إشلاق دوت كوم....ishlag.com

هيثم منعم شبو طبعا" كان جناح لفت خطير جدا" وذي ماعارف دائما" الجماعة الاشولنجية حريفين شبو كانت حرفنتو في أخلاقة قدورة يقول لية أطلع برة يطلع علطول يأخي جناح لفت ينفرد بالمرمى هو يدخل قوووون والكرة تطلع أوت

ميرغني كان في ملعب أخر لو تذكر بين بيوت الاشلاق وبيوت الممرضيين دا كنا بنلعب فية يوم تكون كل الساحات مليانة

الكرهونا الكرة زمان وكرهونا التمارين لو يتذكر شيوخ المنتدى (عادل الشيخ و محمد ساتي) عاوزيين يلعبوا - وياحليل ودالعباس الكان كفيل بيهم ولو تذكروا مرة شال عادل الشيخ ورماه في الخور أيام

معتصم يوسف كتب:الكرهونا الكرة زمان وكرهونا التمارين لو يتذكر شيوخ المنتدى (عادل الشيخ و محمد ساتي) عاوزيين يلعبوا - وياحليل ودالعباس الكان كفيل بيهم ولو تذكروا مرة شال عادل الشيخ ورماه في الخور أيام

معتصم انا اتصلت بعادل الشيخ وكلمته باقى هو معانا فى الدمام وقال ليك يامرض مابتذكر إلأ دى قال انا سوف ادخل وأطلع المخفى ( جاك الموت يا ملك الموت )0

الاخ معتصم السلام عليكم ورحمه الله يا اخى مشتاقين اكثر من 20سنه لم نشوف بعض اتمنى من الله ان تكون بخير وعافيه وبعد ين حكا ية ود العباس لها 30 سنه يا اخى ما شاء على الزاكره ياعجوز

عادل الشيخ كتب:الاخ معتصم السلام عليكم ورحمه الله يا اخى مشتاقين اكثر من 20سنه لم نشوف بعض اتمنى من الله ان تكون بخير وعافيه وبعد ين حكا ية ود العباس لها 30 سنه يا اخى ما شاء على الزاكره ياعجوز

مرحب عادل الشيخ نورت المنتدى ويلا عايزين مشاركاتك وبعدين انت من دفعتنا يعنى من رواد اسماء فى حياتنا

والله ياولد الشيخ حمد لله على السلامة واخبارك وأخبار أولادك شنو وكلامي صحيح لو ماانت ومحمد ساتي نحن كنا لعبنا في برشلونة كرهتونا ليها زمان - بس أبوكليقة (الكشة) كان أحسن منكم يقولو ليهو أطلع يطلع برة علطول لكن أنت ومحمد ساتي العكليتة مصائب

الساده شيوخ المنتدى السلام عليكم.بعد ما الله ريحنا شويه من القصص بتاعت نسايم الليل وقلنا معتصم انشغل ببنبرو والعمده ومرغنى ذاكرتهم ضعفت شايفه جاكم عضو جديد كمان الشكيه لى الله ماشين فى ذياده كمان.طبعا مرغنى حا يعملنى مدير بالانابه لفتره انتظروا منى تغيير فى هذا الجانب..لكم الود

هو ياسلمى نحن كويسين لكن في 3 اليومين بجهزوا في حالهم وداخلين ليكم في المنتدى وتخصصهم أشلاق دوت كوم وبعد داك بتشوفي نحن كنا أرحم

هاآآآآ أخوانا هيييي

ما تشتغلو بي سلمى دي .......دي شافعة صغيرة وقامت لقت أبوها في بيوت الضباط والموظفين وما عارفة حاجة للإشلاقات وسحرها

وباعتباركم جزء من التراث القومي......نحن عاوزين نحافظ عليو من خلال التوثيق عبر هذه الزاوية

يللا

أتحفونا

كلامك صالح كنتو ساكنين في بيوت الضباط عارفين. لكن بيت الضباط دا كان وين برضها شايقية أشلاقية

ياخوي مسؤل عن الخير اليومين ودعمك وين

معتصم يوسف كتب:كلامك صالح كنتو ساكنين في بيوت الضباط عارفين. لكن بيت الضباط دا كان وين برضها شايقية أشلاقية

إنت ما تتحسس

أنا بتكلم عن سلمى (أصغر زول في بيتنا) ....وعن نفسي ولدوني وسكنت في البيت الجنب جمعية البوليس والروضة{الوصف دة صاح؟؟؟}

معتصم يوسف كتب:ياخوي مسؤل عن الخير اليومين ودعمك وين

والله يامعتصم الزول دة لحد الخميس خش المنتدى -واتكلمت معاهو تليفونياً-يعني الحمدلله نصيح وشديد

لكن شوف إنت زعلتو في شنو ،،عشان يقوم يفطك بالطريقة دي

عمدة صاحبي وانا عارفو وصدقني لو قال شي بيكون قال عن نفسو لانو نحن إتعلمنا منه كل شي كل شي كل شي

يعني ياهيثم قلت خش يوم الخميس وتاني ماعارفين عنو حاجة صاح طيب . خميسو كان كيف ياهيثم دا عمدة وانا عارفو فتشو الزول

شكرا ياجماعة للسؤال والله ياجماعة انا شخصيا ما بقدر اغيب عن المنتدى إلإ للشديد القوى عموما السبب كانت مأمورية عمل للرياض وزحمة ودوشة منعتنى الدخول ويامعتصم تسأل عنك العافية وترانى إلتزمت بالعهد وانا فى انتظار الكورلا 000 وإلأ ببقى ليك زى صاحب عود الكبريت 0000 تانى شكرا ليكم وزى ماقلنا ان المنتدى بربط الناس مع بعض والبغيب الناس بتفقدوا 000
أنا ظهرت الله يظهر ليكم الجاهورى 00000000000

مرغنى صدقنى المايقوما محطة مهمة فى حياتى مع ان الفترة كانت بسيطة إلا انها كانت حافلة ويكفينى اننى كنت السبب فى ازالة العلاقات التى كانت متوترة بين اولاد البوليس واولاد المايقوما وحتى فى فترة اندمجنا فى التمارين مع اولاد المايقوما وكانت لنا فيها علاقات اخوة وصداقة مع شبابها وكانت تربطنا علاقة قرابة اسرية مع بعض مؤسسين المايقوما (اسرة عثمان حمد / اسرة حسن خلف الله ) بالاضافة لصداقات مع اخوة نعتز بهم مثل يسن منصور وحسن حاج الصديق والمرحوم حسن كولا وعلى النور عطية وناس عصام فرينى وناس راشد عكاشة و جونى وجارنا حاج الصديق ولده دخل الكلية الحربية وجيرانا اتذكر امهم بيقولوا لها بت عسولة وابنائهم اتذكر هاشم واتذكر حاجة الدهر ودكانها وطبعا يامرغنى فى البداية انا المايقوما دى كنت لا اطيقها والله العظيم احضر من الاشلاق ادخل بيتنا من الباب الصغير واطلع منه بالباب الكبير وارجع للإشلاق ( امى كانت تقول لى انت دافنين صرتك فى الاشلاق ) لكن فى الأخير بقت الامور عادية وحتى اولاد الاشلاق كانوا بيجونى فى المايقوما 000 زمن والله زمن --
اما احمد ودفاطنة فكانت لنا صولات وجولات سوف اعود لها لاحقا 0000

العمده سلاااام عودا حميد...سجمى يالعمده شايفه حكاويك بقى فيها جماعه الله يرحمهم دفعتك خلاص بدت فى النقراض؟ الله يديكم انت ومرغنى حسن الخاتمه بعد كده...لك الود

سلمى الشفيع كتب:العمده سلاااام عودا حميد...سجمى يالعمده شايفه حكاويك بقى فيها جماعه الله يرحمهم دفعتك خلاص بدت فى النقراض؟ الله يديكم انت ومرغنى حسن الخاتمه بعد كده...لك الود

والله ياسلمى لحقنا الزينين اقصد انا واولاد دفعتى وهل تصدقى قطع غيار بقت ماعندنا لأن الموديلات القديمة انقرضت غايتو لمن نحتاج لقطع الغيار قاعدين نمشى التشاليح للقديم والاسكراب 000000 والله يعظم الأجر 0000

ميرغني ابراهيم عمر كتب:الاخوان بالمنتدي ,, لفت انتباهي الابن محمد الباقر الي اننا لم نكتب عن ال احمد العباس ,,,, ولكثرة تردد اسم ال ود العباس لثناء الردود كنت اعتقد اننا قد كتبنا عنهم ,,, وللتأكيد راجعت الموضوع ولم اجد رد منفصل يتحدث عن آل احمد العباس ,,,, وهو تقصير كبير وان لم يكن مقصودا فآل احمد العباس رمز كبير من رموز الاشلاق والعم احمد العباس رحمه الله كان رمزا من رموز الاشلاق البارزه كان رجلا له كلمته ووضعه المميز بين اقرانه,, وكان رئيسا للسواقين وزوجته الحاجه التومه كانت زعيمه ايضا بين النساء ,جاؤا الي الاشلاق في منتصف السبعينات من اشلاق مدني, وابناؤه : محمد الشهير بود القرد تخرج في كلية الشرطه حتي تقاعد للمعاش قريبا برتبة عميد ,, وهو لا يحتاج منا لكثير قول,, ثم الباقر احمد العباس الذي عمل بالشرطه وتركها لياتي الي الغربه وله لسان لاذع وقفشات ومواقف كثيره قد ناتي الي ذكرها لاحقا ,,, ثم البنات نفيسه وكانت مشهوره بانها اشطر البنات بالاشلاق تزوجت مبكرا من ابن عمها عمر ,,, واظنها قد واصلت دراستها الجامعيه بعد الزواج,,, ثم اسماء تزوجت بالاستاذ ابو القاسم ابو لاحظ,,, وحفلة الزواج فرتقها اولاد المايقوما بعد شكله مع ود العباس ,,, ثم سلمي اظنها قد درست القانون وتزوجت من خريج زراعي اسمه مدني ,,, ثم هاجر ومني ونجوي ,, واخر الاخبار ان مني ونجوي بمدينة الرياض ,,, لهم جميعا التحيه ولكم الود.

وما تنسى يا مرغنى ان حاجة التومة كانت مشلخة زى امك وام معتصم يعنى فى حلف الناس القدام مازى امهاتنا الما مشلخات وبراكم قيسو مين الاحسن ومين الأجدادهم كان متحضرين وفاهمين 00000

عاطر التحايا لي أل أحمد العباس الذي كان ينطلق من بيتهم في الاشلاق كل الخطط وبخصوص الشلوخ ياعماد أنا أمي إتشلخت في صالون تجميل مش شلوخ إي كلام

ميرغني ابراهيم عمر كتب:الاخ معتصم يوسف وعماد عبد الرحمن ,,, كلمونا عن عمك النور بتاع الجمعيه,,, كان ساكن في البيت الجنب النادي ,, واهلو من الدناقله ,,, يلا ورونا همتكم,,, لكم الود.

انا حولت الموضوع لمعتصم مع اننى متذكر شكله واظن عندو ولد كان ضابط شرطة واغتيل من قبل عصابات التهريب زى سمعت لى قصة زى دى عموما معتصم تم الباقى 0000000لكم التحايا

بسم الله والحمد لله اولا اشكر ادارة نادي و منتدي الذبيدي والشفيع دوت كوم جزيل الشكر واتمني لهم مذيد من التفوق والتقدم والنجاح والكثير من مواضيع بتاعت زمان زمن ابواتنا وين اتربو وزمن الاشلاقات وزمن الناس كانت واحد وزمن السودان كان بي خيرو والله انا بشوف انو المنتدي دة واصحاب هذا المنتدي بالجد اصحاب لانو بي القصص القريتا انا دي والله ديل اخوان عديل حيث كان لافرق بين بيت فلان وبيت فلان الناس كلها واحد في اي شي وانا تاني اشكر المنتدي جزيل الشكر بتمثيل احد من عائلة احمد العباس واشكر العم ميرغني ووالله العظيم لولا هذا المنتدي لما كنا نعرف هذة الذكريات التي لم يدفنها اصحابها وهذة الاسماء العريقة والاهل ولولا هذا المنتدي لنسيناها والله انا بتكلم جد وبشكر العم عماد الشفيع واخيرا بقول للمنتدي زودنا بالكثير من القصص عن ابواتنا واخونهم وابوتهم واماتهم مع واحترامي للجميع شكرا

فعلا عمدة بتشالق والله . الجاب النور شنو لعم أبراهيم الدنقلاوي رحم الله ( محمد الفاتح)

معتصم يوسف كتب:فعلا عمدة بتشالق والله . الجاب النور شنو لعم أبراهيم الدنقلاوي رحم الله ( محمد الفاتح)

خلى شلاقتى000 انت العارف ماتتكلم ولا انت برضوماسح زى000 اهو نحن بنجتهد وبس0000

محمد الباقر احمد كتب:بسم الله والحمد لله اولا اشكر ادارة نادي و منتدي الذبيدي والشفيع دوت كوم جزيل الشكر واتمني لهم مذيد من التفوق والتقدم والنجاح والكثير من مواضيع بتاعت زمان زمن ابواتنا وين اتربو وزمن الاشلاقات وزمن الناس كانت واحد وزمن السودان كان بي خيرو والله انا بشوف انو المنتدي دة واصحاب هذا المنتدي بالجد اصحاب لانو بي القصص القريتا انا دي والله ديل اخوان عديل حيث كان لافرق بين بيت فلان وبيت فلان الناس كلها واحد في اي شي وانا تاني اشكر المنتدي جزيل الشكر بتمثيل احد من عائلة احمد العباس واشكر العم ميرغني ووالله العظيم لولا هذا المنتدي لما كنا نعرف هذة الذكريات التي لم يدفنها اصحابها وهذة الاسماء العريقة والاهل ولولا هذا المنتدي لنسيناها والله انا بتكلم جد وبشكر العم عماد الشفيع واخيرا بقول للمنتدي زودنا بالكثير من القصص عن ابواتنا واخونهم وابوتهم واماتهم مع واحترامي للجميع شكرا

شكرا ابننا محمد لدخولك المنتدى ومشاركتك وكمان عايزين اسراء وأحمد الدخول والمشاركة 00 اصلوا ما لقينا فايدة من عمك الكبير الذى يظهر أن ود ابو القاسم ماقاعد يجيه المكتب 00 اما ابوك فكأنى اسمع قولته المشهورة 00من ويييييييييين باقى البيت والبنيان شاغلين كل احاسيسه وتفكيره 00 اما بخصوص الإشلاق فصدقنى يا ابنى دى اجمل فترة مرت بنا وزى ماقلت لا زالت علاقة الاشلاق ممتدة لأنها ضاربة فى الجذور اتمنى منك المواصلة عند عودتكم للسودان وعدم الانقطاع 000مع تحياتى

الساعه 3:30 بتوقيت السودان زمان ,, المكان منزل الزبيدي في نهاية السبعينات مع بداية العام الدراسي يعني شهر 7 او 8 :

بعد المدرسه مشينا النادي لحدي 2:30 وخليت هناك عماد الشفيع { طبعا اخر زول يقوم من التربيزه ,, ومعاهو صلاح الشيخ { منتظرو لانو عماد حيمشي يتغدي معاهم ,, ما بيقدر يمشي المايقوما ويجي } ومعاهم احمد المضمون و ابو عبيده حسن الطيب لانو ساكن مع عمو خالو المرحوم احمد الطيب وحيمشي يتغدي مع مجموعة ناس احمد العباس عليه الرحمه ويوسف العوض في الروضه { طبعا اولاد العباس ومعتصم ما بنتظروهو لانو ضمان حيجي وهم حيمشوا البيوت عشان يجيبو الغداء الروضه} ,,, جيت البيت اتغديت بي ملاح بامبي مع عمك الزبيدي ووليد وحامد ,,, وسيبدأ عمك الزبيدي في التجهيز للخروج لمزرعة البوليس والنادي ,, علي وليد وحامد ان يذهبوا معه للقش والمساعده في حليب البقر المغرب ,,,, انتظرت بفارغ الصبر خروج عمك الزبيدي لادخن سيجاره بي مزاج ,,, خرج اخيرا بعد ان صلي العصر وقرأ كمية من الاوراد ,,, وقرات انا كميه من ميكي جيب والالغاز ,, وتشاغلت بعض الوقت بحل الكلمات المتقاطعه بجريدة نجوم وكواكب ,,, بعد ان خرج عمك الزبيدي طلبت من احد البنات ان تنادي علي جارتنا التي تبيع السجائر ,, واشتريت 2 سيجاره شامبيون بي 3 قروش ,,, استمتعت بسيجاره منهم وانا انظر الي سقف الديوان {لقد حفظت عدد الاخشاب ," المراين" واشكالها وخرائط الماء علي الاخشاب ,, والاماكن المنبعجه من السقف بفعل الامطار وردم التراب علي السقف} المهم انني اكملت سيجارتي بمتعه ولذه متناهيه لانها ما فيها تخميسه ولا يحزنون,, والان حان موعد لقاءنا الثالث اثناء اليوم بعد المدرسه والنادي ,, الي ملعب الحكوميه ,, لبست الشورت والفانله وفوقهما الجلابيه " لزوم الحشمه" وخرجت من المنزل ميمما جنوبا ,, وقتها وعلي ضل حيطة ناس الشيخ وشبو بدات تتجمع بائعات الطعميه وسلطة الروب و التبش بي الشطه من بنات الاشلاق الصغيرات السن ,, وقد تحلق حولهن الذباب والزبائن ممن هم اصغر منا سنا ,, وانشغلت بعض البائعات والزبونات بلعب الصج واريكا ,,, انتهت مسيرتي جنوبا بالكوشه التي طفحت محتوياتها خارجها بينما اجتمع كلب او كلبان يبحثان عن لقمة عيش ,,, كان علي يميني الفسحه المنبسطه امام صف بيوت عثمان عبد الهادي وقرشي رحمهما الله وكان كلب قرشي راقدا علي مقربه من عا مود النور الذي يتوسط الفسحه التي يحدها جنوبا السلك الشائك لسور معهد التربيه الشمالي ,, راودني التفكير ان انادي علي باشاتا وانا اتجه غربا ومنزل ال ساتي علي يميني ,, ولكن حدثت نفسي بان عمك ساتي رحمه الله سيكون موجودا وقد يكون نائما فيحدث لباشاتا ما لا تحمد عقباه ,, مررت بمنزل عمسيب عن يميني ايضا متجاوزا بيت مالك الي بيت السر حسن نصر الله رحمه الله عن يميني متجنبا مياه حمام ناس السر ,, ممسكا بعمود الكهرباء في نهاية المسار لاتجه جنوبا لظل حائط منزل السر ,,وكالعاده وجدت منعم شبو جالسا متكئا علي الحائط وهو يرسم شيئا علي الارض ,, بعد التحيه:
: وين الجماعه ديل ,,
: والله ما عارف.
: حقو نبدأ قبل ما عرب الداخليه ديل يجيبو ليهم كفر ويملاوا لينا الميدان .
: انت الكوره عند من؟
: الكورتين عند قدوره ,, هو كان ما حضنهن بيمشي ؟
: كم مره اتفقنا انو يخلي كوره عند ناس السر
: طيب قولو ليهو الكلام دا بعدين
: جيت متين؟
: يا اخي انا تاني ما بجي كل يوم راكب مواصلات وجايي من يوم والجماعه القاعدين هنا ما بيطلعوا.
قطع علينا الحديث ظهور محمد ساتي وهو يجر العجله المثقوبه العجلات وعلي ظهرها شوال عيش في طريقه الي الطاحونه .
: كيف يا شباب ,, قالها وكانما نحن من ارسله الطاحونه وفوت عليه فرصة التمرين .
بعد ان تعدي طريق العربات الترابي مقتربا من سور المدرسه ,, التفت الي منعم شبو فرحا ,, : الحمد لله ان شاء الله كل يوم يرسلوهو ,, وانا مستعد ادفع حق الدقيق .
وذلك لان محمد ساتي وعادل الشيخ كانوا في جيل اصغر مننا واكبر من جيل ورانا ,, فكانوا ياتون الي تمارين الفريق الاكبر,, نقبلهم حين يكون هنالك نقص ونتذمر ونتنمر عليهم ان كنا كاملي العدد,, كان معهم الكشه ولكن حسمه كان سهلا بالنسبه لصلاح السر وجمال ,, ثم انه لا يكمل التمرين عادة لان البقرة تاتي من الراعي بين الشوطين ,, فيهب جاريا اليها تاركا التمرين حتي ولو كان علي انفراد تام بالحارس ,,,
سمعنا من وراءنا صرير الباب الغربي لمنزل السر حسن نصروالتفت كلانا عله يكون جمال او صلاح ومعه الكرة ,, ولكن كان الكشه في احدي طلعاته الاستكشافيه .
قطع علينا سلامنا مع الكشه ظهور عبد العزيز " ود التومه " وهو يظهر من خلف الكراكات والدقاقات القديمه شمال سور المدرسه وجنوب المنطقه.
نواصل

يامرغنى عليك الله وآآآآآصل بل شوف المتعة دى ويشهد الله لو خيرونى برجعة الزمن لى وراء وقالوا لى اطلب واختار صدقنى ما بطلب اكثر من الشئ الكنا عايشنه لأنه بحق وحقيقة قمة المتعة والسعاده ورحم الله ابهاتنا الذين غادروا الدنيا ومتع الله الأحياء بالصحة والعافية 000
ودائما اتذكر مقولة الوالد رحمة الله عليه ( الله من خلانى قديرك يا لهمن فوق غيرك ) والله مبسوطين وما عارفين بيجيبو شنو ؟ ولا كيف ؟ وهسع نحن قلنا الرووووب المدارس فتحت والأقساط بدأت وشئ كتب وشئ ترحيل وشئ مصاريف وشئ علاج وهلم جرا 000 انا فى انتظار باقى اليوم 000 ولى هسع قدورة ماجاء00 وشبو الفصاحة العليه شنو هو بيقدر يقول كلامه ده للقد 0000

بالمناسبة دى دعوة موجها لعجائز المنتدى لقضاء اسبوع فى مدينة الحصاحيصا وتقرر لذلك الاسبوع الأول من اغسطس 2008م واستجاب الى الآن مرغنى الزبيدى / عماد الشفيع / معتصم يوسف / عبد المنعم شبو 0000 يالله ياجماعة اى زول عنده طريقة يلحقنا والبرنامج سوف يكون كالآتى :
الفترة الصباحية 0000 الشاى من بقرة الزبيدى - وبعده الفطور فتافت + كبد + مشويات
الفترة الظهرية 0000 كوتشينة لليفة ( الرواد العمالقة موجودين بقيادة القد وجمال السر وكمان محمد ود العباس )
الغداء 000 اى شئ
الفترة العصرية 0000 كورة دافورى انشاء الله جنب البيت
الفترة المسائة 000 نادى البوليس ونسة وكشاتين واعادة زكريات ومشاهدة التلفزيون وطبعا مشاهدة التلفزيون فى نادى البوليس لها طعم تانى 000
وبعد ده كله النوم فى الحوش وكان كترتو بنوم فى الشارع 000تتذكر عرس احلام بت الزينة
طبعا الاسبوع كل يوم خروف على وآحد 000
خلونا ننسى الهم والغم والغربة وجهجهتها 00 بعدين اهم حاجة 00 عزابة بس لاحريم ولا شفع 000

ميرغني العزيز

بانتظار (الواقعية السحرية) المدهشة .........لا لأبطال"مائة عام من العزلة"

ولكن لأولاد الإشلاق

كانت سمية السر مغرمة ب(قلبنة )الكلام..يوم طلعت فى راسها انو كلمة ماتت بتنسمع زى (ما أتت) يعنى ما جات..فقضت يوماً كاملا تقول لكل من يقابلها :أحلام بت الزينة ما أتت فيرتاع السامع ويقول يابت قلتى شنو؟؟ فتضحك سمية وتكرر أحلام بت الزينة ما أتت..يعنى ما جات..هاهاها..

انا كتبت قبل قراية(ملخص ما نُشر)..واصل يا مرغنى..لكن ما ذكرت اِنو شبو كان سافِّى.

معاوية علي الشفيع كتب:انا كتبت قبل قراية(ملخص ما نُشر)..واصل يا مرغنى..لكن ما ذكرت اِنو شبو كان سافِّى.

سافى بس ؟ !

الأعزاء شباب وشيب المنتدى ،،،

( وبالمناسبة أنا ذاتو من شيب المنتدي --- عشان الكوامر ما يتحسسوا )

يا جماعة الحياة في اشلاق البوليس بالحصاحيصا كان ليها طعم اخر وتحتاج الي توثيق اكثر من مختلف الاجيال والفئات العمرية ،،، احتمال اخواني ميرغني والعمدة بيحاولوا يوثقوا لفترتهم التي يعتبرونها من اجمل فترات حياتهم ( ولهم الحق) لكن هنالك فترات اخرى تلت جيل ( قرعم وجكسا وصديق منزول ) والكل يعتبر شلته وفترته هي الاجمل ،،، كما اود التنبيه هنا الي ان هنالك بعض الأسر سكنت في الاشلاق اكثر من اسر اخرى تنقلت بين النقاط والمراكز ( وافراد هذه الاسر ربما تغيب عنهم بعض المعلومات الخاصة باشلاق الحصاحيصا في بعض الفترات ) للسبب انف الذكر ،،،، واشير ايضا الى ان اعضاء المنتدي ينتمون الى مختلف الاجيال او الفئات العمرية او الشلل التي يمكن ان نقسمها حسب التالي :
( جيل قرعم والتلفزيون ابيض واسود )
عماد الشفيع ، الباقر احمد العباس ، محمد احمد العباس ، قدورة ، صلاح الشيخ سلمان ، ميرغني الزبيدي ، جمال السر ، المرحوم صلاح السر ، معتصم يوسف العوض ، فيصل ساتي ، معتصم ساتي ، عبد المنعم شبو ، بابكر بانقا ، ابوعبيده حسن الطيب ، عماد يوسف ، ، بدر الدين حسن الطيب و جمال حسن الطيب ، عبد العزيز ابراهيم ( عزو ) ،،،،،،،، احمد محمد الخليفة ، صلاح محمد الخليفة ،،، ديل يا جماعة من استحضرتهم من جيل العمالقة 0
( جيل في النص مرفوض من قبل جيل العمالقة لكنه يميل للجيل اللاحق)
عادل الشيخ سلمان ، ياسر السر حسن نصر الله ، حيدر الامين ، طارق الشيخ ، محمد ساتي ، المرحوم ياسر الشفيع ، قاسم الزاكي ، عادل النور ، المرحوم عبد الحميد كمبال ، جلال قرشي ، بكري محمد الخليفة الخ 0000 ( واحتمال بعضهم لم يلتقي الا لفترات قليلة بسبب التنقل بين النقاط والمراكز )
( جيل النقر وسيماوي ) ،
معاوية الشيخ ، معاوية الشفيع ، ، حسين شبو ، محمد مالك ، عوض يوسف العوض ، محمد سعيد ازيرق ، رمضان داني ، عمر محمد الخليفة 0الخ

( جيل حمد والديبا هنالك فرق ثلاثة الى اربعة سنوات في هذا الجيل )
عبدالحكيم جعفر كمبال ، عزالدين قرشي ، النور قرشي ، محمد عبدالله ( سميرة) ، فاروق الامين ، خالد محمد الخليفة ، بدر الدين ساتي ، مصطفى مالك ، محمد عبدالله الحلاوي ، ياسر محمد احمد ، عبد البديع محمد احمد ، صلاح محمد ( الشايقي ) ، محمد خضر ، حسين سعيد ازيرق ، علي إبراهيم محمد احمد ، كمال عباس حربيات ، ياسر ابو الروضة ، ابوعبيدة عباس حريبات ، وليد الزبيدي ، حامد الزبيدي ، خالد الشيخ سلمان ، خالد السر ، فائز الماحي ، فوزي الماحي ، عبدالله بله ، ضياء الدين عمسيب ، مجدي ابو شنب ، عادل كريمة ، الخ


ميرغني الزبيدي لمن يعرفه لديه ذاكرة حاضرة جدا وعلى المستوى العائلي نستعين به نحن اخوانه الصغار في تذكر أسماء بعض اقربائنا اضافة لمعرفة صلة قربتنا بهم ( يعني الراجل خماكم بالواضح ) ، وبكره كان قال ليكم صلاح ادريس كان ساكن مع والدنا المرحوم الشيخ سلمان حا توافقوه اولا لذاكرته الحاضرة والشيء الثاني لانه ينتمى الى الاسر التي عاصرت عدد من سكان الاشلاق 0

هيثم الشفيع اظنك تنتمي الى جيل ( نميري احمد سعيد ) لكن المرحومة بلقيس علي الشفيع وإنصاف علي الشفيع كانوا معانا في الروضة وكانت بتدرسنا ( ماما ) عواطف وراق وماما سكينة ،،،، اما اصحابنا الكوامر ديل يمكن يكونوا سمعوا بالروضة من أولادهم 0

معاوية الشفيع ،،، يا اخوي شايفك بتنطط ساكت في البوست ده ،،، وين (رفايجك ) ،،،، انتا العيدان ( جمع عود وهي الكبير بالدارجية الخليجية ) ديل ما بتقدر تجاري قصصهم 0

العود عمدة ،،، يا أخي بتذكر بعد ما سكنتو الخرطوم كنتا جاي لي عرس في الاشلاق وشايل ليك شنطة كبيرة وماليها فلين ( وجوة الشنطة كان في قميص وبنطلون بس ) ،،،، وبعدين يا اخي ما حكيت لينا ضمن ذكريات المايقوما حكاية الحرامي الزنقك في الزقاق 0


العود معتصم يوسف العوض ،،، اولا اشكرك جزيل الشكر على الاتصال واتمني ان نتواصل خصوصا بينا فقط ثلاثة ساعات بالسيارة ويا اخي ساعدوا ميرغني الذبيدي ده شوية ،،، قصة حرامية الاشلاق ،،، وقصص الدافوري الخ ، وبعدين حكاية رعية البقر دي جبتها من وين ،، الظاهر بتشوف افلام غرب كثيرة 0


يا ميرغني ما كملتا قصة التمرين الشايل فيهو محمد ساتي الدقيق بالعجلة المنفسة 0

حامد الزبيدي منور والله

ياخوي أنا ماااااااااااااصغير ....لكن في الروضة قرتني ماما دولة "الله يرحما"

يعني فرقتنا بسييييييييتة وما لدرجة نميري أحمد سعيد ود أول أمس دة{طبعاً كتشجيع لكن في العمر بنكون دفعة}

مع الود

يالله يا جماعة والله كلامكم ده حلو وجميل كلو واحد يدلى بدلوه وبزكرياته اما انا فتطرقت لموضوع الحرامى فى الصفحات الاولى لاشلاق دوت كوم

تصحيح لحامد..المرحوم عبدالحميد..وحيدر الامين(جنكل) من جيلنا نحن..لكن لانو فى فترة مرغنى اخوك صاحب الاولاد الصغار اختلطت عليك الاجيال.

الي معاويه / هسه الجاب سيرة المرحوم عبد الحميد كمبال وجنكل معاي منو؟؟؟ الزول دا قال هم في جيل وانا في جيل ,,, كان عندك كلام عايز تقولوا ,, قولوا عديل,,, لك الود.

اخواني ،،

يا جماعة انا قلتا من الاول الزول ده ما بتقدروا عليهو وجراكم الى مصيدة تذكر اسر الاشلاق ومافي زول فيكم قدر يتذكر اي اسرة ،،، وانا يا غرق يا جيت حازمة ،،، يا ميرغني بتتذكر خيراوي ومن هم افراد اسرته وكمساعدة خيراوي كان ساكن جارنا وجار والدنا المرحوم أحمد العباس 0

ولي مع هذه الأسرة قصة شهيرة أنني كنت أذهب مع من يذهب لمنزلهم لأنهم كانوا من أوائل الأسر التي أدخلت التلفزيون ....وتلفزيونهم بعد جديد ذهبنا إليهم ولا حظت وأنا أتفرج على التلفزيون أن خيراوي وخيراوية يتحدثان ويضحكان ، ولما عدت للمنزل أخبرت والدتي
-يرحمها الله - قائلاً:

خيراوية فرحاااااااااااااانة بي راجلا

ولما أخبرتها أمي بذلك قالت: شديتو فوق النبي يايمة شاف فرحتي وين!!؟؟

يامرغنى ديل كانوا متين انا والله ما متذكرهم اظن بعد ما طلعنا من الاشلاق او قبل ما نجى ؟

انت زعلت يا دكتور؟؟أنا ماصححت لأنو حامد قال الجماعة ديل جيلك..لكن وضعهم فى جيل تانى ..وفتشت ليهو عن عذر لإختلاط الأجيال فى ذاكرتو.فلم أجد غير ما ذكرت...فان أصبنا فالحمد لله وان أخطأنا فما تزعلوا...

اخي هيثم تعرف اول اسرة امتلكت تلفزيون كانت اسرة منو !!!!!!! وبالمناسبة السؤال ده مطروح على الجميع