رد: إشلاق دوت كوم....ishlag.com

يا اخوي معتصم سألتوا عن ناس عمك المرحوم حسن الطيب ولبد ,,, وعشان نحلوا من الحرج اليك الاسرة.

اسرة المرحوم : حسن الطيب ,,, وزوجته / بخيتة بت طابت ,,, وابناؤهم حسب العمر/ ابوعبيدة حسن الطيب وله نوادر وملح كثيرة ,, وبدر الدين { دفعة في الثانوي العام } في ب
كان الفتنا في الفصل,,, وجمال حسن الطيب ,, الذي تخصص في إثارة غضبي منذ الثانوية وحتي اليوم { الله يعين مرتو عليه} ,, عبد الجبار واظنه الان بالمدينة المنورة , وليد, ثم الطيب .
واخواتهم / منازل الكبيرة ,, والتي ذهبنا ايام زواجها الي طابت ولعبنا ضد منتخب طابت,, ثم مشاعر ,,, ارتبطت بهذه الاسرة خلال اقامتهم بالاشلاق لعلاقتي الوثيقة بالاخ بدر الدين,, ثم خلال فترة عملي بمدينة طابت ,, لهم الود والاحترام .

من طرف هالة الزبيدي الإثنين فبراير 11, 2008 7:45 am

اولا لك التحية مرغني الزبيدي
وربنا يديك العافية والله انا في ناس ما متزكراهم ما تقول عاملة فيها صغيرة
بعدين هيثم الشفيع ناكر عوض التس مالو انا عندي دليل بالصور انو عوض التس قرا معاكم وبقول قرا معاكم لاني في الصورة كانت شايلنى ماما دولة يعني عمر سنة كدة

الاخت هالة/ مرحبا بعودتك ,,,, ويستاهل هيثم لانو العضو الوحيد الكان بيسالك عنك ,,, فتشي في خشم الباب ,,,
بعدين الزول دا ما نكر عوض التس ,, ما تبهتيهوا ساكت ,,, الزول دا قال هو دفعة عوض التس .
مرحبا بعودتك الي المنتدي وما تنقطعي .

ميرغني ابراهيم عمر كتب:
بعدين الزول دا ما نكر عوض التس ,, ما تبهتيهوا ساكت ,,, الزول دا قال هو دفعة عوض التس .
.

هوووووووووووووي أولاد الزبيدي
ماتقولوني كلام أنا ماقلتو ...........بعدين لو عاوزين تطلعوني كبير أنا ماعندي مانع بس تعالو نحسبا سوا ونطلع الكبار كلهم:
إنت ياميرغني قلت عوض التس فرقو من عمدة سنتين وهالة أختك بتقول عندها صورة ليها وهي عمرها سنة مع عوض التس {وبافتراض إنو أكبر زول في الروضة بيكون عمرو 6 سنوات....فده معناهو إنو هالة فرقها من العمدة 7سنة يعني حالياً عمرها بالميييييييييييييييييييييييييييييييت كدة 42 سنة}

هيثم على الشفيع كتب:
ميرغني ابراهيم عمر كتب:
بعدين الزول دا ما نكر عوض التس ,, ما تبهتيهوا ساكت ,,, الزول دا قال هو دفعة عوض التس .
.
هوووووووووووووي أولاد الزبيدي
ماتقولوني كلام أنا ماقلتو ...........بعدين لو عاوزين تطلعوني كبير أنا ماعندي مانع بس تعالو نحسبا سوا ونطلع الكبار كلهم:
إنت ياميرغني قلت عوض التس فرقو من عمدة سنتين وهالة أختك بتقول عندها صورة ليها وهي عمرها سنة مع عوض التس {وبافتراض إنو أكبر زول في الروضة بيكون عمرو 6 سنوات....فده معناهو إنو هالة فرقها من العمدة 7سنة يعني حالياً عمرها بالميييييييييييييييييييييييييييييييت كدة 42 سنة}

والله ياهيثم بحساب سنين الزمن السبعة سنين زاتهم كتار ما تنقصهم شوية

الاخ هيثم / اين انت من كل هذه الحسابات ؟ لو فرضنا جدلا بانها صحيحة ,,, ووين فرقك بتاع السنتين يا هيثم من عماد ,,,,, بالمناسبة عماد بقي زي عمود النور في الحي ,,, الناس تحسب وتحسب وتجيهو,,, عشان كده انا بقترح انو اي عضو في المنتدي يكون عمره بالتاريخ العمادي يعني مثلا عوض التس سنتين بعد عماد يكون 2.ب.ع وهكذا.
لكم الود.

يا اخوانا اسمحو لي الحكاية بعد دخلتني في الاربعينات انا بسحب اقوالي اصلا الكان في الصورة عمر الزبيدي لانو انا ما كان ولدوني لسة بعدين القال منو زمان اكبر زول في الروضة عمرو 6 سنة

ميرغني ابراهيم عمر كتب:الاخ هيثم / اين انت من كل هذه الحسابات ؟ لو فرضنا جدلا بانها صحيحة ,,, ووين فرقك بتاع السنتين يا هيثم من عماد
لكم الود.

أتعب شوية وأرجع للتعليق (انا ماعندي مانع تطلعوني كبير) وبنفس الحسابات انا فرقي من عوض التس سنة واحدة يعني من عماد 3 يعني عمري 47 مواااااااااااااااااااااااااااااافق
وياهالة المدرسة كانت بتقبل 7 سنوات يعني سقف الروضة " النظري" 6 سنة....وبعد سحبت أقوالك قبلنا الجرسة ورجعناك صغيرة وجاهلة .....البقنع بعلك وأولادك شنو؟؟؟

من طرف هالة الزبيدي الخميس فبراير 14, 2008 5:18 pm

يااخوانا خلونا من مناقشة العمر ده انا برة مامعاكم
انا ما اتجرستة اسأل عمر الزبيدي عن العمرده باعتبار انو اكبر مني بي سنتين يعني دفعتكم ياهيثم الشفيع انت وعوض التس

اليوم ,, ساكتب عن واحد من رموز الاشلاق في فترة من الفترة وهو عمك بنداس وزوجته امنة ,,, وابناءه حسن { داشنقا} كان لاعب له مستقبل ولكن لم يجد التوجيه ودفن في كرة الاقاليم ,,, واخوانه صلاح وبدر الدين بنداس واخواتهم , محاسن ومني ,,, عاشوا لفترة جيرانا لنا ,,, وكان عمك بنداس مشهور بالانضباط الشديد في عمله ,,, وكان يمتلك عربة لاندروفر وكانت العربة الوحيدة بالاشلاق لفترة طويلة ,,, رحلوا الي مدينة طابت والتقيتهم هناك , خلال فترة عملي بمدينة طابت.

من طرف عماد الشفيع الأحد فبراير 17, 2008 4:01 pm

وأنا اليوم سوف اكتب عن شخصية منسية سواق اسمو عبدالرحيم على اسد سكن جار ناس شبو قبل ناس معتصم يوسف العوض زوجته اسمها ( والله نسيتها الا اتصل على الوالدة فى السودان واعرف الاسم ودى كان عرفتها يامرغنى سوف آمن عديل ) المهم كان عندو بنت اسمها سامية وولد اسمو سامى وهو دنقلاوىصرف ولسانه 000 عندما يريد ان يستدعى سامية يقول ياسامى واذا داير يستدعى سامى يقول ياسامية وعمل لخبطة لأولاده الذين لم يشاهدو بلدهم الاصلية ولا يعرفون الرطانة عموما كان شخصية جميلة ونحن التقينا بهم ايضا بنقطة المعيلق ( اكثر بلد فيها الباعوضة والله كان ما اخاف الكذب اقول الباعوضة قدر الجرادة 00دل000 ) المهم حاليا ماعارفهم وين وماعارف تانى عندهم اولاد ولا 00000 لا000 يالله يامرغنى انحت رأسك 0

اليوم ساتحدث قليلا عن الجمعية واترك البقية لي عمده ومعتصم يوسف الغائب:
الجمعية طبعا موقعها معروف ,,, كانت زمن السودان زين وفيهو جمعيات تعاونية ,,, كانوا ياتون بالمواد التموينية وغيرها ,, وتباع بهامش ربح ضئيل للاعضاء ,,, ودين كمان لي اخر الشهر ,وفي اخر السنة تاتي الاعضاء نسبة من الارباح ,, يعني المواد التموينية ما تنقطع من بيتك كان مفلس ولا مقرش ,,,, واذكر في اشلاق مدني ,, كانت ملحقة بالجمعية جزارة ودكان خضار ,, وكان البيع فيها بي الماركة { والماركة لمن لا يعرفها هي عملة معدنية تخص الجمعية فقط وتداولها بين العساكر في الشراء من اجزاء الجمعية المختلفة ,, يعني ما ما ممكن تشتري بيها من السوق ,,, وكانت الماركة تعطي كنقدية بدفتر الجمعية ,,, يعني مثلا تشيل عشرة ريال نقدية ,, يدوك عشرة من الماركة ابو ريال ,,, تشتري بيها الخضار والخضار من الجمعية وممكن كمان تشتري بيها الفول من نادي البوليس } واشهرمن عمل بالجمعية في اشلاق الحصاحيصا عمك النور وعبد الله سيد احمد وبشير جمعية وعلي يوسف ,,وطبعا ايام الاعياد بتلقي الاشلاق كلو لابس زي بعض { هدوم الجمعية} والحلاوة ياها زاتها في كل البيوت الا من رحم ربك او كان في مامورية قطن,, اما الروضة فاشهر من مر بها ماما عواطف وراق وماما دولة,,, وحياة بتاعة القصة ومهلة الداية والصبر لدار الرعاية,,, والناقص يتموا عماد.

من طرف عماد الشفيع الإثنين فبراير 25, 2008 8:41 am

اليوم سوف اتحدث عن معلم من معالم الاشلاق وهو نادى البوليس الذى يقع فى الطرف ( انا عندى مشكلة فى الاتجاهات ) اختاروا انتو المهم كان يقع بين الاشلاق وبيوت الممرضين واننى سوف احكى عن الحقبة التى كان يشرف على النادى فيها عمنا امد الله فى عمره الزبيدى ، كلنا يعلم ان اول تلفزيون دخل كان فى نادى البوليس وكانت امهاتنا يجن متلبتات ويقعدن فى الركن بالقرب من عمود الانارة 00 وابدا انا لاانسى هذا المكان لأننى اخذت فيه كف صاموطى من الوالد عليه الرحمة والسبب اننى بحكم تعصبى للمريخ كنت اناقش حسن بنداس الهلالابى المتعصبواشتبكنا بالايدى فما كان من الوالد عليه الرحمة وكلكم تعرفوه انه لايحب المشاكل وبدون معرفة السبب قطع فى كف من النوع اياه المهم كان لنا النادى ملاذا بالنهار نلعب فيه الكوتشينة وخاصة فى عطلة المدارس وبينى وبينكم كمان مرات المدارس تكون فاتحة المهم الساعة عشرة نتوجه للسوق لنحضر التمباك والسيجاير ابو نخلة ومرات نغشى الاكشاك بالقرب من المستشفى ومرات ندخل الطوارى ولا اسمها اظن الحوادث وده كله لزوم نغازل البنات بالمناسبة دى تعرفو ا محمد ودالعباس كان بيغازل كيف اقصد بيشاغل كيف ( يبرم فى شعره بيده الشمال ويصفر ) قبل الوصول للمستشفى نغشى الأب الروحى قدورة كان يبيع الليمون فى السوق وهو مصدر رزقه عندما يشاهدنا يقوم يكارن الليمون ويعملوا كوم واحد ويبيعه بريال مع العلم ان سعره اكثر من هذا المبلغ ويستلم القيادة حتى وصولنا النادى الذى نظل فيه حتى وقت الغداء ونتوجه لبيمتنا او اى بيت يصادفك وتتغدى وبعد الغداء نذهب للتمرين وبعد التمرين نذهب السوق للعشاء بفول عمك محى الدين او بوش فى حالة الفلس وبعد ذلك نتوجه للنادى لمشاهدة التلفزيون وكان لقينا لينا تربيزة فاضية نلعب وست وعند الساعة التاسعة يكون عمك الزبيدى وهو جالس القرفصاء او بمعنى اصح نائم فى كرسى البلاستيك الدائرى وبعد فترة يقوم يتمقى ويلتفت يمنا ويسار ( يكحل ) هل يوجد احد من الكبار واذا لم يجد احد على طول يتوجه الى التلفزيون ويغلقه حتى ولو الناس تشاهد فى اى عمل مثير وكلنا يتذكر مقولة هاشم خليفة ولا حسين الحلبى عندما كنا نشاهد فى فيلم او مسلسل مثير وقبل النهاية قام عمك الزبيدى وقفل التلفزيون ذهب ونحن جلسنا شوية وقمنا نفضنا ملابسنا واتجهنا للأشلاق وقام هاشم قال قولته المشهورة ( الزبييدى 000الزبيدى 000 بالذ000بدة اليأكلها وطبعا بعد ان شاهد مرغنى معنا ) و هناك شخصيات لاتنسى فى النادى من ضمنهم احمد ولد رفاعة كان صراف فى البنك وتمت ضمانته ووضع فى النادى 0 عموما هذه خواطر من تلك الفترة 00000000 نواصل

موضوع الشلوخ لهالة ذكرني بان النسوان المشلخات في الاشلاق كن القاعدة والاستثناء كان غير المشلخات وهن علي ما اذكر: سعاد زوجة المرحوم عبد الرحمن الشفيع, وعبلة مرة جعفر كمبال,وبدرية مرة محمد احمد, واسيا مرة عبد الرحمن ابو لكة, ومستورة مرة الزاكي , وعلوية مرة محمد حمد , وفاطمة مرة السر مكي { عليه الرحمة} وشادية مرة محمد كمال الدين, وصديقة مرة سيد موسي,وفاطمة مرة بنداس وحامدنو مرة عثمان الجاك , ومريم مرة محجوب ,بقارة مرة الشيخ ,فاطمة مرة مالك { عليه الرحمة} ونعيمة مرة عمر حسن اما البقية فاتركها لعماد الشفيع.
اما بين الرجال فكانت الشلوخ استثناء : عبد الرحمن الشفيع { عليه الرحمة} و ساتي حمد عليه الرحمة, علي الشفيع, محمد الخليفة طه الكودة, يوسف عمسيب,احمد العباس { عليه الرحمة},محجوب الفكي عليه الرحمة, حسن الطيب { عليه الرحمة}, بشير الطيب,وعباس الجعلي وعمر حسن ,,,,, والبقية ايضا متروكة لعماد ولهالة,,, لكم الود.

اليوم ساكتب عن أحد الاشخاص الذين مروا علي الاشلاق:

أحمد طيفور ,,,, سكن مع ناس محمد كمال الدين في منتصف السبعينات,,و اهله من دلوت البحر,,, اي انه من اقارب محمد كمال الدين ,,, كان يدرس بالحصاحيصا الشعبية الثانوية العليا,{ الجديدة الان} ,,, كان يلعب في الجناح الايمن,,, وشخص فكه مرح دائما ما تجد الجميع متحلقون حوله ,,, وفي كل خطوة وموقف له طرفة,,, بعد الشهادة الثانوية عمل بالقوات المسلحة ,,, التقيته مره بجوار البركس في اواسط الثمانينات,,, ذهبت وسلمت عليهو باسمو وبعد السؤال عن الاحوال والاسئلة المعتادة عرفته انه عرفني لكن الاسم رايح ,, فعملت فيها ما عارف حاجة ,,, وقلت ليهو نتلاقي ان شاء الله لانك هنا في سلاح الاسلحة { جوار البركس} وانا ساكن في البركس { لم اكن اسكن في البركس ولكن للمناورة} ,,, قال لي : يا أخي ما تمشي وخلينا نتونس شوية ,,, وتمشي تتغدي معانا وكده ,,, قلت ليهو انا مستعجل جدا { لم اكن مستعجلا ولكن لزوم اثارته} ,,, قال لي... والله اليلة ما افكك دي فرصة يا اخي ونحن كم سنة ما تلاقينا,,, قلت ليهو شنو الكم سنة ما اتلاقينا , انالا منو زاتو؟ قال لي يا اخي انا عارفك لكن الااسم طاير لي ,,,, يا اخي انت ما ودعمك,,, وضرب جبهته بيده,,, عمك يا اخي ابوك ما !!! يا اخي انعل ابوك زاتو ,,, ما تقول لينا وتريحنا.

من طرف عماد الشفيع الثلاثاء مارس 04, 2008 9:39 am

ميرغني ابراهيم عمر كتب:اليوم ساكتب عن أحد الاشخاص الذين مروا علي الاشلاق:

أحمد طيفور ,,,, سكن مع ناس محمد كمال الدين في منتصف السبعينات,,و اهله من دلوت البحر,,, اي انه من اقارب محمد كمال الدين ,,, كان يدرس بالحصاحيصا الشعبية الثانوية العليا,{ الجديدة الان} ,,, كان يلعب في الجناح الايمن,,, وشخص فكه مرح دائما ما تجد الجميع متحلقون حوله ,,, وفي كل خطوة وموقف له طرفة,,, بعد الشهادة الثانوية عمل بالقوات المسلحة ,,, التقيته مره بجوار البركس في اواسط الثمانينات,,, ذهبت وسلمت عليهو باسمو وبعد السؤال عن الاحوال والاسئلة المعتادة عرفته انه عرفني لكن الاسم رايح ,, فعملت فيها ما عارف حاجة ,,, وقلت ليهو نتلاقي ان شاء الله لانك هنا في سلاح الاسلحة { جوار البركس} وانا ساكن في البركس { لم اكن اسكن في البركس ولكن للمناورة} ,,, قال لي : يا أخي ما تمشي وخلينا نتونس شوية ,,, وتمشي تتغدي معانا وكده ,,, قلت ليهو انا مستعجل جدا { لم اكن مستعجلا ولكن لزوم اثارته} ,,, قال لي... والله اليلة ما افكك دي فرصة يا اخي ونحن كم سنة ما تلاقينا,,, قلت ليهو شنو الكم سنة ما اتلاقينا , انالا منو زاتو؟ قال لي يا اخي انا عارفك لكن الااسم طاير لي ,,,, يا اخي انت ما ودعمك,,, وضرب جبهته بيده,,, عمك يا اخي ابوك ما !!! يا اخي انعل ابوك زاتو ,,, ما تقول لينا وتريحنا.

كان فردته ومشكل مشكل معاه ثنائى هو احمد ابو شعر اوبمعنى اصح كانوا ثلاثى وتالتهم هو خالد ومن طرائف خالد مع الاخ صلاح السر ( رحمة الله عليه ) صلاح السر جاب فى امتحان الانجليزى واحد فقط قام خالد قال لصلاح بلغته الساخرة والمكسورة ( فى زمتك ياصلاح دى قراية 30 جنيه عصاية وما فيها تنية طبعا شبه الواحد بالعصاية ورمز ل 30 جنيه لان صلاح كان بيقرأ فى الفصل المسائى وبيدفعوا ليهم 30 جنيه واظنه كان يدفع المبلغ من مال جمعية الشرطة) الله يرحم داك الزمن

الاخوان بالمنتدي / سؤال لكل يوم لتنشيط البوست .

من هو زكريا ؟ علي قكرة في 2 زكريا مروا علي الاشلاق فمن هم؟

من طرف معتصم يوسف الأربعاء مارس 05, 2008 6:43 pm

غايتو ياميرغني انا بتذكر واحد فيهم ( وكان عمك عجوز يرحمة الله ) ولو تذكر ياسعادة المدير كان ساكن في عنبر البوليس حارس للاسطبل أيام الاسطبل والراجل دا توفي لرحمة مولاه في أواخر السبعينات وانا تذكرتة لاني الوحيد من اولاد الاشلاق المشيت المقابر للدفن وكنت برفقة الوالد رحمة الله علية أحمد العباس والوالد أطال الله في عمرة ابراهيم الذبيدي وزكريا الثاني زكريا محي الدين رئيس وزراء مصر الاسبق كان ساكن مع ناس العنبلوك وكان بيقراء في الحكومية

من طرف معتصم يوسف الأربعاء مارس 05, 2008 7:40 pm

أخي الحبيب ميرغني ياعظيم باخلاقك وكريم بصفاتك ياعزيز وغالي علي . عرفتك أعز صديق وعاشرتك أخ أخوان وجمل شيل كنت أود أو أن أكون جزء لايتجزي من شغلكم الجميل منتاكم الراقي الجميل . كنت بكتب وبرد ذي الاني معاكم ومشارككم في المنتدى ولمن شفت المنتدى أول مرة فرحت لاني لقيت في غربتي حبايبي البعاد مني لكن اليوم جاني إحباط من الاخ الصغير (هـ) ومافي داعي للباقي وأتنى ليكككككككككككككككم كل التوفيق

معتصم يوسف كتب: لكن اليوم جاني إحباط من الاخ الصغير (هـ) ومافي داعي للباقي وأتنى ليكككككككككككككككم كل التوفيق

الأخ/معتصم
قريت كلامك في بنبر الجاهوري المولع وافتكرتو هظار ورديت عليهو بهظار ، لكن كلامك الهنا دة كلام جد وزعل عديل كدة وأي زول ماعندو حتى ذرة فهم بيكمل الهاء دي بهيثم
عموماً والله على ماأقول شهيد ماقصدت من كلامي مع مدثر أي حاجة سوى إنو أكتر ناس حتسألو في البنبر هم الناس الأكتر دخولاً للمنتدى ، وهو فهمها كذلك بدليل إنو جاوب بدون أي حساسية وزاد عليها هظار بالإنفصال...
فاذا كان ماكتبته سبب لك أي نوع من الضيق فأعتذر 1000000000000مرة
وعليك الله بلاش حرد وأرجع معتصم أخونا الكبير العرفناهو من خلال المنتدى والما بنرضى إنسحابو لأي سبب لأنو ببساطة المنتدى بتاعو زي ما هو بقى بتاع أي عضو مسجل فيهو{ممكن تسأل ميرغني إني طالبت بفتح عضوية المنتدى حتى لأشخاص لا نعرفهم لزيادة الفائدة ، فهل يعقل أكون عاوزو يتقفل على أولاد الزبيدي والشفيع؟؟؟}
أكر إعتذاري آلاف المرات عساك تسامحني على زلة"كي بورد" قصدت منها المداعبة ليس إلا

من طرف عماد الشفيع الخميس مارس 06, 2008 9:33 am

لعزيز / النسيم
سبحان الله داير تعمل فيها وآحد حساس ورقيق والكلام بيأثر فيك ( شايفك كاتب للمدير كلاما رقيقا مايهو ) 00 وحاقر لى على الاولاد الصغار وداير تثبت للجاهورى انت دفعت هيثم ياود بطل الشر (وق)000 واللو (ز)0000 بس اناقاصد زى حقت هاشم خليفة بخصوص عمك الزبيدى 00والله جلدك جلد بقر يعنى داير تورينا ان اغتراب الامارات مازى اغتراب السعودية وكلنا فى الهوا سوا الكريمات ياها الكريمات ( باقى الايام دى انا والباقر عاملين معسكر مسوح الباقر فوق عديلو اولاده جايين اما انا داير اروح الغبشة الأبت تروح دى ) المهم انا بقول ليك اياك وولدنا الرقيق الشاعر هيثم انا بحرش ليك اخوه باقى داك تربية معتقلات وحيوريك الويل وكان ماقدر عليك نحن هنا 0000 والمديدة حرقتنى

من طرف **ميرغني ابراهيم** الأحد مارس 09, 2008 9:43 am

الاخ معتصم / اظنك كبرت !!!!!
يا اخي علي مسئوليتي ,,,, هيثم دا ارق من النسمة الطايرة ,,, وقلبو ابيض من اللبن بتاع زمان ,,, وتأكد ان كان فيما كتب اي مساس بك او باحد اعضاء المنتدي ,,,, لكنا قلنا ذلك ,,,, الراجل لم يخرج عن روح الدعابة ,,,, وهو اول من طالب بزيادة الاعضاء وحتي من غير ما نكون بنعرفهم ,,,, اضافة لذلك الراجل اعتذر ان فهمت كلامو بغير ما قصد ,,,, وكذلك طالب بتغيير اسم المنتدي ,,,,, فيا اخي سيب الزعل بتاع العجايز ,,, وهي ساحة للتواصل وليست للخصام ,,,,,وحقك علينا يا عجوز يا مخرف ,,, وبلاش زعل ,,, وتاكد ان مكانك مهما حدث فهو في القلب ,,, لك الود الكثير

من طرف معتصم يوسف الأحد مارس 09, 2008 9:53 pm

دي غنية لي هيثم ( كلو من الحادث حادث سبب حواجز هيييييييييي حنانة نسى اهلو مانسانه) وياهيثم تذكر أتشاكلنا كتييير في الروضة وكانت بتحجزنا ماما دولت تذكر . وانا قصدي ارجع معاك لايام طفولتنا في الروضة وخليك من العجائز المدير وولد عمك الكأن بسف الصعوط من تاني أولية وأنتو اخوتي وأهلي رضيت أم أبيت ولك ياهيثم كل الود والشوق

من طرف عماد الشفيع الإثنين مارس 10, 2008 8:06 am

معتصم يوسف كتب:دي غنية لي هيثم ( كلو من الحادث حادث سبب حواجز هيييييييييي حنانة نسى اهلو مانسانه) وياهيثم تذكر أتشاكلنا كتييير في الروضة وكانت بتحجزنا ماما دولت تذكر . وانا قصدي ارجع معاك لايام طفولتنا في الروضة وخليك من العجائز المدير وولد عمك الكأن بسف الصعوط من تاني أولية وأنتو اخوتي وأهلي رضيت أم أبيت ولك ياهيثم كل الود والشوق

تفصل ياكبير000 ناس ما بتستحى تجى بالعين الحمرة ( شفته ياهيثم مش خوفتو ليك ده زولى وانا بعرفو ) بعدين هاك 00000 ارضع 000 التمباك والصعوط علمتنى ليه انت وهسع صلعتك دى صلعت ماما دولت ؟ ياود اختشى لك الود والشوق يا فردة ويا دفعة 0

الأعزاء/معتصم وميرغني وعمدة
لكم الشكر والتقدير وكما قال العزيز ميرغني نحن راجين من المنتدى يلم لينا الناس مش يفرقم
مع الود

معتصم يوسف كتب:دي غنية لي هيثم ( كلو من الحادث حادث سبب حواجز هيييييييييي حنانة نسى اهلو مانسانه) وياهيثم تذكر أتشاكلنا كتييير في الروضة وكانت بتحجزنا ماما دولت تذكر . وانا قصدي ارجع معاك لايام طفولتنا في الروضة وخليك من العجائز المدير وولد عمك الكأن بسف الصعوط من تاني أولية وأنتو اخوتي وأهلي رضيت أم أبيت ولك ياهيثم كل الود والشوق

ما تستغل الفرصة وتعمل فيها قدر هيثم ,,,,, يا معتصم لو عرسوا ليك زمن كنت شغال مع ناس الجماكسين ,,, كنتى جبت اكبر منو ,,,, وبعدين لسه نحن ما فتحنا الموضوع بتاع العمر وتقول ناسين جايينك..... لك الود.

هيثم على الشفيع كتب:الأعزاء/معتصم وميرغني وعمدة
لكم الشكر والتقدير وكما قال العزيز ميرغني نحن راجين من المنتدى يلم لينا الناس مش يفرقم
مع الود

نبصم بي العشرة,,,, لكم الحب جميعا

اليوم سنتحدث عن نادي البوليس:
وهويحتل الرقعة شمال غرب الاشلاق وتحده من الغرب مزرعة البوليس التي تمتد غربا حتي الترعة الرئيسية { الكنار} وشمالا مستشفي الحصاحيصا والي الشمال الشرقي ميز الممرضات وبيوت الممرضين كما كنا نسميها ,,, سكنها مجموعة من العاملين بالمستشفي اذكر منهم علي سبيل المثال لا الحصر عمنا أحمد صالح وابناؤه منهم اسامة وعاصم ومحمد وعادل وكانت لهم صلات وثيقة باهل الاشلاق,, وعمنا بشير الفحيص وعبد الله الميل مساعد الصيدلي ,,, ورهط من اهل الصحة ,,, النادي كان اول نادي بالحصاحيصا به تلفزيون وكان متنفسا لاهل الاشلاق مساء ,,, وبالنسبة لجيلنا كان واحتنا التي نستظل بها من الانحراف في مناحي اللهو الاخري ,,, كان معظم وقتنا بالنادي وطبعا اخونا عماد مرضان كوتشينة ولا يزال كان يلقب بالركييب ,,, عادة ما كان هناك احد المساجين الذي تتم ضمانته ليعمل بالنادي ,,,, وحقيقة كان يتم انتقاؤهم من اصحاب الجرائم غير المجرمين المعرفوين والذين ادينوا بجرائم مثل الاختلاس وما الي ذلك ,, وعندما ارجع لذلك الزمن
استغرب من اننا ما كنا نعاملهم كمساجين ,, وكانت لنا صداقات مع العديد منهم ,,, واذكر منهم احمد حسين من رفاعة والذين كان يعمل بالشرطة قبل سجنه واذكر انه كان يملك مسجلا وعدد لايستهان به من الاشرطة ,, وكان يحب مصطفي سيد احمد جدا وله العديد من اشرطة الكاسيت وفي ذهني مربوط باغنية الامان لرمضان حسن بصوت مصطفي سيد احمد ,,, وكان هناك ايضا احمد ود الامباشي وكان يعمل موظف بالبنك قبل ادانته وكان لاعبا ماهرا في كرة القدم .
كنا نقضي جل وقتنا بالنادي ناتيه نهارا في يوم الجمعة او الخميس ,, ولكن عماد كان من رواده نهارا في كل الايام وكان يذهب للمدرسة صباحا ويحضر حصة وحيدة بعد الفطور ليذهب الي النادي ,,, عصرا كان كل السودان يلعب كرة وكنا كذلك. المغرب نتوجه للعشاء بمطعم محي الدين ,, ثم نذهب للنادي حتي منتصف الليل تقريبا ,, كان هذا البرنامج ثابت الا اذا ذهبنا للسينما او لحضور الحفلات المميزة ,,,, رحم الله تلك الايام واهلها ,,,, وإلا ان نلتقي لكم الود.

ها اللخو..كشف الحال لزومو شنو؟؟الناس ديل هس عندهم احفاد ما عارفين انهم كانوا مساجين..دقست يا مدير..حيا الله ايام الاشبلق واهل الاشلاق اينما حلوا...

من طرف **ميرغني ابراهيم** السبت مارس 22, 2008 8:12 am

الاخ معاوية الشفيع / مرحب بيك في اشلاق دوت كوم ,,,, واسعدتني ملاحظتك , مما يعني انك كتابع وبدقة .
اخي حقيقة لم يغب عني هذا الخاطر وانا اكتب عن ماضي غير مشرف لاخوان عرفتهم ,,, ولكن تجد بين السطور ما يصف حال من يكون مضمونا بانه ليس من اصحاب السوابق او ارتكب جرما شنيعا ,,, ودليل احترامنا ليهم وقتها وحتي الان هو انهم كان بشرا تستحب صحبتهم رغم اخطاؤهم الاخري ,, وسبحان من لايخطئ ,,, وان حدث فقد سبق السيف العذل ولهم مني الاعتذار مثني وثلاث ,,, شكرا معاوية,,, لكم الود.

ارى ان اشلاق دوت كوم يجب ان تتطرق للمزيد من النوادر والملح وانا اطلب من الشيوخ..عماد ومعتصم يوسف ومرغنى ان يتحفونا بقصة قدورة مع نضارة جمال السر وحيا الاشلاق الحيا..

الاخ معاوية/ كويس اني ذُكرت كاخر الشيوخ ,, يعني اصغرهم ,,مكسب برضو,, الفكرة جميلة وخلينا نلملم اطراف الذكريات ,,, لك الود.

السادة شيوخ المنتدى

إنتو مسعولين من الخير:-

معتصم يوسف(باعتباره أحد اهم رواد هذا البوست) عمل حادث تاني ولا شنو؟؟؟!!؟؟

من طرف معتصم يوسف الإثنين مارس 31, 2008 6:48 am

يسال منك الخير يامعاوية بس اليومين ديل غيرت الشغل بتاعي بعد 25 سنة لمكان شغل جديد وانشاء نعوض الايام الفاتت وربنا يديكم العافية ويوفقكم

من طرف معتصم يوسف الإثنين مارس 31, 2008 6:51 am

شايف جبتو لينا تلفزيون في المنتدي والله ياجماعة خايف عم ابراهيم الذبيدي يشوفة ويقوم يكسرو ماتخلوة يشوفة

من طرف معتصم يوسف الإثنين مارس 31, 2008 7:18 am

ياجماعة بسأل عن صلاح الشيخ وعماد يوسف وين الناس ديل رجاء سعادة المدير شوف طريقة ودخلهم عاوزين التواصل معهم

أخونا معتصم

الظاهر والله أعلم الحادث أثر على نظرك

ياخوي السأل منك أناااااااااااااااااااااااا ....هيثم ....ما معاوية

بتشكر معاوية على شنو؟؟؟؟؟

من طرف عماد الشفيع الإثنين مارس 31, 2008 8:51 am

الأخ معتصم والله ليك وحشة ده اولا
ثانيا سؤالك عن صلاح الشيخ وعماد يوسف انا برد نيابة عن المدير اصلى نصبت نفسى كبير مساعدى المدير ما اصلو الحكاية بالعمر
صلاح الشيخ ذهب السودان ولم يحضر حتى تاريخه ولا اعرف هل ينوى العودة ولا000 لا
عماد يوسف حضر قبل 03 اسابيع من السودان وذهب لأنه قالوا احتمال ارجاعهم لعملهم مرة اخرى والراجل جاء محبط لأنه لم تتضح الرؤية حتى عودته وجميعهم بخير 0
وشنو يامعلم نزلوك الصالح العام ولا شنو حكاية العمل الجديد ده نأمل الافادة ( الواحد تم تأبيده فى عمله ) وبرضو قاعد00 يامعتصم انت بقيت من ارباب المعاشات وانا والباقر اخوى بدأنا ننسج فى العناقريب عشان نختها قدام البيوت للونسة والقطيعة والله نحّرم للنسوان المرقة لأننا سوف نرصد كل شاردة وواردة وطبعا الباقر اخطر من ابوه فى المساخة والتعليف وما بتفوت عليه اى حاجة 000

لكن ياعمدة خذلتني

إتخيلتك أول زول حيرد لي على ملاحظة طبزة معتصم السالت منو أنا ومشى قال شكراً لمعاوية

من طرف عماد الشفيع الإثنين مارس 31, 2008 9:55 am

هيثم على الشفيع كتب:لكن ياعمدة خذلتني

إتخيلتك أول زول حيرد لي على ملاحظة طبزة معتصم السالت منو أنا ومشى قال شكراً لمعاوية

والله ياهيثم كنت فعلا داير اعلق على الطبزة دى لكن عند الكتابة اتملأ على المكتب بالزوار وتشتت الأفكار وبعدين التلفزيون القالو ده موجود ويين ؟ لكن ياهيثم معزرة الزول من الحادث بقى كلامو كتر والزاد الطين بلة كمان نزلوه الصالح العام فدعواتنا ليه بحسن الخاتمة آميييييييييييييييييييين

من طرف معتصم يوسف الإثنين مارس 31, 2008 5:00 pm

ياجماعة معليش انا ( اتلخبط شوية وياهيثم ودعمك العامل فيها عندو مكتب وزوار كمان (عمدة خليك في علبك ياخى انت الثانوي العالي كلو عندك كراس واحد ) قال مكتب وزوار

من طرف معتصم يوسف الإثنين مارس 31, 2008 5:15 pm

عمدة لعلمك توجد في المنتدي قناة عازة (عمدة مالك ومال النت ياخي امشي شوف ليك مافي داعي اكمل)

الاخ عماد/ توجد قناة المنتدي التلفزيونية من فترة ليست بالقريبة ,,, اسفل البوابة وهي قناة عازة

معاوية علي الشفيع كتب:ارى ان اشلاق دوت كوم يجب ان تتطرق للمزيد من النوادر والملح وانا اطلب من الشيوخ..عماد ومعتصم يوسف ومرغنى ان يتحفونا بقصة قدورة مع نضارة جمال السر وحيا الاشلاق الحيا..

ياااااااااااااااااااااااشيوخ المنتدى :

نكرر مطلب أخونا معاوية وشايف مافي زول هببو ليو....غير ميرغني الفرحان بإنو أصغر الشيوخ

بانتظاركم

من طرف سلمى الشفيع السبت أبريل 05, 2008 8:04 pm

معاويه مااالك علينا عاوز تفتح فينا شيوخ المنتدى بقصص الاشلاق ماصدقنا سكتوا مننا معتصم خلوهو لبنبرو والعمده ومرغنى الظاهر الشيخوخه ضعفت الذاكره شويه خلونا نرتاح شويه من حكاوى قدوره.لك الود

السادة رواد المنتدى وزاوية إشلاق دوت كوم خاصة

أرى أن بريق هذه الزاوية قد خبا ...يعد أن وصلت مرحلة إختيارها كموضوع مميز للشهر

هل هي تخمة الإطراء؟؟؟ أم كسل المجيد؟؟

أفيدونا.......

من طرف معتصم يوسف الإثنين أبريل 14, 2008 8:30 pm

هيثم والله ياحبوب بريق زاوية الاشلاق لم ولن ينطفي بس أختنا سلمى سكتتنا جيب لينا منها الامان وبعدين بنكتب في أجمل زاوية قصص ومواقف طريفة وحاجات عجيبة

الاخوان هيثم ,عمده, معتصم , عدنا لاحياء اشلاق دوت كوم ,,, رغما عن توسلات اختنا سلمي وفرحتها بعدم نشاطه في الفترة السابقة

كرة القدم في الاشلاق:

كان لنا اكثر من ملعب فجورانا معهد التربية به ملعبين وان كنا لا نلعب بهما كثيرا وملعب الحصاحيصا الحكومية{القديمة},,, وملعب المستشفي قبل ان تغزوه من الجهة الجنوبية مقابر الاطفال حديثي الولادة والخدج,, وكل ما ذكر هذا الملعب الاخير وثب الي الذاكرة فاطيما وزكريا الجنوبي وشلوت من قدور في احد الايام.
ملعب الحكومية ولعبنا به كثيرا وكان برنامج يومي بعد الغداء نتوجه الي الميدان ,, البعض امثال منعم شبو بعد رحيلهم الي الامتداد وعبد العزيز ابراهيم واخرين كانوا يحتفظون بملابسهم في بيت عم السر حسن نصر حيث انه كان هناك بالديوان حمار لبني بتاع حديد تجد ارتال من الملابس عليه ملقاة دائما في غير نظام. وغالبا ما يعود اولئك الذين يسكنون بعيدا الي بيت عم السر ثانية بعد التمرين للاستحمام وشاي المغرب.

نبدأ بحراسة المرمي : كان العمده اولا ثم اعتزل حراسة المرمي ليتجه الي الوسط
ثم الرشيد الضقالة
ثم مبارك الفحل
ثم معتصم ساتي الذي كان حارسا مميزا
في الدفاع لعب مجموعة من الاخوان في فترات مختلفة ولكن احدث تشكيلة للدفاع كانت معتصم يوسف العوض,فيصل ساتي{باشاتا}, قدورة ياك يمين في كل العصور ولعب حيدر الامين في خانة الباك الايسر وهو بعد غض يافع,,, لعب عماد يوسف{ طيرالجنة} وصلاح الشيخ سلمان وابوعبيدة حسن الطيب وبدر الدين حسن الطيب,,, اما جمال فكان مدافعا غير راضي بوضعه ولذلك كان يلعب مهاجما في بعض المرات, والباقر{ لم تكن كرة القدم من اهتماماته القوية },احمد اب شعر{ كان يسكن مع ناس محمد كمال الدين} وخالد{قريب ناس عمر عبد الرحيم} ومن اشهر واحرف من لعب في هذه الخانة حسن بنداس{ داشنقا} وابن عمهم ازهري, لعب كذلك ميرغني عبد الرحمن التوم وعبد المعبود.
وسط الملعب لعب به الكثيرون ولكن احرف من لعب محمد احمد ودالعباس{ ود القرد} ولعب به ايضا ميرغني الزبيدي وعماد عبد الرحمن واحمد ود القصاص وجمال السر ومن اللاعبين المهرة والذي كان يلعب مهاجما خطيرا بابكر بانقا{العب}ومولانا عبد الرحيم وفاروق ابو زيد
في الهجوم اشهر من لعب كقلب هجوم وكان هدافنا رحمة الله عليه رحمة واسعة: صلاح السر { ود الكاو}
وكذلك عبد العزيز ابراهيم { عزو}واحمد طيفور وصالح ابن اخ الزاكي

هؤلاء من اسعفتني الذاكرة بذكرهم ,,, وطبعا لعبوا في الفترة ديك في الخرطوم ناس قرعم وعوض كوكا وسبت دودو وصديق منزول وجكسا

اترك البقية لعماد ومعتصم لذكر من سقطت اسماؤهم سهوا,,, ولكم الود.

من طرف عماد الشفيع الثلاثاء أبريل 15, 2008 8:05 am

[quote="ميرغني ابراهيم عمر"][color=darkblue]الاخوان هيثم ,عمده, معتصم , عدنا لاحياء اشلاق دوت كوم ,,, رغما عن توسلات اختنا سلمي وفرحتها بعدم نشاطه في الفترة السابقة

كرة القدم في الاشلاق:

والله يامرغنى رجعتنا لى فترة حلوة وجميلة وماشاء الله على ذكريات وصدقنى اعتبر فترة الاشلاق من اجمل الفترات التى مرت على فى حياتى 000من ذكريات ملعب المستشفى انو المعلب يكتظ بالمشاهدين من الجنسين طبعا ماحبا فى مشاهدت كورتنا الجميلة ولا حرفنتنا لكن لمشاهدة الحارس المبدع ( قدورة ) تخيلوا حارس مرمى عريان من فوق ولابس نكس ( سروال ) ازرق من السيتان وبيد مقطوعة 00 ايضا اتذكر فاطيما ولعبة الكعب التى اشتهر بها والعكليته عمر تلقاه تحت ارجلك وهو قصير القامة ولصقة كمان 000 وكأنى أرى يامرغنى شبو الجناح الطاير وهو جارى شاقى المقابر عشان يحصل التمرين000 قصص وذكريات نتمنى ان تواصل يامرغنى وأخصرك من سلمى التى احبطتنا فى الفترة السابقة يالله يامعتصم خلى برنامج اسماء فى حياتنا يشتغل00

يا اخوانا أي نعم شبو(عبدالمنعم) دة كان أشول (وغالباً أي أشول حريف)

لكن أنا لعبت معاهو -أيامي الفي الجامعة..كنا بنبتكر لعبات كدة على قدر حوش ناس عم عبدالرحمن الله يرحمو وبكورة الشفع الصغار- شكلو كيييييييييييييييييييييييشة

كلمونا عن كورتو شوية

من طرف معتصم يوسف الثلاثاء أبريل 15, 2008 3:07 pm

هيثم منعم شبو طبعا" كان جناح لفت خطير جدا" وذي ماعارف دائما" الجماعة الاشولنجية حريفين شبو كانت حرفنتو في أخلاقة قدورة يقول لية أطلع برة يطلع علطول يأخي جناح لفت ينفرد بالمرمى هو يدخل قوووون والكرة تطلع أوت

من طرف معتصم يوسف الثلاثاء أبريل 15, 2008 3:09 pm

ميرغني كان في ملعب أخر لو تذكر بين بيوت الاشلاق وبيوت الممرضيين دا كنا بنلعب فية يوم تكون كل الساحات مليانة

من طرف معتصم يوسف الثلاثاء أبريل 15, 2008 3:13 pm

الكرهونا الكرة زمان وكرهونا التمارين لو يتذكر شيوخ المنتدى (عادل الشيخ و محمد ساتي) عاوزيين يلعبوا - وياحليل ودالعباس الكان كفيل بيهم ولو تذكروا مرة شال عادل الشيخ ورماه في الخور أيام

من طرف عماد الشفيع الأربعاء أبريل 16, 2008 9:29 am

معتصم يوسف كتب:الكرهونا الكرة زمان وكرهونا التمارين لو يتذكر شيوخ المنتدى (عادل الشيخ و محمد ساتي) عاوزيين يلعبوا - وياحليل ودالعباس الكان كفيل بيهم ولو تذكروا مرة شال عادل الشيخ ورماه في الخور أيام

معتصم انا اتصلت بعادل الشيخ وكلمته باقى هو معانا فى الدمام وقال ليك يامرض مابتذكر إلأ دى قال انا سوف ادخل وأطلع المخفى ( جاك الموت يا ملك الموت )0

من طرف عادل الشيخ الأربعاء أبريل 16, 2008 1:47 pm

الاخ معتصم السلام عليكم ورحمه الله يا اخى مشتاقين اكثر من 20سنه لم نشوف بعض اتمنى من الله ان تكون بخير وعافيه وبعد ين حكا ية ود العباس لها 30 سنه يا اخى ما شاء على الزاكره ياعجوز

من طرف عماد الشفيع الأربعاء أبريل 16, 2008 2:19 pm

عادل الشيخ كتب:الاخ معتصم السلام عليكم ورحمه الله يا اخى مشتاقين اكثر من 20سنه لم نشوف بعض اتمنى من الله ان تكون بخير وعافيه وبعد ين حكا ية ود العباس لها 30 سنه يا اخى ما شاء على الزاكره ياعجوز

مرحب عادل الشيخ نورت المنتدى ويلا عايزين مشاركاتك وبعدين انت من دفعتنا يعنى من رواد اسماء فى حياتنا

من طرف معتصم يوسف الأربعاء أبريل 16, 2008 5:55 pm

والله ياولد الشيخ حمد لله على السلامة واخبارك وأخبار أولادك شنو وكلامي صحيح لو ماانت ومحمد ساتي نحن كنا لعبنا في برشلونة كرهتونا ليها زمان - بس أبوكليقة (الكشة) كان أحسن منكم يقولو ليهو أطلع يطلع برة علطول لكن أنت ومحمد ساتي العكليتة مصائب

من طرف سلمى الشفيع الخميس أبريل 17, 2008 12:18 pm

الساده شيوخ المنتدى السلام عليكم.بعد ما الله ريحنا شويه من القصص بتاعت نسايم الليل وقلنا معتصم انشغل ببنبرو والعمده ومرغنى ذاكرتهم ضعفت شايفه جاكم عضو جديد كمان الشكيه لى الله ماشين فى ذياده كمان.طبعا مرغنى حا يعملنى مدير بالانابه لفتره انتظروا منى تغيير فى هذا الجانب..لكم الود