتكونوا شاهدتموها كانت تقديم السر عثمان الطيب والشاعر محمد سعيد دفع الله والشاعر المبدع محمد سالم حميد ونخبة من محبى غناء الطنبور وكان نجم السهرة الذى ابهر الجميع ورجع الناس لأكثرمن عشرين سنة بنفس الصوت الفنان محمد كرم الله واتمنى ان يكون واحد سجل هذه السهرة