أعمال خاصة

الاخ/ هيثم ,, قرأتك هذه المره بتمعن,, وشربت ببطء شديد" مصا وليس عبا"وبتلذذ,,ولكن هذه المقاطع احسست انها تخصني وانك لا شك قد سرقتها مني قبل ان استطيع قولها:

إبكِ ... ولا تنس الندم

فالحلم غادر أرضه ..

وبقيتَ وحدك بانتظار المعجزات

أضعتَ قلبك في متاهات العدم

والحزن – عاد بجوقةٍ – صخبٌ يصيبك بالصمم :

( لا ...

لن تعيش ولو لبضع لويحظاتٍ

دون تبريحٍ ... وغم

وواصل وما تشتغل بيهم ,, جد جد عندك قارئ,, لك الود.

الهيثم ازيك ياود أمى؟لا تنكر انى كنت من قراءك المواظبين ايام الجامعه والبال الخالى صاح؟وكنت بحفظ كمان لكن اجارك الله بقيت لا افقه اى حاجه والورقه والقلم بشوفهم اول الشهر لما اكتب احتياجات البيت لابو العيال لكن يا عزيزى تظل كتاباتك هى الاجمل والاحب الى نفسى عما سواها اوعدك انى ارجع اقرا واواظب زى ما كنت وبارك الله فيك وفى المنتدى وقبلكم سيدنا المرغنى.لك الود

ميرغني ، سلمى حبابكم

سعيد أنا ولا شك بوجودكما على صفحات بوستي الخاص ولا أمل تكرار بانتظار ما هو أكثر

مع الود

ميرغني بعدما اتجاوزت تعليقك واكتفيت بالشكر ، لقيت روحي عاوز ارجع ليو تاني

وخطر ببالي مقطع أغنية وردي {الشايل هموم الناس وهمو العندو غالبو يشيلو}

ياخي بعد الشر عليك ،،، نحن أصلنا مرقنا للزهج والدبرسة -كان زمان كان هسة - ولا نرضى بزيادة أعداد المدبرسين والمتشائمين بالمنتدى

عُد مبشراً بالتفاؤل والأمل كما عهدناك و...........خلي لينا نحن السوداوية

لوكنت بسف عايزه ليها سفة وجغمة كمان لكن ما علينا.
صراحة حاجة تعجب وتكيف كمان.
تصفيق حار يصم الاذان يا استاذ هيثم واظن ان ميرغني سرق التعليق مني . امرنا لله كل حاجة عايزنها يجي واحد يخطفها . حتي التعليق يا المغتربين خليناها ليكم الخطيبة لحقتونا لحدي هنا؟
اشكرابو اهلك استاذ هيثم.

الله يديك الفى مرادك يا أبو ياسر الشفيع والله كلنا بنحب الشعر والشعراء لكن بت الكلب الغربة مسخت علينا كل شى وشغلتنا الهموم والديون عن كل شى جميل لكن أقول ليك كلام زى مابيقول حافظ الشيخ انت هبة الله لهذا المنتدى وعليك الله كتر لينا منو لانو نحنا زهجانين وعاوزين البيسوقنا للحاجات السمحة وتانى الله يديك الفى مرادك ويدينا




والله انا مصر بكرة أحلى وأشعر

قرفان وبكور

منورين البوست عدييييييييييييييييييل كدة

وبانتظار رجع صداكم دائماً

مع الوعد بالمواصلة

كل الود

لكن تعال دقيقة ياقرفان

أوع يكون التعليق السرقو ميرغني إنك القائل(لا........ لن تعيش ولو لبضع....الخ)؟؟؟؟؟

إنتو مالكم ياناس؟؟!؟؟؟

أنا قايل روحي المدبرس الوحيد في الدنيا دي

القصيدة القادمة كتبت ايام الجامعة بمناسبة تخرج صديقة عزيزة لي ،،، لكن بعض المغرضين قالو إنها كتبت بسبب "شاكوش" ........هي بين ايديكم ولا يضيرني اي الحديثين سيقنعكم إذ أني من انصار(ينشد الزمار ماشاء......وكل بهواه)


قافــــــــــــية....
....بلا كلــــمات

( الى.....صديقة)

(1)
بلازادٍ..

بلا شمسٍ...

سأكمل هذه الرحلة

تحاصرنى جراحاتى

أصوم عن إبتساماتى

أصلِّى دونما قبلة ....

........

فكيف أضأتِ أيامى...

.....ـ كمثل البرق ـ ..بضع ثوان؟؟

وكيف رحلتِ عن ذاتي ...

....بلا استئذان ؟؟؟

وكيف رضيتِ أن أبقى ...

..بدونك وسط هذا الموج لا سفنٌ ولا شطآن ؟؟

ألا ما أتعس الدنيا ....إذاكانت..

..سماءً لا غيوم بها

وأرضاً عشبها الأحزان.

(2)

أنا أعلم..

بأن حياتنا غربة

ونحن بدربها أغراب..

..أنا أشهد ..

بأن زماننا كذبة

وأصدق وعده كذاب

أنا يا بئر أسرارى

وحين تشردى دارى

صنعتك من معاناتى...

فكنتِ الأهل والأحباب

ولكن يا صديقة عمرى المنكود

لكن فوق ذاك وذا.....

....حظوظى...

...توصد الأبواب.

( 3)

وها انا ذا وحيداً فى بحار الصمت

بعد نواك

أسائل كل من ألقى

بدربى علَّه يلقاك ..

أدور ...أعود..

يسحقنى مجئ الصوت

ـ بعد اليأس والآلام ـ

يملؤنى رنين صداك:

" هى الكأس التى صبَّت لنا الدنيا

فذق ..... واشرب ..

ـ هنيئاًـ

ما جنته يداك"

(4)

وداعاً...

كنتِ لى فجراً ...نقى الروح والقسمات
وداعاً..

كنت لى بدراً ...ألان قساوة الظلمات

وداعاً...

فالوداع الآن يخنقنى...

وتهرب من يدى النجمات

لتبقى الامنيات بها:

لك الآمال......والأحلام.....والأفراح......لك الدعوات

ولى من بعدك الوحدة ...

....أنين الحرف....

قافيةً .....

..... بلا كلمات

شنو يااااااااااااااااااااااا خوانا؟؟؟؟

ميرغني ذااااااااااااتو خلانا؟؟؟؟

الدوام لله ................وبرررررررررضو بواصل مابقيف

إنشالله ما علقتو ذاتو

العزيز هيثم لك التحية علي الاعمال الجميلة الرائعة
اما بالنسبة للرد علي القصيدة الاخيرة
ميرغني خلي امكن الراجل فتر من الرد علي شواكيش اولاد الشفيع اسمع انا قاصد معاوية عديل وكان راجل خلي يرد

لك التحية ولآل الشفيع.

هيثم على الشفيع كتب:ولكن يا صديقة عمرى المنكود

والله ياهيثم قدر مانحت راسى عشان اتذكر صديقة عمرك المنكود دى مالقيتا !!!!!!!!

الجعلي حبابك ومنور البوست خااااااااااااااااالس

أنا قايلك مالقيت عمري المنكود ذاااااااتو..!!!

هن كتار الصادقن عمري المنكود لكن دي أسأل عنها مدامك(الزمن داك ماكنا بنعرفك كويس)

ياهيثم مايكون دا الجنووووووووووبى!!!!!!!

مقاطع شعـــــــــــــــــــــــــــــــــــــــــــــــــرية

وكنوع من التغيير ومحاولة لجذب جمهور لهذا البوست سنقدم فيما يلي مجموعة مقاطع شعرية لهواة ال(Take Away)

ولنبدأ:


وأعود تحملني الغيوم السود

انزل كالمطر

وأعود أبحث عن مرافئ هانئاتٍ

لايعذبها السفر ...
وأعود طفلا" ..

ثم كهلا" ..

ثم طفلا" يستبيح حمي الخطر …

عدواً وراء سراب ميلادي

تعاندني رمال الصبر

تسقيني كئوس المر …

… يلجمني القدر


-

ونواصل هنا المقاطع الشعرية

عسى ....و....لعل

لستُ السراب بقيعة ...
ذاك الذي .. للظامئ المنهوك يبدو ماء سعد
دمنٌ أنا ...
... صمتٌ ظلامٌ بعضه من فوق بعض
إن أخرج الرائي يداه ...
فلن يجد الاَّي .... وعد
نبضٌ تمزق خلف ميلاد الضياء
ولم يلد
أحدٌ ......... أحدْ
فردٌ ......... صمدْ
لم يُدمن من الدنيا ولم يحتاجها
يوماً ..... فجازته الوفاء بغدرها
من
بعد
اعراضٍ
.... بصدْ

والحمدلله الناس طفشت من البوست دة

لكن أخوكم صامد وماااااابقيف

للمقطع أعلاه رد جميل جداً كتبته أختنا الشاعرة ال"جميلة" -سابقاً-
(وسابقاً هذه تقبل للإثنين ، كونها أختنا ، وكونها شاعرة جميلة،إذ صارت من رواد الشعر الذي لا أحبه ولا أفهمه)
نجلاء عثمان
سأورده قريباً باذن الله رغم أنه ليس من أعمالي الخاصة لكن (الأشياء يذكر بعضها بالبعض)

مع الود

الاخ هيثم الشي الجميل ما بحتاج تعليق

لكن يا اخوي انت قاصد تطفشنا بي الون ..... ده

مرحب حباب الوليد

ياخوي كلام المجاملات دي خلينا منو ....، ومابعفيك من التعليق ،،حتى لو تقول : اللللللللللله

بعدين معليش ، نغير ليك اللون وكت عنك منو حساسية (أزرق كويس معاك؟؟؟)

كنت قد وعدتكم بنشر رد جميل لصديقتنا نجلاء عثمان التوم على آخر مقطع شعري نشرته (لست السراب بقيعة....) وها أناذا أفي بوعدي ولكم أن تستمتعوا بهذا النص الجميل الذي كتبته وأرسلته لي مع صديق مشترك بعد قراءتها للمقطع المذكور ونحن لم نلتق - حينها - بعد....

لست احتمالاً للوصول فلا تمل
سأظل أرحل فيك حتى يكتمل ........هذا الجنون
أو.................يجن الإكتمال ، أوَليس ذاك باحتمال؟؟!!؟؟
فمن أنا؟؟؟
أنا فكرةٌ في الخاطر المذهول تمعن في الهرب
صخب الرحيل الى الرحيل بلا صخب
عبث ابتعادك عن حواف البوح وهم ، فالبوح منِّي يقترب
لم تدمن الشكوى؟؟
لم تألف الإصغاء إذ تشدو حواري البحر للموج التعب؟؟
ماذا ستفعل؟؟؟ والحقول البكر ترقب إشتهاء
ماذا ستفعل بالنداء؟؟؟
أوتنثني....؟
والخطو منك يردد الشوق الندي ...فينسكب
ضوء الحواري
كلما نثرت جواري...........وفي يدي نجمات حب
في ضوئهن العشق يغفو ..،...يستفيق على جنوني
عندما تغتالني الأفراح فيك فأرتمي
في صدرك المعروق.....أبكي........أنتحب

إنت شايف شنو؟؟؟؟

لااااااااحظ الكلام دة قبل 16 سنة!!!!!!

ميرغني حبابك

أكره جداً شرح أشعاري لكنك قلت "غلبتك عديييييييل"

هي أصلاً يا سيدي(رحيل ممدود كخصل الحب والإشتياق) والحب فيما نعلم لا نهاية له وكذا الأشواق أي : يكون هواك مولد لرحيل لا نهائي نحو..............

وقع ليك ولا أعيدو ليك؟؟؟؟؟؟؟؟؟

وقع ,,, مشكووووووووووور ,, يا حلو ,,, تعرف يا هيثم الزول بيصدي زي الحديد ,,, أعذرنا ,, صدينا ,, وكان مغالط أسأل كجنكي.... لك الود ,, وواصل.

الاخ هيثم / سؤال حشري جدا


وين الزولة دي؟؟؟

لك الود.

أولاً السؤال ما حشري خالس

تانياً ليس المسئول بأعلم من السائل(بيكون آخر مرة اتلاقينا قبل 11 سنة كدة)

لكن العارفو إنها للأسف الشديد فارقت الشكل دة من الشعر سواء اكان الدارجي أو الفصيح وبقت تكتب زي ناس الصادق الرضي وعاطف خيري وبقية كتاب الصفوة-على حد زعمها هي ذااااااتها-

ونواصل المقاطع الشعرية

فيم انتظارك ؟؟
والقلوب شواهد للموت ..
لا للموتي ثبَّتها .. الرهق
فيم انتظارك ؟؟
والشواهد تستغيث ...
فلا تغاث براحةٍ ...
... غير الأرق
دع عنك أحلاماً يطول فراقها ..
.. وارحل ...
فضوء الشمس شرقاً
غير
أشرعة
الغسق .

- الخرطوم 1995 -

هيثم / نعم للميلاد ,, والف لا للرحيل ,, استوقفتني الدعوة الاخيرة أكثر,,
فالمداخل تستغيث ...
فلا تغاث بنأمة ...
... غير الألق..

فلا تحرمنا من هذا الالق حتي لو سمعتك وحدي. لك الود.

إطمئن آخوي: (أني قاااااااااائد) وترجمتها(أنا قااااااااعد)

وسنواصل باذن واحد أحد

وكت المقاطع ما جابت زباين زيادة نرجع لي قصايدنا والله يقدرنا نواصل....


أعتقد ..أنهم ..يسمّونه…
..غنـــــــــــــــاء


• نغمة شاردة :

لا أحلي منكِ ....
... الاَّكِ
لا أعذب منكِ ...
... الاَّكِ
شيطاني
أنتِ
وملاكي.
• اللحن :

شوقاً اليك – حبيبتي – ..
رحَلَتْ دُناي وبتُّ أحترف النحيب
شوقاً لدفئك – أنتِ – عشق مدينتي ....
غامت رؤاي وصرتُ ابترد اللهيب
مهلاً ....
... فضميني الي عينيك قبل ضياع أغنيتي
وناديني بلا صوتٍ أكون المستجيب .
هل تحفظين السر ؟؟!
إذاً فلننتظر ...
... حتماً سنتساقي كئوس الحب
بعد لقائنا .... شعراً ونثر
فالسائرون بلا هدي
والتابئون بغير ذنب
والعاشقون ذري التعب
هم مَنْ يقاسمني هواك – مليكتي –
مدَّاً ... وجزر
فالسائرون بلا هديً ...
كنتِ الدليل لهم ... ومرفاهم إذا ضاع الأثر
والتابئون بغير ذنب ...
كنتِ أنتِ ذنوبهم ..
تلك التي ...
.. ما أن رآها ربهم ...
.. توَّاً غفر
والعاشقون ذري التعب ...
لم يتعبوا ..!!
بل أنهم عشقوك آلهة لهم ...
وتقاسموك ... قصيدةً ... ورداً
... زمردةً ... فبدر
فأصابهم تعب السعادة
بعدما اختاروا الرفيق ... وبعده ...
ركبوا السفر
هم مَنْ يقاسمني هواك – بدنيتي –
وبدون حبك لن أتوب .. ولن أُنيب
رفقاً ....
... فضميني الي عينيك ..
قبل قيامة الموتي
وناديني ..
.. بلا صوتٍ ...
... أجيب
- الخرطوم 1994 -

لله درك يافتى..الجديد بالله..أم نضب المعين بفعل شمس السودان اللافحة؟؟أم غطته الأتربة التى تغطى سماء أمدرمان؟؟اااه ياوطن الوجع..غن يا ولدى.لعل وعسى..

مرحب والله أخونا كنجكي والمنتدى كلو منور خليهو البوست

أثق ثقة عمياء أن معيني لم -ولن- ينضب ولكنها إستراحة أبذل المستحيل لأن تكون قصيرة

إنتظروني

واصل ياهيثم ,,, ما تقيف ,, ما تقيف,,, لك الود.

ميرغني ابراهيم عمر كتب:واصل ياهيثم ,,, ما تقيف ,, ما تقيف,,, لك الود.

ماوقفت
لكن فترت خلااااااااااااااس

يدك معاي عشان أرجع (نحلة المنتدى) زي ما سميتني

يا سعادة المدير

البتاع دة مالو بقى عامل كدة؟؟؟؟

المشاركات الأخيرة صغيييييييييييييييييييييرة ليه؟؟؟؟؟

والله ياهيثم المدير ما فاضى لينا يجغم ساى شى لحم وشى لقيمات وشى.... الصفحة تجيبها بى جاى تلقاها مشت بى قادى وبينى وبينك من عمل اللون ده النحس لازززم المنتدى قال سادومبا قال ؟؟؟؟؟؟؟؟؟؟ظ

الاخ هيثم الشفيع/ لك التحية ,, حاولت أن أميز مشاركاتك في الاعمال الخاصة بترتيبها كمدونة ,,, ولكن ان كنت تري غيرذلك نحن جاهزون,,,,لك الود.

الاخ/ عماد الشفيع ,,, خلي الحسادة... الحاجات دي لمن جيت بركت شهرين هنا في زول سألك؟؟؟ أما اللون والله لبني وما لون الهلال ولا حاجة,,زول يضيع شقتو الساكن فيها حيعرف لي لبني من أزرق؟؟, ماتبقي لي زي بلة جابر,, لك الود.

ياخوي رجع ليناالحال القديم

إنت قلت لما تضغط على المشاركة بتتكبر ودة ما بيحصل عندي
عليه

خلينا في الجن البنعرفو

آللخو!!؟؟

ماقلنا رجعو لينا الجن البنعرفو عشان نواصل ليكم

ونعود اليوم لنواصل نشر الأعمال الخاصة بعد توقف استمر لفترة ليست بالقصيرة

والقصيدة القادمة كتبتها وأنا بعد "برلوم" وهي للصناعة أقرب منها للإحساس لأني استعرت فيها إحساس صديق لي تعرض لشاكوش حينها.....وهي طبعاً من قصائد البدايات:

بكائيـــــــــــــة ...
.. علي أطـــــلال قـلــب


(اليه ....
... مَنْ كتبت لأجل تعزيته هذه القصيدة)


وبعدما ...
... أصبحت أمهر سابحٍ
في موج شعرك
بعدما ...
.. عبَّقتِ كل الأزمنة
بأريج .. خدك
بعدما اعتادت جفوني ...
.. أن تظل مُسَّهدة ...
في قرب بعدك
ساهرة ...
في بعد قربك
قد هتفتِ أن الرحيل ..
.. هذا الذي ... أمقته الاَّ ...
حينما أسرج ركابي باحثاً ...
عنك ... وفيك
وكما قيلت لغيرك ........... لا عليك
فأنا الذي ....
.... عرف الحقيقة بعد أن غنم الهواء
وأنا الذي ...
... عشق السرابات البعيدة ... والخواء
أهواك يا حبى ... وياحلمى ... ويا معنى معانى الكبرياء
أهواك ياجرحى الذى ما عاد ينفعه
التوجع لا البكاء...
وأظل دون الأمل منى ..
أنتظر أمل الشفاء
يفتر ثغرك باسما..
فأضيع في الأضواء ؛
ينساب ليل الشعر ...
تغشانيا الظلماء؛
لدن قوامك فارع ...
وحدي تعيس ضائع ..
فلتنقذيني حلوتي من ظلمة الأضواء
ولترحلي .....
ترعاك آلهة السماء
وأظل بعدك حائر ....
فأنا الذي...
لولاك لم يدر معاني العشق في زمن الضياع
لولاك ما سارت سفينى دون موج أو شراع
أو ترحلين..
وتتركيني..
..في مفازات الوداع؟؟؟



الخرطوم –1992-

[quote="هيثم على الشفيع"]ونعود اليوم لنواصل نشر الأعمال الخاصة بعد توقف استمر لفترة ليست بالقصيرة

والقصيدة القادمة كتبتها وأنا بعد "برلوم" وهي للصناعة أقرب منها للإحساس لأني استعرت فيها إحساس صديق لي تعرض لشاكوش حينها.....وهي طبعاً من قصائد البدايات:

بكائيـــــــــــــة ...
.. علي أطـــــلال قـلــب


(اليه ....
... مَنْ كتبت لأجل تعزيته هذه القصيدة)


وبعدما ...
... أصبحت أمهر سابحٍ
في موج شعرك
بعدما ...
.. عبَّقتِ كل الأزمنة
بأريج .. خدك
بعدما اعتادت جفوني ...
.. أن تظل مُسَّهدة ...
في قرب بعدك
ساهرة ...
في بعد قربك
قد هتفتِ أن الرحيل ..
.. هذا الذي ... أمقته الاَّ ...
حينما أسرج ركابي باحثاً ...
عنك ... وفيك
وكما قيلت لغيرك ........... لا عليك
فأنا الذي ....
.... عرف الحقيقة بعد أن غنم الهواء
وأنا الذي ...

وأظل دون الأمل منى ..
أنتظر أمل الشفاء
يفتر ثغرك باسما..
فأضيع في الأضواء ؛
ينساب ليل الشعر ...
تغشانيا الظلماء؛
لدن قوامك فارع ...
وحدي تعيس ضائع ..
فلتنقذيني حلوتي من ظلمة الأضواء
ولترحلي .....
ترعاك آلهة السماء
وأظل بعدك حائر ....
/quote]

القصيدة كما عودنا هيثم رائعة ومليئة بالمعاني الخبيئة دائما ,,, ولكن لا ادري هيثم الابيات اعلاه المقتطفة من القصيدة تبدو الصنعة فيها ,,, وتفتقد روح كبقية الابيات ,,مجرد احساس,,, لا أدري لماذا ؟؟

شكراً يامنقة على المرور
لكن إنت آخوي قريت القصيدة بس وما قريت الكلام القبلها؟؟؟؟
قلنا ليك كتبناها ونحن برالمة - يعني لسة مبتدئين-
ومستلفين فيها شعور زول ماخد شاكوش ،

وبراااااااااي قلت هي أقرب للصناعة منها للإحساس ....تجي تعيد لي كلامي؟؟؟

إنت كنت نعست ولا شنو؟؟؟؟؟

ياهو الكبر والطرطشة بتاعة ناس عماد الشفيع ,,, وعاملها اقتباس كمان ,,, لكن برضو مكسب احساسنا لسه بخير ,,, وحقو برضو انت تكون سعيد لانو القاعدين نقولو ليك قبل القصيدة دي كلو صاح ,,, مش كدي؟؟,, لك الاعتذار ولو انو ما بيننا.

بغض النظر عن احساسك الحزين او الفرح فيما تكتب ,,,
ومع احترامي لردود (ميرغني) ..
ودون انحياز . . . أكتب يا ود عمتي أكتب حزينا" كنت
او فرحا" ..
وعلي الطلاق انت كان (قحيت) ساي (قحتك فيها تعبير ومعاني)
و أنا بحس بيها في (سدري)
خلي كمان تكتب ؟!!
وانا في انتظار المزيد و ...... (المدكككككككن)
فرجاء" لا تبخل او تكسل ..

حرّم معاك في كل القلتو يا خالد لكن البقنع الد.... شنو؟

لك وله الود.

ميرغني ابراهيم عمر كتب:
لكن البقنع الد.... شنو؟

خالد عمر شكراً على المرور والإطراء مع الوعد بالمواصلة

ويا ميرغني:

قطع شك إنت قاصد (الدود) القرقر وحبس الدرب

صاح؟؟؟