إرشيف البنبر

اما بخصوص سؤال الاخ هيثم وعلاقتى بالعم والخال الدكتور ميرغنىفمرغنى والدته الحاجة بت حامد ود محمود ود حماد
وانا والدى هاشم عبدالرحمن محمد منصور حماد(وقع ليك ولا نعيدو ليك)يعنى جدى ووالدة ميرغنى ابناء عمومة اذا هى خالة ابى اذا ميرغنى عمى ...

بعدين خليك من اللفة الطويلة لقيت حماد خلاص وصلت ...

بعدين ميرغنى دا برضو بطلع خالى

واذا استعنت بى صديق يمكن اطلع انا خالو كمان

هو سؤال ياسر براهو؟؟؟؟

سيرة الكورة ذاتا طنشا,,,,, الظاهر الأخ جزائري أقصد هلالابي

لكن يا ابوذر أكضب عليك؟؟؟؟ كان فهمت حاجة من قصة قرابتك لميرغني دي ..!! أتنطر

بخصوص مشاهدة كرة القدم اول حاجة انا مريخابى خالص بكل فخر واعتزاز وبشجع كل لعبة حلوة حتى لو كانت كانت جزائرية اقصد هلالابية يعنى ما متعصب اما بخصوص سؤال ياسر عن اوصاف المرة العايز اتزوجها اى واحد بتمنى انو يلقى مرة من اسرة كويسة على دين وخلق يتخيلى الحاجتين ديل لو اتوفرو كفاية جدا

يا هيثم ولا انا فهمت حاجة 000 ودى فوتناها بمزاجنا 000

لا ما تفوتوها لو اتمعنتو كويس حاتلقوها واضحة جدا وانا اختصرتها ليك قلت ليك لما تلقى اسم حماد دا خلاص سيب اى حاجة والموضوع منتهى

ياعمدة صاحبك دة بقول في شنو؟؟ فسر "حماد" بعد جهد ب"حماد" {وبيني وبينك أخير شرح أبوذر}

بعدين ياأبوذر ولا يهمك ،، وزي ماقال ليك ميرغني نحن أصلنا كدة بنعمل من اللاموضوع مواضيع ،،

عودة للبنبر (وبرضو عن الغربة):

لما اغتربت كنت محدد سنين الغربة(زي آلاف المغتربين الطلعو كضابين) ولا خاليها على الله وما فارقة كان سنتين كان 20؟؟؟!؟؟؟

من الطبيعى ان ان يحلم كل شخص ولكن ليس كل ما يتمناه المرء يدركه تظل الاحلام متواصلة بعضها يتحقق وبعضها يظل حلما ولكن يظل الامل موجود ما دامت هناك حياة

الشيخاب تظل دائما فى القلب ومن المؤكد ان كل بلد تترك اثر فى طبيعة وتكوين اى شخص حتى ولو نشأ بعيدا عنها انا فى الحقيقة اتولدت واتربيت خارج الشيخاب وصلتى بيها فى شكل زيارات ومناسبات ولكن يظل الارتباط الوجدانى والنفسى بالمنطقة والاهل وتظل العادات والتقاليد لاهل الشيخاب موجودة فى طبيعتنا وتكويننا وتظل المحافظة على العادات وتقاليد المنطقة الشيخاب واجبا علينا نسعد ونفتخر ونعتز بها وبالمحافظة عليها

العزيز ابو ذر بداية ارحب بك في المنتدي .

المرأة في حياة ابو ذر؟
السودان والاغتراب الفرق في العمل؟
ماذا كسبت من الاغتراب؟

مودتي

والله انا على حسب اعتقادى ان المراة تمثل دور مهم فى حياة كل رجل وكما يقال ان وراء كل عظيم امرأة يتخيلى انو المثل دا يجسد الدور المهم الذى تلعبه المراة فى حياة كل رجل

السودان والاغتراب والفرق فى العمل ؟ ما اظن فى فرق فى العمل يعنى يمكن يكون فرق مادى فقط لكن نفس الشقاوة الحاصلة هنا وهناك

ماذا كسبت من الاغتراب؟ والله زى ما بقال اخونا الهلالاب كسبنا احتكاك خارجى واستفدنا من التجربة

السلاااااااااااااام عليكم جميعاً

يااخوانا دة بنبر شنو البيتم 5 يوم بدون اسئلة جديدة؟؟؟؟؟؟

أبوذر إنت ما عندك ذنب طبعاً لكن بتكون عاجباك فكرة الناس الما بتزرزرك دي

محاولة ل"هب" نار البنبر:

علاقتك بالسياسة؟؟
مزيد من الإسهاب في علاقتك بالجنس الآخر ....يعني بالوااااااضح كدة علاقاتك أثناء الدراسة والعمل ....صداقات ، شواكيش......شلولخ؟؟؟؟

شوف لينا ديل لمن نجيب باقي ناس المنتدى ونجيك

الليلة بيحتفل الشخص الجالس على البنبر بمرور 7 أيام على مرورو على هذا البوست

ياناس المنتدى

واحد من إتنين:
يا ...........غيرو إسم البوست دة لأنو أبرد من التلاجة
يا .............ألغوه كلو ، كلو ...عشان شكلو ما عندكم نية تسخنوه

لاحظو........مافي إحتمال أو خيار بإنكم ترجعوه لحالتو القديمة

(نايمين كدة زي الرؤساء العرب مع ناس غزة)

ولو ناراً نفخت بها أضاءت ،،،،،،ولكني نفخت على رماد
لقد أسمعت لو ناديت حياً ،،،،،،، ولكن لا حياة لمن أنادي

والحمدلله أعضاء المنتدى الدخلو بعد كتابة المناشدة أعلاه ما شوية وبما فيهم الشخص المستضاف ، لكن قال ليك ولاااااااااا قالو لي بتقول في شنو


يللا ......وآآآآدي نومة معاكم

الاخوة الاعزاء تحياتى واتاسف جدا للتاخير فى الرد لظروف خارجة عن الارادة ولكن الان جاهز للرد بس ياهيثم ما تهبها للدرجة دى

بالنسبة للسؤال الاول علاقتى بالسياسة يمكن تكون ضعيفة او مافى خالص وماعندى لون سياسى ودى حقيقة .
السؤال التانى دا سؤال صعب شوية وماعايز اقوليك كمان ماعندى علاقة بالجنس الاخر لكن الحاجة العايز اقولا ليك صراحة انو فى جميع مراحلى الدراسية ماكانت عندى علاقة بالجنس الاخر وبعد الدراسة العلاقة الوحيدة توجتها بالخطوبة واستعد الان انشاء الله لاكمال نصف الدين

abuzar كتب: لكن الحاجة العايز اقولا ليك صراحة انو فى جميع مراحلى الدراسية ماكانت عندى علاقة بالجنس الاخر وبعد الدراسة العلاقة الوحيدة توجتها بالخطوبة واستعد الان انشاء الله لاكمال نصف الدين

زولك زاغ ياهيثم شكلو خايف عمو وخالو يوصل الكلام !!!!!!

abuzar كتب:الشيخاب

انت ياهيثم الشيخاب دى وين!!!!!!!

انا عارف معنى انك ماتصدق دى فيها اسئلة كتيييييييييييييييييييييييييييييييرة جدا وانشاء الله حاتقعد فى البنبر دا وحاسألك ليها


الاخ الرشيد الشيخاب دى لو ماعارفا وين هى قرية فى ولاية نهر النيل محافظة شندى محلية حجر العسل والسؤال دا انا فوتو ليك عشان خاطر دكتور ميرغنى.
معقولة ياخى ما بتعرف الشيخاب

abuzar كتب:انا عارف معنى انك ماتصدق دى فيها اسئلة كتيييييييييييييييييييييييييييييييرة جدا وانشاء الله حاتقعد فى البنبر دا وحاسألك ليها


الاخ الرشيد الشيخاب دى لو ماعارفا وين هى قرية فى ولاية نهر النيل محافظة شندى محلية حجر العسل والسؤال دا انا فوتو ليك عشان خاطر دكتور ميرغنى.
معقولة ياخى ما بتعرف الشيخاب

نحن شندى عندنا فيها رأى كمان الشيخاب تتبع لمحلية حجر العسل والله هانت الزلابية قالوا حجر العسل عملوها محلية هو الناس زاتو يالرشيد ما عارفين وين حجر العسل تقوم تقول لى الشيخاب 00000

يا أبوذر ،،، الرشيد دة متفسح فيك عشان هو أحد قعدتو في البنبر وإرتاح لكن كان عملتوها زي ضربات الجزاء -بعد الناس تكمل بيرجعو يعيدو الشايتين- بتلقاهو تاني في البنبر

لكن بيني وبينك أنا ذاااااااااااااااتي ما مصدق،،،،،ياخ خطيبتك دي ما بتخش المنتدى ومافي زول بكلما ،،،

إعترف

بينى وبينك يالسيد عماد تتبع لمحلية حجر العسل دا نحنا زاتنا عندنا فيها راى لانو المفروض تكون حجر العسل تتبع لمحلية الشيخاب وذلك نسبة للتاريخ العريق للشيخاب

انا اطالب السيد المدير العام باعادة بنبر الرشيد لانو انا ما حضرتو .............

بعدين يا هيثم انت البنبر دا اخدت قعدتك فيهو والله لسة ؟؟

abuzar كتب:بينى وبينك يالسيد عماد تتبع لمحلية حجر العسل دا نحنا زاتنا عندنا فيها راى لانو المفروض تكون حجر العسل تتبع لمحلية الشيخاب وذلك نسبة للتاريخ العريق للشيخاب

عشان شنو تنسى لوقت فريب جدا كان لما يجيكم جواب فى الشيخاب ترسلو حجر العسل بحمار عشان يقرو ليكم

بالمناسبة يالباقر عليك الله اسرد لإبننا اباذر ( زيارة الوالى لإحدى قرى البطانة ومطالبهم للوالى ) 0000

عماد الشفيع كتب:بالمناسبة يالباقر عليك الله اسرد لإبننا اباذر ( زيارة الوالى لإحدى قرى البطانة ومطالبهم للوالى ) 0000

ياعمدة دى دايره ليها عدااااااااد بسسسسسييييط

تسعد إدارة المنتدي وتقدم بكل فخر إستضافة عضو المنتدي/ الباقر احمد العباس,, والباقر احمد العباس إسم لا يحتاج لتعريف,, قامة سامقة من ابناء الاشلاق,, تسبقه شهرته اينما حل ,,, وشهادتنا فيه مجروحه فهو الصديق , الاخ , الدفعه,, وسنبدأ بالبطاقة الشخصية كما تعودنا:
الأسم كاملا:
العمر:
المراحل الدراسية:
الحالة الاجتماعية:

له ولكم الشكر مسبقا.

ياجماعة البنبر بتاع ابوذر مالو انتهى سرييييييع؟؟؟؟؟؟؟؟

الباقر شنو يا اخي ؟؟؟ ولا كلمة ؟؟ المنتدي ذاتو شايفك خليتو,, والعمده شكلو متضامن معاك ,, افيدونا.

قلتوا لي بنبر مولع؟؟؟؟؟؟؟؟؟؟؟؟؟؟؟

اخونا المدير العام
نسبة لعدم ظهور الباقر فى البنبر فلدى اقتراح بتأجيل تنصيبه لحين عودته من الاجازة وزولك الايام دى مزنزق فى العمل وفى التجهيز لإجازته وحتى كما تلاحظوا لايدخل المنتدى وهذا مجرد اقتراح

نعتذر لاعزائنا أعضاء المنتدي لعدم تمكن الاخ الباقر من الجلوس علي البنبر والرد علي الاخوة المتداخلين ,, وخطأ الادارة الغير مقصود بترشيح العضو دون معرفة ظروفه,, إذ ان الاخ الباقر غير متفرغ بل جدوله ملئي بالالتزامات الاخري عليه سنرجئي اجلاسه الي وقت آخر,,, وسنقوم بترشيح عضو آخر بعد التشاور معه,,, وناسف كثيرا لما سببنا لكم من تضارب ,, لكم الشكر.

كان لهذا البوست رواج شديد في سابق الايام ,,, إقترح الاخ هيثم بعثه من جديد ,,, وهانحن نقوم بتنشيطه من جديد

العضو المستضاف إخترناه دون إستشارته : العضو النشط:خالد عمر حسن
نبدأ البداية التقليدية:

الاسم كاملا
العمر
الحالة الاجتماعية
مراحل التعليم
المهنة
الهواية

الرجاء إضافة اسئلتكم حتي يولع البنبر.
لكم الود.

مرحبتين حباب خالد عمر وإنت أول ضيف على بنبرنا نسخة 2010
وللذين لم يشهدوا رواج هذا البوست ، كان الشخص المستضاف يمكث بالبنبر شهر كامل يجاوب فيه على جميع اسئلة الأعضاء العام منها والخاص(البقدر يجاوبو)
ويمكنكم الرجوع لإرشيف هذا البوست لأخذ فكرة عن الأسئلة والزوغان منها وماشابه
بالتوفيق للشخص الجالس ، ولبقية الأعضاء همتكم عشان يولع شديد


خالد:

خلينا نسخن باسئلة ميرغني دي

وبنجيك لي قدام بس طوّل لينا بالك

والله ما كان عندي أي فكرة عن البوست دة لكن ابدأ ليكم من اسمو,اتخيل لي أي زول من الاربعين ولي فوق قعاد البنبر صعب عليه (عشان الرطوبة وآلام المفاصل)وكويس انو الاختيار وقع علي خالد (يكون ميرغني راعى للنقطة دي)يلا استعدوا يا شباب المنتدي ونحن( بنتحكر في سرايرنا)ونسأل.

علي الطلاق أول مرة أعرف إنو كان في بوست بالشكل دا ؟!!

- لكن مرحب بيكم ومرحب بي أسئلتكم ,, سلوّوا ما شئتم فكلي آذان صاغية ..

الإسم: خالدعمرحسن محمدصالح خليفة علي الشـــــــــــــــــــــــــــوش (والزول دا قالوا كان رباطي) عديييييل

العمر:27سنة و5شهور و14يوم و4ساعات ونص (لحدي هسي)

الحالة الإجتماعية: عازب والحمدلله

مراحل التعليم: مدينة ودمدني الجميلة ,, الإبتدائي (المدرسة الجنوبية بالدرجة) ,, حاليا" (عمربن العاص) من أولي حتي خامسة , ثم عماربن ياسر(السكة حديدالغربية سابقا") من خامسة حتي ثامنة ..

الثانوي الشهيد د/مصطفي الطيب علي (المدرسة العربية سابقا") أولي وثانية ثانوي ,, ثالثة ,, السني الثانوية بنين

ثم مركز التدريب المهني مدني قسم ميكانيكا الديزل والطلمبات

ثم كلية الجريف شرق التقنية لنيل شهادة البرنامج التأهيلي (ونلتها والحمدلله) وكفي

المهنة: فني ميكانيكا

الهواية: كتار والله ,, لكن بلخصا ليكم في الاتطلاع ..

أييي سؤال ,,, بس ختوني وليد النبي فيكم!

خالد عمر لو ما درس الميكانيكا

كان ممكن يقرا شنو؟؟؟؟

يا خالد ابن عمر وليلى ماذا اخذت من والديك ؟؟

اخونا خالد كلمنا شويه عن بانتيو وكتير عن بورتسودان !!!!!!!!

- والله يا هيثم ما كان درستا أييي شي ,, ودة الخلاني أمشي التدريب المهني

بس الظرووف ما ساعدت وكملتا ال في بالي .. والحمدلله .

- العمدة - أخذت من أبوي (إتقي الله حيثما كنت)
ومن والدتي ,,, الصّبــــــــــــــــــــــــــــــــــــــــر علي كل شي .

- الرشيدالريح نورالدين ,,, بانتيو ,, عاصمة ولاية الوحدة -غرب النوير- جمال طبيعة ما تتخيلو من كل النواحي ,, جو ,, أمطار ,, خضرة ,, خصوبة تربة ما عادية ,, بس مشكلتا أهلا والحيكومة ال في الخرتوم
(وحا أحكي ليك موقف ,, عن أهلا) قس عليه

وإنت ماشي في الشارع ,, لو مدنقر أقرب واحد حا يوقفك ويقول ليك بتعاين للواطة مالك ؟ حقتك ,, الواطة دي حقتنا أنحنا ,, شوف اللون دا مش أسود - ويعمل معاك مشكلة ..
أم لو ماشي ورافع راسك المشكلة أكبر ,,, طوالي حا يقول ليك بتعاين لي مالك إنت جنا عرب حقار وتبقي تفتش للبحللك ومرات ما بتلقي .

- بورسودان ,,, أحبها بالفطرة .. البحر الأحمر (وكمان عملو في أي حتة فيها موية كورنيش) ,, الموانئ (بالمساء مبــــــــالغة),, جزيرة سنقنيب (تمشي هناك ,, ما بتقدر تقول غير سبحان الله , بس) جمال في أيي حتة وكل بكان (أيي بالباء) ..
العجب الرطوبة تجــــــــــــــــنّن من الروعة دة غير (أهلي الحنان)
والباقي إنت شفتو بي عينك يا هندسة , بس بالجد من آخر مرة ليكم فيها إتغيرت وإتطورت تطوور
زاد كل المعالم لي أجمل ,, غير الجمال الأصلا" هو فيها ..

خالد عمر إزيك ياشاب قلت لى بورتسودان شنو؟؟؟؟؟؟؟ حب بالفطره ومالا؟ فى الفتره الاخيره اتطورت ولا شنو؟؟؟؟ دا ما محمد طاهر ايلا ياخ!!!!! الناس احسن تكون وااااااااااضحه والجعلى دا ماغريب مننا وفينا.
ماتعملا لى كورنيش وبتاع الراجل كان سؤالو واضح ماذا تعنى بورتسودان وانا اكرر ماذا تعنى لك بورتسودان؟؟؟؟؟؟ بعدين ياخوى ماتخاف الناس دى كلها اتبنبرت!!!!!!!!

بسسسسسسسسسسسسسسملاي ؟!!

أولا" حبابك ألف ونص وخمسة ..

والله أنا ما عديت الجعلي غريب (عيب عليك الكلام دا)!!
ولا خايف من البنبرة ..

والناس ال في المنتدي ديل عــــــــــــــاديهم زي أخواني وأكتر ؟؟؟

بالنسبة لي بورسودان (الرشيد قال لي كلمنا كتير) وكلمتو كتير !!!

- طبعا" محمد طاهر ايلا ,,, يعني حيكون كمال شداد ؟!!

ماذا تعني لي بورسودان ؟؟ دة سؤالك ال وأكرر صاح

كتير ,,, عندي أصحاب فيها وزكريات ,, كورة وشلليات

وليالي سمر صراحة لا تنسي ولن تمحي من زاكرتي مهما حييت

بالرغم من أنو دخولي لها كان في الإجازات إلا إنو كنت بستمتع جد وأنا فيها ...

خالدعمرحسن كتب:- بورسودان ,,, أحبها بالفطرة .. ..

والله ياخالد الحب البفطره دا مابجى بى هينه !!!!! وعلى ما اذكر اخر زياراتك ليها كانت طويله شوووووويه!!!!

الرشيد وسلمى

الزول دة جديد في البنبر

ما تحكوها لمن تجيّبوها الدم

وعلى رأي "نظيم شعراوي" في "شاهد ما شافش حاجة":

كفاية كدة وما تودوناش في داهية

صاح ,,, سمعنا آخر مشية ليك كانت طويــــــــــــــــــــــــــــــــــــــــــــــــــــــــــــــــــــلة,,,,,,,,,بنبرة جد!
انت قايل البنبرة دي ساهلة ,,,, طويلة لي شنو؟
اعجبني مصطلح سلمي ,,, لكن الغريبة ما تسمع الفصاحة دي والله هي ما اتبنبرت ولا حاجة. تكون مزعلاها بنبرة الرشيد,,, لكم الود.

والله يالرشيد وميرغني أكيّدما بجي بي هينة,, لأني بمشي وبجيها من سنة 1982م بس ؟!!

بالنسبة لزيارتي الأخيرة لأنو كنت عارف نفسي ما حا أرجع ليها قريب عشان كدة طولتا ..

شهرين وإتناشر يوم بس

رغم تجربتك القصيرة جداً معاها:

أثر الغربة على حاجات خالد!!؟؟؟

وهل لو طُرحت ليك أي خيارات بديلة بالسودان -مستقبلاً- حتختار الغربة برضو؟؟؟

شايفاك شاكي من برودة البنبر.وأنت الآن تعد ضمن (المغتربين).هل صار لقاء الحبيبة(وتكوين أسرة على المدى البعيد) حلما أقرب للتحقيق أم العكس؟؟

إزيكم يا شباب؟هيثم يا اخوي شايفاك شغال دفاع الراجل قال كلو آذآن صاغيه مااالك إنت ضايق المره.لك الود

هيثم على الشفيع كتب:رغم تجربتك القصيرة جداً معاها:

أثر الغربة على حاجات خالد!!؟؟؟

وهل لو طُرحت ليك أي خيارات بديلة بالسودان -مستقبلاً- حتختار الغربة برضو؟؟؟

أيوة كدة السؤال الصريح مرييح !! وبجاااااااااااااااابو .. تش!

والله يا هيثم رقم حداثتي بها إلا إنو وللأسف بدأت خصما" سالبا

وينحصر دائما" في الافتقاد ,,, إبتداء" من الحي والدافوري ولمة الفرد والأصحاب ,,, ومرورا" بالبروود في كل شي حتي ردود الأفعال ,, ووقوفا" عند الحسابات التي تجبرك علي أن تحسب حتي خطوات قدميك ..

وما خفيّ أنييل علي قول المصريين!

دة كان بالنسبة علي أثر الغربة ... علي حاجاتي .

بالنسبة للبدايل ,,, لو لقيت برجع هسي قبل بكرة

انصاف علي الشفيع كتب:شايفاك شاكي من برودة البنبر.وأنت الآن تعد ضمن (المغتربين).هل صار لقاء الحبيبة(وتكوين أسرة على المدى البعيد) حلما أقرب للتحقيق أم العكس؟؟

والله يا إنصاف لا هو بالقريب ولا هو بالبعيد ...

بالنسبة لي شخصيا" ,,, وصراحة" ,,, في إلتزامات لازم أوفيها تجاه البيت ..

بعدين الحبيبة دي ,,, تصــــــــــــــــــــــــــــــبر بس

لو إنتهيت من إلتزاماتي دي ,,, هسسسسسسسسي بمشي أعقد عليها وبتلتلكم للجية ..

الاخ خالد/ الغربة تاني ,,, ما ملاحظ انها خلتك بكاي وجرسة اكتر من أول؟
لماذا ؟
وهل هي حسنة أم سيئة من سيئات الغربة؟
القروش بتحسبها زي أول ولا لا؟
حاسي إنك درجة رابعة ,, ولا لا؟
الناس شايفهم زي أول ولا لا؟
هل لديك برنامج زمني محدد للاغتراب والعودة ,, ولا البرنامج مفتوح ,, لحدي ما نشوف البيحصل شنو؟؟
هل تحس بأن قرار الاغتراب الذي اتخذته صحيح أم لا؟
علل إجاباتك
الزمن ساعة
لك الود.