إشلاق دوت كوم....ishlag.com

اهه يا معاوية , اولاد الاشلاق كانوا لاعبين في ميدان المعهد القريب من الاشلاق,,,وقاموا ناس الشبيبة جو يتمرنوا ,, قاموا اقترحوا يلعبوا لعبة معاهم,,و من ضمن الفريق كان هناك اللاعب القدير وليد الزبيدي,,, اهه قاموا حسبوا ضربة جزاء صحيحة لاشلاق البوليس,,اصر والح اخونا وليد الا يشوت البنلتي,,, الحارس كان اسامة بتاع الشبيبة{هسه في جده} فشمر وليد عن فخذه,,,و رشا ليك الكورة,,, انقر ما طلعت جدعة,,, واخونا طبعا خجلان,,, قام اسامة قال ليهو: انت بي جدك يا ابو الشباب!!!! طبعا من غير استئذان من الحكم طلع والحكم ما خلي زول يخش بدلو لانو طلع من غير اذن,,,,,,, بقوا لاعبين عشرة وضايعه ليهم ضربة جزاء ,,, اما اخونا فعلي طول علي البيت ولم يخرج الا صبيحة الغد.... وطبعا انا حأواصل قطيعة في وليد لمن يخش... ايش رأيكم

(صادوه)...اول حاجة حاعلق على(ايش رايكم)...انت يا مرغنى سعودوك متين؟؟؟(
نرجع لحبيبنا وليد او(سليمان عبدالقادر)..هو كان مالو ومال ضربة الجزاء؟؟ واحد باك وكيشة ضيع فريقو..
صدقنى انا ما كنت قايلو كده...تعرف ذكريات وليد مع الكورة كلها كدة...ضيع ضربة جزاء....ضيع اولاد الاشلاق...ادى ود ساتى كف...دة لاعب شنو ده؟؟؟..اعتقد ان ))وليد الزبيدى هو احد اسباب تخلف الكورة فى السودان...(طبعا السبب التانى هو ابوبكر الزبيدى..والتالت كمال حامد والرابع كمال شداد..

اخونا كجنكي / تلقاها عند الغافل,,,,,, كنت واعي جدا وانا بكتب في ايش رأيكم دي ,,, وعارف انو واحد ممكن يربطها با قامتي بالسعودية ولكن , ايش دي اسأل منها علي الشفيع, في الشمال لا يقال ايه بل يقال ايش وليش{ بدلا عن ايه وليه} وشق ايش قول لي مروح ,و وقدر ايش شنها,,, ومسدار تيش ,,,,والمهم صادوه دي اظنها تقال في طابت الشيخ عبد المحمود,,,, اما موضوع عمك وليد , نحن يا دوب بدينا , الغريق لي قدام وأحسن ليهو يظهر,,,,,,, حدثنا عن قدورة يا رحمك الله. لك الود.

اهه شبو { اخونا عبد المنعم شبو} وبي المناسبة هو داخل في التصنيف بتاع اصهارهم بتاع سلمي ولا لا؟
اهه شبو بعد ايام العسكرية, يوم ماشي في الخرطوم لاقاهو واحد , يشيل ويسلم وكيف يا جنابو,,,,وووو . بعد ان ذهب الراجل الي حال سبيله التفت شبو الي مرافقه وقال: الجنابه دي اصلها ما بتروح, تحياتي لشبو ووليداتو وام وليداتو.

بالمناسبة كان مرافق شبو : هيثم الشفيع

معاوية : قصة المرافق البيحكو ليهو القصة ذاتها ذكرتني قصةلاحد اصدقائنا دفعة معاوية: اهه صاحبنا دا مسمنو تلش,, في يوم من الايام,, كان له غرض بالسفارة البريطانية بالرياض,,, وهو جالس منتظر دورو,, كان جنبو واحد سوداني فقام سلم عليهو ,, وعرف انو الراجل شغال في حتة اسمها عفيف,,, فقام سألوا عن واحد من حلتهم { قريبو} يعمل في عفيف وعن اخباره وكيف عامل وبالله سلم عليهو كتير وقول ليهو فلان دا مشتاق ليك جدا وبسال عن اخبارك ,,, الراجل وعدو انو يبلغ قريبو التحايا ان شاء الله,,,, وبعد ان اتم كل منهم غرضه في السفارة وبقوا ناس وداع تب,,,,,,,, الراجل بتاع غفيف قال ليهو:طيب يافلان مع السلامة وزولك البتسأل منو سلامك وصلو ,,, لانو ياهو انا ذاتي,,,,,,,, مش تلش!

كنت انا وياسر الشفيع نتعاطى التمباك
كنت فى الرصيرص وعماد فى السعودية وياسر فى مصر..
اتفقنا ان نلتقى فى ام درمان
جاء ياسر وعماد اولا..عدة ايام وياسر لا(يسف) قدام عماد...جئت انا الصعلوق الجلف القادم من الرصيرص..
فى اليوم التالى اخذنا عماد الى السوق الشعبى فى عربية عمى عبدالرحمن(يرحمه الله)
نزل عماد وقال :دايرين حاجة؟؟..ببساطة قلت ليهو:تمباك..عماد جاب التمباك وانا دردمت سفتى وختيتا..اتململ ياسرٌ(قاعد جنب عماد قدام) ...
فى النهاية قال لى::اسمع جيب سفة...عماد استغرب..عاين ليهو..قال ليهو: انت بتسف؟؟.رد ياسر:ايوة...قال عماد:طيب ليك كم يوم معاى ما سفيت مالك؟؟.
قام ياسر قال ليهو:محترمك يا عماد..فقال عماد: تحترمنى انا يا حيوان؟؟؟؟؟؟؟؟؟؟

اخونا العمدة,,,,,,, لمن لا يعرفه , زول زي موية المطرة,,,, لا مواد حافظة او مساحيق تجميل{ ربما كان هذ هو السبب في معاناته,,,,, والاحترام يحسبه تكلفا وتصنع, وفي هذا اساءة له,,,,,, رحم الله ذلك الزمان والرحمة لاخونا ياسر,,,,, كان ايضا كما العمدة وان اختلف القالب قليلا,,,,,,, له ولنا الرحمة.

يشهد الله كان زمان زين وسمح لاتزييف ولانفاق ولا خساسة ولا0ولا ولا 000 الحياة نعم فيها معناة لكن والله يا اخوان المعاناة زاتها طعمها حلو طبعا الناس بتستغرب كيف تكون معاناة وطعمها حلو لكن للناس الكانوا معانا وأنا أقصد شلة قشلاق الحصاحيصا ( طيب يامرغنى يامديرنا اشلاق الحصاحيصا وبلاش من قشلاق دى لأنها حتكون ضيقت خلقك ) عموما شكرا مرغنى للكلمات الحلوة دى مع انى ويشهد الله مامتوقعها منك لكن يظهر الخرابة دا أدبك مع انو الكلام سمح لكن شل تفكيرى ؟؟؟؟؟؟؟ولنا عودة مع زكريات الحصاحيصا الحلوة

أما بخصوص ولدنا معاوية ماعايز اوصفه لأنكم كلكم تعرفونه طبعا هوكبيرالمتمردين ومن صغره كده عكس المرحوم ياسر طبعا داك كان زى النسمة ومع ذلك كنت عايز اغيره وأخليه زى الصعلوك دا الذى كان يعجبنى تمرده وطبعا ربنا ستر لأنهم لم نستقر واياهم فى مكان واحد وعاشوا طفولتهم وشبابهم بعيدين عنى ( طبع البقرأ الكلام ده بيقول الجماعة ديل دفعتى لا والله بس الفرق ما كبير ولا ماكده يامرغنى شكرا معاوية بديت تحرك فينا حاجات وحاجات 000000000 ( عبيد كبار فى جامعة ضيقة ) مكتوبة فى باب غرفة معاوية وحافظ الشيخ جامعة الجزيرة

العمدة لك كل الود والاحترام,,,,, كان عجبك كان غلبك

الله يصهر 0000000 يامرغنى شبو شنو الداير تدخلو والله لسه داير ليه 10 سنة ممكن ولدو الجقر يشارك نيابة عنو بالمناسبة دى يامرغنى مرة مشينا عرس فى احدى قرى الحصاحيصا ( عرس منو والله نسيتو وانت ذاكرتك ماشاء الله المهم الحفلة دورت والحلة مافيها كهرباء واخونا شبو كان معانا وطبعا بلدا مابدك امشى فيها 000 زولك من ساحة الرقص لم يطلع وجا الفاصل والفنانين دخلو عشان يرتاحوا ويتذودوا بالوقود المهم واحد جاء شايل البنقز(جنى الدلوكة وقام عرضها على الرتينة عشان يشد الجلد وبعد مسافة قام يجرب فيها وعمل تجربة للجلد بالنقر عليه فما كان من شبو والأ أن دخل الدائرة وبدأ فى الرقص 0000000 وبرضو تقول لى صهركم

من لا يعرف احمد ودفاطنة فهو ابن عمتنا جاء من البلد طازه وشوف القدر يا مرغنى صاحب مين فى داك الزمن على النورعطية أى نعم هو اطرش لكن كان أبوه محسوب من رأسمالية الحصاحيصا المهم يا أخوى كانوا متبارين أحمدودفاطنة وعلىالنور عطية بعد المغرب فى سوق الحصاحيصا وجو بالقرب من سلطان الكيف وكان عمك على الشفيع جالس بين حقتين التمباك الكبار وجاء احمد يتبختر ومده يدو لعمك على وقال ليه بلهجة الشوايقة أدنى سيجارة ضحك عمك على وهنا اتهجم احمد ودفاطنة وفطن للموقف وقال والله ياخالىالسيجارة ما لى دى حقت على النور عطيه ودارت الايام والسنين وقريبا وأثناء جلسة مع عمك على استحضر الموقف وقام حكاه وهنا قام ودفاطنة قال ( والله ياخالى لو صبرت شوية كان تشيتها ) ويقصد السيجارة يعنى كان ولعها بالله عليكم الله شوف الزمن داك كان كيف حاليا الطالب يسف من بالاستاذ والولد يسجر مع ابوه وفى ناس كأساتهم واحدة بالله يامرغنى سيجارة ابو نخلة كان بخمسها كم واحد وبهذه المناسبة ربنا يرحم صلاح السر حسن نصرالله ز000000 الحم000000 وب0000000000000 بره

اخونا عماد/ نبدأ بالترحم علي روح اخونا صلاح السر حسن نصر{ ابيض القلب وصافي السريرة} ان الدنيا يا عماد لا تأخذ الا الاخيار,,,,,, ما عارفها مقعداني لي يوم الليلة في شنو؟,, قصة يا هيثم ومعاوية تخص عماد الشفيع,,,,,, طبعا عماد هابش وفضولي{ طبعا انا بتخيلو من صغير بكون ضاق الزريعه وعجين الابري,,,, وكابس الابري ذاتو في الكراتين قبال يبلو,,,, وبكون قطع شك ضاق العجينة بتاعة الخبيز,,, قبل ما يخبزوهو,,, وبكون نوع البرسلوهو يجيب الفول في الجق بتاع الالمونيوم ,,, يغطس العيشة في الفول قبل ما يصل البيت ... وطبعا حيجيهو الزيت المطفح بي فوق كتير,,, المهم انو كان آفة وأسألوا سعاد الله يديها العافية} قصتنا ,,, طبعا كنا ايام الجامعه معظم الوقت في الاجازة معاهو في المسح,,, والزمن داك عمك عبد الرحمن الشفيع {الله يرحمه ويحسن اليه} كان في السعودية,,, وطبعا برسل القروش الليلة باكر تكون انقرضت في الفارغة والمليانة وغالبا الفارغة ,, والتي تكون محض فضول{ سلكيما بي الفرن, المطعم التحت الواطة,,, وهلم جرا} في ذلك اليوم مشينا كبانا المريديان{ هو بوفيه بره المريديان لكن حكاية كبانا دي لجذب نوع صاحبنا} المهم ونحن طالعين من الكبانا دي بعد ما ضربنا حاجة غير معروفة الاسم كالعادة, في الدور الارضي فاتح علي شارع القصر كان في الخطوط الفرنسية,,, قزاز من بره وبنت بيضاء تجلس علي مكتب, ويمكن رؤيتها وانت في الشارع,,, فجأة ومن دون سابق انذار انقطع العمدة جوه الخطوط الفرنسية{ طبعا لابسين سفنجات ولا شباشب ما عارف وقمصان زرايره فاتحة وممكن نكون سافين وحالتنا تغني عن سؤالنا,,, توجه العمده بكل جرأة وسأل البنت البيضاء: بالله طيارة باريس متين,,, فقالت له : الثلاثاء,,,, فقال لها العمدة/ طيب شكرا وانا طبعا مباريه بس,مندهش رغم اني متعود عليه,,,, لمن بقينا جنب الباب اتلفت العمدة وسأل: ود الزبيدى مش صاح باريس دي عاصمة فرنسا,,,, لكم وله الود.

ونسة عجايز ترحب بي معتصم يوسف العوض

اهلا بيكم أهلا باندادي واخواني الصغار

طبعا" انا بتخصص ليكم في قدورة رمز الاشلاق (بائع الليمون) الجرجخيص النبق الرخيص

اهلا يا معتصم/ وشنو انت بادي لينا من فوق,,, انزل تحت شوية وخلي النبق الرخيص دا لي قدام,,, لك الود الكثير.

قدر بينا القدر وجدعنا في بلاد ما بلادنا لكن . ذكر ايام زمان وياحليل زمان وناس زمان كنا ماعارفين نفسنا أصدقاء أصحاب أخوة بس كنا أكتر من كدا . وأضرب مثل الولد السخي بيتو في المايقوما لكن روحو في الاشلاق . والولد عبـد (ابوعبيدة حسن الطيب) اهلو في طابت لكن حياتو في الاشلاق . والولد الثري وعباس ابو لاحظ وعم ميرغني هاشم الظريف كانت بيتوهم كلها الاشلاق . لا فاطمة السر ملت من الحمام بعد التمرين العنيف . ولا بنت الباسبير ملت من كترت كبابي شاي اللبن الظريف من بقر حامد ساكية في جنينة البوليس أيام وأه ياايام

مشينا المركز أول الشهر انا وقدورة والباقر احمد العباس عملنا كشف وجمعنا قروش كتيرة من اباونا واعمامنا البواليس والقروش كانت أكتر من السبب الذى جمع لاجلها وهو ( شراء كفر كورة) المهم اشترينا الكفر والباقي طبعا" كان أكثر وقام أوايدية قدورة بتوزيع الباقي بينا الثلاث لكن انا رفض بس قصبوني لاني نظيف من زمان (دا كلام وبس) وفي أول تمرين بالكفر موديل السنة حدثت مشكلة كبيرة قام جمال السر بأخذ الكفر وحلف بفاطمة السر يلا يقدو . المسكين شال الكفر وجرى بية عشان يقدو كان بفتش علي مسمار قام باقوري جاب المسمار وأنقد الكفر . قدورة حلف بالمرحومة الزينة يشتيكة والله مشينا المركز وفتحنا بلاغ في جمال السر . لكن تدخلت الاجاويد وتم أعتبار الفاعل مجهول وحظ جمال السر كان لي اليوم في السجن

طبعا" يا أخوتي انا مابلوم صلاح أدريس والدكتاتورية بتاعتو في نادي الهلال بس حكاية دكتاتورية الاندية السودانية بدأت مع العم الغالي ( ابراهيم الذبيدي أطال الله في عمرة ) الكان بقفل لينا تلفزيون نادي البوليس من الساعة تسعة لكن ياعم ابراهيم أقول ليك كانت محطة واحدة وكمان أبيض وأسود ولو كان في رسيفر كان عملت لينا شنو

الاخ معتصم / اشكر حضورك الفاعل,,, قضية الكفر دي بتذكرها كويس ,,, اما ملاباسات فتح البلاغ فلا علم لي بها,, لانو لمليم القروش واكل حقوقنا,, كان بالغالب الاعم الطرف الرئيسي فيها دائما اخونا معتصم ,, كل ما يقولوا في تبرعات في المركز ,, معتصم يشتري كراسو بتاع التبرعات من حر ماله وتلقاهو قدام الناس من الساعة 6 في المركز يوم الماهية,, واظن السبب الرئيسي فيما آل اليه حالنا هو حقوق طفولتنا البريئة التي سطا عليها معتصم وامثاله,, نعم كانت المال موجودا والتبرعات تجمع ولكن اين تذهب؟ واقول لكم سادتي انها كانت تذهب لجيوب التماسيح في ذلك العهد { معتصم وامثاله},,,, رحم الله تلك الايام

الاخ / معتصم يوسف لك التحية,,
طبعا يا معتصم لو ما عمك الزبيدي كان بقفل النادي بدري ,, كنا حنكون قاعدين لي يوم الليلة هناك{ ان شاء الله مضامين}..ناس في الثانوي العالي عندهم تربيزتهم براهم ,, بتاعة الكوتشينة,,وبي النهار وكت المدرسة في النادي,, فلابد لكم ,, كان من دكتاتور,,,,
طبعا,, كان يقفل عمك الزبيدي التلفزيون من هنا وتنصب اللعنات علي رأسي أنا,,وكان أشد المعارضين,, اخونا ابوعبيدة والباقر وقبلها حسين الحلبي وهاشم محمد خليفة,,
اما اخونا ود العباس,, وهو كان بالحق زعيمنا في فترة من الفترات فكان اكثرهم مراعاة لمشاعري,, واذكر له هذ{ بالمناسبة محمد احمد العباس دا كان له دور كبير في توجهاتنا لاحقا وكان يملأ فراغ الزعيم في تلك الفترة بعد زعامة قدورة الطائفية,, } وللحديث بقية,,

اخونا معتصم{ النسيم الله يديك العافية} ذكرتني تلك الايام النضرة الزاهية من اعمارنا ,, كانت كل البيوت بيوتنا,, كل الامهات امهاتنا وكل الاباء آباؤنا,,, والفي الجيب واحد طبعا جيب قدورة ,, الله يديهو العافية ,,, وللحديث تكملة.

االاخ/ العزيز معتصم : لقد تم جمع كل ما كتبت عن الاشلاق في ونسة عجايز ,, واظن انه تماشيا مع نوع الحكاوي سنسميه إشلاق دوت كوم,, لكي يتواصل تسلسل الاحداث ولا ينقطع ومنعا للتكرار ,, فالمعذرة

الاشلاق في السبعينات والثمانينات,,,{1}
سادتي ساحاول ان اتذكر بيوت الاشلاق وساكنيها في فترات متفرقة ,,, وقد تختلط علي الاوراق والاسماء والبيوت فالذاكرة ما عادت هي الذاكرة,, كما الايام ماعادت هي الايام ,,, وستكون هناك وقفات قصيرة مع كل شخصية او بيت ,, اتمني عليكم ان تكملوا ما قد يتساقط من ثقوب الذاكرة.
اول ما نبدأ به البيتين المنفردين قبالة معهد التربية,,, وامام الاصطبل وعنبر البوليس,, كان يقطن البيتين لفترة ناس عبد الحكم عبد الرحيم الشهير بالطنيقة,,, واظنهم دناقلة بقوا في هذا المنزل حتي اوائل السبعينات,, ودرس معنا عبد الحكم بالصف السادس بمدرسة الحصاحيصا الغربية,,, وكان معنا اولاد دفعة,,, عماد عبد الرحمن { السخي} , صلاح الشيخ سلمان, وصلاح محمد خليفة{ كان يدرس بمدرسة وسط,, امام سينما الحصاحيصا} كان معنا بالغربية من الاشلاق فيصل ابو زيد, وعوض حسن الطاهر,وابا ذر السري,ومجدي عثمان عبد الهادي دفعة ورانا .
وكان من وراءهم مباشرة حيدر الامين{ جنكل}.سكن في بيت عبد الرحيم لاحقا,, عبد الرحمن محمد عبد الرحمن الشهير { بأب لكة} وزوجته اسيا ,, لم يكن له اولاد ذكور
كان بالبيت الاخر في فترة لاحقة الشاويش عمر علي عبد السلام,, وابنه { دفعة ورانا } المحامي الشهير الان: كمال عمر وامهم كانت حسيبة وابناءهم عصمت وعوض{ التس} واختهم نجاة.سكن بعدهم العم عبد الله سيد احمد { الجمعية} وكان رجلا مثقفا ودوودا باسم الوجه دائما وكان قريبا الي الشباب,, وزوجته سميرة وابناؤهم محمد عبدالله{ الان بالرياض} والشيخ ايضا بالسعودية ودومية وبنتهم فاطمة.... لهم جميعا اطيب التحايا . سكن في فترة لاحقة المرحوم صلاح السر في فترة وجوده بالحصاحيصا, له الرحمة وسناتي علي ذكره لاحقا.
اذا اتجهنا شرقا الصف الاول المواجه لمعهد التربية.. اول بيت كان يسكنه,, القصاص,, وابن اخيه لاعب الوسط القصير
احمد القصاص ,, وسكن معهم لفترة شخص نحيل هادئ كان يدرس بالحصاحيصا الشعبية كان اسمه عمر,,, في هذا المنزل سكن لاحقا,, ال المرحوم /عثمان عبد الهادي ,, وزوجته المرأة العظيمة ابنة رفاعة التي قبلت في كلية غردون ولكن حال زواجها دون التحاقها بتلك الكلية , وكانت المراة الوحيدة في ذلك الجيل التي تقرأ وتكتب ,, وكانت رحمها الله اما للجميع ,, واشتهرت بانها المرأة الوحيدة التي كانت تملك ماكينة خياطة { سنجر}وكانت مشهورة بانها إمرأة تاجرة. رحمها الله,, ابناءها بعضهم عاش معنا بالاشلاق وبعضهم كان قد تزوج او يعمل بمكان اخر,,,كانت بنتها الكبري التاية ثم امنة ثم احمد ثم شمس الدين{ رحمه الله},,, اما الذين عاشوا في الاشلاق بصورة دائمة فعلي راسهم عبد القادر اب اديه او قدورة,, ومجدي { الرحالة} ونجم الدين { اب كشر} والتوم {قرشو} والصغير وقتها محمد واختهم إحلام بت الزينة,,, التي تزوجت لاحقا من ابن عمها فتحي والذي كان مغتربا والسيرة كانت من كسلا,, وزواجها تاريخ تؤرخ له احداث كثيرة,,, قبل ان ادلف للمنزل التالي دعوني اتحدث قليلا عن شخص يجله الجميع وله حكايا كثيرة بالاشلاق :
هذا الشخص الذي تسامي فوق اعاقته الجزئية وكان اتم واكمل مايكون,, انسانية,, حكي لي قدورة انه فقد يده اليمني او نصفها تقريبا اسفل مفصل الكوع بعد عملية بتر يري قدورة حتي الان انه كان يمكن تلافيها,, اذ ان اليد تعرضت لكسور مضاعفة في حادث حركة حدث اثناء سيرة عرس وكانت البصات تدور في دائرة كما العادة في تلك الايام,, كان وقتها قدورة في السابعة او اقل,, المهم في الموضوع ان بتر يده لم تشكل عائقا امام قدورة حتي جسديا في القيام باشياء حتي لايستطيع اتيانها ذوو اليدين,, كان يلعب الورق والضمنة وتجده ممسكا بالضمنة او الورق بكيفية يتذكرها كل من عاش معه,, هذا القدورة مثال للشخص المكافح المثابر أخو الاخوان, تجده في كل المناسبات جمل الشيل والذي يعتمد عليه اباؤنا اعتمادا كليا في الفرح والحزن{ لم تكن الاحزان كثيرة وقتها}
كان قدورة كابتن الفريق,, وهو الذي يقوم بشراء او التنسيق لشراء الكور وفنلات الفريق وطبعا الكور والفنلات بتكون معاهو في البيت,,, كان ينظم الرحلات والمباريات مع الاحياء الاخري,,, كان طبعا يحكم التمارين وان لم يخلو من دكتاتورية. كان يقوم بتجميع الناس بعد التمارين,, ويتاكد
من حضور الجميع يسأل عن الغائب للذهاب للسينما او جولة العشاء اليومية { فول عمك محي الدين وطعمية علي},, كان يكمل ما نقص من حق العشاء ومن حق السينما ,, ويشتري لبعضنا التمباك ,, وحق السجاير,, وكل ماينقص ,, لم يكن متدينا ولكن كان يقف حائلا بيننا وبين اي اعوجاج في المسلك
وتلك كلمة حق,,المعوج والمارق للربي والتلاف كان يساعده في حدود ولكن من كان منا متحفظا كان يراعيه ويحاول جل جهده ان يبقي كما هو. ولقدورة طرف ونوادر سنأتي اليها في حينها,,,,ونلقاكم قريبا,,,

والله يادكتور ميرغني صدقني قدورة كان لينا زمان زي بيل جيتس الان برمجنا وربانا مع اهلنا دافع عننا وصرف علينا وعشانا بفول عمك محي الدين ودخلنا السينما بحق أرباح تربيزة الليمون بس المشكلة ( كل الافلام هندي) بس للاسف نحن قصرنا معاهو الان بقول للباقر وصلاح الشيخ والسخي وابوعبيدة ودكتور بانقا وعماد الخيمة والحاج شبو ولبقية العقد الذي لايعوض (لاتنسو قدورة الرمز) بيل جتس زمانة

اخونا معتصم,,,شكرا لك ,, ولكن يظل ما نكتبه عن قدورة بعيدا جدا عما هو واقع,,,وصراحة خجلت مما كتبت عن قدورة فهو ضئيل في حق الرجل الضخم,,,, والعين بصيرة.

آه يامرغنى ومعتصم هيجتم المشاعر واعدتم الزكريات ويا لها من زكريات والله يا أخوان انا بعتبر فترة الإشلاق اجمل محطة واسعد فترة مرت فى حياتى ولذا اقترح من الأخ مرغنى وما شاء الله له زاكرة قوية ( انا والله لحقت الزينين ) المهم يامرغنى ابدأ لينا بيوت الاشلاق من اول بيت من ناحية السوق ( السرحسن نصرالله رحمة الله عليه ) لآخر بيت واظن فى تلك الفترة بيت عمك عمر ابو كمال وممكن تعمل مسابقة فى ذلك 0 التحية والتقدير والاجلال للرمز قدورة اب بدية الذى فى عهده وتحت عرشه لم نتعاطى الحرام بل تعاطينا المكروه عمدا ( التمباك / ابو قندول / ابو نخلة / ولمن تفرج تخميسة برنجية ) الله يرحم صلاح السر & اما فى عهد رعياية ود العباس والتى كانت فترتها قصيرة فتعاطينا الحرام ومعتصم أولنا واكثر دراية ونومة الكوشة لا زالت على البال

معتصم زى ما قال ميرغنى كنتم ماكلين حقوقنا وتتاجرو بينا نرجع لموضوع جمال السر وقطيع الكفر فعلا جمال اخذ الكفر وقال الا يقطعه واى واحد ياخذ نصيبه بعد زعله منو عمنا صال جمال وجال ولم يجد ليه شى يقطع بيه وهدأ شوية وبدأ التمرين الأ ان القصير ود ال000 بابكر بانقا وجد ليه حديدة او قزازة عموما اداها لجمال والذى بدوره قام باللازم ولا ما كده يامرغنى

مرغنى ارجع لموضوع الاشلاق ممكن تكون المسابقة يوميا ابدأ لينا ببيت والمطلوب ذكر ناس البيت ابوهم امهم والاولاد الاحياء والاموات ومنو الكان ساكن معاهم واولادهم هسع وين وتانى يوم يكون الرد أو الحل كده ممكن نعيد الزكريات واذا كانت هناك اى معلومات ممكن نعيد الكان حليل الكان 00

مرغنى والله اليوم اول مرة اعرف فيها سبب قطع يد قدورة طيلة الفترة السابقة لم يخطر على بالى ابد السؤال عن هذا الموضوع ياربى لشنو ؟ لكن بى يدو دى كان مبوظ اعصابنا تتذكروا عندما نلعب الكوتشينة بالنهار فى النادى وتكون مندمج يجى من وراك براحة ويخت ليك الضقل بتاعه فى رقبتك والله الواحد يصرخ تقول مسك ليهوكهرباء.

الله يرحمة حبيب الكل صلاح السر (ود الكاو) مابننساك. الله يرحم الطيب الظريف صلاح السر . الله يرحم العملاق في الاخلاق صلاح السر . الله يرحم أول ضابط من ولاد الاشلاق صلاح السر . عمــــــــلاق الاخــــــــلاق الي جنات الخلد

الي الاخوان الصغار أولاد علي الشفيع والي الاخت الصغيرة هالة الذبيدي الله يعطيكم العافية معليش استحملوني بكتب بس عن الاشلاق وعن ايام الاشلاق . لانو والله عندي من أجمل الاحياء والفرقان ( الاشلاق بطيبتو ولا دبي بابراجها ) والله مفيش مقارنة إشلاق طيبة دوت كوم

الإخوان معتصم وعمدة شكرا للمرور والاضافة.
عملا بإقتراح الأخ عمدة ,, فقد قمت بتجهيز كروكي { اتمني ان يكون واضح} وكل يوم سنقوم بتحديد رقم بيت للحديث عنه وعن ساكنيه في كل الأزمنة,, سيطرح اليوم مثلا صباحا وننتظر اراء الجميع ثم نقوم بالتعليق علي الاجابات يوميا مما سيستغرق 44 يوما هو عدد المنازل المتبقية .

سنبدا اليوم بالرقم 4 لانو آخر بيت كان بتاع ناس قدورة رقم 3,, ونتمني للجميع اوقات هانئة وذكريات طيبة.
آسف لم اتمكن من رفع الكروكي,, ولكن البيت الملاصق لمنزل عثمان عبد الهادي من الشرق.

الاخوان الاعزاء: لم يصلني اي رد,,, بخصوص المنزل رقم 4 ولذلك سأقوم بالاجابة عليه زائدا المنزل رقم خمسة الذي يجاوره واترك لكم المنزل رقم ستة الناصية المواجه لمعهد التربية وبقربه الكوشة
المنزل رقم 4 سكنه الكثيرون ولكن اشهر من سكن هذا المنزل
عمنا الامين مصطفي وزوجته فاطمة { ام عارض} رحمها الله رحمة واسعة , كانت امراة ولا كل النساء,, ابناؤهم حيدر الامين { جنكل} وشهادتي مجروحة في جنكل لانه قريب جدا الي قلبي واخو,, ثم التاج وفاروق { فيركو} وعبد الحفيظ,, واخواتهم الفضليات سناء وسوسن, جنكل اشتهر باللعب بالرجل اليسري وكان لاعبا حريفا خفيفا لعب لفريق الاشلاق كبار وفريق النيل الحصاحيصا وهو بعد غض ثم النجمة,,, اذكر ان سبب تسجيله بالنيل اننا كنا نلاعب فريق الرد ستار وهو تجمع لابناء حي العمدة وكريمة كان يقوم علي تنظيمه الاستاذ جرفل وكان يلعب معهم لاعب من اعظم اللاعبين الذين مروا علي ملاعب الحصا حيصا وهو محمد عثمان ابشر الشهير بتورو وفي تلك المباراة ابدع جنكل في مواجهة تورو.
لم يستمر في كرة القدم ولم يجد الشهرة الكافية { اعني جنكل} نسبة لعصبيته وسهولة نرفزته داخل الملعب وهو شخص مختلف جدا عن جنكل خارج الملعب الصبور الدمث الاخلاق. عمنا الامين مصطفي من اظرف واطيب الناس تجده دائما ضاحكا يستقبلك محييا{ كيف تمام؟؟ لحم ضان وبيضن جان} وهم من اول الناس الذين ارتحلوا الي اركويت,,, لهم تحيتي جميعا.

المنزل رقم 5 سكنه الكثيرون ايضا ولكن اشهرهم عمنا قرشي الفكي ,, رحمه الله رحمة واسعة وزوجته بثينة امد الله في عمرها وهم من قرية اب جلفة شرق رفاعة وكان لهم كلب مشهور ضخم الجثة , كان يقلل الحركة في ذلك الشارع ,, ابناؤهم جلال وعز الدين والنور قرشي,, ولم تكن لهم بنات ,,اشتهر آل قرشي جميعهم دون فرز بطيب المعشر,, لهم التحايا والود الكثير.

المنزل رقم (6) منزل ال لهادي الطيبيين .منزل عمك الهادي سليمان علية رحمة الله الرجل الطيب البشوش الودود والد سعادة العميد الدكتور يحي واخوهم الكبير معتصم الهادي كانو مجمع طيبة في الاشلاق وخاصة أمهم ( تحياتي أليهم)

معتصم تحياتى الواحد يجيب اقصد ( اكبر عدد من الاولاد والبنات ) اولا امهم بت سلفاب فاطمة وابوهم عمك الهادى عليه الرحمة الاولاد معتصم + يحى +عبد المنعم كونا + بدرالدين والبنات ماعارفهم وثانى سكن فيه ناس عمك محمد خليفة وزوجته المرة الطيبة زينب واولادهم طبعا هاشم +صلاح +احمد+عمر+بكرى+جعفر+البنات والله ماعارف اسمائهم

الاخوان / معتصم , عماد,,, سكن ايضا هذا المنزل محمد احمد محمد محمد نور وزو جته بدرية ابراهيم و اولادهم ياسر و عبد البديع والجقير وبكري وبتهم رجاء ,, سكن معهم لفترة عمة محمد احمد النعيمة { رحمها الله} واخوه مصطفي كان شخصا نحيلا صامتا ,,,, لهم الجميع التحية ولكم . اليوم سنتحدث عن اول بيت من البيتين الجداد التي بنيت بجوار معهد التربية وكانت لاتشبه بقية بيوت الاشلاق ,,, اول حاجة مافي جير اصفر والشبابيك والابواب من الحديد مطلية باللون الازرق,, علي خلاف بيوت الاشلاق الاخري. ويمكن التحدث عن البيتين.

منزل عمك السرحسن نصرالله وطبعا جميعا نعرف اسرته لأنها كانت مميزة عمكم السر عليه الرحمة + الوالدة فاطمة ( وآ شريرى وآ شريرى صلاح جاى يموت ) وفعلا توفى عليه الرحمة صلاح السر+ جمال + ياسر الكشة وبالمناسبة هو بالخبر + خالد العجب وبناتهم احسان + سمية زوجة عبد المعبود

شكرا معتصم يوسف اولا لتصغيرنا(طبعا انا ومرغنى اخوى ما بنحب الكبر)وتانيا للاضافة..البيت التانى من البيتين الجديدين كان يسكنه المرحوم ساتى حمد واظنكم تذكرون جميع عياله..ثم حل عم عمسيب مكان عمى السر نصرالله وابنه ضياء الدين حارس مرمى الهلال..(هو دحين مش مات؟؟؟)
هذا كان اخر عهدى باشلاق الحصاحيصا..حيث رحلنا و(تاشلقنا )فى مدن اخرى

لية يامعاوية مريت علي ناس بيت عمنا ساتي ( رحمة الله) سريع كدأ . فيصل ساتي (باشاتا) ( معتصم) ومحمد العكليتة في الكورة والضب وأخواتهم المحترمات الله يعطيهم العافية

ونسيتو ناس عمك عمسيب ( رحمة الله علية) والخالة الطيبة فاطمة عمسيب وبالمناسبة عملوا لينا أول بارتي في الاشلاق يوم جمال السر ( الرجل الذي كان يلبس كبابي في عينية) ماشي بلاد برة ( القاهرة) يقرأ هناك جينا وقعدنا شربنا الفرات وأكلنا الموز وشربنا الشاي ( وجمال كان قاعد عامل لينا فيها ماشي لوس انجلس)

بيت عمك ساتى الله يرحمه وزوجته فوزية واولادهم يا معتصم هم فيصل باشاتا + معتصم + محمد +بدرالدين قرموط ساتى +الطيب والبنات احلام وامال وابتسام والمرحومة الهام ( احلف قسم فى واحد غششنى والما عاجبو يشرب من البحر ) وكان على معتصم اتحداه كان يعرف عدد اسرتنا واسمائهم

البيت الاول سكنه المرحوم/ ساتي حمد وزوجته فوزية وابناءهم فيصل باشاتا { كان مدافعا صلبا, ومعتصم { كان حارس مرمي مميز ولاعب لا يشق له غبار في الكرة الطائرة} الان بالمنطقة الشرقية, محمد ساتي حمد الذي كان لاعب وسط والباقي تاميه غلاط ,, ولولا الدقيق في الطاحونة لصار لاعب احسن حالا, بدرالدين { قرموط ساتي} ثم الطيب. وبناتهم إحلام وآمال وابتسام والمرحومة الهام ثم اصغرهم احمد ساتي الذي اظنه الان قد تخرج في كلية الطب.
كانوا قوما لطفاء وطيبون جدا كما جميع اهل الاشلاق في تلك الفترة.
سكن اول بالمنزل الثاني المرحوم السر حسن نصر الله وهو كان زعيم الاشلاق وحلال المشاكل,, وزوجته فاطمة بت عثمان من اطيب خلق الله,, ابنهم الاكبر المرحوم / صلاح السر عمل كضابط للشرطة وكان رجلا طيب المعشر ودوود
ولا يخلو من مرح كان يلقب بود الكاو ,, والدنيا لا تاخذ الا الاخيار,,, ثم جمال السر وهولا يحتاج الا تعريف له ملح ونوادر سنتعرض لها ان كان في العمر بقية. ثم ياسر الكشة الذي يدعي انه لولا البقرة لاصبح من ابرز المهاجمين بالسودان
ثم خالد. البنات كن احسان وسمية وانتصار ,,, كان هناك مجموعة من الشباب تزورهم بانتظام من اهل البلد إختلطوا بابناء الاشلاق كثيرا{ يعقوب فقيري ذو الحديث الشايقي القح وقد اصبح طبيبا فيما بعد ,, حسان والذي اصبح طبيبا ايضا ويعقوب النحيف}
سكن هذا المنزل فيما بعد ال المرحوم يوسف عمسيب الشايقي المشلخ وزوجته فاطمه,التي اشتهرت بانها بصيرة تعالج الفكك,, وكان حينما يحضر اليها المصاب إن كان شابا,, تجلس بناتها معها لكيلا يبدي اي كان اي من علامات الجرسه وامها حليمة وابناءهم ضياء { اصبح حارس مرمي هلال الحصاحيصا} والطيب والفاضل,, وبناتهم حنان تعمل ببنك الادخار,, وفرحة ثم امتثال,,, وكانوا كغيرهم اناس طيبون مضيافون لهم التحية.
شوفوا لينا بعد كده بيت الضابط عشان نلف نرجع.

شنو يا جماعة صنيتو كلكم طيب ما دام موضوع المسابقة دا ما نافع اي واحد امسك اي بيت من طرف ويقول لينا عن اهله,,, من غير ترتيب,,,وانا حابدا ليكم بي المرحوم / ابراهيم محمد احمد,,,, كان يسكن في المنزل المجاور للمنزل الذي كان يسكنه ال / الهادي سليمان عليه الرحمة من الشمال ويواجه منزل ال الشيخ سلمان عليه الرحمة,,, كانت زوجته زينب وابناؤه مبارك{ الفحل} وعلي ومحمد ,, وبناته ليلي { عليها الرحمة} ودرية,,, كانوا ناس طيبين ومتداخلين مع اهل الاشلاق في الشينة السمحة ,,, سكن في هذا المنزل قبلهم العم صديق الماحي وزوجته فاطمة وابناءهم عصام رحمه الله وعماد والبنات جميلة وبديعه ورفيعه ,, وكان يسكن معهم ابن عمهم خالد الذي كان يعمل بالبوليس ودياب الذي كان يدرس بالثانوي ثم عمل بعدها بمحكمة الحصاحيصا ,,, واشتهر ال صديق الماحي جميعهم بقرض الشعر ,,, لهم التحية.
لوكان بي الايد كنت بقيت بالاشلاق والسودان الي اللحظة ولكن نسوي شنو؟؟؟
البلد الأبوك عمدوا وجفوك نظاروا
زي المتلي قاعد فوقوا شن أفكاروا
أولى الخترة فوق جملا تكب فقارو
ما خالقنا زول .. مولانا واسعة دياروا
,,,,,,,,,,,,,,,,,,,,,,,,,,,,,,,,,,,,,
والبلد اللي غير بلدك بتلقى مرارو
ما بسعد هناك فيه البفارق دارو
الزم للوطن مهما ظروفك جارو
اصلو البغترب دايما مولعه نارو
ولكم الود.

والله ياميرغني ويالسخي الاذهان محفورة بكثير من بيوت الاجلاء لكن الذاكرة ضعفت وشوقي اليهم كتيييير لناس عمك داني ولي ناس ابوروضة وللعم الصديق محمد كمال الدين والمرحوم عمك السر واولادة ناس جمال وياريت تعود الايام ياقاسم وليد مستورة وللعم العزيز بشير ( الان خفير بمستشفى الحصاحيصا) أيــــــــــــــام مضت ياعم أحمد فداسي بس أجمل الايام ولن تعــــــــود

الاخ معتصم / قلت لينا كمية من البيوت ,,, بالله خلينا واحد واحد عشان نركز,,, الاخ محمد كمال الدين كان يسكن البيت الاخير في الصف التاني ,,,,, من البيوت القريبة من المدرسة الثانوية ,,, هذا المنزل كان يسكنه عمك كمال الدين والد محمد واستمروا بالسكن فيه بعد وفاته ,,, امه الرسالة واخوانه الماحي وصلاح واخواته نجاة ورشيدة وسامية,,, تزوج محمد كمال الدين وهو في هذا المنزل زوجته الحالية / شادية وله من الابناءصغار السن لا اذكر منهم غير خطاب وهواري,,, ومحمد كمال من الشخصيات التي كانت قريبة من الشباب بحكم سنه وكان مشجعا شديد الحماس لهلال الحصاحيصا,,, وهو رجل طيب المعشر واخو اخوان,,, وكل مايذكر محمد كمال الدين يذكر المرحوم/ السر مكي كان جاره في البيت الملاصق له,,, وكان مشجعا هلاليا وكان من اخيار الناس شابا في روحه وفي جسده,,, وكانا لا يفترقان البتة زوجته فاطمة الله يديها الصحة والعافية وابناؤه جمال ,جلال, عمار,,, والصغير لا اذكر اسمه,, وبنت واحدة ,, رشا,,, كانت تسكن معهم بنت اخيه او ما شابه,,, نادية وتم زواجها وهي بالاشلاق.ذكرهم الله كلهم بالخير. ولكم الود.

بيت عمك محجوب حسن وزوجته مريم واولاده نزار والله نسيت الاسماء الباقية وايضا بيت ناس عمك حسن الطاهر وزوجته بلالة وولدهم عوض وبناتهم محاسن ونور و0000 و000 وبنتهم الصغيرة كان عندها سكرى وايضا بيت ناس عمك شبو ( ابو النسب ) نسبو طاير ورطة ووقعنا فيها 000 ويا مرغنى جمال حسن الطيب قال فى بيت فيه اولاد هم عادل وصلاح و000 والبنات عايدة وسناء ديل ابوهم وامهم اسمهم منو وهم وين حاليا؟